Yoꞌoꞌ kaꞌán tiakú Isaías xaꞌa̱ꞌ ña̱ sa̱ndoꞌoꞌ Ndiosí sa̱kuuꞌ ne̱ yivi̱ꞌ i̱i̱n yivi̱ꞌ
24
Ko̱to̱ ndo̱ꞌ,
xa̱ xitoꞌ sa̱nduxín xa̱tyiꞌ Yahvé ka̱niiꞌ ñu̱ꞌuꞌ i̱i̱n yivi̱ꞌ,
te̱ sa̱ndo̱ñuꞌuꞌ a̱ sa̱kuuꞌ ña̱ yoo nuu̱ꞌ a̱.
Ki̱si̱ ndi̱e̱eꞌ va̱ Yahvé ka̱niiꞌ ñu̱ꞌuꞌ i̱i̱n yivi̱ꞌ te̱ ki̱ku̱ꞌ a̱ sa̱kuuꞌ ne̱ yivi̱ꞌ i̱i̱n yivi̱ꞌ.
2 Te̱ i̱i̱n ni̱ nda̱ꞌaꞌ ku̱ndo̱ꞌo̱ naa kuuꞌ sutu̱ xiinꞌ ne̱ yivi̱ꞌ ndaꞌvi so̱ꞌo̱,
naa kuuꞌ ne̱ xikaꞌ nuuꞌ so̱ꞌo̱ xiinꞌ xto̱ꞌo̱ ni̱a̱,
naaꞌ kuuꞌ ñaꞌ xikaꞌ nuuꞌ so̱ꞌo̱ xiinꞌ ñaꞌ ni̱ ndu̱kuꞌ ña̱ꞌaꞌ,
naa kuuꞌ ne̱ sata̱ꞌ ña̱ꞌa̱ xiinꞌ ne̱ xiko̱ꞌ a̱,
naa kuuꞌ ne̱ satatu xu̱ꞌunꞌ xiinꞌ ne̱ tatu a̱,
naa kuuꞌ ne̱ kumiꞌ vi̱ꞌe̱ miiꞌ taxaꞌa ne̱ yivi̱ꞌ xu̱ꞌunꞌ xiinꞌ ne̱ tatu xu̱ꞌunꞌ vi̱ꞌe̱ ja̱a̱nꞌ.
3 Ka̱niiꞌ ñu̱ꞌuꞌ i̱i̱n yivi̱ꞌ nduxi̱n xa̱tyiꞌ,
te̱ ndo̱ñuꞌuꞌ ndo̱o̱ ña̱ yoo nuu̱ꞌ a̱,
sa̱kanꞌ ña̱ miiꞌ Yahvé ni̱ kaꞌa̱n tyuunꞌ ña̱ sa̱kanꞌ ku̱ndo̱ꞌo̱ a̱.
4 Xa̱ ni̱ na̱ya̱a̱ ndo̱o̱ ñu̱ꞌuꞌ i̱i̱n yivi̱ꞌ vi̱ti̱n,
te̱ ni̱ ityi̱ tu̱ sa̱kuuꞌ ña̱ yoo nuu̱ꞌ a̱,
te̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ni̱ ndo̱ko̱ ti̱kui,
te̱ ndaꞌvi va̱ kuni a̱,
te̱ ndaꞌvi va̱ tu̱ kuni sa̱kuuꞌ ne̱ vikaꞌ yoo ka̱niiꞌ i̱i̱n yivi̱ꞌ.
5 Xa̱ ni̱ ti̱viꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ni̱ xa̱a̱ ne̱ yivi̱ꞌ,
ne̱ ndieeꞌ nuu̱ꞌ a̱,
sa̱kanꞌ ña̱ xa̱ ni̱ xaꞌnu̱ ni̱a̱ sa̱kuuꞌ ña̱ kaꞌán tu̱ꞌu̱n nde̱iꞌ Ndiosí,
te̱ ni̱ xa̱ so̱ꞌo̱ sa̱kuuꞌ ni̱a̱ ña̱ kaꞌán tyuunꞌ tu̱ꞌu̱n nde̱iꞌ a̱,
te̱ ni̱ xaꞌnu̱ tu̱ ni̱a̱ kuento ña̱ ni̱ ta̱xi̱ a̱ nuu̱ꞌ ni̱a̱ kii̱ꞌ ni̱ kaꞌa̱n a̱ xiinꞌ ni̱a̱ ña̱ nde̱e̱ ndiꞌiꞌ ni̱ kivi̱ꞌ ni̱ ndoo̱ a̱ kuento a̱ ja̱a̱nꞌ xiinꞌ ni̱a̱.
6 Sa̱kanꞌ na kuiiꞌ natyaꞌanꞌ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ kumiꞌ ku̱a̱tyi̱,
xaꞌa̱ꞌ ja̱a̱nꞌ na sa̱kuuꞌ ni̱a̱ ndoꞌoꞌ tu̱ndoꞌo̱ꞌ ja̱a̱nꞌ.
Xaꞌa̱ꞌ a̱ ja̱a̱nꞌ naa kuiiꞌ xa̱ ndiꞌiꞌ ni̱a̱,
te̱ ndee ndiaꞌviꞌ ku̱i̱ti̱ꞌ ni̱a̱ ni̱ ndoo̱.
7 Ityí ndo̱o̱ yo̱ꞌoꞌ uva,
te̱ köo̱ꞌ ka̱ xa̱tyiꞌ vino xa̱aꞌ yoo,
te̱ sa̱kuuꞌ te̱ xiꞌiꞌ vino ndii,
tanaꞌ ndi̱i ra̱ te̱ kusutyiꞌ va̱ tu̱ i̱ni̱ ra̱.
8 Xa̱ ni̱ xi̱kuii̱n tu̱ ña̱ sii̱ꞌ kuuꞌ xandaaꞌ te̱ yivi̱ꞌ,
te̱ kisiꞌ ra̱ ti̱ko̱ko̱,
te̱ ni̱ xi̱kuii̱n tu̱ ña̱ tiakú kuaaꞌ ne̱ yivi̱ꞌ ña̱ va̱ꞌa̱ kuni ni̱a̱ ndieeꞌ sii̱ꞌ ni̱a̱.
9 Köo̱ꞌ ka̱ vino xiꞌiꞌ ne̱ yivi̱ꞌ,
ni̱ nde̱e̱ köo̱ꞌ ka̱ tu̱ ya̱a̱ xini so̱ꞌo̱ ni̱a̱,
te̱ nde̱e̱ te̱ xtani̱ va̱ ko̱ꞌo̱ vino ndii,
uva̱ raꞌ nuu̱ꞌ ra̱ kivi̱ꞌ ja̱a̱nꞌ.
10 Xa̱ ni̱ nduxi̱n ndo̱o̱ ñu̱u̱ miiꞌ ki̱ni̱ va̱ ndieeꞌ ne̱ yivi̱ꞌ,
te̱ ndasi ndo̱o̱ vi̱ꞌe̱ sa̱kuuꞌ ne̱ yivi̱ꞌ,
te̱ nde̱e̱ i̱i̱n köo̱ꞌ ku̱vi̱ ndiꞌvi̱.
11 Te̱ sa̱a̱ kuaꞌa̱n ya̱ꞌya̱ kuaaꞌ ne̱ yivi̱ꞌ xaꞌa̱ꞌ a̱ ña̱ köo̱ꞌ ka̱ vino ko̱ꞌo̱ ni̱a̱,
te̱ xa̱ ni̱ ndi̱ꞌi̱ sa̱kuuꞌ ña̱ va̱ꞌa̱ kuni ne̱ yivi̱ꞌ,
te̱ ña̱ nakuatiaꞌ ni̱a̱ ndii,
xa̱ ni̱ ndi̱ꞌi̱ ndo̱o̱ a̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
12 Xa̱ ni̱ nduxi̱n ndo̱o̱ ka̱niiꞌ ñu̱u̱,
te̱ vitu̱ꞌ tunꞌ ndasiꞌ yiꞌeꞌ ñu̱u̱ ndii,
ni̱ tya̱tyi̱ xiꞌe̱ ndo̱o̱ nu̱ꞌ.
13 Niiꞌ sa̱kanꞌ tu̱ ku̱ndo̱ꞌo̱ ne̱ yivi̱ꞌ ka̱niiꞌ ma̱ꞌiꞌ ñu̱ꞌuꞌ i̱i̱n yivi̱ꞌ ndee ndiaꞌviꞌ ku̱i̱ti̱ꞌ ni̱a̱ ndoo̱,
nde̱e̱ naa xaaꞌ a̱ kii̱ꞌ kisiꞌ ndi̱e̱eꞌ ne̱ yivi̱ꞌ tunꞌ olivo te̱ sakoyó ni̱a̱ nduu̱ꞌ nda̱ꞌaꞌ nu̱ꞌ,
uun nde̱e̱ naa kii̱ꞌ nakaya ne̱ yivi̱ꞌ ndiaꞌviꞌ ka̱ uva ña̱ ni̱ ndoo̱ kii̱ꞌ xa̱ ni̱ ndi̱ꞌi̱ ni̱ ke̱ndiaa̱ꞌ ne̱ yivi̱ꞌ sa̱kuuꞌ a̱.
14 Ndisu̱ ne̱ ndiaꞌviꞌ ne̱ ni̱ kaku̱ ndii,
ka̱ta̱ tiꞌeꞌ sii̱ꞌ ni̱a̱ nuu̱ꞌ Ndiosí kii̱ꞌ ku̱ni̱ ni̱a̱ ña̱ kaꞌnuꞌ va̱ ña̱ nduuꞌ Yahvé,
te̱ nde̱e̱ tu̱ku̱ taꞌviꞌ xi̱o̱o̱ mi̱ni̱ ku̱ndi̱e̱e̱ ne̱ ja̱a̱nꞌ te̱ sa̱kaꞌnuꞌ ña̱ꞌaꞌ ni̱a̱.
15 Na sa̱kaꞌnuꞌ sa̱kuuꞌ ndoꞌó,
ne̱ ndieeꞌ xtoꞌniꞌ miiꞌ ketaꞌ ñu̱ꞌu̱,
xiinꞌ sa̱kuuꞌ ndoꞌó,
ne̱ ndieeꞌ sa̱a̱ kuaꞌa̱n yu̱ꞌuꞌ mi̱ni̱ kaꞌnuꞌ,
Yahvé Ndiosí,
ña̱ xakaꞌnuꞌ ne̱ vi̱ꞌe̱ Israel.
16 Nde̱e̱ miiꞌ xaꞌa̱n ndi̱ꞌi̱ ñu̱ꞌuꞌ i̱i̱n yivi̱ꞌ ni̱ xi̱ni̱ so̱ꞌo̱ ndu̱ tiakú xitaꞌ ne̱ yivi̱ꞌ,
kaꞌán ni̱a̱ ndii:
“Kiꞌinꞌ kaꞌnuꞌ va̱ Ndiosí,
ne̱ xatyuunꞌ nda̱ku nuu̱ꞌ a̱”,
katyi ni̱a̱.
Ndisu̱ yuꞌu̱ kaꞌán ndii:
“Ndaꞌvi va̱ ndoꞌoꞌ yuꞌu̱,
ndaꞌvi va̱ ndoꞌoꞌ yuꞌu̱.
Te̱ sikiꞌ ndii,
tiinꞌ sikiꞌ va̱ ra̱ ne̱ yivi̱ꞌ,
te̱ tyituní tu̱ ra̱ sa̱a̱ ku̱vi̱ ti̱i̱n sikiꞌ na ti̱i̱n sikiꞌ ka̱ ra̱ ne̱ yivi̱ꞌ”,
katyi i̱.
17 Sa̱kuuꞌ ndoꞌó,
ne̱ yivi̱ꞌ i̱i̱n yivi̱ꞌ ndii,
ku̱ndo̱ꞌo̱ ndo̱ꞌ ña̱ i̱yo̱ va̱,
te̱ koyo̱ ndo̱ꞌ nuu̱ꞌ tunꞌ ii̱ꞌ,
te̱ koyo̱ tu̱ ndo̱ꞌ nuu̱ꞌ ñu̱nu̱.
18 Yo̱o̱ ka̱ xinuꞌ nuu̱ꞌ ña̱ kuaaꞌ ne̱ yivi̱ꞌ ña̱ yiꞌvi ni̱a̱ ndii,
koyo̱ ni̱a̱ nuu̱ꞌ tunꞌ ii̱ꞌ ja̱a̱nꞌ,
te̱ yo̱o̱ ka̱ kaku̱ nuu̱ꞌ tunꞌ ii̱ꞌ ja̱a̱nꞌ ndii,
na̱ma̱ ni̱a̱ ti̱xi̱n ñu̱nu̱ꞌ ña̱ sékun ña̱ꞌaꞌ te̱ yivi̱ꞌ.
Sa̱kanꞌ ña̱ ni̱ nuni̱a̱ꞌ yiꞌeꞌ ndi̱viꞌ te̱ ndi̱e̱eꞌ xa̱va̱ꞌa̱ ta̱a̱n xaꞌa̱ꞌ ñu̱ꞌuꞌ i̱i̱n yivi̱ꞌ.
19 Te̱ ndi̱e̱eꞌ xa̱va̱ꞌa̱ ta̱a̱n ñu̱ꞌuꞌ i̱i̱n yivi̱ꞌ,
te̱ ndata̱ꞌ ka̱niiꞌ a̱,
te̱ ku̱a̱tyi̱ a̱,
te̱ taꞌvi̱ꞌ ka̱niiꞌ a̱,
te̱ vi̱kuꞌu̱n kuiꞌe̱ ndo̱o̱ a̱.
20 Ñu̱ꞌuꞌ i̱i̱n yivi̱ꞌ ndii,
ta̱a̱n ndi̱e̱eꞌ va̱ a̱ nde̱e̱ naa kisiꞌ a̱ i̱i̱n te̱ xini̱,
te̱ ndi̱e̱eꞌ va̱ se̱koꞌ ña̱ꞌaꞌ ña̱ kanda nde̱e̱ naa xaaꞌ vi̱ꞌe̱ ndaꞌvi ña̱ xa̱ kuni tani̱ kuii.
Te̱ xaꞌa̱ꞌ a̱ ña̱ kuaꞌa̱ꞌ va̱ ku̱a̱tyi̱ ne̱ yivi̱ꞌ i̱i̱n yivi̱ꞌ ndii,
tani̱ xa̱tyiꞌ ñu̱ꞌuꞌ i̱i̱n yivi̱ꞌ ja̱a̱nꞌ,
te̱ köo̱ꞌ kivi̱ꞌ ndu̱va̱ꞌa̱ a̱.
21 Kivi̱ꞌ ja̱a̱nꞌ ndii,
sa̱ndoꞌoꞌ Yahvé sa̱kuuꞌ ña̱ ni̱a̱ꞌa ña̱ xaꞌndia tyuunꞌ,
ña̱ ndieeꞌ te̱i̱n viko̱ꞌ,
te̱ sa̱kanꞌ tu̱ sa̱ndoꞌoꞌ a̱ sa̱kuuꞌ te̱ yivi̱ꞌ,
te̱ nduuꞌ rey nuu̱ꞌ ñu̱ꞌuꞌ i̱i̱n yivi̱ꞌ.
22 Nda̱sa̱ i̱i̱n ña̱ꞌaꞌ Yahvé ti̱xi̱n yavi̱ kunu va̱,
te̱ ta̱a̱n ti̱ꞌvi̱ ña̱ꞌaꞌ a̱ i̱kanꞌ nde̱e̱ naa xaaꞌ te̱ yivi̱ꞌ xiinꞌ te̱ ñuꞌuꞌ vi̱ꞌe̱ ka̱a̱,
te̱ kii̱ꞌ yaꞌa̱ kuaꞌa̱ꞌ kivi̱ꞌ te̱ sa̱ndoꞌoꞌ ña̱ꞌaꞌ a̱.
23 Kii̱ꞌ sa̱kanꞌ ndii,
nu̱u̱ ña̱ nda̱tu̱nꞌ va̱ yoo̱ꞌ,
te̱ ña̱ yiꞌé ñu̱ꞌu̱ ndii,
ndi̱ꞌi̱ a̱.
Sa̱kanꞌ ña̱ mi̱iꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ka̱ꞌndi̱a̱ tyuunꞌ ñu̱u̱ Jerusalén kivi̱ꞌ ja̱a̱nꞌ.
Te̱ sa̱kuuꞌ te̱ kuuꞌ nu̱uꞌ nuu̱ꞌ ne̱ nduuꞌ kuenta a̱ ndieeꞌ ñu̱u̱ ja̱a̱nꞌ ndii,
ku̱ni̱ nuu̱ꞌ ra̱ ña̱ ña̱ kaꞌnuꞌ va̱ nduuꞌ a̱.