Yoꞌoꞌ kaꞌán tiakú Isaías ña̱ ndaꞌvi va̱ ku̱ndo̱ꞌo̱ ne̱ vi̱ꞌe̱ Judá xaꞌa̱ꞌ a̱ ña̱ i̱ni̱ ni̱a̱ xini ni̱a̱ ne̱ ndieeꞌ nuu̱ꞌ ñu̱ꞌu̱ꞌ Egipto
31
Ndaꞌvi va̱ ku̱ndo̱ꞌo̱ ne̱ yivi̱ꞌ,
ne̱ kuaꞌa̱n na̱kaa̱ꞌ nuu̱ꞌ ñu̱ꞌuꞌ Egipto te̱ ndu̱kuꞌ ni̱a̱ ña̱ tyi̱ndi̱e̱eꞌ ña̱ꞌaꞌ te̱ xíinꞌ,
te̱ ndieeꞌ nuu̱ꞌ ñu̱ꞌuꞌ ja̱a̱nꞌ,
sa̱kanꞌ ña̱ i̱ni̱ ni̱a̱ xini ni̱a̱ kuei,
tiꞌ kumiꞌ te̱ xíinꞌ ja̱a̱nꞌ,
xiinꞌ carreta,
tunꞌ kumiꞌ ra̱,
xiinꞌ te̱ satuvi̱ꞌ carreta ja̱a̱nꞌ.
Te̱ i̱ni̱ tu̱ ni̱a̱ xini ni̱a̱ ña̱ ndi̱e̱eꞌ te̱ xíinꞌ,
te̱ yoo nuu̱ꞌ ñu̱ꞌuꞌ i̱i̱n yivi̱ꞌ,
te̱ nï̱ kuni̱ ni̱a̱ ndu̱kuꞌ ni̱a̱ ña̱ tyi̱ndi̱e̱eꞌ ña̱ꞌaꞌ Yahvé,
ña̱ su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel.
2 Ndisu̱ Ndiosí ndii,
ña̱ xini tuní yaꞌa̱ nduuꞌ tu̱ ña̱ ja̱a̱nꞌ,
sa̱kanꞌ na kuiiꞌ ti̱ꞌviꞌ a̱ kuiꞌe̱ xatu̱ va̱ ku̱ndo̱ꞌo̱ ne̱ yivi̱ꞌ,
te̱ sa̱xinu̱ xna̱ꞌa̱ a̱ ña̱ ni̱ kaꞌa̱n a̱ sa̱a̱ xiinꞌ ne̱ xaaꞌ ña̱ ni̱a̱ꞌa.
Xaꞌa̱ꞌ a̱ ja̱a̱nꞌ na kuiiꞌ na̱ko̱to̱ꞌni̱ a̱ nuu̱ꞌ sa̱kuuꞌ ne̱ xaaꞌ ni̱a̱ꞌa ja̱a̱nꞌ,
te̱ na̱ko̱to̱ꞌni̱ tu̱ a̱ nuu̱ꞌ sa̱kuuꞌ ne̱ tyindieeꞌ ña̱ꞌaꞌ.
3 Ne̱ ndieeꞌ nuu̱ꞌ ñu̱ꞌuꞌ Egipto ndii,
ne̱ yivi̱ꞌ ku̱i̱ti̱ꞌ nduuꞌ ni̱a̱,
te̱ süu̱ꞌ ndiosí nduuꞌ ni̱a̱.
Kuei sana̱ ni̱a̱ ndii,
ki̱tiꞌ,
tiꞌ yoo nde̱i̱ꞌ xiinꞌ i̱kiꞌ ku̱i̱ti̱ꞌ,
nduuꞌ riꞌ,
te̱ süu̱ꞌ espíritu nduuꞌ riꞌ.
Te̱ kii̱ꞌ ndo̱ni̱ꞌi̱ nda̱ꞌaꞌ Yahvé te̱ ku̱ntaꞌanꞌ a̱ xiinꞌ te̱ xíinꞌ ja̱a̱nꞌ ndii,
sa̱kuuꞌ te̱ tyindieeꞌ taꞌanꞌ xiinꞌ ne̱ ja̱a̱nꞌ xaa̱ ñu̱ꞌuꞌ,
te̱ ku̱vi̱ sa̱kuuꞌ ni̱a̱.
4 Ni̱ kaꞌa̱n Yahvé xiinꞌ i̱ ndii:
“Nde̱e̱ naa xaaꞌ i̱i̱n lion kii̱ꞌ xiña riꞌ uun nde̱e̱ naa xaaꞌ i̱i̱n lion siee kii̱ꞌ xiña riꞌ xaꞌa̱ꞌ i̱i̱n mbe̱e̱,
tiꞌ ni̱ xa̱ꞌni̱ꞌ riꞌ ka̱xi̱ꞌ riꞌ ndii,
kuäsa̱ꞌ yiꞌvi riꞌ tee̱ꞌ ndee kuaꞌa̱ꞌ va̱ te̱ pa̱xto ni̱ na̱kaya̱ kuaaꞌ ra̱.
Te̱ sa̱kanꞌ tu̱ sa̱a̱ yuꞌu̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
kii̱ꞌ nu̱u̱ i̱ ñu̱u̱ Jerusalén te̱ ku̱ntaꞌanꞌ i̱ xiinꞌ ne̱ xaaꞌ ña̱ ni̱a̱ꞌa ja̱a̱nꞌ.
5 Nde̱e̱ naa xaaꞌ sa̱a̱ taꞌnuꞌ riꞌ taxiꞌ tivi̱ riꞌ xata̱ꞌ tyoꞌo̱ riꞌ ndii,
niiꞌ sa̱kanꞌ tu̱ xaaꞌ yuꞌu̱,
Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
te̱ xitoꞌ i̱ ne̱ ndieeꞌ ñu̱u̱ Jerusalén,
te̱ tyindieeꞌ tu̱ ña̱ꞌaꞌ i̱,
te̱ sakakú tu̱ ña̱ꞌaꞌ i̱,
te̱ nakaꞌán tu̱ i̱ xaꞌa̱ꞌ ni̱a̱,
te̱ sandoó ndiká tu̱ ña̱ꞌaꞌ i̱”,
katyi a̱.
6 Ndoꞌó,
ne̱ vi̱ꞌe̱ Israel,
na̱ndi̱koꞌ ndo̱ꞌ nuu̱ꞌ Ndiosí ña̱ xa̱ ni̱ xa̱teiꞌ xa̱va̱ꞌa̱ ndo̱ꞌ nuu̱ꞌ sa̱aꞌ.
7 Sa̱kanꞌ ña̱ kii̱ꞌ xaa̱ kivi̱ꞌ ña̱ sa̱ndoꞌoꞌ a̱ ndoꞌó ndii,
ka̱ti̱a̱ ndo̱ꞌ sa̱kuuꞌ ndiosí saka ña̱ ni̱ ku̱a̱ꞌa̱ xiinꞌ oro xiinꞌ plata,
ña̱ ni̱ xa̱ꞌa̱ mi̱iꞌ ndo̱ꞌ xiinꞌ nda̱ꞌaꞌ ndo̱ꞌ xakaꞌnuꞌ ndo̱ꞌ.
8 “Kivi̱ꞌ ja̱a̱nꞌ ndii,
ku̱vi̱ ne̱ ndieeꞌ nuu̱ꞌ ñu̱ꞌuꞌ Asiria xiinꞌ ityi̱,
ndisu̱ süu̱ꞌ te̱ yivi̱ꞌ ka̱ꞌni̱ꞌ ña̱ꞌaꞌ.
Süu̱ꞌ ja̱a̱nꞌ ndii,
mi̱iꞌ Ndiosí ka̱ꞌni̱ꞌ ña̱ꞌaꞌ xiinꞌ ityi̱ a̱,
te̱ ku̱yi̱ꞌvi xa̱va̱ꞌa̱ sa̱kuuꞌ ni̱a̱,
te̱ ku̱nu̱ ndo̱o̱ ni̱a̱.
Te̱ sa̱va̱,
te̱ ndi̱e̱eꞌ va̱ ndieeꞌ nuu̱ꞌ ñu̱ꞌuꞌ ja̱a̱nꞌ ndii,
na̱ti̱i̱n ña̱ꞌaꞌ te̱ xíinꞌ te̱ kuꞌu̱n ku̱ndu̱u̱ ra̱ te̱ ka̱ka̱ nu̱u̱ so̱ꞌo̱ nuu̱ꞌ ne̱ ndieeꞌ tu̱ku̱ ñu̱ꞌuꞌ.
9 Te̱ xaꞌa̱ꞌ a̱ ña̱ yiꞌvi va̱ rey,
te̱ xaꞌndia tyuunꞌ ñu̱u̱ ndo̱ꞌ ndii,
ku̱nu̱ niꞌvi ra̱,
te̱ te̱ xíinꞌ kuuꞌ nu̱uꞌ nuu̱ꞌ ndo̱ꞌ ndii,
ti̱i̱n ra̱ bandera sa̱kanaꞌ ra̱ te̱ ku̱nu̱ ra̱ xaꞌa̱ꞌ a̱ ña̱ yiꞌvi ra̱.”
Ña̱ kaa̱ꞌ nduuꞌ ña̱ kaꞌán Yahvé,
te̱ ñu̱u̱ Sión iinꞌ miiꞌ ndatin ñuꞌu̱ xaaꞌ a̱,
saka̱nꞌ ña̱ ñu̱u̱ Jerusalén iinꞌ miiꞌ naꞌmiꞌ a̱ ñuꞌu̱,
te̱ i̱kanꞌ sa̱ndoꞌoꞌ a̱ sa̱kuuꞌ te̱ ndasiꞌ taꞌanꞌ xiinꞌ a̱.