Yoꞌoꞌ kaꞌán Isaías ña̱ ndaꞌvi va̱ ku̱ndo̱ꞌo̱ ne̱ ndieeꞌ ñu̱u̱ Jerusalén
29
Kaꞌán Ndiosí ndii:
“¡Ndoꞌó kuaꞌa,
ndoꞌó kuaꞌa,
ne̱ ndieeꞌ ñu̱u̱ Ariel miiꞌ ni̱ nduꞌu̱ꞌ rey David nandiee̱ꞌ ra̱!
¡Ndaꞌvi va̱ ku̱ndo̱ꞌo̱ ndo̱ꞌ!
Sa̱a̱ kuiya̱ xaꞌa ndo̱ꞌ vi̱koꞌ,
te̱ xïkuiín ndo̱ꞌ xiinꞌ ña̱ ja̱a̱nꞌ.
2 Ndisu̱ yuꞌu̱ ndii,
sa̱ndoꞌoꞌ i̱ sa̱kuuꞌ ndo̱ꞌ,
te̱ ku̱a̱ku̱ xa̱va̱ꞌa̱ ndo̱ꞌ,
te̱ ku̱ni̱ uꞌvi̱ xa̱va̱ꞌa̱ tu̱ ndo̱ꞌ.
Sa̱kanꞌ ña̱ Jerusalén miiꞌ ndieeꞌ ndo̱ꞌ ñaa̱ꞌ ndii,
na̱ndu̱u̱ a̱ nde̱e̱ naa ña̱ kuni katyi̱ kivi̱ꞌ a̱ Ariel.
Te̱ ña̱ ja̱a̱nꞌ kuni katyi̱ a̱ ndii,
altar miiꞌ xixí ki̱tiꞌ.
3 Sa̱kanꞌ ña̱ ti̱ꞌviꞌ i̱ kiꞌinꞌ te̱ xíinꞌ xikaꞌ nuuꞌ nuu̱ꞌ i̱,
te̱ na̱ka̱si̱ ra̱ sa̱a̱ xinundu̱u̱ xi̱i̱nꞌ ñu̱u̱ ndo̱ꞌ.
Te̱ ka̱ta̱ yuku̱n i̱ kiꞌinꞌ te̱ xíinꞌ,
te̱ kooꞌ tyukuuꞌ va̱ sa̱a̱ xinundu̱u̱ xi̱i̱nꞌ ñu̱u̱ ndo̱ꞌ,
te̱ sa̱kaaꞌ sukun tu̱ i̱ ñu̱ꞌuꞌ miiꞌ ku̱vi̱ ka̱a̱ te̱ xíinꞌ te̱ sa̱ndo̱ñuꞌuꞌ ra̱ ñu̱u̱ ndo̱ꞌ ja̱a̱nꞌ.
4 Te̱ sa̱nduva i̱ sa̱kuuꞌ ndo̱ꞌ nde̱e̱ nuu̱ꞌ ñu̱ꞌuꞌ,
te̱ nde̱e̱ te̱i̱n ya̱kaꞌ tiaku̱ tatyi̱ꞌ yu̱ꞌuꞌ ndo̱ꞌ kaꞌa̱n ndo̱ꞌ ti̱xi̱n ñu̱ꞌuꞌ nde̱e̱ naa i̱ꞌnaꞌ kii̱ꞌ kaꞌán ya̱aꞌ a̱ ti̱xi̱n yavi̱ ndi̱i̱.
5 Ndisu̱ sa̱kuuꞌ te̱ kuaꞌa̱ꞌ xa̱va̱ꞌa̱,
te̱ ndasiꞌ taꞌanꞌ xiinꞌ ndo̱ꞌ ndii,
mi̱iꞌ yuꞌu̱,
Yahvé,
ka̱ꞌni̱ꞌ ña̱ꞌaꞌ te̱ sa̱kuatyiꞌ xiꞌe̱ ndo̱o̱ ña̱ꞌaꞌ i̱ nde̱e̱ naa ya̱kaꞌ ndiꞌi̱ va̱.
Te̱ sa̱kuuꞌ te̱ xíinꞌ,
te̱ kuaꞌa̱ꞌ xa̱va̱ꞌa̱,
te̱ ndi̱e̱ni va̱ kuni ka̱ꞌni̱ꞌ ndoꞌó ndii,
ku̱ndu̱u̱ ra̱ nde̱e̱ naa mi̱ꞌiꞌ i̱tyiꞌ ña̱ ndíátyiꞌ xaaꞌ tatyi̱ꞌ ku̱i̱ti̱ꞌ.
Te̱ yatyi̱ va̱ xkaꞌndi̱a̱ sa̱kuuꞌ ña̱ ja̱a̱nꞌ,
i̱i̱n ki̱xi̱n ku̱i̱ti̱ꞌ a̱.
6 Yuꞌu̱,
ña̱ nduuꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii,
na̱kaꞌa̱n i̱ xaꞌa̱ꞌ ndo̱ꞌ xiinꞌ ña̱ ndeꞌí savi̱ꞌ,
xiinꞌ ña̱ ta̱a̱n ndi̱e̱eꞌ,
xiinꞌ ña̱ ni̱ꞌi̱ ndi̱e̱eꞌ xa̱va̱ꞌa̱,
xiinꞌ ti̱katyi̱ꞌ,
xiinꞌ ña̱ ku̱u̱nꞌ kuiꞌe̱ ndi̱e̱eꞌ va̱ savi̱ꞌ,
xiinꞌ ñuꞌu̱ ña̱ xaꞌmiꞌ sa̱kuuꞌ nuu̱ꞌ ña̱ꞌa̱.
7 Te̱ sa̱kuuꞌ ne̱ yivi̱ꞌ,
ne̱ kuaꞌa̱ꞌ xa̱va̱ꞌa̱,
ne̱ kuntaꞌanꞌ xiinꞌ ndo̱ꞌ,
te̱ kuni sa̱nduva ni̱a̱ vi̱ꞌe̱ sukun miiꞌ ku̱vi̱ kaku̱ ndo̱ꞌ,
te̱ sandoꞌoꞌ tu̱ ni̱a̱ ndoꞌó,
ne̱ ndieeꞌ ñu̱u̱ Jerusalén ndii,
i̱i̱n ndi̱ꞌi̱ ni̱a̱ so̱ꞌo̱ sa̱a̱ yuꞌu̱,
Ndiosí,
te̱ ku̱ndu̱u̱ ni̱a̱ nde̱e̱ naa xa̱ni̱ ku̱i̱ti̱ꞌ,
uun nde̱e̱ naa ña̱ satuví a̱ nuu̱ꞌ ne̱ yivi̱ꞌ ñu̱u ku̱i̱ti̱ꞌ.
8 Te̱ ku̱ndo̱ꞌo̱ ni̱a̱ nde̱e̱ naa i̱i̱n ne̱ xiꞌí va̱ so̱ko̱,
te̱ xáni ni̱a̱ ña̱ xixiꞌ ni̱a̱ xtu ni̱a̱,
ndisu̱ kii̱ꞌ ndo̱to̱ ni̱a̱ ndii,
kusaaꞌ xiꞌí ka̱ ni̱a̱ so̱ko̱,
te̱ köo̱ꞌ xa̱tyiꞌ ña̱ xaxi̱ꞌ naá xi̱ti̱ ni̱a̱.
Uun ku̱ndo̱ꞌo̱ ni̱a̱ nde̱e̱ naa i̱i̱n ne̱ ityí va̱ ti̱kui,
te̱ xáni ni̱a̱ ña̱ xiꞌiꞌ ni̱a̱ ti̱kui xtu ni̱a̱,
ndisu̱ kii̱ꞌ ndo̱to̱ ni̱a̱ ndii,
kusaaꞌ ityí ka̱ ni̱a̱ ti̱kui,
te̱ ni̱ na̱ya̱a̱ ndo̱o̱ tunꞌ yoo̱ꞌ suku̱nꞌ ni̱a̱.
Sa̱kanꞌ ku̱ndo̱ꞌo̱ sa̱kuuꞌ ne̱ ndieeꞌ ñu̱u̱,
ne̱ kuntaꞌanꞌ xiinꞌ ne̱ ndieeꞌ ñu̱u̱ Jerusalén”,
ni̱ katyi̱ a̱.
Yoꞌoꞌ kaꞌán Isaías ña̱ nde̱e̱ naa ne̱ kuiꞌe nuu̱ꞌ nduuꞌ ne̱ vi̱ꞌe̱ Israel
9 Vi̱kuii̱n ndo̱ꞌ,
te̱ na̱nda̱ni̱ va̱ ndo̱ꞌ tee̱ꞌ ndee tuviꞌ kaxiꞌ nuu̱ꞌ ndo̱ꞌ ndii,
kü̱vi̱ xa̱tyiꞌ ku̱ni̱ ndo̱ꞌ,
te̱ xini̱ va̱ ndo̱ꞌ tee̱ꞌ ndee köo̱ꞌ tiku̱nꞌ vi̱ꞌ vino ni̱ xi̱ꞌi̱ ndo̱ꞌ,
te̱ kisiꞌ a̱ ndoꞌó nde̱e̱ naa te̱ xini̱ tee̱ꞌ ndee köo̱ꞌ siee vi̱ꞌ vino ni̱ xi̱ꞌi̱ ndo̱ꞌ.
10 Sa̱kanꞌ ña̱ mi̱iꞌ Yahvé ni̱ sa̱nuuꞌ ña̱ kuni kusu̱n xa̱va̱ꞌa̱ nimá ndo̱ꞌ.
Te̱ kaꞌán tiakú tu̱ꞌu̱n Ndiosí nduuꞌ nde̱e̱ naa ndu̱tyiꞌ nuu̱ꞌ ne̱ yivi̱ꞌ,
ndisu̱ xa̱ ni̱ nda̱si̱ Yahvé ndu̱tyiꞌ nuu̱ꞌ ra̱,
te̱ xa̱ ni̱ tyi̱nduꞌu̱ꞌ tu̱ a̱ toto̱ ndi̱kiꞌ xíniꞌ sa̱kuuꞌ te̱ tuviꞌ i̱ni̱ te̱ kaꞌán xiinꞌ ndo̱ꞌ ña̱ ko̱o̱.
11 Ña̱ satuví a̱ nuu̱ꞌ ndo̱ꞌ ndii,
xa̱ ni̱ na̱ndu̱u̱ a̱ nuu̱ꞌ ndoꞌó nde̱e̱ naa i̱i̱n tu̱tu̱ ña̱ ni̱ ke̱ꞌi̱ te̱ yivi̱ꞌ,
te̱ iinꞌ tuvíꞌ a̱,
te̱ ndasi kutu̱ꞌ va̱ a̱.
Te̱ naaꞌ ta̱xi̱ ndo̱ꞌ a̱ nda̱ꞌaꞌ i̱i̱n ne̱ yivi̱ꞌ,
ne̱ ku̱vi̱ kaꞌviꞌ,
te̱ kaꞌa̱n ndo̱ꞌ xiinꞌ ni̱a̱ ndii:
“Sa̱a̱ u̱nꞌ ña̱ va̱ꞌa̱ te̱ ka̱ꞌvi̱ u̱nꞌ ña̱ yo̱ꞌo̱ꞌ”,
katyi̱ ndo̱ꞌ.
Te̱ na̱ku̱i̱i̱n ne̱ ja̱a̱nꞌ nuu̱ꞌ ndo̱ꞌ ndii:
“Kü̱vi̱ ka̱ꞌvi̱ i̱ a̱,
sa̱kanꞌ ña̱ ndasi kutu̱ꞌ va̱ a̱”,
katyi̱ ni̱a̱.
12 Te̱ naaꞌ ta̱xi̱ ndo̱ꞌ tu̱tu̱ ja̱a̱nꞌ nda̱ꞌaꞌ i̱i̱n ne̱ kü̱vi̱ ka̱ꞌvi̱,
te̱ kaꞌa̱n ndo̱ꞌ xiinꞌ ni̱a̱ ndii:
“Sa̱a̱ u̱nꞌ ña̱ va̱ꞌa̱ te̱ ka̱ꞌvi̱ u̱nꞌ tu̱tu̱ yoꞌoꞌ”,
katyi̱ ndo̱ꞌ xiinꞌ ni̱a̱.
Te̱ kaꞌa̱n ne̱ ja̱a̱nꞌ xiinꞌ ndo̱ꞌ ndii:
“Xïní yuꞌu̱ ka̱ꞌvi̱ i̱”,
katyi̱ ni̱a̱.
13 Xaꞌa̱ꞌ a̱ ja̱a̱nꞌ na kaꞌán Tákuiꞌe Ndiosí ndii:
“Ne̱ yivi̱ꞌ kaa̱ꞌ ndii,
xiinꞌ ña̱ kaꞌán ku̱i̱ti̱ꞌ ni̱a̱ xakaꞌnuꞌ ni̱a̱ yuꞌu̱,
te̱ xiinꞌ yu̱ꞌuꞌ ku̱i̱ti̱ꞌ ni̱a̱ kiꞌinꞌ kaꞌnuꞌ ni̱a̱ yuꞌu̱,
ndisu̱ nimá ni̱a̱ ndii,
xikaꞌ xa̱va̱ꞌa̱ yoo a̱ nuu̱ꞌ i̱.
Te̱ si̱u̱ꞌunꞌ ña̱ kaꞌán ni̱a̱ xiinꞌ i̱ ndii,
ña̱ tyituní ne̱ yivi̱ꞌ ku̱i̱ti̱ꞌ nduuꞌ a̱,
te̱ ni̱ sa̱kuaa̱n ni̱a̱ ña̱ ja̱a̱nꞌ xiinꞌ xíniꞌ ni̱a̱ a̱.
14 Sa̱kanꞌ na kuiiꞌ kuaꞌa̱n na kuaꞌa̱n i̱ ña̱ sa̱a̱ i̱ tyu̱u̱n kaꞌnuꞌ xiinꞌ ña̱ nandani̱ nuu̱ꞌ ne̱ yivi̱ꞌ kaa̱ꞌ,
te̱ na̱nda̱ni̱ va̱ ni̱a̱.
Te̱ sa̱ndo̱ñuꞌuꞌ i̱ ña̱ xini tuní te̱ xini tuní,
te̱ ne̱ ndityi va̱ ndii,
sa̱ndoyoꞌ tu̱ i̱ ña̱ ndityi ne̱ ja̱a̱nꞌ”,
katyi a̱.
15 Ndaꞌvi va̱ ku̱ndo̱ꞌo̱ sa̱kuuꞌ ne̱ tísi̱ꞌe nuu̱ꞌ Yahvé ña̱ ki̱ni̱ ña̱ tyituní ni̱a̱ sa̱a̱ ni̱a̱,
te̱ xaaꞌ ni̱a̱ ña̱ ni̱a̱ꞌa miiꞌ kasi̱ꞌe,
te̱ kaꞌán ni̱a̱ ndii:
“Köo̱ꞌ xini xa̱tyiꞌ ña̱ xaaꞌ e̱ꞌ kaa̱ꞌ,
te̱ ni̱ nde̱e̱ köo̱ꞌ xiní tu̱ yooꞌ”,
katyi ni̱a̱.
16 Ne̱ küuꞌ kaxiꞌ xa̱tyiꞌ nduuꞌ ndoꞌó.
Tyu̱u̱n va̱ ndo̱ꞌ te̱ nda̱sa̱ sikiꞌ ndo̱ꞌ ndiaa ka̱ ña̱ xaaꞌ ndo̱ꞌ tee̱ꞌ xanini ndo̱ꞌ ña̱ i̱i̱n katyi nduuꞌ ñu̱ꞌuꞌ kixinꞌ xiinꞌ te̱ xatyuunꞌ xiinꞌ a̱.
Te̱ kü̱vi̱ kaꞌa̱n i̱i̱n ki̱si̱ xiinꞌ te̱ ni̱ xa̱ꞌa̱ ña̱ꞌaꞌ ndii:
“Süu̱ꞌ yoꞌó ni̱ xa̱ꞌa̱ yuꞌu̱”,
katyi̱ a̱.
Ni̱ nde̱e̱ kü̱vi̱ tu̱ kaꞌa̱n i̱i̱n yo̱o̱ xiinꞌ te̱ ni̱ xa̱ꞌa̱ ña̱ꞌaꞌ ndii:
“Xïní xa̱tyiꞌ yoꞌó ña̱ xaaꞌ u̱nꞌ”,
katyi̱ a̱.
Yoꞌoꞌ kaꞌán Isaías ña̱ xa̱ kuyatinꞌ sa̱kakú Ndiosí ne̱ vi̱ꞌe̱ Israel
17 Nä̱ꞌaꞌ ka̱ te̱ na̱ndu̱u̱ xiki̱ꞌ Líbano ñu̱ꞌuꞌ ñaꞌma va̱,
te̱ ñu̱ꞌuꞌ ñaꞌma ja̱a̱nꞌ na̱ndu̱u̱ kuꞌu̱ xi̱xa̱ xa̱va̱ꞌa̱.
18 Te̱ kivi̱ꞌ ja̱a̱nꞌ ndii,
ku̱vi̱ ku̱ni̱ so̱ꞌo̱ ne̱ soꞌoꞌ naaꞌ ka̱ꞌvi̱ ne̱ yivi̱ꞌ tu̱tu̱ Ndiosí ña̱ iinꞌ tuvíꞌ nuu̱ꞌ ni̱a̱,
te̱ ne̱ kuiꞌe ndu̱tyiꞌ nuu̱ꞌ ndii,
na̱tuvi̱ nuu̱ꞌ ni̱a̱ te̱ ku̱vi̱ ko̱to̱ kaxiꞌ ni̱a̱ tee̱ꞌ ndee i̱i̱n yaví va̱.
19 Te̱ ne̱ ndaꞌvi kuuꞌ ndii,
tu̱ku̱ sa̱kanꞌ sa̱kuatiaꞌ Yahvé nimá ni̱a̱,
te̱ nde̱e̱ ne̱ ndaꞌvi xa̱va̱ꞌa̱ kuuꞌ na̱ku̱a̱tiaꞌ nimá sa̱a̱ Ndiosí su̱ꞌu̱n ña̱ xakaꞌnuꞌ ne̱ vi̱ꞌe̱ Israel.
20 Ne̱ xandiꞌiꞌ ndii,
köo̱ꞌ ni̱a̱ ko̱o̱ kivi̱ꞌ ja̱a̱nꞌ,
te̱ ne̱ ñuñuꞌ ndii,
ndoñuꞌuꞌ sa̱kuuꞌ ni̱a̱,
te̱ ne̱ tyituní sa̱a̱ ña̱ ni̱a̱ꞌa ndii,
ku̱vi̱ sa̱kuuꞌ ni̱a̱.
21 Te̱ ne̱ sataví ku̱a̱tyi̱ nianí ne̱ köo̱ꞌ ku̱a̱tyi̱ xiinꞌ tu̱n vixi̱ ndii,
ku̱vi̱ ni̱a̱ sa̱a̱ Ndiosí.
Te̱ ne̱ xini xaꞌanꞌ kuesí kii̱ꞌ kuaꞌa̱n ni̱a̱ vi̱ꞌe̱ ku̱a̱tyi̱,
te̱ käꞌán nda̱ku ni̱a̱ xaꞌa̱ꞌ ne̱ köo̱ꞌ ku̱a̱tyi̱ te̱ tyinaá ña̱ꞌaꞌ kuesí ja̱a̱nꞌ vi̱ꞌe̱ ka̱a̱ ndii,
ku̱vi̱ tu̱ ne̱ ja̱a̱nꞌ sa̱a̱ Ndiosí.
22 Sa̱kanꞌ na kuiiꞌ kaꞌán Yahvé,
ña̱ ni̱ sa̱kakú Abraham,
xiinꞌ ne̱ vi̱ꞌe̱ Israel ndii:
“Nde̱e̱ vi̱ti̱n te̱ nde̱e̱ nuu̱ꞌ kuꞌu̱n e̱ꞌ ndii,
kü̱ka̱ꞌa̱n ka̱ nuu̱ꞌ nde̱e̱ i̱i̱n ne̱ vi̱ꞌe̱ Israel ni̱ nde̱e̱ kü̱ya̱a̱ ndi̱i ka̱ tu̱ nuu̱ꞌ ni̱a̱ xaꞌa̱ꞌ ña̱ yiꞌvi ni̱a̱.
23 Te̱ kii̱ꞌ ku̱ni̱ sa̱kuuꞌ ne̱ vi̱ꞌe̱ Israel ña̱ nda̱sa̱ kuaꞌa̱ꞌ xa̱va̱ꞌa̱ i̱ siꞌe̱ ni̱a̱,
te̱ ni̱ sa̱ñuꞌuꞌ kuaꞌa̱ꞌ xa̱va̱ꞌa̱ tu̱ ña̱ꞌaꞌ i̱ ndii,
sa̱ñuꞌuꞌ ni̱a̱ yuꞌu̱,
ña̱ nduuꞌ Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ Jacob,
te̱ ki̱ꞌi̱n kaꞌnuꞌ xa̱va̱ꞌa̱ ni̱a̱ yuꞌu̱,
Ndiosí,
ña̱ xakaꞌnuꞌ ne̱ vi̱ꞌe̱ Israel.
24 Te̱ sa̱kuuꞌ ne̱ ni̱ kiku̱ xikaꞌ sanaꞌ kivi̱ꞌ ja̱a̱nꞌ ndii,
ta̱xi̱ i̱ ña̱ ku̱nda̱ni̱ ni̱a̱ ña̱ xini tuní,
te̱ ne̱ kaꞌán i̱ꞌni̱ xaꞌa̱ꞌ i̱ ndii,
na̱ti̱i̱n ni̱a̱ ña̱ saniaꞌá ña̱ꞌaꞌ i̱”,
katyi a̱.