Yoꞌoꞌ ku̱a̱xi̱ ya̱a̱ ña̱ ka̱ta̱ ne̱ yivi̱ꞌ nuu̱ꞌ Ndiosí xaꞌa̱ꞌ a̱ ña̱ ni̱ sa̱kakú ña̱ꞌaꞌ a̱
26
Kivi̱ꞌ ja̱a̱nꞌ ndii,
ya̱a̱ yoꞌoꞌ ka̱ta̱ sa̱kuuꞌ ne̱ vi̱ꞌe̱ Judá kaꞌa̱n ni̱a̱ ndii:
“Ñu̱u̱ e̱ꞌ ndii,
i̱i̱n ñu̱u̱ ña̱ ndasi kutu̱ꞌ va̱ nduuꞌ a̱,
te̱ ku̱vi̱ kaku̱ e̱ꞌ ti̱xi̱n a̱,
sa̱kanꞌ ña̱ mi̱iꞌ Ndiosí ni̱ xa̱ꞌa̱ nama̱ sukun va̱ ña̱ ndasi i̱ꞌnu̱ a̱,
te̱ ni̱ xa̱kutu̱ꞌ va̱ ña̱ꞌaꞌ a̱.
2 Nu̱niaꞌ ndo̱ꞌ sa̱kuuꞌ yiꞌeꞌ te̱ ko̱ꞌni̱ sa̱kuuꞌ ne̱ xatyuunꞌ nda̱ku,
ne̱ sa̱xinu̱ ña̱ ndi̱xa̱ xaꞌa̱ꞌ Ndiosí.
3 Yoꞌó,
Tákuiꞌe Ndiosí,
sa̱kuuꞌ ne̱ xanini te̱ xanini xaꞌa̱ꞌ u̱nꞌ ndii,
xitoꞌ mani̱ꞌ ña̱ꞌaꞌ u̱nꞌ,
sa̱kanꞌ ña̱ i̱ni̱ ni̱a̱ xini ni̱a̱ yoꞌó.
4 I̱ni̱ ndo̱ꞌ ku̱ni̱ ndo̱ꞌ Yahvé nde̱e̱ ndiꞌiꞌ ni̱ kivi̱ꞌ,
sa̱kanꞌ ña̱ ña̱ ja̱a̱nꞌ nduuꞌ ña̱ xitoꞌ yooꞌ,
te̱ nduuꞌ a̱ nde̱e̱ naa yuu̱ꞌ ña̱ köo̱ꞌ kivi̱ꞌ ndoñuꞌuꞌ.
5 Sa̱kanꞌ ña̱ ni̱ sa̱ndo̱ñuꞌuꞌ a̱ sa̱kuuꞌ ne̱ ñuñuꞌ,
ne̱ ndieeꞌ va̱ꞌa̱,
te̱ ni̱ sa̱ndo̱ñuꞌuꞌ tu̱ a̱ sa̱kuuꞌ ñu̱u̱ ña̱ kaniꞌiꞌ xiinꞌ miiꞌ miiꞌ ndieeꞌ ne̱ ñuñuꞌ ja̱a̱nꞌ,
te̱ ni̱ sa̱kaꞌanꞌ ña̱ꞌaꞌ a̱,
te̱ nde̱e̱ nuu̱ꞌ ñu̱ꞌuꞌ ni̱ xa̱ti̱a̱ ña̱ꞌaꞌ a̱.
6 Te̱ vi̱ti̱n ndii,
ne̱ ndaꞌvi kuuꞌ xiinꞌ ne̱ natiín xeꞌní ndo̱so̱ꞌ ñu̱u̱ ja̱a̱nꞌ xikaꞌ ni̱a̱.”
7 Ndisu̱ ne̱ xatyuunꞌ nda̱ku ndii,
kuäsa̱ꞌ ki̱ni̱ kaaꞌ i̱tyiꞌ xikaꞌ ni̱a̱,
ni̱ nde̱e̱ kuäsa̱ꞌ tu̱ yoo ña̱ kueinꞌ nuu̱ꞌ i̱tyiꞌ ja̱a̱nꞌ.
Sa̱kanꞌ ña̱ yoꞌó ndii,
Ndiosí ña̱ xatyuunꞌ nda̱ku nduuꞌ u̱nꞌ,
te̱ ndasaꞌ nda̱ku u̱nꞌ i̱tyiꞌ miiꞌ xikaꞌ ne̱ xatyuunꞌ nda̱ku ja̱a̱nꞌ.
8 Tákuiꞌe Yahvé,
sa̱kanꞌ tu̱ nduꞌu̱ ndii,
niaꞌá ndu̱ ña̱ i̱ni̱ ndu̱ xini ndu̱ yoꞌó xaꞌa̱ꞌ a̱ ña̱ sa̱xinu̱ ndu̱ ña̱ kaꞌán tyuunꞌ tu̱ꞌu̱n nde̱iꞌ u̱nꞌ,
te̱ yoꞌó ku̱i̱ti̱ꞌ ndi̱e̱eꞌ va̱ kaꞌán nimá ndu̱ sa̱kaꞌnuꞌ ndu̱.
9 Xiinꞌ i̱i̱n kaniiꞌ nimá i̱ nandukuꞌ i̱ yoꞌó sa̱a̱ ñu̱u,
te̱ ndi̱e̱eꞌ va̱ kaꞌán nimá i̱ sa̱a̱ ni̱a̱ꞌa̱ ña̱ kuni ku̱ni̱ i̱ nuu̱ꞌ u̱nꞌ,
sa̱kanꞌ ña̱ kii̱ꞌ sanaꞌmá yoꞌó ne̱ yivi̱ꞌ i̱i̱n yivi̱ꞌ ndii,
ku̱nda̱ni̱ sa̱kuuꞌ ni̱a̱ sa̱a̱ sa̱tyuunꞌ nda̱ku ni̱a̱.
10 Ndiosí,
tee̱ꞌ ndee ku̱vi̱ta i̱ni̱ u̱nꞌ xaꞌa̱ꞌ ne̱ xaaꞌ ña̱ ni̱a̱ꞌa ndii,
köo̱ꞌ kivi̱ꞌ sa̱tyuunꞌ nda̱ku ne̱ ja̱a̱nꞌ.
Tee̱ꞌ ndee ku̱ni̱ ne̱ ja̱a̱nꞌ xatyuunꞌ nda̱ku i̱nga̱ ne̱ yivi̱ꞌ ndii,
kuaꞌa̱n naa kuaꞌa̱n ni̱a̱ xaaꞌ ni̱a̱ ña̱ ni̱a̱ꞌa,
te̱ xäaꞌ ni̱a̱ kuenta kuuꞌ ña̱ kaꞌnuꞌ va̱ yoꞌó,
Yahvé.
11 Yahvé,
xa̱ ni̱ ndo̱ni̱ꞌi̱ yoꞌó nda̱ꞌaꞌ u̱nꞌ,
te̱ xäaꞌ ne̱ ja̱a̱nꞌ kuenta vi̱ꞌ,
ndisu̱ ku̱ka̱ꞌa̱n va̱ nuu̱ꞌ ni̱a̱ kii̱ꞌ ku̱ni̱ ni̱a̱ ña̱ kaꞌán va̱ u̱nꞌ xaꞌa̱ꞌ ne̱ nduuꞌ kuenta u̱nꞌ.
Te̱ na ko̱ko̱ ni̱a̱ nuu̱ꞌ ñuꞌu̱ ña̱ ni̱ sa̱kooꞌ tu̱ꞌva̱ u̱nꞌ xaꞌa̱ꞌ ne̱ ndasiꞌ taꞌanꞌ xiinꞌ u̱nꞌ.
12 Yahvé,
yoꞌó nduuꞌ ña̱ xaaꞌ sa̱kanꞌ te̱ ndieeꞌ mani̱ꞌ ndu̱,
sa̱kanꞌ ña̱ yoꞌó nduuꞌ ña̱ tyindieeꞌ ndu̱,
te̱ ku̱vi̱ sa̱xinu̱ ndu̱ sa̱kuuꞌ tyu̱u̱n nuu̱ꞌ ndu̱.
13 Yahvé,
Ndiosí ña̱ xakaꞌnuꞌ ndu̱,
kiꞌinꞌ i̱nga̱ xto̱ꞌo̱ ni̱ xi̱ko̱ niꞌiꞌ ndu̱,
ndisu̱ i̱i̱n nda̱a̱ꞌ yoꞌó ku̱i̱ti̱ꞌ nduuꞌ xna̱ꞌa̱ xto̱ꞌo̱ ña̱ xitoꞌ kaꞌnuꞌ ndu̱.
14 Xa̱ ni̱ xiꞌi̱ sa̱kuuꞌ te̱ ni̱ nduu̱ xto̱ꞌo̱ ndu̱,
te̱ ni̱ xika̱ nu̱u̱ ndu̱ nuu̱ꞌ ja̱a̱nꞌ,
te̱ köo̱ꞌ kivi̱ꞌ ka̱ na̱ti̱a̱ku̱ nde̱e̱ i̱i̱n ra̱ nde̱e̱ ndi̱ka̱ndi̱ ku̱i̱ti̱ꞌ nduuꞌ ra̱.
Te̱ köo̱ꞌ kivi̱ꞌ ka̱ ki̱e̱e̱ nde̱e̱ i̱i̱n ra̱ ti̱xi̱n yavi̱ ndi̱i̱ te̱ na̱ndi̱koꞌ ra̱.
Mi̱iꞌ yoꞌó ni̱ ku̱ntaꞌanꞌ xiinꞌ ra̱,
te̱ ni̱ sa̱nduxín xa̱tyiꞌ ña̱ꞌaꞌ u̱nꞌ,
te̱ xa̱ xta̱ꞌanꞌ va̱ ni̱ na̱ndoso̱ꞌ sa̱kuuꞌ ne̱ yivi̱ꞌ xaꞌa̱ꞌ ra̱.
15 Tákuiꞌe Yahvé,
ni̱ nda̱sa̱ kuaꞌa̱ꞌ u̱nꞌ nduꞌu̱,
ne̱ nduuꞌ kuenta u̱nꞌ,
ni̱ nda̱sa̱ kuaꞌa̱ꞌ u̱nꞌ ndu̱ te̱ ki̱ꞌi̱n kaꞌnuꞌ ndu̱ yoꞌó,
te̱ ni̱ nda̱sa̱ kuaꞌa̱ꞌ ka̱ tu̱ u̱nꞌ ñu̱ꞌuꞌ ndu̱ kii̱ꞌ ni̱ sa̱nu̱ndiaꞌá u̱nꞌ xeꞌinꞌ sa̱a̱ kuaꞌa̱n nuu̱ꞌ ñu̱ꞌuꞌ ndu̱.
16 Yahvé,
kii̱ꞌ ndoꞌoꞌ ndu̱ ndii,
ni̱ na̱ndu̱kuꞌ ndu̱ yoꞌó,
te̱ kii̱ꞌ ni̱ sa̱ndoꞌoꞌ xa̱va̱ꞌa̱ u̱nꞌ ndu̱ ndii,
ndee ñuꞌuꞌ yu̱ꞌuꞌ ku̱i̱ti̱ꞌ ndu̱,
te̱ ni̱ kaꞌa̱n ndu̱ si̱u̱ꞌunꞌ xiinꞌ u̱nꞌ.
17 Tákuiꞌe Yahvé,
ni̱ ndo̱ꞌo̱ ndu̱ nde̱e̱ naa i̱i̱n ña̱ꞌaꞌ kii̱ꞌ uꞌvi̱ va̱ xini aꞌ ña̱ xa̱ xitoꞌ tuvi̱ siꞌe̱ aꞌ,
ndeꞌí aꞌ nde̱e̱ sakuiyoꞌ xiinꞌ miiꞌ vi̱ꞌ aꞌ,
te̱ niiꞌ sa̱kanꞌ vi̱ꞌ ni̱ ndo̱ꞌo̱ ndu̱ nuu̱ꞌ yoꞌó kii̱ꞌ ni̱ sa̱ndoꞌoꞌ u̱nꞌ ndu̱.
18 Uꞌvi̱ xa̱va̱ꞌa̱ ni̱ xi̱ni̱ ndu̱ kii̱ꞌ ni̱ sa̱kakuꞌ ndu̱,
ndisu̱ köo̱ꞌ nde̱e̱ i̱i̱n ña̱ꞌa̱ ni̱ sa̱kakuꞌ ndu̱,
te̱ köo̱ꞌ nde̱e̱ i̱i̱n ña̱ sakakú ne̱ yivi̱ꞌ ni̱ sa̱kakuꞌ ndu̱ nuu̱ꞌ ñu̱ꞌuꞌ i̱i̱n yivi̱ꞌ,
ni̱ nde̱e̱ köo̱ꞌ tu̱ nde̱e̱ i̱i̱n ne̱ yivi̱ꞌ ni̱ sa̱kakuꞌ ndu̱,
te̱ ku̱ndi̱e̱e̱ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ.
19 Ndisu̱ ne̱ nduuꞌ kuenta yoꞌó,
ne̱ xiꞌí ndii,
na̱ti̱a̱ku̱ ni̱a̱.
Te̱ ñu̱ꞌuꞌ ndeꞌi̱ ni̱a̱ ndii,
tu̱ku̱ ni̱ ki̱e̱e̱ a̱ ti̱xi̱n yavi̱ ndi̱i̱,
te̱ na̱ti̱a̱ku̱ ni̱a̱.
Ndoꞌó,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ,
ndo̱to̱ nuu̱ꞌ ndo̱ꞌ te̱ ku̱a̱aꞌ tiꞌeꞌ ndo̱ꞌ ña̱ va̱ꞌa̱ va̱ kuni ndo̱ꞌ.
Ndiosí,
ñuꞌu̱ yoꞌó ña̱ taxiꞌ kivi̱ꞌ ñu̱u̱ ndu̱ ndii,
nduuꞌ a̱ nde̱e̱ naa yuyuꞌ ña̱ koyó sa̱a̱ ni̱a̱ꞌa̱ miiꞌ ñuꞌuꞌ ne̱ nduuꞌ kuenta u̱nꞌ ñu̱u̱ ndi̱i.
20 Ndoꞌó,
ne̱ nduuꞌ ne̱ taꞌanꞌ i̱,
ko̱ꞌni̱ kiꞌi̱ꞌ ndo̱ꞌ vi̱ꞌe̱ ndo̱ꞌ,
te̱ nda̱si̱ ndo̱ꞌ yiꞌeꞌ ndo̱ꞌ kii̱ꞌ ndiꞌvi̱ ndo̱ꞌ,
te̱ ti̱si̱ꞌe ndo̱ꞌ i̱i̱n xaꞌaꞌ nde̱e̱ ska̱tyiꞌ xkaꞌndi̱a̱ ña̱ xiꞌé va̱ Yahvé.
21 Ko̱o̱ tu̱ꞌva̱ ndo̱ꞌ,
sa̱kanꞌ ña̱ nä̱ꞌaꞌ ka̱ te̱ ke̱ta̱ a̱ miiꞌ nduꞌu̱ꞌ a̱,
te̱ ki̱xi̱n sa̱ndoꞌoꞌ a̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱.
Te̱ ñu̱ꞌuꞌ i̱i̱n yivi̱ꞌ ndii,
na̱tava̱ꞌ tuviꞌ a̱ sa̱kuuꞌ ne̱ yivi̱ꞌ,
ne̱ ni̱ xiꞌi̱ ni̱ xa̱a̱ ne̱ xaꞌni̱ꞌ,
te̱ tï̱si̱ꞌe ka̱ ña̱ꞌaꞌ a̱ nuu̱ꞌ Ndiosí.