Yoꞌoꞌ ku̱a̱xi̱ ya̱a̱ ña̱ ni̱ xi̱ta̱ Isaias nuu̱ꞌ Ndiosí
25
Yahvé,
yoꞌó nduuꞌ Ndiosí yuꞌu̱,
sa̱kanꞌ ña̱ yoꞌó ku̱i̱ti̱ꞌ nduuꞌ ña̱ kiꞌinꞌ kaꞌnuꞌ i̱,
te̱ nuu̱ꞌ yoꞌó ku̱i̱ti̱ꞌ sa̱kaꞌnuꞌ i̱.
Ku̱a̱tyi̱ ndii,
ni̱ xa̱a̱ u̱nꞌ kuaꞌa̱ꞌ va̱ ña̱ nandani̱ ña̱ xa̱ ni̱ tyi̱tuní u̱nꞌ nde̱e̱ xta̱ꞌanꞌ kivi̱ꞌ,
te̱ vi̱ti̱n ndii,
xa̱ ni̱ sa̱xinu̱ u̱nꞌ ña̱ ja̱a̱nꞌ.
2 Sa̱kuuꞌ ñu̱u̱ kaꞌnuꞌ va̱ ndii,
ni̱ sa̱ndo̱ñuꞌuꞌ xa̱tyiꞌ u̱nꞌ u̱n,
te̱ ndee xiꞌe̱ yuu̱ꞌ ku̱i̱ti̱ꞌ ni̱ ndoo̱ miiꞌ ni̱ ndiee̱ a̱,
te̱ ñu̱u̱ ña̱ ndasi i̱ꞌnu̱ kutu̱ꞌ va̱ ndii,
ni̱ sa̱nduxín ndo̱o̱ u̱nꞌ,
te̱ vi̱ꞌe̱ kaꞌnuꞌ,
ña̱ kutu̱ꞌ va̱ yoo miiꞌ ndieeꞌ te̱ tukuꞌ xaꞌndia tyuunꞌ ra̱ ndii,
ni̱ sa̱nduxín ndo̱o̱ tu̱ u̱nꞌ ña̱ ja̱a̱nꞌ,
te̱ köo̱ꞌ kivi̱ꞌ na̱ka̱ta̱ ka̱ te̱ yivi̱ꞌ a̱.
3 Sa̱kanꞌ na kuiiꞌ sa̱kaꞌnuꞌ ne̱ ndieeꞌ sa̱kuuꞌ ñu̱u̱ ña̱ kaꞌnuꞌ va̱ yoꞌó,
te̱ sa̱kanꞌ tu̱ sa̱kaꞌnuꞌ ne̱ ndieeꞌ sa̱kuuꞌ ñu̱u̱ miiꞌ ni̱a̱ꞌa va̱ ne̱ yivi̱ꞌ yoꞌó.
4 Sa̱kanꞌ ña̱ yoꞌó nduuꞌ nde̱e̱ naa vi̱ꞌe̱ sukun miiꞌ ku̱vi̱ kaku̱ ne̱ ndaꞌvi kuuꞌ,
te̱ su̱vi̱ tu̱ u̱nꞌ nduuꞌ ña̱ xitoꞌ ne̱ natiín kii̱ꞌ ndoꞌoꞌ ni̱a̱ xaꞌa̱ꞌ ña̱ꞌa̱,
te̱ su̱vi̱ tu̱ u̱nꞌ nduuꞌ ña̱ xitoꞌ ne̱ yivi̱ꞌ kii̱ꞌ kuunꞌ kuiꞌe̱ savi̱ꞌ,
te̱ su̱vi̱ tu̱ u̱nꞌ nduuꞌ ka̱tiꞌ nuu̱ꞌ ne̱ yivi̱ꞌ kii̱ꞌ i̱ꞌniꞌ va̱.
Sa̱kanꞌ ña̱ ña̱ ni̱a̱ꞌa,
ña̱ xaaꞌ ne̱ yivi̱ꞌ,
ne̱ ni̱a̱ꞌa va̱ xiinꞌ ne̱ natiín ndii,
nduuꞌ a̱ nde̱e̱ naa savi̱ꞌ kii̱ꞌ kuunꞌ kuiꞌe̱ a̱,
te̱ xa̱ kuni sa̱nduva a̱ nama̱ ña̱ ndasi i̱ꞌnu̱ ñu̱u̱,
5 uun nde̱e̱ naa xaaꞌ ña̱ i̱ꞌniꞌ xa̱va̱ꞌa̱ miiꞌ kaaꞌ i̱tyi.
Nde̱e̱ sa̱a̱ ka̱ ni̱ ndii,
mi̱iꞌ yoꞌó saiinꞌ kuiín ña̱ ñuñuꞌ ne̱ tukuꞌ,
ne̱ ku̱a̱xi̱ tu̱ku̱ xaanꞌ,
nde̱e̱ naa xaaꞌ u̱nꞌ kii̱ꞌ saiinꞌ kuiín u̱nꞌ ña̱ i̱ꞌniꞌ ja̱a̱nꞌ xiinꞌ ka̱tiꞌ viko̱ꞌ.
Niiꞌ sa̱kanꞌ tu̱ kavikoꞌ ndi̱e̱eꞌ u̱nꞌ ne̱ ni̱a̱ꞌa va̱ ña̱ ko̱o̱ taxi̱nꞌ yu̱ꞌuꞌ ni̱a̱.
6 Xíniꞌ i̱kuꞌ Sión yoꞌoꞌ ndii,
sakooꞌ tu̱ꞌva̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ña̱ xaxi̱ꞌ asi̱nꞌ xa̱va̱ꞌa̱ xaꞌa̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ sakooꞌ tu̱ꞌva̱ tu̱ a̱ vino va̱ꞌa̱ xa̱va̱ꞌa̱.
Te̱ ña̱ xaxi̱ꞌ ja̱a̱nꞌ ndii,
i̱i̱n nuu̱ꞌ ña̱ xaxi̱ꞌ asi̱nꞌ nde̱e̱ xaꞌa̱n ndi̱koꞌ nduuꞌ a̱,
te̱ vino ndii,
i̱i̱n nuu̱ꞌ teꞌ ya̱taꞌ xavixínꞌ xa̱va̱ꞌa̱ nduuꞌ raꞌ.
7 Xíniꞌ i̱kuꞌ Sión yoꞌoꞌ sa̱kuatyiꞌ Ndiosí sa̱kuuꞌ ña̱ ndoꞌoꞌ ne̱ yivi̱ꞌ,
ne̱ ndiee i̱i̱n yivi̱ꞌ,
xiinꞌ sa̱kuuꞌ ña̱ xaꞌni̱ꞌ ña̱ꞌaꞌ,
ña̱ nduuꞌ nde̱e̱ naa toto̱ ndiká ña̱ tiasi nuu̱ꞌ sa̱kuuꞌ ne̱ tukuꞌ,
te̱ sa̱kuatyiꞌ tu̱ a̱ toto̱ ndiká ña̱ tiasi nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ.
8 Sa̱ndo̱ñuꞌuꞌ xa̱tyiꞌ Yahvé ña̱ xaꞌni̱ꞌ ne̱ yivi̱ꞌ i̱i̱n yivi̱ꞌ nde̱e̱ a̱ma̱a̱ ka̱ ni̱ kivi̱ꞌ,
te̱ nde̱e̱ ndiꞌiꞌ ni̱ tu̱ kivi̱ꞌ sa̱na̱yaaꞌ a̱ ti̱kui nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ ña̱ ni̱ xa̱ku̱ ni̱a̱.
Te̱ sa̱ndiꞌiꞌ tu̱ a̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ña̱ sakaꞌanꞌ ne̱ yivi̱ꞌ,
sa̱kuuꞌ ne̱ nduuꞌ kuenta a̱.
Te̱ mi̱iꞌ Yahvé nduuꞌ ña̱ ni̱ kaꞌa̱n ña̱ sa̱a̱ a̱ sa̱kuuꞌ ña̱ ja̱a̱nꞌ.
9 Te̱ kaꞌa̱n ne̱ yivi̱ꞌ kivi̱ꞌ ja̱a̱nꞌ ndii:
“Ña̱ yo̱ꞌo̱ꞌ nduuꞌ Ndiosí ña̱ xakaꞌnuꞌ e̱ꞌ.
Te̱ i̱i̱n nda̱a̱ꞌ ña̱ kaa̱ꞌ ku̱i̱ti̱ꞌ i̱ni̱ e̱ꞌ xini e̱ꞌ,
sa̱kanꞌ ña̱ ña̱ kaa̱ꞌ nduuꞌ ña̱ ni̱ sa̱kakú yooꞌ,
te̱ i̱ni̱ e̱ꞌ xini ña̱ꞌaꞌ e̱ꞌ.
Na na̱ku̱a̱tiaꞌ e̱ꞌ,
te̱ na va̱ꞌa̱ tu̱ ku̱ni̱ e̱ꞌ nuu̱ꞌ a̱ xaꞌa̱ꞌ a̱ ña̱ ni̱ sa̱kakú a̱ yooꞌ”,
katyi̱ ni̱a̱.
10 Ku̱a̱tyi̱ ndii,
ka̱ta̱ni̱ nda̱ꞌaꞌ Yahvé nuu̱ꞌ i̱kuꞌ Sión yoꞌoꞌ,
te̱ ko̱to̱ ña̱ꞌaꞌ a̱.
Ndisu̱ ne̱ ndieeꞌ Moab ndii,
ka̱tavi̱ a̱ sa̱kuuꞌ ni̱a̱ nde̱e̱ naa xaaꞌ ne̱ yivi̱ꞌ kii̱ꞌ xeꞌní ni̱a̱ i̱ti̱a̱ i̱tyiꞌ nuu̱ꞌ mi̱ꞌiꞌ.
11 Ka̱ta̱ni̱ ne̱ ja̱a̱nꞌ nda̱ꞌaꞌ ni̱a̱ nde̱e̱ naa xaaꞌ ne̱ yivi̱ꞌ kii̱ꞌ su̱ntiaꞌ ni̱a̱ sanakaá ni̱a̱ nda̱ꞌaꞌ ni̱a̱.
Ndisu̱ sa̱kuuꞌ i̱tyiꞌ kii̱ꞌ sanakaá ni̱a̱ nda̱ꞌaꞌ ni̱a̱ ndii,
so̱ꞌo̱ kunu ka̱ sa̱koyó ña̱ꞌaꞌ Ndiosí nuu̱ꞌ ña̱ ñuñuꞌ ni̱a̱.
12 Sa̱nduva tu̱ a̱ nama̱ sukun ña̱ itaꞌ kutu̱ꞌ va̱,
ña̱ ndasi i̱ꞌnu̱ ñu̱u̱ ni̱a̱,
sa̱kaꞌanꞌ va̱ a̱ nuu̱ꞌ ne̱ Moab ja̱a̱nꞌ te̱ nde̱e̱ nuu̱ꞌ ñu̱ꞌuꞌ ka̱ti̱a̱ ña̱ꞌaꞌ a̱.