Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ ndieeꞌ ñu̱u̱ Samaria
28
Ndaꞌvi va̱ ku̱ndo̱ꞌo̱ ne̱ ñuñuꞌ,
ne̱ ndieeꞌ ñu̱u̱ Samaria,
ña̱ nduuꞌ nde̱e̱ naa corona nda̱tu̱nꞌ ña̱ nduꞌu̱ꞌ xíniꞌ te̱ xini̱,
te̱ vi̱ꞌe̱ Israel.
Te̱ ñu̱u̱ ja̱a̱nꞌ ndii,
nde̱e̱ xíniꞌ yo̱soꞌ miiꞌ va̱ꞌa̱ va̱ xaꞌnuꞌ ña̱ ta̱ta̱ kanduꞌu̱ꞌ a̱,
ndisu̱ ña̱ nda̱tu̱nꞌ a̱ ndii,
ityi̱ a̱ nde̱e̱ naa ityí i̱ta̱,
te̱ xa̱ ña̱ ja̱a̱nꞌ nduuꞌ ña̱ va̱ꞌa̱ va̱ kuni ne̱ ndiee ñu̱u̱ ja̱a̱nꞌ xini ni̱a̱,
sa̱kanꞌ ña̱ xtani̱ va̱ ni̱a̱ ko̱ꞌo̱ ni̱a̱ vino nde̱e̱ xaá ni̱a̱ ñu̱ꞌuꞌ.
2 Ko̱to̱ ndo̱ꞌ,
Yahvé ndii,
kumiꞌ a̱ i̱i̱n ti̱ꞌvi̱ te̱ xíinꞌ te̱ kooꞌ tyukuuꞌ xa̱va̱ꞌa̱,
te̱ ja̱a̱nꞌ ndii nduuꞌ ra̱ nde̱e̱ naa iꞌinꞌ naꞌnuꞌ va̱,
te̱ nduuꞌ tu̱ ra̱ nde̱e̱ naa savi̱ꞌ kii̱ꞌ kuunꞌ kuiꞌe̱ va̱ a̱,
te̱ i̱i̱n koyo̱ ku̱i̱ti̱ꞌ raꞌ siki̱ꞌ ni̱a̱ nde̱e̱ naa te̱ñuꞌu̱ꞌ kii̱ꞌ kuunꞌ kuiꞌe̱ savi̱ꞌ,
te̱ ka̱tavi̱ raꞌ sa̱kuuꞌ ni̱a̱ nde̱e̱ nuu̱ꞌ ñu̱ꞌuꞌ ja̱a̱nꞌ nde̱e̱ naa xaaꞌ te̱ñuꞌu̱ꞌ ja̱a̱nꞌ.
3 Ñu̱u̱ Samaria,
ña̱ kaꞌán ñuñuꞌ ne̱ ndieeꞌ i̱kanꞌ xaꞌa̱ꞌ te̱ nduuꞌ a̱ nde̱e̱ naa corona ña̱ nduꞌu̱ꞌ xíniꞌ te̱ xini̱,
te̱ Israel ndii,
kueꞌni̱ ndo̱so̱ꞌ ña̱ꞌaꞌ te̱ ndasiꞌ taꞌanꞌ xiinꞌ ni̱a̱.
4 Te̱ ñu̱u̱ ja̱a̱nꞌ ndii,
nde̱e̱ xíniꞌ yo̱soꞌ miiꞌ va̱ꞌa̱ va̱ xaꞌnuꞌ ña̱ ta̱ta̱ kanduꞌu̱ꞌ a̱.
Te̱ ña̱ nda̱tu̱nꞌ a̱ ndii,
ityi̱ a̱ nde̱e̱ naa ityí i̱ta̱,
te̱ ku̱ndo̱ꞌo̱ a̱ nde̱e̱ naa xaaꞌ ne̱ yivi̱ꞌ xiinꞌ ndo̱koꞌ higo ña̱ tyityí nu̱uꞌ ña̱ kendiaa̱ꞌ ne̱ yivi̱ꞌ te̱ xaxi̱ꞌ ni̱a̱ a̱.
5 Kii̱ꞌ xaa̱ kivi̱ꞌ ja̱a̱nꞌ ndii,
Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ku̱ndu̱u̱ nde̱e̱ naa corona nda̱tu̱nꞌ ña̱ ku̱nduꞌu̱ꞌ xíniꞌ ne̱ vi̱ꞌe̱ Israel,
ne̱ nduuꞌ kuenta a̱,
ne̱ ndiaꞌviꞌ ne̱ ndoo̱.
6 Te̱ ta̱xi̱ a̱ espíritu ña̱ xatyuunꞌ nda̱ku ku̱naa̱ nimá kuesí,
te̱ kaꞌnu̱ nda̱ku ra̱ ku̱a̱tyi̱ ne̱ yivi̱ꞌ,
te̱ ta̱xi̱ a̱ ña̱ ndi̱e̱ni nimá te̱ xíinꞌ,
te̱ ndi̱e̱ni va̱ ku̱ntaꞌanꞌ,
te̱ xitoꞌ yiꞌeꞌ ñu̱u̱.
7 Ndisu̱ vi̱ti̱n ndii,
ndee te̱ xini̱ ku̱i̱ti̱ꞌ nduuꞌ te̱ niꞌiꞌ i̱tyiꞌ nuu̱ꞌ ne̱ vi̱ꞌe̱ Israel,
te̱ xini̱ ku̱i̱ti̱ꞌ nduuꞌ sa̱kuuꞌ ra̱,
te̱ kisiꞌ vi̱ꞌ ña̱ꞌaꞌ a̱ xaꞌa̱ꞌ a̱ ña̱ kaꞌán va̱ nimá ra̱ ko̱ꞌo̱ ra̱ vino,
te̱ nde̱e̱ nasuku̱ꞌ taꞌanꞌ vi̱ꞌ xaꞌa̱ꞌ ra̱ kuaꞌa̱n ko̱ꞌo̱ ra̱ vino xatu̱.
Sa̱kanꞌ tu̱ xaaꞌ naa kuuꞌ sutu̱ xiinꞌ te̱ kaꞌán tiakú tu̱ꞌu̱n Ndiosí ndii,
nasuku̱ꞌ taꞌanꞌ vi̱ꞌ xaꞌa̱ꞌ ra̱ xaaꞌ vino xatu̱,
te̱ kisiꞌ vi̱ꞌ ña̱ꞌaꞌ a̱ kii̱ꞌ satuví a̱ nuu̱ꞌ ra̱,
te̱ xini̱ ra̱ kii̱ꞌ katunꞌ ra̱ ne̱ yivi̱ꞌ.
8 Te̱ ka̱niiꞌ nuu̱ꞌ mesa miiꞌ ndieeꞌ ra̱ xatyuunꞌ ra̱ tyituꞌ vi̱ꞌ kaaꞌ suxa̱n yu̱ꞌuꞌ ra̱,
te̱ nde̱e̱ siee kuäsa̱ꞌ ka̱ ndo̱o̱ kaaꞌ ti̱xi̱n vi̱ꞌe̱ miiꞌ ndieeꞌ ra̱ ja̱a̱nꞌ.
9 Te̱ kaꞌán ra̱ xaꞌa̱ꞌ i̱ ndii:
“¿Yo̱o̱ tu̱ kuni sa̱niaꞌá te̱ ja̱a̱nꞌ,
kaꞌanꞌ ra̱?
¿Yo̱o̱ tu̱ nuu̱ꞌ sa̱na̱kuatyiꞌ te̱ ja̱a̱nꞌ kuento Ndiosí kaꞌanꞌ ra̱?
¿Ñáá tuu ra̱ ña̱ sa̱niaꞌá ra̱ ne̱ kuatyi̱ꞌ kualiꞌ,
ne̱ xa̱ ni̱ na̱ko̱o̱ ndo̱soꞌ uun ne̱ kualiꞌ,
ne̱ saka̱nꞌ ni̱ ndondi̱a̱ ña̱ tyityinꞌ ni̱a̱?
10 Sa̱kanꞌ ña̱ saniaꞌá ra̱ yooꞌ tu̱ku̱ te̱ tu̱ku̱ tu̱ꞌu̱n nde̱iꞌ,
te̱ tu̱ku̱ te̱ tu̱ku̱ tu̱ ña̱ kaꞌán tyuunꞌ,
te̱ tu̱ku̱ te̱ tu̱ku̱ tu̱ yuku̱n ña̱ nde̱iꞌ kaꞌán ra̱ nuu̱ꞌ e̱ꞌ,
te̱ tu̱ku̱ te̱ tu̱ku̱ tu̱ yu̱ꞌuꞌ nde̱iꞌ ja̱a̱nꞌ saniaꞌá ra̱ yooꞌ siee ña̱ yoso̱ꞌ yoꞌoꞌ,
te̱ siee ña̱ yoso̱ꞌ tu̱ku̱ xaanꞌ kaꞌán ra̱ xiinꞌ e̱ꞌ”,
katyi ra̱.
11 Va̱ꞌa̱,
su̱u̱ xiinꞌ tu̱ꞌu̱n ndiaꞌndi̱a̱ kaꞌa̱n Ndiosí xiinꞌ ne̱ yivi̱ꞌ kaa̱ꞌ,
te̱ kaꞌa̱n tu̱ a̱ xiinꞌ ni̱a̱ xiinꞌ tu̱ꞌu̱n ña̱ ndatuꞌunꞌ i̱nga̱ ne̱ yivi̱ꞌ.
12 Xa̱ ni̱ kaꞌa̱n Ndiosí xiinꞌ ne̱ ja̱a̱nꞌ xta̱ꞌanꞌ ndii:
“Yoꞌoꞌ ku̱vi̱ na̱ndiee̱ꞌ ndo̱ꞌ,
na na̱ndiee̱ꞌ ne̱ xa̱ ni̱ xa̱vi va̱ yoꞌoꞌ ndii,
i̱i̱n xaanꞌ miiꞌ taxi̱nꞌ kaaꞌ miiꞌ ku̱vi̱ na̱ndiee̱ꞌ e̱ꞌ nduuꞌ a̱”,
ni̱ katyi̱ a̱.
Ndisu̱ nï̱ xiinꞌ ne̱ ja̱a̱nꞌ ta̱xi̱ so̱ꞌo̱ ni̱a̱ ña̱ ni̱ kaꞌa̱n a̱.
13 Sa̱kanꞌ na kuiiꞌ tu̱ku̱ ni̱ kaꞌa̱n Yahvé xiinꞌ te̱ ja̱a̱nꞌ sa̱kuuꞌ tu̱ꞌu̱n nde̱iꞌ a̱,
te̱ tu̱ku̱ te̱ tu̱ku̱ tu̱ꞌu̱n nde̱iꞌ,
te̱ tu̱ku̱ te̱ tu̱ku̱ tu̱ ña̱ kaꞌán tyuunꞌ,
te̱ tu̱ku̱ te̱ tu̱ku̱ tu̱ yuku̱n ña̱ nde̱iꞌ kaꞌán a̱ nuu̱ꞌ ne̱ nduuꞌ kuenta a̱,
te̱ tu̱ku̱ te̱ tu̱ku̱ tu̱ yu̱ꞌuꞌ nde̱iꞌ ja̱a̱nꞌ saniaꞌá ña̱ꞌaꞌ a̱ siee ña̱ yoso̱ꞌ yoꞌoꞌ,
te̱ siee ña̱ yoso̱ꞌ tu̱ku̱ xaanꞌ kaꞌa̱n a̱ xiinꞌ ni̱a̱,
sa̱kanꞌ te̱ ke̱kiꞌi̱ ni̱a̱ te̱ ndu̱va̱ ni̱a̱ ñu̱ꞌuꞌ,
te̱ koyo̱ ni̱a̱ nuu̱ꞌ tunꞌ ii̱ꞌ te̱ na̱ti̱i̱n ña̱ꞌaꞌ te̱ xíinꞌ.
Yoꞌoꞌ kaniꞌ kuento Isaías ne̱ ndieeꞌ ñu̱u̱ Jerusalén
14 Xaꞌa̱ꞌ a̱ ja̱a̱nꞌ na kuiiꞌ ndoꞌó,
te̱ ndieeꞌ ñu̱u̱ Jerusalén,
te̱ xaꞌndia tyuunꞌ,
te̱ xandiꞌiꞌ ndii,
ku̱ni̱ so̱ꞌo̱ ndo̱ꞌ ña̱ kaꞌán Yahvé xiinꞌ ndo̱ꞌ.
15 Ndoꞌó kaꞌán ndii:
“Xa̱ ni̱ ndoo̱ ndu̱ꞌ kuento xiinꞌ ña̱ xiꞌí,
te̱ xa̱ ni̱ na̱kuita̱ kuento ndu̱ xiinꞌ ñu̱u̱ ndi̱i,
sa̱kanꞌ te̱ kii̱ꞌ xkaꞌndi̱a̱ kuiꞌe̱ ku̱ndo̱ꞌo̱ sa̱kuuꞌ ne̱ yivi̱ꞌ ndii,
köo̱ꞌ a̱ sa̱a̱ a̱ xiinꞌ ndu̱.
Nuu̱ꞌ tu̱n vixi̱ xa̱ ni̱ ndu̱kuꞌ ndu̱ miiꞌ ku̱vi̱ kaku̱ ndu̱ nuu̱ꞌ kuiꞌe̱ ja̱a̱nꞌ,
te̱ ña̱ xini xaꞌanꞌ ja̱a̱nꞌ ko̱to̱ ndu̱”,
katyi ndo̱ꞌ.
16 Sa̱kanꞌ na kuiiꞌ kaꞌán Yahvé ndii:
“Tyi̱nduꞌu̱ꞌ i̱ i̱i̱n yuu̱ꞌ ña̱ va̱ꞌa̱ va̱ kaaꞌ,
ña̱ kuaꞌa̱n xiki̱ꞌ vi̱ꞌe̱ xíniꞌ i̱kuꞌ Sión.
Yuu̱ꞌ ja̱a̱nꞌ ndii,
i̱i̱n yuu̱ꞌ tiꞌeꞌ xa̱va̱ꞌa̱ nduuꞌ a̱,
te̱ xa̱ ni̱ na̱ka̱xi̱n te̱ yivi̱ꞌ a̱,
te̱ ña̱ ja̱a̱nꞌ ku̱nduꞌu̱ꞌ nu̱uꞌ xiki̱ꞌ vi̱ꞌe̱,
te̱ yo̱o̱ ka̱ i̱ni̱ xini yuu̱ꞌ ja̱a̱nꞌ ndii,
köo̱ꞌ xa̱tyiꞌ ña̱ sa̱ndiꞌni̱ nimá ni̱a̱.
17 Sa̱kanꞌ na kuiiꞌ ko̱to̱ ku̱a̱ꞌa̱ i̱ sa̱kuuꞌ ndoꞌó,
te̱ xaꞌndia tyuunꞌ,
te̱ ndieeꞌ ñu̱u̱ Jerusalén ja̱a̱nꞌ,
xiinꞌ yo̱ꞌoꞌ ña̱ kiꞌinꞌ ku̱ꞌva̱ te̱ yivi̱ꞌ,
te̱ ku̱ni̱ i̱ naaꞌ xatyuunꞌ nda̱ku ndo̱ꞌ,
te̱ ko̱to̱ ku̱a̱ꞌa̱ i̱ ndoꞌó nde̱e̱ naa xaaꞌ te̱ xaꞌa vi̱ꞌe̱ tiinꞌ ra̱ plomo,
te̱ ku̱ni̱ i̱ naaꞌ te̱ i̱i̱n nda̱a̱ꞌ nimá nduuꞌ sa̱kuuꞌ ndo̱ꞌ.
Iꞌinꞌ sa̱nduxín ndo̱o̱ ña̱ ni̱ xa̱ꞌa̱ ndo̱ꞌ xiinꞌ tu̱n vixi̱,
te̱ kaku̱ ndo̱ꞌ,
katyi mi̱iꞌ ndo̱ꞌ.
Te̱ xaꞌa̱ꞌ a̱ ña̱ xiinꞌ tu̱n vixi̱ ni̱ xa̱ꞌa̱ ndo̱ꞌ miiꞌ kaku̱ ndo̱ꞌ ja̱a̱nꞌ ndii,
sa̱nduxín ña̱ꞌaꞌ te̱ñuꞌu̱ꞌ.
18 Te̱ kuento ña̱ xa̱ ni̱ ndoo̱ ndo̱ꞌ xiinꞌ ña̱ xiꞌí ndii,
ni̱ sa̱kuatyiꞌ ña̱ꞌaꞌ Ndiosí,
te̱ sa̱kanꞌ tu̱ ña̱ xa̱ ni̱ na̱kuita̱ ndo̱ꞌ kuento xiinꞌ ñu̱u̱ ndi̱i ndii,
kü̱vi̱ ka̱ tyi̱ndi̱e̱eꞌ a̱ ndoꞌó,
te̱ kii̱ꞌ xkaꞌndi̱a̱ kuiꞌe̱ xatu̱ ña̱ ku̱ndo̱ꞌo̱ sa̱kuuꞌ ne̱ yivi̱ꞌ ndii,
xi̱ꞌna̱ ka̱ ndoꞌó ka̱ꞌni̱ꞌ a̱.
19 Te̱ i̱ꞌi̱n i̱tyiꞌ kii̱ꞌ ki̱xi̱n a̱ ndii,
ka̱ñu̱u̱ a̱ ndoꞌó,
te̱ sa̱a̱ ni̱a̱ꞌa̱ ki̱xi̱n a̱,
te̱ ki̱xi̱n tu̱ a̱ i̱i̱n keꞌinꞌ xiinꞌ ñu̱u”,
katyi a̱.
Te̱ kii̱ꞌ ku̱ni̱ ndo̱ꞌ kuento ña̱ ku̱a̱xi̱ ña̱ ja̱a̱nꞌ ndii,
ku̱yi̱ꞌvi xa̱va̱ꞌa̱ ndo̱ꞌ nde̱e̱ ki̱si̱ vi̱ꞌ a̱ ndoꞌó.
20 Ku̱ndu̱u̱ a̱ nde̱e̱ naa ña̱ kanduꞌu̱ꞌ i̱i̱n ne̱ yivi̱ꞌ nuu̱ꞌ i̱i̱n tunꞌ xto̱ kuiti va̱,
te̱ kü̱vi̱ sa̱na̱kaá xiinꞌ miiꞌ ni̱a̱,
uun nde̱e̱ naa ti̱saꞌvi̱ xiinꞌ miiꞌ ni̱a̱ xiinꞌ i̱i̱n ti̱ka̱tyiꞌ kuiti xa̱va̱ꞌa̱,
te̱ kü̱vi̱ sa̱nakaá ni̱a̱ xaꞌa̱ꞌ ni̱a̱.
21 Yahvé ndii,
sa̱ndoꞌoꞌ a̱ te̱ ja̱a̱nꞌ nde̱e̱ naa ni̱ xa̱a̱ a̱ xíniꞌ i̱kuꞌ ña̱ naniꞌ Perazim xta̱ꞌanꞌ,
te̱ na̱kaꞌa̱n a̱ xaꞌa̱ꞌ ne̱ nduuꞌ kuenta a̱ nde̱e̱ naa ni̱ xa̱a̱ a̱ yo̱soꞌ ña̱ naniꞌ Gabaón xta̱ꞌanꞌ.
Te̱ tyu̱u̱n ña̱ sa̱a̱ a̱ ja̱a̱nꞌ ndii,
siinꞌ va̱ ko̱o̱ a̱,
te̱ köo̱ꞌ nde̱e̱ i̱i̱n ne̱ yivi̱ꞌ ni̱ xini a̱.
22 Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii,
xa̱ ni̱ kaꞌa̱n kaxiꞌ a̱ ña̱ xa̱ i̱i̱n nda̱a̱ꞌ a̱ ni̱ ta̱xi̱ i̱ni̱ a̱ ña̱ sa̱nduxín a̱ sa̱kuuꞌ ne̱ vi̱ꞌe̱ Israel,
sa̱kanꞌ na kuiiꞌ sä̱ndi̱ꞌi̱ ka̱ ndo̱ꞌ xiinꞌ a̱,
sa̱kanꞌ ña̱ naaꞌ sa̱ndi̱ꞌi̱ naa xandiꞌiꞌ ndo̱ꞌ xiinꞌ a̱ ndii,
tyiee̱ ka̱ tu̱ndoꞌo̱ꞌ ta̱xi̱ a̱ ku̱ndo̱ꞌo̱ ndo̱ꞌ.
23 Ku̱ni̱ so̱ꞌo̱ ndo̱ꞌ ña̱ kaꞌán i̱ xiinꞌ ndo̱ꞌ,
te̱ ta̱xi̱ so̱ꞌo̱ kaxiꞌ va̱ ndo̱ꞌ ña̱ kaꞌán i̱,
te̱ tyu̱nxaꞌaꞌ va̱ tu̱ ndo̱ꞌ tu̱ꞌu̱n yu̱ꞌuꞌ i̱.
24 Kii̱ꞌ xitoꞌ tyi̱ꞌi̱ i̱i̱n te̱ xatyuunꞌ xaꞌa̱ꞌ kuꞌu̱ ndii,
süu̱ꞌ xa̱ nuu̱ꞌ ñu̱ꞌuꞌ taꞌviꞌ ra̱ ndu̱viꞌ,
ni̱ nde̱e̱ süu̱ꞌ xa̱nuu̱ꞌ ñu̱ꞌuꞌ tikoꞌndoꞌ taꞌviꞌ ra̱ uun sakuatyiꞌ ra̱,
te̱ natandieeꞌ i̱i̱n katyi ra̱ a̱ ndu̱viꞌ.
25 Kii̱ꞌ ndi̱ꞌi̱ ndasaꞌ i̱i̱n katyi ra̱ nuu̱ꞌ ñu̱ꞌuꞌ,
te̱ xa̱ꞌaꞌ ra̱ tyiꞌiꞌ ra̱ ndi̱kinꞌ eneldo xiinꞌ ndi̱kinꞌ komino,
ndi̱ꞌi̱ ja̱a̱nꞌ te̱ tyiꞌiꞌ yuku̱n ra̱ ndi̱kinꞌ trigo,
te̱ sa̱a̱ kuaꞌa̱n nuu̱ꞌ kuꞌu̱ tyiꞌiꞌ ra̱ ndi̱kinꞌ cebada xiinꞌ ndi̱kinꞌ centeno.
26 Sa̱kanꞌ ña̱ mi̱iꞌ Ndiosí saniaꞌá ña̱ꞌaꞌ sa̱a̱ tyi̱ꞌi̱ ra̱ ndi̱kinꞌ ja̱a̱nꞌ.
27 Ndi̱kinꞌ eneldo ndii,
süu̱ꞌ xiinꞌ tunꞌ tisiꞌin nda̱ꞌaꞌ kuu̱nꞌ te̱ yivi̱ꞌ a̱,
ni̱ nde̱e̱ ndi̱kinꞌ comino kuäsa̱ꞌ saxkaꞌndíá te̱ yivi̱ꞌ ndixa̱nꞌ carreta xata̱ꞌ te̱ kuu̱nꞌ ra̱ a̱,
süu̱ꞌ ja̱a̱nꞌ ndii,
xata̱ꞌ i̱tunꞌ ku̱i̱ti̱ꞌ suku̱ꞌ ra̱ i̱ti̱a̱ eneldo te̱ sakuunꞌ ra̱ ndi̱kinꞌ a̱,
te̱ comino ndii,
ndu̱ku̱ ku̱i̱ti̱ꞌ suku̱ꞌ ra̱ xata̱ꞌ a̱ te̱ kuu̱nꞌ ra̱ ndi̱kinꞌ a̱.
28 Ndi̱kinꞌ trigo ndii,
tuxiꞌ ne̱ yivi̱ꞌ a̱,
ndisu̱ süu̱ꞌ tuxiꞌ ni̱a̱ nde̱e̱ ku̱a̱tyi̱ xa̱tyiꞌ a̱,
te̱ saxkaꞌndíá te̱ yivi̱ꞌ ndixa̱nꞌ carreta xata̱ꞌ ndi̱kinꞌ comino,
te̱ tava̱ꞌ ra̱ soo̱ꞌ a̱,
ndisu̱ kuäsa̱ꞌ sakuatyiꞌ xiꞌe̱ xa̱tyiꞌ ra̱ nde̱e̱ ndi̱kinꞌ a̱.
29 Te̱ sa̱kuuꞌ ña̱ xaaꞌ ne̱ yivi̱ꞌ xiinꞌ ndi̱kinꞌ ja̱a̱nꞌ ndii,
mi̱iꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ni̱ ta̱xi̱ ña̱ xini tuní nuu̱ꞌ ni̱a̱ te̱ ku̱vi̱ xaaꞌ ni̱a̱ ña̱ ja̱a̱nꞌ.