Yoꞌoꞌ kaꞌán Isaías ña̱ va̱ꞌa̱ ka̱ Ndiosí i̱ni̱ ne̱ vi̱ꞌe̱ Israel ku̱ni̱ ni̱a̱ te̱ sa̱kanꞌ ña̱ i̱ni̱ ni̱a̱ xini ni̱a̱ ne̱ ndieeꞌ ñu̱u̱ Egipto
30
1fKaꞌán Yahvé ndii:
“Ndaꞌvi va̱ ku̱ndo̱ꞌo̱ siꞌe̱ i̱,
ne̱ so̱ꞌo̱ nuu̱ꞌ i̱,
ne̱ kuxiooꞌ te̱ tyituní mi̱iꞌ ni̱a̱ ña̱ sa̱a̱ ni̱a̱,
te̱ kïꞌinꞌ kuenta ni̱a̱ yuꞌu̱.
Te̱ ña̱ nakataꞌ ni̱a̱ kuento ni̱a̱ sa̱a̱ ni̱a̱ ja̱a̱nꞌ ndii,
süu̱ꞌ Espíritu yuꞌu̱ nduuꞌ ña̱ sa̱kaꞌán ña̱ꞌaꞌ,
te̱ kii̱ꞌ xaaꞌ ni̱a̱ sa̱kanꞌ ndii,
so̱ꞌo̱ kuuꞌ kuaꞌa̱ꞌ ka̱ ku̱a̱tyi̱ ni̱a̱.
2 Sa̱kanꞌ ña̱ kiꞌi̱ꞌ va̱ ni̱ na̱kaa̱ꞌ ni̱a̱ nuu̱ꞌ ñu̱ꞌuꞌ Egipto,
te̱ tyi̱ndi̱e̱eꞌ ña̱ꞌaꞌ te̱ ndieeꞌ i̱kanꞌ,
te̱ nï̱ kaꞌa̱n vi̱ꞌ ni̱a̱ xiinꞌ yuꞌu̱.
Süu̱ꞌ ja̱a̱nꞌ ndii,
ni̱ i̱ni̱ ka̱ ni̱a̱ ni̱ xi̱ni̱ ni̱a̱ faraón,
te̱ xaꞌndia tyuunꞌ nuu̱ꞌ ñu̱ꞌuꞌ Egipto ja̱a̱nꞌ,
ña̱ ko̱to̱ ña̱ꞌaꞌ te̱ ja̱a̱nꞌ,
te̱ ni̱ xika̱ ni̱a̱ ti̱si̱ꞌe xiinꞌ miiꞌ ni̱a̱ miiꞌ ku̱vi̱ ko̱to̱ ña̱ꞌaꞌ te̱ ja̱a̱nꞌ.
3 Ndisu̱ xaꞌa̱ꞌ a̱ ña̱ i̱ni̱ ni̱a̱ xini ni̱a̱ faraón ja̱a̱nꞌ ndii,
ku̱ka̱ꞌa̱n va̱ nuu̱ꞌ ni̱a̱ sa̱a̱ i̱,
te̱ xaꞌa̱ꞌ a̱ ña̱ ndiatuꞌ i̱ni̱ ni̱a̱ tyi̱ndi̱e̱eꞌ ña̱ꞌaꞌ te̱ ja̱a̱nꞌ ndii,
sa̱ndi̱e̱e̱ kuiꞌe i̱ sa̱kuuꞌ ni̱a̱.
4 Sa̱kanꞌ ña̱ tee̱ꞌ ndee ni̱ ti̱ꞌviꞌ ni̱a̱ te̱ kuuꞌ nu̱uꞌ nuu̱ꞌ ni̱a̱ nde̱e̱ ñu̱u̱ Zoán,
te̱ nde̱e̱ ñu̱u̱ Hanes ni̱ ti̱ꞌviꞌ ni̱a̱ te̱ kuaꞌa̱n xiinꞌ kuento ndii,
5 sa̱kuuꞌ te̱ ja̱a̱nꞌ ku̱ka̱ꞌa̱n nuu̱ꞌ sa̱a̱ ne̱ ndieeꞌ ñu̱u̱ ja̱a̱nꞌ xaꞌa̱ꞌ a̱ ña̱ kuäsa̱ꞌ kuní xa̱tyiꞌ ne̱ ndieeꞌ ñu̱u̱ ja̱a̱nꞌ,
te̱ tyï̱ndi̱e̱eꞌ xa̱tyiꞌ tu̱ ña̱ꞌaꞌ ni̱a̱ nde̱e̱ siee,
ni̱ nde̱e̱ köo̱ꞌ tu̱ ña̱ va̱ꞌa̱ ku̱vi̱ sa̱a̱ ne̱ ja̱a̱nꞌ xaꞌa̱ꞌ ra̱.
Süu̱ꞌ ja̱a̱nꞌ ndii,
sa̱kaꞌanꞌ ku̱i̱ti̱ꞌ ña̱ꞌaꞌ ni̱a̱,
te̱ sa̱ndoꞌoꞌ va̱ tu̱ ña̱ꞌaꞌ ni̱a̱”,
katyi a̱.
6 Ña̱ yo̱ꞌo̱ꞌ nduuꞌ ña̱ ni̱ kaꞌa̱n Ndiosí xiinꞌ i̱ ku̱ndo̱ꞌo̱ sa̱kuuꞌ ki̱tiꞌ i̱kuꞌ,
tiꞌ yooꞌ nuu̱ꞌ ñu̱ꞌuꞌ miiꞌ i̱tyiꞌ kaaꞌ miiꞌ naniꞌ Neguev,
kaꞌán a̱ ndii:
“Kuaꞌa̱ꞌ va̱ ne̱ vi̱ꞌe̱ Israel kuaꞌa̱n xiinꞌ mburru xiinꞌ camello,
te̱ ndisoꞌ riꞌ kuaꞌa̱ꞌ va̱ ña̱ vikaꞌ ni̱a̱,
kuaꞌa̱n ni̱a̱ te̱ tya̱ꞌvi̱ ni̱a̱ ne̱ ndieeꞌ nuu̱ꞌ ñu̱ꞌuꞌ Egipto ña̱ ta̱xi̱ ni̱a̱ nda̱ꞌaꞌ ne̱ ja̱a̱nꞌ te̱ ko̱to̱ ña̱ꞌaꞌ ne̱ ja̱a̱nꞌ.
Te̱ miiꞌ xkaꞌndíá ni̱a̱ kuaꞌa̱n ni̱a̱ ndii,
nuu̱ꞌ ñu̱ꞌuꞌ miiꞌ i̱tyi kaaꞌ miiꞌ yooꞌ kuaꞌa̱ꞌ va̱ nuu̱ꞌ tiꞌ kuiꞌe̱ nduuꞌ a̱,
naa kuuꞌ lion tiata̱nꞌ,
xiinꞌ lion tyiee̱,
xiinꞌ koo̱ꞌ ka̱a̱,
xiinꞌ koo̱ꞌ xatu̱ va̱.
Tee̱ꞌ ndee kuaꞌa̱ꞌ va̱ ña̱ vikaꞌ ja̱a̱nꞌ kuaꞌa̱n sa̱mani̱ꞌ ni̱a̱ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ ndii,
nde̱e̱ siee kü̱vi̱ xa̱tyiꞌ tyi̱ndi̱e̱eꞌ ña̱ꞌaꞌ ne̱ ja̱a̱nꞌ,
sa̱kanꞌ ña̱ ne̱ ndieeꞌ ja̱a̱nꞌ ndii kuäsa̱ꞌ kuní xa̱tyiꞌ ni̱a̱.
7 Ne̱ ndieeꞌ nuu̱ꞌ ñu̱ꞌuꞌ Egipto ndii,
vä̱ꞌa̱ xa̱tyiꞌ ni̱a̱,
te̱ kuäsa̱ꞌ kuní xa̱tyiꞌ tu̱ ña̱ tyindieeꞌ ni̱a̱.
Sa̱kanꞌ na kuiiꞌ ni̱ tyi̱nduꞌu̱ꞌ i̱ kivi̱ꞌ ni̱a̱ naniꞌ ni̱a̱ Rahab,
te̱ ña̱ ja̱a̱nꞌ kuni katyi̱ ndii,
ki̱tiꞌ,
tiꞌ kuiꞌe̱ va̱,
tiꞌ xa̱ ni̱ ku̱maso ni̱ xa̱a̱ ne̱ yivi̱ꞌ,
kuni katyi̱ a̱.”
8 Te̱ ni̱ kaꞌa̱n ka̱ Ndiosí xiinꞌ i̱ ndii:
“Kuaꞌan miiꞌ ndieeꞌ ne̱ ja̱a̱nꞌ,
te̱ ke̱ꞌi̱ u̱nꞌ xata̱ꞌ i̱i̱n vitu̱ꞌ ña̱ ni̱ satuví i̱ nuu̱ꞌ u̱nꞌ vi̱ti̱n,
te̱ ka̱ꞌvi̱ ne̱ yivi̱ꞌ a̱,
te̱ ke̱ꞌi̱ tu̱ u̱nꞌ nuu̱ꞌ i̱i̱n tu̱tu̱ ña̱ iinꞌ tuvíꞌ,
sa̱kanꞌ te̱ ndoo̱ a̱ te̱ saniaꞌá a̱ xaꞌa̱ꞌ i̱ nuu̱ꞌ ne̱ yivi̱ꞌ nuu̱ꞌ kuꞌu̱n e̱ꞌ.
9 Sa̱kanꞌ ña̱ sa̱kuuꞌ ne̱ yivi̱ꞌ kaa̱ꞌ ndii,
so̱ꞌo̱ va̱ ni̱a̱,
te̱ ne̱ sikiꞌ va̱ tu̱ nduuꞌ ni̱a̱,
te̱ küni ka̱ndi̱xaꞌ ni̱a̱ tu̱ꞌu̱n nde̱iꞌ Yahvé.
10 Kaꞌán ni̱a̱ xiinꞌ te̱ tava̱ꞌ ndiatu̱ ndii:
Na sä̱tuví ka̱ a̱ nuu̱ꞌ ndo̱ꞌ,
katyi ni̱a̱.
Te̱ xiinꞌ te̱ kaꞌán tiakú tu̱ꞌu̱n Ndiosí kaꞌán ni̱a̱ ndii:
Käꞌa̱n ndo̱ꞌ xiinꞌ ndu̱ ña̱ ndi̱xa̱ ña̱ satuví Ndiosí nuu̱ꞌ ndo̱ꞌ,
süu̱ꞌ ja̱a̱nꞌ ndii,
va̱ꞌa̱ ka̱ ña̱ xtani̱ mi̱iꞌ ndu̱ ku̱ni̱ so̱ꞌo̱ ndu̱,
xiinꞌ tu̱n vixi̱ ku̱i̱ti̱ꞌ kaꞌa̱n tiakú ndo̱ꞌ nuu̱ꞌ ndu̱.
11 Kuaꞌan ndi̱a̱ꞌa̱ ndo̱ꞌ nuu̱ꞌ ndu̱,
te̱ tiäsi ndo̱ꞌ i̱tyiꞌ nuu̱ꞌ ndu̱ꞌ miiꞌ kuaꞌa̱n ndu̱,
te̱ kuaꞌan ki̱e̱e̱ tu̱ ndoꞌó nuu̱ꞌ i̱tyiꞌ nda̱ku ja̱a̱nꞌ,
te̱ käꞌa̱n ka̱ ndo̱ꞌ xiinꞌ ndu̱ xaꞌa̱ꞌ Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel,
katyi ni̱a̱”,
katyi a̱.
12 Xaꞌa̱ꞌ a̱ ja̱a̱nꞌ na kuiiꞌ kaꞌán Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel ndii:
“Ndoꞌó ndii,
xïinꞌ ndo̱ꞌ ka̱ndi̱xaꞌ ndo̱ꞌ kuento ña̱ ni̱ kaꞌa̱n i̱ xiinꞌ ndo̱ꞌ,
te̱ ni̱ i̱ni̱ ka̱ ndo̱ꞌ ni̱ xi̱ni̱ ndo̱ꞌ ña̱ sandoꞌoꞌ ndo̱ꞌ ne̱ yivi̱ꞌ,
xiinꞌ ña̱ mi̱iꞌ kuuꞌ ndo̱ꞌ xiinꞌ ni̱a̱,
xiinꞌ ña̱ ni̱a̱ꞌa ña̱ xaaꞌ ndo̱ꞌ,
te̱ ña̱ ja̱a̱nꞌ ku̱i̱ti̱ꞌ nduuꞌ kuei̱ ndo̱ꞌ.
13 Sa̱kanꞌ na kuiiꞌ ku̱a̱tyi̱ ndo̱ꞌ ja̱a̱nꞌ sa̱a̱ sa̱kanꞌ te̱ i̱i̱n koyo̱ ku̱i̱ti̱ꞌ kuiꞌe̱ xatu̱ ku̱ndo̱ꞌo̱ ndo̱ꞌ nde̱e̱ naa xaaꞌ i̱i̱n nama̱ ña̱ xa̱ ni̱ ndata̱ꞌ ndo̱o̱,
te̱ xa̱ kuni ndu̱va̱ kuii a̱,
i̱i̱n tu̱n kiꞌi̱ꞌ va̱ te̱ ndu̱va̱ ndo̱o̱ a̱.
14 Te̱ xaꞌa̱ꞌ ña̱ ni̱a̱ꞌa ña̱ xaaꞌ ndo̱ꞌ ja̱a̱nꞌ ndii,
ndo̱ñuꞌuꞌ xa̱tyiꞌ ndo̱ꞌ nde̱e̱ naa xaaꞌ i̱i̱n ki̱si̱ ñu̱ꞌuꞌ kii̱ꞌ sakuatyiꞌ xiꞌe̱ xa̱tyiꞌ ne̱ yivi̱ꞌ a̱,
te̱ nde̱e̱ i̱i̱n tuꞌu̱nꞌ a̱ vä̱ꞌa̱ xa̱tyiꞌ ka̱ te̱ ta̱va̱ꞌ ne̱ yivi̱ꞌ ñuꞌu̱ ti̱kei̱ xiinꞌ a̱,
uun te̱ ti̱i̱n ne̱ yivi̱ꞌ a̱ te̱ ta̱va̱ꞌ ni̱a̱ siee ti̱kui xiinꞌ a̱ ti̱xi̱n poso”,
katyi a̱.
15 Sa̱kanꞌ na kuiiꞌ ña̱ yo̱ꞌo̱ꞌ kaꞌán Tákuiꞌe Yahvé,
ña̱ su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel ndii:
“Naaꞌ kuni kaku̱ ndo̱ꞌ ndii,
nuu̱ꞌ yuꞌu̱ kuní a̱ na̱ndi̱koꞌ ndo̱ꞌ,
te̱ ku̱ndi̱e̱e̱ taxi̱nꞌ ndo̱ꞌ.
Taxi̱nꞌ ko̱o̱ ndo̱ꞌ,
te̱ i̱ni̱ ndo̱ꞌ ku̱ni̱ ndo̱ꞌ yuꞌu̱,
te̱ ta̱xi̱ i̱ ndi̱e̱e̱ꞌ ndo̱ꞌ.
Ndisu̱ ndoꞌó ndii,
nï̱ xiinꞌ xa̱tyiꞌ ndo̱ꞌ ku̱ni̱ so̱ꞌo̱ ndo̱ꞌ ña̱ ja̱a̱nꞌ.
16 Te̱ kaꞌán ndo̱ꞌ ndii:
Äa̱ꞌo,
va̱ꞌa̱ ka̱ xiinꞌ kuei ku̱nu̱ ndu̱,
katyi ndo̱ꞌ.
Va̱ꞌa̱ tu̱ sa̱kanꞌ,
xiinꞌ tiꞌ ja̱a̱nꞌ ku̱nu̱ ndo̱ꞌ.
Te̱ ni̱ kaꞌa̱n tu̱ ndo̱ꞌ ndii:
Ti̱xi̱n carreta,
tunꞌ ka̱ma̱ va̱,
ku̱ꞌu̱n ndu̱ te̱ ku̱nu̱ ndu̱,
ni̱ katyi̱ ndo̱ꞌ.
Va̱ꞌa̱ tu̱ sa̱kanꞌ,
ndisu̱ ka̱ma̱ ka̱ te̱ xíinꞌ,
te̱ ku̱ndiku̱n ta̱xiꞌ ndoꞌó te̱ sa̱kanꞌ ndoꞌó.
17 I̱i̱n mií vi̱ꞌ ndoꞌó ku̱nu̱ tee̱ꞌ ndee i̱i̱n nda̱a̱ꞌ ku̱i̱ti̱ꞌ te̱ xíinꞌ ja̱a̱nꞌ sa̱yi̱ꞌvi ndoꞌó,
te̱ ni̱a̱ni̱ uꞌu̱n taꞌan ku̱i̱ti̱ꞌ ra̱ sa̱yi̱ꞌvi ra̱ sa̱kuuꞌ ndo̱ꞌ,
te̱ ndee ndiaꞌviꞌ ku̱i̱ti̱ꞌ ndo̱ꞌ ndoo̱ nde̱e̱ naa i̱i̱n i̱tunꞌ kii̱ꞌ ndoó i̱i̱n nda̱a̱ꞌ soꞌoꞌ nu̱ꞌ xíniꞌ i̱kuꞌ miiꞌ sukun”,
ni̱ katyi̱ a̱.
Yoꞌoꞌ kaꞌán Isaías ña̱ ni̱ ta̱xi̱ Ndiosí kuento a̱ ña̱ ku̱vi̱ta i̱ni̱ a̱ xaꞌa̱ꞌ ne̱ ndieeꞌ ñu̱u̱ Jerusalén
18 Xaꞌa̱ꞌ ja̱a̱nꞌ na kuiiꞌ ndiatuꞌ Yahvé,
te̱ ku̱vi̱ta i̱ni̱ a̱ xaꞌa̱ꞌ ndo̱ꞌ,
te̱ kaꞌán va̱ nimá a̱ ko̱o̱ kaꞌnuꞌ i̱ni̱ a̱ xaꞌa̱ꞌ ku̱a̱tyi̱ ndo̱ꞌ.
Sa̱kanꞌ ña̱ Ndiosí ña̱ xatyuunꞌ nda̱ku nduuꞌ a̱.
Va̱ꞌa̱ va̱ kuni sa̱kuuꞌ ne̱ i̱ni̱ xini ña̱ ja̱a̱nꞌ,
te̱ ndiatuꞌ ni̱a̱ tyi̱ndi̱e̱eꞌ ña̱ꞌaꞌ.
19 Sa̱kanꞌ nduuꞌ a̱,
ndoꞌó,
ne̱ ndieeꞌ ñu̱u̱ Sión,
ndoꞌó,
ne̱ nduuꞌ kuenta ne̱ ndieeꞌ ñu̱u̱ Jerusalén,
kü̱a̱ku̱ ka̱ ndo̱ꞌ.
Sa̱kanꞌ ña̱ Ndiosí,
ña̱ vi̱ta i̱ni̱ ndii,
kundaꞌvi i̱ni̱ a̱ xaꞌa̱ꞌ ndo̱ꞌ kii̱ꞌ ku̱ni̱ so̱ꞌo̱ a̱ xakuꞌ ndo̱ꞌ,
te̱ kii̱ꞌ ku̱ni̱ so̱ꞌo̱ a̱ ña̱ kaꞌán ndaꞌvi ndo̱ꞌ xiinꞌ a̱ te̱ tyi̱ndi̱e̱eꞌ a̱ ndo̱ꞌoꞌ ndii,
numi̱ꞌ va̱ te̱ na̱ku̱i̱i̱n a̱ nuu̱ꞌ ndo̱ꞌ.
20 Tee̱ꞌ ndee ta̱xi̱ Yahvé tu̱ndoꞌo̱ꞌ nuu̱ꞌ kivi̱ꞌ ñu̱u̱ ndo̱ꞌ nde̱e̱ naa ña̱ xaxi̱ꞌ,
te̱ ta̱xi̱ tu̱ a̱ ña̱ ndiꞌni̱ va̱ nimá ndo̱ꞌ nde̱e̱ naa ti̱kui vi̱xi̱n ko̱ꞌo̱ ndo̱ꞌ ndii,
ña̱ saniaꞌá ndoꞌó ja̱a̱nꞌ ndii,
köo̱ꞌ kivi̱ꞌ ka̱ ti̱si̱ꞌe a̱ nuu̱ꞌ ndo̱ꞌ,
te̱ ku̱vi̱ ku̱ni̱ ndu̱tyiꞌ nuu̱ꞌ xa̱tyiꞌ ña̱ꞌaꞌ ndo̱ꞌ.
21 Sa̱kanꞌ te̱ ku̱ni̱ so̱ꞌo̱ ndo̱ꞌ tatyi̱ꞌ yu̱ꞌuꞌ Ndiosí kaꞌa̱n a̱ xiinꞌ ndo̱ꞌ xata̱ꞌ ndo̱ꞌ ndii:
“Yoꞌoꞌ kuaꞌa̱n i̱tyiꞌ ña̱ kuní a̱ kuꞌu̱n ndo̱ꞌ,
i̱tyiꞌ ña̱ kuaꞌa̱n nda̱ꞌaꞌ ku̱a̱ꞌa̱ uun i̱tyiꞌ ña̱ kuaꞌa̱n nda̱ꞌaꞌ i̱ti̱n köo̱ꞌ a̱ xaaꞌ a̱”,
katyi̱ a̱.
22 Kii̱ꞌ sa̱kanꞌ ndii,
ku̱nda̱siꞌ ndo̱ꞌ ndiosí saka ña̱ xakaꞌnuꞌ ndo̱ꞌ,
ña̱ ni̱ ku̱a̱ꞌa̱ xiinꞌ plata,
te̱ ku̱nda̱siꞌ tu̱ ndo̱ꞌ ña̱ nianiaꞌ,
ña̱ ndiaa yaꞌviꞌ va̱,
ña̱ ni̱ ku̱a̱ꞌa̱ xiinꞌ oro,
te̱ ku̱ndu̱u̱ a̱ nde̱e̱ naa ña̱ tyaꞌanꞌ iinꞌ nuu̱ꞌ ndo̱ꞌ.
Te̱ ka̱ti̱a̱ ndo̱ꞌ sa̱kuuꞌ ndiosí saka ja̱a̱nꞌ nde̱e̱ naa xaaꞌ ne̱ yivi̱ꞌ kii̱ꞌ xatia ni̱a̱ ti̱a̱ꞌndia ndeꞌi̱,
te̱ kaꞌa̱n ndo̱ꞌ xiinꞌ a̱ ndii:
“Kuaꞌan ki̱e̱e̱ sa̱kuuꞌ ndo̱ꞌ yoꞌoꞌ”,
katyi̱ ndo̱ꞌ xiinꞌ ña̱ ja̱a̱nꞌ.
23 Te̱ kii̱ꞌ sa̱kanꞌ ndii,
sa̱ñuꞌuꞌ Tákuiꞌe Ndiosí ndoꞌó ti̱ꞌviꞌ a̱ savi̱ꞌ te̱ koso̱ a̱ sa̱kuuꞌ ndi̱kinꞌ ña̱ tyi̱ꞌi̱ ndo̱ꞌ,
te̱ na̱ka̱ya̱ ndo̱ꞌ kuaꞌa̱ꞌ ña̱ savi̱ꞌ asi̱nꞌ va̱ ku̱xi̱ ndo̱ꞌ nuu̱ꞌ ñu̱ꞌuꞌ miiꞌ xikaꞌ ndo̱ꞌ,
te̱ ko̱o̱ kuaꞌa̱ꞌ va̱ tu̱ kuꞌu̱ ka̱xi̱ꞌ si̱ndiki̱ꞌ sana̱ ndo̱ꞌ ka̱niiꞌ nuu̱ꞌ ñu̱ꞌuꞌ ndo̱ꞌ.
24 Sa̱kanꞌ tu̱ si̱ndiki̱ꞌ sana̱ ndo̱ꞌ xiinꞌ mburru,
tiꞌ taꞌviꞌ ñu̱ꞌuꞌ ndo̱ꞌ ndii,
ko̱o̱ kuaꞌa̱ꞌ ndi̱kinꞌ va̱ꞌa̱ xiinꞌ kuꞌu̱ nda̱tu̱nꞌ xa̱va̱ꞌa̱ ka̱xi̱ꞌ riꞌ mi̱iꞌ ndiꞌiꞌ ndi̱kinꞌ ña̱ nativi ne̱ yivi̱ꞌ xiinꞌ tunꞌ tisiꞌin nuu̱ꞌ nduuꞌ a̱.
25 Te̱ kii̱ꞌ xaa̱ kivi̱ꞌ ña̱ ku̱vi̱ ndo̱o̱ te̱ ndasiꞌ taꞌanꞌ xiinꞌ ndo̱ꞌ,
te̱ ndu̱va̱ tu̱ sa̱kuuꞌ vi̱ꞌe̱ sukun miiꞌ itaꞌ ra̱ te̱ xitoꞌ ndo̱so̱ꞌ ra̱ ñu̱u̱ ndii,
ki̱e̱e̱ kuaꞌa̱ꞌ xa̱va̱ꞌa̱ ti̱kui xíniꞌ sa̱kuuꞌ i̱kuꞌ sukun xiinꞌ xíniꞌ sa̱kuuꞌ xiki̱ꞌ sukun va̱.
26 Kivi̱ꞌ ja̱a̱nꞌ ndii,
nda̱tu̱nꞌ xa̱va̱ꞌa̱ yiꞌe̱ yoo̱ꞌ nde̱e̱ naa nandii̱ꞌ ñu̱ꞌu̱ vi̱ꞌ,
te̱ ñu̱ꞌu̱ ndii,
uxa̱ taꞌan i̱tyiꞌ ka̱ ndi̱e̱eꞌ nayiꞌé a̱ nde̱e̱ naa yiꞌé ingaꞌ uxa̱ taꞌan vi̱ꞌ ñu̱ꞌu̱.
Sa̱kanꞌ sa̱a̱ a̱ kii̱ꞌ xa̱ꞌaꞌ Yahvé sa̱ndaꞌa a̱ sa̱kuuꞌ ne̱ nduuꞌ kuenta a̱,
te̱ satatanꞌ tu̱ ña̱ꞌaꞌ a̱ miiꞌ ni̱ sa̱tu̱xuꞌví ña̱ꞌaꞌ a̱.
Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ ndieeꞌ ñu̱u̱ Asiria
27 Ko̱to̱ ndo̱ꞌ,
mi̱iꞌ Yahvé kuyatinꞌ ku̱a̱xi̱,
te̱ xikaꞌ va̱ ni̱ ki̱e̱e̱ a̱ te̱ ku̱a̱xi̱ a̱,
te̱ xiꞌé xa̱va̱ꞌa̱ a̱ ku̱a̱xi̱ a̱,
nde̱e̱ naa ñuꞌu̱ ndatin vi̱ꞌ nduuꞌ a̱,
te̱ ñuꞌma̱ tuu̱nꞌ ndiaaꞌ vi̱ꞌ kieeꞌ miiꞌ ku̱a̱xi̱ a̱.
Te̱ xatu̱ xa̱va̱ꞌa̱ kaꞌán ku̱a̱xi̱ a̱,
te̱ yaa̱ꞌ a̱ ndii,
nduuꞌ a̱ nde̱e̱ naa ñuꞌu̱ ndatin vi̱ꞌ.
28 Te̱ tatyi̱ꞌ yu̱ꞌuꞌ a̱ ndii,
nduuꞌ a̱ nde̱e̱ naa i̱ti̱a̱ miiꞌ ni̱ kaya̱ kuaꞌa̱ꞌ va̱ te̱ ñuꞌu̱,
te̱ naxaá ti̱kui nde̱e̱ suku̱nꞌ ne̱ yivi̱ꞌ.
Te̱ ki̱si̱ a̱ sa̱kuuꞌ ne̱ tukuꞌ,
ne̱ ñuñuꞌ,
te̱ sa̱ndo̱ñuꞌuꞌ tu̱ a̱ sa̱kuuꞌ ni̱a̱.
Te̱ sa̱nduxín xa̱tyiꞌ a̱ sa̱kuuꞌ ni̱a̱,
te̱ tyu̱ꞌu̱n tu̱ a̱ ka̱a̱ ki̱ꞌiꞌ yu̱ꞌuꞌ ni̱a̱,
te̱ xi̱ta̱ꞌ ña̱ꞌaꞌ a̱ kañuuꞌ a̱ te̱ kiku̱ ndo̱o̱ ni̱a̱ kuꞌu̱n ni̱a̱ sa̱a̱ a̱.
29 Ndisu̱ ndoꞌó ndii,
ka̱ta̱ ku̱i̱ti̱ꞌ ndo̱ꞌ nde̱e̱ naa xaaꞌ ne̱ yivi̱ꞌ xitaꞌ ni̱a̱ ñu̱u kii̱ꞌ xakaꞌnuꞌ ni̱a̱ vi̱koꞌ pascua.
Va̱ꞌa̱ va̱ ku̱ni̱ ndo̱ꞌ nde̱e̱ naa xaaꞌ ne̱ yivi̱ꞌ tivi ni̱a̱ tunꞌ yoo̱ꞌ kuaꞌa̱n ni̱a̱ xíniꞌ i̱kuꞌ miiꞌ xakaꞌnuꞌ ni̱a̱ Yahvé,
xíniꞌ i̱kuꞌ miiꞌ yoo Ndiosí ña̱ kooꞌ tyukuuꞌ va̱,
ña̱ xakaꞌnuꞌ ne̱ vi̱ꞌe̱ Israel.
30 Te̱ sa̱kuniꞌ so̱ꞌo̱ Yahvé sa̱kuuꞌ ne̱ yivi̱ꞌ tatyi̱ꞌ yu̱ꞌuꞌ a̱ ña̱ tiꞌeꞌ xa̱va̱ꞌa̱ kaꞌán a̱,
te̱ sa̱kuniꞌ tu̱ a̱ ndoꞌó sa̱a̱ sa̱nuuꞌ a̱ nda̱ꞌaꞌ a̱.
Te̱ nu̱u̱ a̱ nduuꞌ a̱ nde̱e̱ naa ñuꞌu̱ ndatin ña̱ xaꞌmiꞌ sa̱kuuꞌ ña̱ꞌa̱,
te̱ sa̱kuunꞌ ndi̱e̱eꞌ va̱ tu̱ a̱ savi̱ꞌ,
te̱ sa̱koyó tu̱ a̱ ñuꞌu̱ savi̱ꞌ,
te̱ sa̱kuunꞌ tu̱ a̱ iꞌinꞌ naꞌnuꞌ xa̱va̱ꞌa̱.
31 Te̱ kii̱ꞌ ku̱ni̱ so̱ꞌo̱ ne̱ ndieeꞌ nuu̱ꞌ ñu̱ꞌuꞌ Asiria tatyi̱ꞌ yu̱ꞌuꞌ Yahvé,
te̱ na̱ti̱i̱n ni̱a̱ sa̱kuuꞌ tu̱ndoꞌo̱ꞌ ja̱a̱nꞌ sa̱a̱ a̱ ndii,
ku̱yi̱ꞌvi ni̱a̱.
32 Te̱ i̱ꞌi̱n i̱tyiꞌ kii̱ꞌ sa̱ndoꞌoꞌ Ndiosí ne̱ ndieeꞌ nuu̱ꞌ ñu̱ꞌuꞌ Asiria ja̱a̱nꞌ ndii,
sa̱kaxanꞌ ne̱ vi̱ꞌe̱ Israel ñuu̱ꞌ tyiee̱ xiinꞌ ñuu̱ꞌ ña̱ naniꞌ arpa xaꞌa̱ꞌ a̱ ña̱ va̱ꞌa̱ va̱ kuni ni̱a̱.
Te̱ ndo̱ni̱ꞌi̱ a̱ nda̱ꞌaꞌ a̱ ña̱ ndi̱e̱eꞌ xa̱va̱ꞌa̱ te̱ ku̱ntaꞌanꞌ a̱ xiinꞌ ne̱ ndieeꞌ nuu̱ꞌ ñu̱ꞌuꞌ Asiria ja̱a̱nꞌ.
33 Sa̱kanꞌ ña̱ poso̱ kunu va ña̱ naniꞌ Tofet miiꞌ xixí ñuꞌu̱ ndii,
nde̱e̱ xta̱ꞌanꞌ vi̱ꞌ xa̱ yoo tu̱ꞌva̱ a̱,
te̱ xa̱ yoo tu̱ꞌva̱ tu̱ a̱ te̱ ko̱ko̱ nde̱e̱ mi̱iꞌ rey,
te̱ xaꞌndia tyuunꞌ nuu̱ꞌ ne̱ ndieeꞌ nuu̱ꞌ ñu̱ꞌuꞌ Asiria ja̱a̱nꞌ.
Te̱ ti̱xi̱n a̱ miiꞌ xixí ne̱ yivi̱ꞌ ja̱a̱nꞌ ndii,
ndiká xa̱va̱ꞌa̱ a̱,
te̱ kunu va̱ tu̱ a̱,
te̱ i̱kanꞌ nduuꞌ miiꞌ naꞌmiꞌ ne̱ yivi̱ꞌ ñuꞌu̱ xiinꞌ kuaꞌa̱ꞌ xa̱va̱ꞌa̱ tu̱tunꞌ.
Te̱ mi̱iꞌ Yahvé na̱ꞌmi̱ ñuꞌu̱ ti̱xi̱n poso̱ ja̱a̱nꞌ xiinꞌ tatyi̱ꞌ yu̱ꞌuꞌ a̱,
te̱ nda̱ti̱n a̱ nde̱e̱ naa ndatin yu̱tyiꞌ azufre.