Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ ndieeꞌ ñu̱u̱ Tiro xiinꞌ ne̱ ndieeꞌ ñu̱u̱ Sidón
23
Ña̱ yo̱ꞌo̱ꞌ nduuꞌ ña̱ ni̱ kaꞌa̱n tiakú Ndiosí xiinꞌ i̱ ña̱ sa̱a̱ a̱ xiinꞌ ne̱ ku̱a̱xi̱ xiko̱ꞌ ña̱ꞌa̱ ñu̱u̱ Tiro:
Ku̱a̱ku̱ sa̱kuuꞌ ndoꞌó,
te̱ xiinꞌ ña̱ꞌa̱ tunꞌ ndo̱oꞌ naꞌnuꞌ,
tunꞌ ni̱ ki̱e̱e̱ ñu̱u̱ Tarsis,
sa̱kanꞌ ña̱ xa̱ ni̱ nduxi̱n ndo̱o̱ yiꞌeꞌ ñu̱u̱ Tiro ja̱a̱nꞌ,
te̱ nde̱e̱ i̱i̱n nda̱a̱ꞌ vi̱ꞌe̱ köo̱ꞌ ka̱ ni̱ ndoo̱ iinꞌ miiꞌ xikuitá tunꞌ ndo̱oꞌ ja̱a̱nꞌ,
te̱ nde̱e̱ köo̱ꞌ ka̱ tu̱ miiꞌ ku̱vi̱ ko̱ꞌni̱ ndo̱ꞌ tunꞌ ndo̱oꞌ ndo̱ꞌ i̱kanꞌ.
Te̱ nde̱e̱ ñu̱u̱ Quitim ku̱a̱xi̱ ra̱,
te̱ ni̱ xi̱ni̱ ra̱ kuento xaꞌa̱ꞌ ña̱ ni̱ ndo̱ꞌo̱ ñu̱u̱ Tiro ja̱a̱nꞌ.
2 Te̱ sa̱kuuꞌ ndoꞌó,
ne̱ ndieeꞌ sa̱a̱ kuaꞌa̱n yu̱ꞌuꞌ mi̱ni̱ miiꞌ naá ñu̱u̱ Sidón xiinꞌ ndoꞌó,
ne̱ xiko̱ꞌ ña̱ꞌa̱ ñu̱u̱ ja̱a̱nꞌ ndii,
taxi̱nꞌ ko̱o̱ yu̱ꞌuꞌ ndo̱ꞌ,
ndoꞌó ne̱ ndieeꞌ ñu̱u̱ ja̱a̱nꞌ nduuꞌ ne̱ xkaꞌndíá nuu̱ꞌ mi̱ni̱ kaꞌnuꞌ xiinꞌ tunꞌ ndo̱oꞌ,
te̱ sata̱ꞌ ndo̱ꞌ ña̱ kuní nuu̱ꞌ ndo̱ꞌ.
3 Te̱ nuu̱ꞌ ti̱kui mi̱ni̱ ja̱a̱nꞌ ni̱ ki̱xi̱n tunꞌ ndo̱oꞌ xiinꞌ sa̱kuuꞌ ndi̱kinꞌ ña̱ yoo nde̱e̱ nuu̱ꞌ ñu̱ꞌuꞌ Egipto,
ña̱ ni̱ koso̱ ne̱ yivi̱ꞌ xiinꞌ ti̱kui i̱ti̱a̱ Nilo.
Te̱ xa̱ ndoꞌó ku̱i̱ti̱ꞌ nduuꞌ ne̱ xiko̱ꞌ ña̱ꞌa̱ nuu̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ.
4 Ndoꞌó,
ne̱ ndieeꞌ ñu̱u̱ Sidón,
na ku̱ka̱ꞌa̱n xa̱va̱ꞌa̱ nuu̱ꞌ ndo̱ꞌ,
ndoꞌó ne̱ xaꞌndia tyuunꞌ nuu̱ꞌ mi̱ni̱ ja̱a̱nꞌ,
sa̱kanꞌ ña̱ xa̱ ni̱ kaꞌa̱n mi̱ni̱ kaꞌnuꞌ ja̱a̱nꞌ ndii:
“Köo̱ꞌ kivi̱ꞌ ni̱ sa̱kakuꞌ i̱ ña̱ kuañuꞌu̱,
te̱ ni̱ nde̱e̱ nï̱ sa̱kitúꞌ tu̱ i̱ ña̱ kuañuꞌu̱,
ni̱ nde̱e̱ nï̱ sa̱kuaꞌnuꞌ tu̱ i̱ te̱ sa̱va̱,
ni̱ nde̱e̱ nï̱ yoo̱ꞌ tu̱ ña̱ꞌaꞌ siꞌe̱ i̱,
te̱ sa̱niaꞌá ña̱ꞌaꞌ i̱ te̱ ko̱o̱ ni̱a̱ i̱i̱n yivi̱ꞌ”,
ni̱ katyi̱ a̱.
5 Te̱ kii̱ꞌ ku̱ni̱ so̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto sa̱kuuꞌ ña̱ ni̱ ndo̱ꞌo̱ ñu̱u̱ Tiro yoꞌoꞌ ndii,
ku̱ndi̱ꞌni̱ xa̱va̱ꞌa̱ ni̱a̱.
6 Te̱ kaꞌa̱n ni̱a̱ xiinꞌ sa̱kuuꞌ ne̱ ndieeꞌ ñu̱u̱ Tarsis ndii:
“Sa̱kuuꞌ ndoꞌó,
ne̱ ndieeꞌ ñu̱u̱ Tarsis ndii,
kuaꞌan ndo̱ꞌ te̱ ku̱a̱ku̱ va̱ ndo̱ꞌ”,
katyi̱ ni̱a̱.
7 Ñu̱u̱ Tiro kaa̱ꞌ nduuꞌ ña̱ ni̱ xi̱ka̱nduꞌu̱ꞌ xta̱ꞌanꞌ kivi̱ꞌ xa̱va̱ꞌa̱,
te̱ ne̱ ni̱ ndiee̱ ñu̱u̱ kaa̱ꞌ ni̱ nduu̱ ne̱ xtani̱ va̱ ka̱sa̱ꞌa̱ vi̱koꞌ.
Te̱ kuaꞌa̱ꞌ ne̱ ni̱ ndiee̱ kaa̱ꞌ kuaꞌa̱n tu̱ku̱ ñu̱ꞌuꞌ,
te̱ ni̱ ndoo̱ ni̱a̱ ndieeꞌ ni̱a̱ i̱kanꞌ.
8 ¿Yo̱o̱ tu̱ ni̱ kaꞌa̱n tuní te̱ ku̱ndo̱ꞌo̱ ñu̱u̱ Tiro kaa̱ꞌ sa̱kanꞌ ña̱ nduuꞌ i̱i̱n ñu̱u̱ kaꞌnuꞌ va̱,
te̱ kaa̱ꞌ ni̱ yoo̱ te̱ xiko̱ꞌ ña̱ꞌa̱,
te̱ xaꞌndia tyuunꞌ kuuꞌ nu̱uꞌ,
te̱ te̱ kooꞌ tyukuuꞌ va̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
ni̱ nduu̱ te̱ sata̱ꞌ ña̱ꞌa̱ te̱ ndieeꞌ ñu̱u̱ kaa̱ꞌ,
te̱ naxiko̱ꞌ ra̱ a̱?
9 Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ni̱ kaꞌa̱n tuní ña̱ sa̱kaꞌanꞌ a̱ sa̱kuuꞌ ne̱ ñuñuꞌ,
te̱ sa̱nduxín tu̱ a̱ sa̱kuuꞌ te̱ kuuꞌ nu̱uꞌ nuu̱ꞌ ne̱ yivi̱ꞌ i̱i̱n yivi̱ꞌ.
10 Ndoꞌó,
ne̱ ndieeꞌ ñu̱u̱ Tarsis,
vi̱ti̱n ndii,
va̱ꞌa̱ ka̱ nuu̱ꞌ ñu̱ꞌuꞌ ndo̱ꞌ sa̱tyuunꞌ ndo̱ꞌ,
naa xaaꞌ ne̱ ndieeꞌ yu̱ꞌuꞌ i̱ti̱a̱ Nilo,
sa̱kanꞌ ña̱ yiꞌeꞌ ñu̱u̱ ndo̱ꞌ miiꞌ xaá tunꞌ ndo̱oꞌ ndii,
xa̱ ni̱ ndi̱ꞌi̱ ndo̱o̱ a̱ ni̱ nduxi̱n.
11 Mi̱iꞌ Yahvé ni̱ ka̱ta̱ni̱ nda̱ꞌaꞌ nuu̱ꞌ mi̱ni̱ kaꞌnuꞌ,
te̱ ni̱ ki̱si̱ a̱ miiꞌ xaꞌndia tyuunꞌ kiꞌinꞌ te̱ kuuꞌ nu̱uꞌ,
te̱ su̱vi̱ tu̱ a̱ ni̱ kaꞌa̱n tyuunꞌ,
te̱ ni̱ sa̱nduxín te̱ xíinꞌ ka̱niiꞌ ñu̱ꞌuꞌ Fenicia.
12 Te̱ ni̱ kaꞌa̱n a̱ xiinꞌ ne̱ ndieeꞌ ñu̱u̱ Sidón ndii:
“Ndoꞌó,
ne̱ ndieeꞌ ñu̱u̱ Sidón,
ne̱ ndoꞌoꞌ va̱ xaaꞌ ne̱ yivi̱ꞌ ndii,
köo̱ꞌ kivi̱ꞌ ka̱ va̱ꞌa̱ ku̱ni̱ ndo̱ꞌ i̱i̱n xaanꞌ miiꞌ na̱ndiee̱ꞌ ndo̱ꞌ,
tee̱ꞌ ndee ki̱e̱e̱ ndo̱ꞌ te̱ kuꞌu̱n ndo̱ꞌ nde̱e̱ nuu̱ꞌ ñu̱ꞌuꞌ Chipre”,
katyi a̱.
13 Ko̱to̱ ndo̱ꞌ nuu̱ꞌ ñu̱ꞌuꞌ Babilonia miiꞌ ni̱ ndiee̱ ne̱ vi̱ꞌe̱ caldeo ndii,
xa̱ ni̱ ndi̱ꞌi̱ ndo̱o̱ ne̱ ni̱ ndiee̱ nuu̱ꞌ ñu̱ꞌuꞌ ja̱a̱nꞌ ni̱ xiꞌi̱.
Te̱ xíinꞌ te̱ ndieeꞌ nuu̱ꞌ ñu̱ꞌuꞌ Asiria nduuꞌ te̱ ni̱ nda̱sa̱ nduuꞌ ñu̱ꞌuꞌ ja̱a̱nꞌ miiꞌ ndieeꞌ ki̱tiꞌ i̱kuꞌ ku̱i̱ti̱ꞌ vi̱ti̱n,
ni̱ xa̱ꞌa̱ te̱ xíinꞌ ja̱a̱nꞌ miiꞌ ni̱ ka̱a̱ ra̱,
te̱ ni̱ ko̱ꞌni̱ ra̱ ñu̱u̱ ja̱a̱nꞌ,
te̱ ni̱ sa̱nduva ra̱ sa̱kuuꞌ vi̱ꞌe̱ kaꞌnuꞌ te̱ xaꞌndia tyuunꞌ nuu̱ꞌ ñu̱u̱ ja̱a̱nꞌ,
te̱ ni̱ sa̱nduxín ra̱ sa̱kuuꞌ a̱,
te̱ ndee yuu̱ꞌ ku̱i̱ti̱ꞌ ni̱ ndoo̱ ndieeꞌ a̱ i̱kanꞌ.
14 Ndoꞌó,
te̱ xatyuunꞌ xiinꞌ tunꞌ ndo̱oꞌ,
tunꞌ kuaꞌa̱n ñu̱u̱ Tarsis ndii,
ku̱a̱ku̱ sutyiꞌ i̱ni̱ va̱ ndo̱ꞌ,
sa̱kanꞌ ña̱ xa̱ ni̱ nduxi̱n ndo̱o̱ sa̱kuuꞌ yiꞌeꞌ ña̱ yoo ñu̱u̱ ja̱a̱nꞌ miiꞌ xaá tunꞌ ndo̱oꞌ ndo̱ꞌ.
15 Kivi̱ꞌ ja̱a̱nꞌ ndii,
na̱ndoso̱ꞌ sa̱kuuꞌ ne̱ yivi̱ꞌ i̱i̱n yivi̱ꞌ niiꞌ uni̱ xi̱ko̱ uxi̱ kuiya̱ xaꞌa̱ꞌ ñu̱u̱ Tiro nde̱e̱ naa kuuꞌ kuiya̱ ña̱ xikaꞌ i̱i̱n rey i̱i̱n yivi̱ꞌ.
Te̱ kii̱ꞌ xinu̱ sa̱kuuꞌ uni̱ xi̱ko̱ uxi̱ kuiya̱ ja̱a̱nꞌ ndii,
ku̱ndo̱ꞌo̱ ñu̱u̱ Tiro ja̱a̱nꞌ nde̱e̱ naa i̱i̱n ña̱ꞌaꞌ ñaꞌ xiko̱ꞌ xiinꞌ miiꞌ kii̱ꞌ kaꞌán ne̱ yivi̱ꞌ xiinꞌ aꞌ ña̱ ka̱ta̱ aꞌ kaꞌán ni̱a̱ ndii:
16 “Yoꞌó,
ñaꞌ xiko̱ꞌ xiinꞌ miiꞌ,
ñaꞌ köo̱ꞌ xitoꞌ xa̱tyiꞌ ka̱ nuu̱ꞌ.
Na̱ꞌi̱ ñu̱u̱ arpa,
te̱ ku̱nu̱ꞌni̱ u̱nꞌ ka̱niiꞌ ñu̱u̱,
te̱ ka̱ta̱ u̱nꞌ ya̱a̱ nda̱tu̱nꞌ va̱,
te̱ kiꞌinꞌ ya̱a̱ ka̱ta̱ u̱nꞌ,
tee̱ꞌ kueinꞌ na̱ka̱ꞌanꞌ na te̱ yivi̱ꞌ xaꞌa̱ꞌ u̱nꞌ”,
katyi̱ ni̱a̱.
17 Te̱ kii̱ꞌ xinu̱ ña̱ uni̱ xi̱ko̱ uxi̱ kuiya̱ ja̱a̱nꞌ ndii,
tu̱ku̱ sa̱kanꞌ tyi̱ndi̱e̱eꞌ Yahvé ñu̱u̱ Tiro ja̱a̱nꞌ,
te̱ ku̱vikaꞌ ne̱ ñu̱u̱ ja̱a̱nꞌ sa̱a̱ a̱,
ndisu̱ xa̱ꞌaꞌ tu̱ku̱u̱ ni̱a̱ sa̱a̱ ni̱a̱ sa̱kuuꞌ nuu̱ꞌ ku̱a̱tyi̱ xiinꞌ sa̱kuuꞌ ñu̱u̱ ña̱ yoo nuu̱ꞌ ñu̱ꞌuꞌ i̱i̱n yivi̱ꞌ.
18 Nde̱e̱ sa̱a̱ ka̱ ni̱ ndii,
sa̱kuuꞌ ña̱ ka̱nandoo ni̱a̱ xiinꞌ ña̱ vikaꞌ ni̱a̱ ja̱a̱nꞌ ndii,
ndi̱ti̱a̱ mi̱iꞌ Yahvé ku̱ndu̱u̱ a̱,
te̱ nä̱koo̱ va̱ꞌa̱ a̱ sa̱a̱ ni̱a̱,
ni̱ nde̱e̱ tä̱a̱n tu̱ ni̱a̱ ña̱ ja̱a̱nꞌ ti̱xi̱n yaka̱ ni̱a̱ te̱ ka̱ya̱ ma̱to ni̱a̱ a̱.
Sa̱kanꞌ ña̱ ña̱ ka̱nandoo ni̱a̱ ja̱a̱nꞌ ndii,
ña̱ ka̱xi̱ꞌ ne̱ nduuꞌ kuenta Yahvé ku̱ndu̱u̱ sa̱kuuꞌ a̱,
sa̱kanꞌ te̱ ku̱xi̱ ndaꞌni ne̱ nduuꞌ kuenta a̱ ja̱a̱nꞌ,
te̱ ku̱i̱ꞌnu̱ tu̱ ni̱a̱ toto̱ va̱ꞌa̱ nda̱tu̱nꞌ xa̱va̱ꞌa̱.