Yoꞌoꞌ kaꞌán tiakú Isaías xaꞌa̱ꞌ ña̱ sa̱kakú Ndiosí ne̱ vi̱ꞌe̱ Israel xiinꞌ xaꞌa̱ꞌ ña̱ na̱ndi̱koꞌ ni̱a̱ nuu̱ꞌ ñu̱ꞌuꞌ ni̱a̱
27
Kii̱ꞌ xaa̱ kivi̱ꞌ ja̱a̱nꞌ ndii,
sa̱tu̱xuꞌví Yahvé ku̱a̱kuꞌ,
tiꞌ naniꞌ leviatán,
xiinꞌ ityi̱ tyiee̱ xíinꞌ va̱ ña̱ niꞌiꞌ a̱.
Te̱ ku̱a̱kuꞌ ja̱a̱nꞌ ndii,
ka̱ma̱ va̱ riꞌ,
te̱ ndi̱ꞌviꞌ va̱ tu̱ riꞌ,
te̱ ka̱ꞌni̱ꞌ tu̱ a̱ ko̱tyiꞌ,
tiꞌ i̱yo̱ va̱ kaaꞌ naá mi̱ni̱ kaꞌnuꞌ.
2 Kaꞌa̱n Ndiosí kivi̱ꞌ ja̱a̱nꞌ ndii:
“Ka̱ta̱ ndi̱a̱a̱ ndo̱ꞌ ya̱a̱ nuu̱ꞌ ne̱ vi̱ꞌe̱ Israel,
sa̱kanꞌ ña̱ nduuꞌ ne̱ ja̱a̱nꞌ nde̱e̱ naa uva ña̱ nda̱tu̱nꞌ xa̱va̱ꞌa̱.
3 Te̱ yuꞌu̱,
Yahvé,
xitoꞌ ña̱ꞌaꞌ,
te̱ i̱ꞌi̱n kivi̱ꞌ kuaꞌa̱n taxiꞌ i̱ ña̱ xaxi̱ꞌ ni̱a̱ nde̱e̱ naa xaaꞌ te̱ xitoꞌ yo̱ꞌoꞌ uva ra̱,
te̱ kosó tu̱ ra̱ a̱.
Xitoꞌ ña̱ꞌaꞌ i̱ ndu̱viꞌ xiinꞌ niiꞌ ñu̱u ko̱to̱ ka̱ ke̱ta̱ ña̱ sa̱ndoꞌoꞌ ña̱ꞌaꞌ.
4 Sa̱kanꞌ ña̱ kuäsa̱ꞌ xiꞌé ka̱ i̱ xini ne̱ vi̱ꞌe̱ Israel ja̱a̱nꞌ,
te̱ naaꞌ xaaꞌ ni̱a̱ ña̱ ni̱a̱ꞌa ña̱ nduuꞌ nde̱e̱ naa i̱ñu̱ꞌ kuii̱ꞌ,
uun naaꞌ xaaꞌ ni̱a̱ ku̱a̱tyi̱ ña̱ nduuꞌ nde̱e̱ naa ndi̱kiꞌi̱ꞌ ndii,
ku̱ntaꞌanꞌ i̱ xiinꞌ sa̱kuuꞌ ku̱a̱tyi̱ ni̱a̱ ja̱a̱nꞌ,
te̱ ka̱ꞌmi̱ xa̱tyiꞌ i̱ sa̱kuuꞌ a̱.
5 Naaꞌ kuní ni̱a̱ ña̱ ko̱to̱ ña̱ꞌaꞌ i̱ ndii,
na ki̱xi̱n ni̱a̱ nuu̱ꞌ i̱ te̱ kaꞌa̱n ni̱a̱ ña̱ tyi̱ndi̱e̱eꞌ ña̱ꞌaꞌ i̱,
na na̱koo̱ ni̱a̱ ña̱ mani̱ꞌ xiinꞌ i̱”,
katyi̱ a̱.
6 Nuu̱ꞌ kuꞌu̱n e̱ꞌ ndii,
na̱taꞌvi̱ꞌ tu̱ku̱u̱ ne̱ si̱a̱niꞌ Jacob,
te̱ ndu̱kuaꞌa̱ꞌ xa̱va̱ꞌa̱ ne̱ vi̱ꞌe̱ Israel ja̱a̱nꞌ,
te̱ sa̱kuuꞌ ni̱a̱ ku̱a̱ꞌnu̱ va̱ꞌa̱,
te̱ sa̱kutuꞌ ni̱a̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ xiinꞌ siꞌe̱ ni̱a̱.
7 Xiní e̱ꞌ ndii,
kuäsa̱ꞌ ni̱ sa̱ndoꞌoꞌ Yahvé ne̱ nduuꞌ kuenta a̱ nde̱e̱ naa ni̱ sa̱ndoꞌoꞌ a̱ te̱ ni̱ sa̱ndoꞌoꞌ ne̱ Israel ja̱a̱nꞌ.
Te̱ kuäsa̱ꞌ tu̱ ni̱ xa̱ꞌni̱ꞌ a̱ ne̱ vi̱ꞌe̱ Israel nde̱e̱ naa ni̱ xa̱ꞌni̱ꞌ a̱ sa̱kuuꞌ te̱ ni̱ xa̱ꞌni̱ꞌ ne̱ ja̱a̱nꞌ.
8 Süu̱ꞌ ja̱a̱nꞌ ndii,
ni̱ sa̱ndoꞌoꞌ a̱ ne̱ vi̱ꞌe̱ Israel ja̱a̱nꞌ,
te̱ ni̱ naka̱n a̱ kuenta nuu̱ꞌ ni̱a̱ xaꞌa̱ꞌ ku̱a̱tyi̱ ni̱a̱,
ni̱ xa̱ti̱a̱ i̱ꞌnu̱ xikaꞌ ña̱ꞌaꞌ a̱ nuu̱ꞌ i̱nga̱ ñu̱ꞌuꞌ,
te̱ ni̱ xa̱a̱ a̱ xiinꞌ ni̱a̱ nde̱e̱ naa ne̱ ni̱ ka̱ñu̱u̱ tatyi̱ꞌ i̱ꞌniꞌ ndi̱e̱eꞌ va̱ ña̱ kuaxi̱ miiꞌ ketaꞌ ñu̱ꞌu̱.
9 Ndisu̱ ko̱o̱ kaꞌnuꞌ i̱ni̱ Ndiosí xaꞌa̱ꞌ ña̱ ni̱a̱ꞌa ña̱ ni̱ xa̱a̱ ne̱ si̱a̱niꞌ xikaꞌ Jacob ja̱a̱nꞌ,
te̱ sa̱ndoyoꞌ a̱ sa̱kuuꞌ ku̱a̱tyi̱ ni̱a̱ kii̱ꞌ ta̱ni̱ ni̱a̱ sa̱kuuꞌ altar miiꞌ itaꞌ ndiosí,
ña̱ xakaꞌnuꞌ ni̱a̱,
te̱ sa̱kuatyiꞌ xiꞌe̱ ndo̱o̱ ni̱a̱ yuu̱ꞌ ña̱ ni̱ ka̱a̱ xiinꞌ altar ja̱a̱nꞌ nde̱e̱ na̱ndu̱u̱ a̱ ya̱kaꞌ xa̱tyiꞌ.
Te̱ na nä̱ka̱ni̱ ka̱ ni̱a̱ nde̱e̱ i̱i̱n ña̱ nianiaꞌ ndiosí,
ña̱ naniꞌ Asera,
ni̱ nde̱e̱ i̱i̱n nda̱a̱ꞌ ña̱ nianiaꞌ ñu̱ꞌu̱ ndöo̱ ka̱ ku̱i̱i̱n i̱kanꞌ te̱ sa̱kaꞌnuꞌ ña̱ꞌaꞌ ni̱a̱.
10 Nduxi̱n ka̱niiꞌ ñu̱u̱ ña̱ ndasi i̱ꞌnu̱ kutu̱ꞌ va̱ miiꞌ ndieeꞌ ni̱a̱ vi̱ti̱n,
te̱ ku̱ndu̱u̱ a̱ nde̱e̱ naa vi̱ꞌe̱ ña̱ xa̱ na̱ko̱o̱ ne̱ yivi̱ꞌ,
uun nde̱e̱ naa miiꞌ i̱tyi kaaꞌ miiꞌ köo̱ꞌ nde̱e̱ i̱i̱n ne̱ yivi̱ꞌ ndieeꞌ.
Te̱ ku̱a̱ꞌnu̱ kuaꞌa̱ꞌ kuꞌu̱ xatu̱ nuu̱ꞌ a̱,
te̱ i̱kanꞌ ku̱ꞌu̱n si̱ndiki̱ꞌ ka̱xi̱ꞌ riꞌ kuꞌu̱,
te̱ i̱kanꞌ tu̱ ka̱xi̱ꞌ si̱ndiki̱ꞌ tiakiꞌ nda̱ꞌaꞌ i̱tunꞌ xiinꞌ ti̱kundu̱ kii̱ꞌ ndieeꞌ riꞌ nandiee̱ꞌ riꞌ.
11 Te̱ kii̱ꞌ ityi̱ nda̱ꞌaꞌ i̱i̱n i̱tunꞌ i̱kanꞌ ndii,
taꞌnu̱ a̱ te̱ ki̱xi̱n ña̱ꞌaꞌ te̱ na̱ꞌi̱ ni̱a̱ nu̱ꞌ ka̱ꞌmi̱ ni̱a̱.
Sa̱kanꞌ ña̱ ne̱ vi̱ꞌe̱ Israel ndii,
ne̱ na̱a̱ kuuꞌ nduuꞌ ni̱a̱ te̱ küuꞌ kaxiꞌ tu̱ ni̱a̱,
ku̱a̱tyi̱ ndii,
sa̱kuuꞌ ni̱a̱ ku̱u̱ xikaꞌ nuu̱ꞌ Ndiosí,
ña̱ ni̱ xaꞌa̱ꞌ ña̱ꞌaꞌ,
te̱ kü̱vi̱ta i̱ni̱ a̱ xaꞌa̱ꞌ ni̱a̱ ni̱ nde̱e̱ kü̱ndaꞌvi tu̱ i̱ni̱ a̱ xaꞌa̱ꞌ ni̱a̱.
12 Kivi̱ꞌ ja̱a̱nꞌ ndii,
na̱ka̱ya̱ Yahvé sa̱kuuꞌ ndoꞌó,
ne̱ vi̱ꞌe̱ Israel,
nde̱e̱ naa xaaꞌ ne̱ yivi̱ꞌ kii̱ꞌ kuu̱nꞌ ni̱a̱ ndi̱kinꞌ trigo.
Xa̱ꞌaꞌ a̱ xiinꞌ ne̱ ndieeꞌ nde̱e̱ yu̱ꞌuꞌ i̱ti̱a̱ Éufrates,
te̱ kuꞌu̱n ndi̱koꞌ a̱ nde̱e̱ xiinꞌ ne̱ ndieeꞌ nde̱e̱ yu̱ꞌuꞌ i̱ti̱a̱ ña̱ xkaꞌndíá nde̱e̱ nuu̱ꞌ ñu̱ꞌuꞌ Egipto,
te̱ na̱ndaa̱ꞌ na̱ndaa̱ꞌ ndo̱ꞌ na̱ka̱ya̱ a̱.
13 Te̱ kivi̱ꞌ ja̱a̱nꞌ ndii,
ndeꞌi̱ tiꞌeꞌ xa̱va̱ꞌa̱ nda̱tyuunꞌ tunꞌ niꞌiꞌ i̱tyiꞌ,
te̱ ne̱ yivi̱ꞌ,
ne̱ ni̱ kiku̱ kuaꞌa̱n nuu̱ꞌ ñu̱ꞌuꞌ Asiria xiinꞌ ne̱ ni̱ xi̱kuꞌu̱n nda̱ꞌaꞌ te̱ xíinꞌ te̱ kuaꞌa̱n ni̱a̱ nde̱e̱ nuu̱ꞌ ñu̱ꞌuꞌ Egipto ndii,
na̱ndi̱koꞌ ni̱a̱ ñu̱u̱ Jerusalén te̱ sa̱kaꞌnuꞌ ni̱a̱ Yahvé xíniꞌ i̱kuꞌ su̱ꞌu̱n miiꞌ kanduꞌu̱ꞌ ñu̱u̱ Jerusalén.