Yoꞌoꞌ kaꞌán Isaías ña̱ sa̱kakú Ndiosí ne̱ yivi̱ꞌ i̱i̱n yivi̱ꞌ
33
Ndaꞌvi va̱ ku̱ndo̱ꞌo̱ ndoꞌó,
te̱ sanduxín ñu̱u̱,
te̱ köo̱ꞌ sanduxín ñu̱u̱ mi̱iꞌ ndo̱ꞌ.
Te̱ tiinꞌ sikiꞌ ndo̱ꞌ i̱nga̱ ne̱ yivi̱ꞌ,
te̱ köo̱ꞌ tiinꞌ sikiꞌ mi̱iꞌ ndo̱ꞌ.
Kii̱ꞌ ndi̱ꞌi̱ ka̱ꞌni̱ꞌ ndo̱ꞌ ne̱ yivi̱ꞌ ndii,
ka̱ꞌni̱ꞌ tu̱ ne̱ yivi̱ꞌ mi̱iꞌ ndo̱ꞌ,
te̱ kii̱ꞌ ndi̱ꞌi̱ ti̱i̱n sikiꞌ ndo̱ꞌ ne̱ yivi̱ꞌ ndii,
ti̱i̱n sikiꞌ tu̱ ne̱ yivi̱ꞌ mi̱iꞌ ndo̱ꞌ.
2 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱vi̱ta i̱ni̱ u̱nꞌ xaꞌa̱ꞌ ndu̱.
I̱ni̱ ndu̱ xini ndu̱ yoꞌó,
sa̱a̱ tu̱ u̱nꞌ ña̱ va̱ꞌa̱ ko̱to̱ u̱nꞌ ndu̱ xiinꞌ ña̱ ndi̱e̱eꞌ u̱nꞌ sa̱a̱ ni̱a̱ꞌa̱,
te̱ sa̱kakú tu̱ u̱nꞌ ndu̱ kii̱ꞌ yoo ña̱ sandiꞌni̱ nimá ndu̱.
3 Kii̱ꞌ ku̱ni̱ so̱ꞌo̱ sa̱kuuꞌ ne̱ yivi̱ꞌ ña̱ niꞌi̱ tatyi̱ꞌ yu̱ꞌuꞌ u̱nꞌ ndii,
ku̱nu̱ ndoo̱ ni̱a̱,
te̱ sa̱kanꞌ tu̱ ne̱ tukuꞌ,
kii̱ꞌ ku̱ni̱ ni̱a̱ nu̱ta̱ u̱nꞌ nuu̱ꞌ tei̱ kaꞌnuꞌ miiꞌ nduꞌu̱ꞌ u̱nꞌ ndii,
kiku̱ ndo̱o̱ ni̱a̱.
4 Te̱ ña̱ vikaꞌ ni̱a̱ ndii,
na̱tyiꞌi̱ꞌ ndo̱o̱ ña̱ꞌaꞌ te̱ ndasiꞌ taꞌanꞌ xiinꞌ ni̱a̱ nde̱e̱ naa xaaꞌ ti̱ndaa̱ꞌ kii̱ꞌ xaxi̱ꞌ riꞌ ña̱ saviꞌ,
te̱ koyo̱ ndo̱so̱ꞌ ra̱ siki̱ꞌ sa̱kuuꞌ ni̱a̱ nde̱e̱ naa xaaꞌ ti̱ka̱ koyó ma̱to vi̱ꞌ riꞌ xata̱ꞌ kuꞌu̱ xaxi̱ꞌ riꞌ kii̱ꞌ kuaꞌa̱ꞌ xa̱va̱ꞌa̱ riꞌ.
5 Kaꞌnuꞌ va̱ Yahvé ña̱ nduꞌu̱ꞌ ndi̱e̱nu̱,
sa̱kanꞌ ña̱ su̱vi̱ a̱ nduuꞌ ña̱ xaaꞌ sa̱kanꞌ te̱ xatyuunꞌ nda̱ku ne̱ ndieeꞌ ñu̱u̱ Jerusalén,
te̱ i̱i̱n nda̱a̱ꞌ tu̱ nimá ni̱a̱ xiinꞌ taꞌanꞌ ni̱a̱.
6 Te̱ ña̱ ja̱a̱nꞌ ku̱ndu̱u̱ ña̱ ko̱to̱ ndoꞌó,
te̱ köo̱ꞌ a̱ ku̱ndo̱ꞌo̱ ndo̱ꞌ,
te̱ ta̱xi̱ a̱ kuaꞌa̱ꞌ ña̱ xini tuní,
xiinꞌ ña̱ ndityi,
xiinꞌ ña̱ sa̱kakú a̱ ndoꞌó.
Te̱ ña̱ ko̱to̱ kaꞌnuꞌ ndo̱ꞌ Yahvé ku̱ndu̱u̱ ña̱ ndiaa yaꞌviꞌ va̱ ña̱ ku̱miꞌ ndo̱ꞌ.
7 Ko̱to̱ ndo̱ꞌ,
sa̱a̱ vi̱ꞌ kuaaꞌ tiꞌeꞌ te̱ ndi̱e̱ni va̱ ñu̱u̱ ndo̱ꞌ,
te̱ ni̱ ti̱ꞌviꞌ ndo̱ꞌ kuaꞌa̱n na̱koo̱ ña̱ mani̱ xaꞌa̱ꞌ a̱ ña̱ köo̱ꞌ a̱ ni̱ ku̱vi̱ sa̱a̱ ra̱.
8 I̱tyiꞌ miiꞌ xikaꞌ ndo̱ꞌ ndii,
ni̱ nduxi̱n ndo̱o̱ a̱,
te̱ ni̱ na̱ndu̱u̱ a̱ nde̱e̱ naa miiꞌ i̱tyiꞌ kaaꞌ,
te̱ köo̱ꞌ xikaꞌ xa̱tyiꞌ ka̱ i̱tyiꞌ ja̱a̱nꞌ.
Te̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria ndii,
ni̱ xaꞌnu̱ ra̱ kuento ña̱ ni̱ ndoo̱ ra̱ ña̱ mani̱ꞌ xiinꞌ ndo̱ꞌ xtun,
te̱ ndïꞌni̱ ra̱ nde̱e̱ sieeꞌ vi̱ꞌ xaꞌa̱ꞌ kuento ña̱ ni̱ ta̱xi̱ ra̱ nuu̱ꞌ ndo̱ꞌ nuu̱ꞌ te̱ ndieeꞌ yu̱ꞌuꞌ xaꞌa̱ꞌ ña̱ ja̱a̱nꞌ.
Te̱ xïtoꞌ kaꞌnuꞌ tu̱ ra̱ nde̱e̱ i̱i̱n ne̱ yivi̱ꞌ.
9 Ñu̱ꞌuꞌ i̱i̱n yivi̱ꞌ ndii,
sutyiꞌ i̱ni̱ a̱,
te̱ ni̱ ku̱tama̱ tu̱ kuni a̱.
Te̱ xiki̱ꞌ Líbano ndii,
ni̱ ku̱ka̱ꞌa̱n va̱ nuu̱ꞌ a̱,
te̱ xa̱ ni̱ ityi̱ ndo̱o̱ a̱.
Te̱ yo̱soꞌ ña̱ naniꞌ Sarón ndii,
xa̱ ni̱ ndi̱ꞌi̱ a̱ ni̱ na̱ndu̱u̱ miiꞌ i̱tyi kaaꞌ,
i̱kuꞌ Basán xiinꞌ i̱kuꞌ Carmelo ndii,
xa̱ ni̱ ndi̱ꞌi̱ ndo̱o̱ i̱tunꞌ koꞌó itaꞌ nuu̱ꞌ a̱ ni̱ xa̱ꞌndi̱a̱ te̱ yivi̱ꞌ.
10 Te̱ kaꞌán Yahvé ndii:
“Vi̱ti̱n xa̱ꞌaꞌ yuꞌu̱ sa̱tyuunꞌ i̱,
vi̱ti̱n xa̱ꞌaꞌ i̱ niaꞌa̱ i̱ ña̱ ndi̱e̱eꞌ kooꞌ tyukuuꞌ i̱,
te̱ vi̱ti̱n tu̱ nduuꞌ a̱ ña̱ niaꞌa̱ i̱ ña̱ kaꞌnuꞌ i̱.
11 Ña̱ tyituní ndoꞌó sa̱a̱ ndo̱ꞌ ndii,
nduuꞌ a̱ nde̱e̱ naa mi̱ꞌiꞌ i̱tyi xiinꞌ i̱ti̱a̱ i̱tyi,
ndisu̱ tatyi̱ꞌ yu̱ꞌuꞌ i̱ ndii,
ka̱ꞌmi̱ a̱ sa̱kuuꞌ ña̱ ja̱a̱nꞌ nde̱e̱ naa xaaꞌ ñuꞌu̱ xaꞌmiꞌ a̱ mi̱ꞌiꞌ.
12 Te̱ ne̱ yivi̱ꞌ jaa̱nꞌ ndii,
ko̱ko̱ xa̱tyiꞌ ni̱a̱ nde̱e̱ na̱ndu̱u̱ ni̱a̱ yaa̱ꞌ,
te̱ ko̱ko̱ sa̱kuuꞌ ni̱a̱ nuu̱ꞌ ñuꞌu̱ nde̱e̱ naa tunꞌ i̱ñu̱ꞌ,
tunꞌ ni̱ xa̱ꞌndi̱a̱ te̱ yivi̱ꞌ.
13 Te̱ ndoꞌó,
ne̱ ndieeꞌ xikaꞌ i̱i̱n yivi̱ꞌ ndii,
ku̱ni̱ so̱ꞌo̱ ndo̱ꞌ ña̱ ni̱ xa̱a̱ i̱.
Te̱ ndoꞌó,
ne̱ ndieeꞌ ya̱ti̱n ndii,
na̱ku̱ni̱ ndo̱ꞌ ña̱ kooꞌ tyukuuꞌ i̱”,
katyi a̱.
14 Ne̱ xaaꞌ ku̱a̱tyi̱,
ne̱ ndieeꞌ ñu̱u̱ Jerusalén ndii,
kisiꞌ vi̱ꞌ ña̱ꞌaꞌ a̱ xaꞌa̱ꞌ a̱ ña̱ yiꞌvi xa̱va̱ꞌa̱ ni̱a̱.
Te̱ ne̱ ñuñuꞌ ndii,
katin vi̱ꞌ nimá ni̱a̱ xaꞌa̱ꞌ a̱ ña̱ yiꞌvi xa̱va̱ꞌa̱ ni̱a̱,
te̱ kaꞌán ni̱a̱ ndii:
“Köo̱ꞌ nde̱e̱ i̱i̱n yooꞌ ku̱ndi̱e̱ni ku̱naa̱ nuu̱ꞌ ñuꞌu̱ ña̱ xaꞌni̱ꞌ xa̱tyiꞌ ne̱ yivi̱ꞌ,
te̱ ni̱ nde̱e̱ köo̱ꞌ tu̱ ne̱ ku̱ndi̱e̱ni ku̱naa̱ nuu̱ꞌ ñuꞌu̱ ña̱ köo̱ꞌ kivi̱ꞌ ndaꞌva̱ nde̱e̱ ndiꞌiꞌ ni̱ kivi̱ꞌ”,
katyi ni̱a̱.
15 Ne̱ xatyuunꞌ nda̱ku,
te̱ mi̱iꞌ ndiꞌiꞌ tu̱ ña̱ nda̱ku kaꞌán ni̱a̱ xiinꞌ ne̱ xtäni̱ ki̱ꞌi̱n xu̱ꞌunꞌ nda̱ꞌaꞌ ne̱ yivi̱ꞌ te̱ ku̱vikaꞌ ni̱a̱,
te̱ ni̱ nde̱e̱ xtäni̱ tu̱ ni̱a̱ sa̱mani̱ꞌ ña̱ꞌaꞌ ne̱ yivi̱ꞌ ña̱ꞌa̱ te̱ tyi̱ndi̱e̱eꞌ ña̱ꞌaꞌ ni̱a̱,
xiinꞌ ne̱ xïinꞌ ki̱ꞌi̱n taꞌanꞌ xiinꞌ te̱ xaꞌni̱ꞌ ne̱ yivi̱ꞌ kii̱ꞌ xakaꞌ ña̱ꞌaꞌ ra̱,
xiinꞌ ne̱ ndasi nda̱ꞌaꞌ ndu̱tyiꞌ nuu̱ꞌ te̱ kö̱to̱ ni̱a̱ miiꞌ xaaꞌ ne̱ yivi̱ꞌ ña̱ ni̱a̱ꞌa,
16 ne̱ ja̱a̱nꞌ nduuꞌ ne̱ ku̱ndi̱e̱e̱ miiꞌ sukun,
te̱ vi̱ꞌe̱ miiꞌ ku̱ndi̱e̱e̱ ni̱a̱ kaku̱ ni̱a̱ ku̱ndu̱u̱ nde̱e̱ naa ka̱va̱ꞌ sukun va̱,
te̱ köo̱ꞌ kivi̱ꞌ ku̱ndo̱ꞌo̱ ni̱a̱ xaꞌa̱ꞌ ña̱ ka̱xi̱ꞌ ni̱a̱,
te̱ köo̱ꞌ kivi̱ꞌ ndi̱ꞌi̱ tu̱ ti̱kui ko̱ꞌo̱ ni̱a̱.
17 Ku̱ni̱ ndu̱tyiꞌ nuu̱ꞌ ndoꞌó ña̱ nda̱tu̱nꞌ xa̱va̱ꞌa̱ rey,
te̱ ka̱ꞌndi̱a̱ tyuunꞌ,
te̱ kë̱ta̱ ndu̱tyiꞌ nuu̱ꞌ ndo̱ꞌ ko̱to̱ ndo̱ꞌ nde̱e̱ miiꞌ kuꞌu̱n ndi̱koꞌ ñu̱ꞌuꞌ ña̱ ku̱ndu̱u̱ ña̱ꞌa̱ ndo̱ꞌ.
18 Te̱ kii̱ꞌ na̱ka̱ꞌanꞌ ndo̱ꞌ xaꞌa̱ꞌ ña̱ ni̱ yi̱ꞌvi xa̱va̱ꞌa̱ ndo̱ꞌ xta̱ꞌanꞌ,
te̱ kaꞌa̱n ndo̱ꞌ xiinꞌ nimá ndo̱ꞌ ndii:
“¿Miiꞌ kuaꞌa̱n tu̱ te̱ natisoꞌ?
¿Miiꞌ kuaꞌa̱n tu̱ kendiaa̱ꞌ yaꞌviꞌ xu̱ꞌunꞌ yoo̱ꞌ?
¿Miiꞌ kuaꞌa̱n tu̱ te̱ kaꞌviꞌ vi̱ꞌe̱ sukun miiꞌ itaꞌ te̱ xíinꞌ,
te̱ xitoꞌ ñu̱u̱?”,
katyi̱ ndo̱ꞌ.
19 Köo̱ꞌ kivi̱ꞌ ku̱ni̱ ka̱ ndo̱ꞌ nuu̱ꞌ nde̱e̱ i̱i̱n te̱ yivi̱ꞌ,
te̱ ñuñuꞌ,
te̱ vixi va̱ tu̱ꞌu̱n ndatuꞌunꞌ,
te̱ tiati̱a̱ tu̱ ra̱,
te̱ nde̱e̱ i̱i̱n ne̱ yivi̱ꞌ kü̱vi̱ ku̱nda̱ni̱ ña̱ kaꞌán ra̱.
20 Ko̱to̱ ndo̱ꞌ miiꞌ kanduꞌu̱ꞌ ñu̱u̱ Jerusalén,
ñu̱u̱ Sión,
miiꞌ xaꞌa e̱ꞌ vi̱koꞌ kaꞌnuꞌ kii̱ꞌ xakaꞌnuꞌ e̱ꞌ Ndiosí,
ñu̱u̱ miiꞌ köo̱ꞌ xa̱tyiꞌ ña̱ ni̱a̱ꞌa yooꞌ.
Te̱ nduuꞌ a̱ nde̱e̱ naa i̱i̱n vi̱ꞌe̱ toto̱ ña̱ iinꞌ kutu̱ꞌ xa̱va̱ꞌa̱,
te̱ kutu̱ꞌ xa̱va̱ꞌa̱ tu̱ itaꞌ ndu̱yu̱ a̱,
te̱ ni̱ꞌi̱ va̱ tu̱ tiín yo̱ꞌoꞌ a̱.
21 Ñu̱u̱ kaa̱ꞌ nduuꞌ miiꞌ niaꞌa̱ Yahvé ña̱ ndi̱e̱eꞌ a̱ nuu̱ꞌ e̱ꞌ,
te̱ ku̱ndu̱u̱ a̱ nde̱e̱ naa i̱i̱n i̱ti̱a̱ ndiká xa̱va̱ꞌa̱,
ndisu̱ köo̱ꞌ nde̱e̱ i̱i̱n te̱ ndasiꞌ taꞌanꞌ xiinꞌ e̱ꞌ ku̱vi̱ xkaꞌndi̱a̱ xiinꞌ tunꞌ ndo̱oꞌ ra̱,
tunꞌ xita̱ꞌ xiinꞌ nda̱ꞌaꞌ ra̱ ti̱kui.
22 Yahvé nduuꞌ kuesí nuu̱ꞌ yooꞌ.
Yahvé nduuꞌ ña̱ kaꞌán nde̱iꞌ nuu̱ꞌ e̱ꞌ.
Yahvé nduuꞌ rey ña̱ xaꞌndia tyuunꞌ nuu̱ꞌ e̱ꞌ,
te̱ mi̱iꞌ a̱ sa̱kakú yooꞌ.
23 Tee̱ꞌ ndee xa̱ ni̱ na̱ta̱ya̱ ndo̱o̱ yo̱ꞌoꞌ ña̱ tiín tunꞌ ndo̱oꞌ ndo̱ꞌ,
te̱ kuäsa̱ꞌ ka̱ tu̱ itaꞌ kutu̱ꞌ ndu̱yu̱ miiꞌ satiín ndo̱ꞌ yo̱ꞌoꞌ ja̱a̱nꞌ,
te̱ kuäsa̱ꞌ ka̱ tu̱ taꞌnuꞌ ni̱ꞌi̱ toto̱ ña̱ taꞌnuꞌ nuu̱ꞌ nu̱ꞌ ndii,
na̱ta̱ꞌviꞌ ndo̱ꞌ kuaꞌa̱ꞌ xa̱va̱ꞌa̱ ña̱ꞌa̱ ña̱ tu̱ꞌu̱n ndo̱ꞌ nda̱ꞌaꞌ te̱ ndasiꞌ taꞌanꞌ xiinꞌ ndo̱ꞌ,
te̱ nde̱e̱ te̱ kuiꞌe xaꞌa̱ꞌ na̱ka̱ya̱ ña̱ꞌa̱ ja̱a̱nꞌ.
24 Te̱ nde̱e̱ i̱i̱n ne̱ ndieeꞌ ñu̱u̱ Jerusalén käꞌa̱n ña̱ kuni ku̱vi̱ ni̱a̱,
sa̱kanꞌ ña̱ ko̱o̱ kaꞌnuꞌ i̱ni̱ Ndiosí xaꞌa̱ꞌ sa̱kuuꞌ ku̱a̱tyi̱ ni̱a̱.