Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ ndieeꞌ ñu̱u̱ Jerusalén
22
Ña̱ yo̱ꞌo̱ꞌ nduuꞌ ña̱ ni̱ kaꞌa̱n tiakú Ndiosí xiinꞌ i̱ ña̱ sa̱a̱ a̱ miiꞌ kanduꞌu̱ꞌ yo̱soꞌ miiꞌ xaá ña̱ satuví a̱ nuu̱ꞌ e̱ꞌ:
¿Yo̱o̱ nduuꞌ a̱ ndoꞌoꞌ ndo̱ꞌ vi̱ti̱n na kuiiꞌ sa̱kuuꞌ ndo̱ꞌ kuaꞌa̱n ka̱a̱ xata̱ꞌ vi̱ꞌe̱ ndo̱ꞌ?
2 Ka̱niiꞌ ñu̱u̱ ni̱ na̱ku̱tyi ndo̱ꞌ,
te̱ kuaaꞌ va̱ ndo̱ꞌ.
Ndoꞌó ndii,
xa̱ nuu̱ꞌ vi̱koꞌ xikaꞌ ndo̱ꞌ,
te̱ taꞌanꞌ ndo̱ꞌ,
ne̱ ni̱ xiꞌi̱ ndii,
süu̱ꞌ xiinꞌ ityi̱ ni̱ xa̱ꞌni̱ꞌ ña̱ꞌaꞌ te̱ yivi̱ꞌ,
ni̱ nde̱e̱ nï̱ xa̱ꞌni̱ꞌ tu̱ ña̱ꞌaꞌ te̱ yivi̱ꞌ miiꞌ ni̱ xaꞌa̱n ti̱i̱n ra̱ ñuꞌu̱,
süu̱ꞌ ja̱a̱nꞌ ndii,
so̱ko̱ xiinꞌ kuiꞌe̱ ni̱ xiꞌi̱ ra̱.
3 Te̱ xaꞌndia tyuunꞌ nuu̱ꞌ ndo̱ꞌ ndii,
i̱i̱n ti̱ꞌvi̱ yoo sa̱kuuꞌ ra̱,
te̱ ni̱ xi̱nu̱ ra̱,
te̱ kii̱ꞌ xinuꞌ ra̱ kuaꞌa̱n ra̱ nuu̱ꞌ te̱ kuni ki̱niꞌ ña̱ꞌaꞌ xiinꞌ kuxi̱ ndii,
ni̱ na̱ti̱i̱n ña̱ꞌaꞌ te̱ xíinꞌ,
te̱ ni̱ ta̱a̱n ña̱ꞌaꞌ ra̱ vi̱ꞌe̱ ka̱a̱.
Te̱ te̱ ñu̱u̱ ndo̱ꞌ te̱ ndi̱e̱ni ka̱ ku̱ntaꞌanꞌ ndii,
tee̱ꞌ ndee xa̱ xikaꞌ va̱ ni̱ xi̱nu̱ ra̱ kuaꞌa̱n ra̱,
ndisu̱ ni̱ na̱ti̱i̱n ña̱ꞌaꞌ te̱ xíinꞌ,
te̱ ni̱ sa̱tiín ña̱ꞌaꞌ ra̱ ni̱ ta̱a̱nꞌ ra̱ vi̱ꞌe̱ ka̱a̱.
4 Sa̱kanꞌ na kuiiꞌ kaꞌán i̱ ndii:
“Na̱ko̱o̱ i̱i̱n nda̱a̱ꞌ ndo̱ꞌ yuꞌu̱,
sa̱kanꞌ ña̱ kuni ku̱a̱ku̱ sutyiꞌ i̱ni̱ xa̱va̱ꞌa̱ i̱,
sä̱a̱ ndo̱ꞌ ña̱ nduxa̱ꞌ te̱ sa̱kiꞌví ndo̱ꞌ yuꞌu̱,
sa̱kanꞌ ña̱ xa̱ ni̱ nduxi̱n ndo̱o̱ kaniiꞌ ñu̱u̱ i̱”,
katyi̱ i̱.
5 Sa̱kanꞌ ña̱ Tákuiꞌe Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii,
xa̱ ni̱ kaꞌa̱n tyuunꞌ a̱ ña̱ ko̱o̱ ña̱ i̱yo̱ va̱ ña̱ ko̱o̱ yo̱soꞌ miiꞌ xaá ña̱ satuví a̱ ja̱a̱nꞌ.
Te̱ ko̱o̱ tu̱ ña̱ nduxi̱n ndo̱o̱ yo̱soꞌ ja̱a̱nꞌ,
xiinꞌ ña̱ sa̱na̱ ndo̱o̱ xíniꞌ sa̱kuuꞌ ne̱ yivi̱ꞌ,
ne̱ ndieeꞌ i̱kanꞌ,
xiinꞌ ña̱ ndu̱va̱ ndo̱o̱ nama̱ ña̱ ndasi i̱ꞌnu̱ kaniiꞌ i̱kanꞌ,
te̱ ku̱tiaku̱ ku̱a̱aꞌ ne̱ yivi̱ꞌ nde̱e̱ xíniꞌ sa̱kuuꞌ i̱kuꞌ.
6 Te̱ xíinꞌ,
te̱ ndieeꞌ ñu̱u̱ Elam ndii,
xa̱ ni̱ sa̱kooꞌ tu̱ꞌva̱ ra̱ kuxi̱ xiinꞌ karreta miiꞌ ñuꞌuꞌ ra̱ kuaꞌa̱n ti̱i̱n ra̱ ñuꞌu̱,
te̱ kuaꞌa̱n tu̱ te̱ xíinꞌ,
te̱ yoso̱ꞌ kuei xiinꞌ ra̱.
Te̱ xíinꞌ,
te̱ ndieeꞌ ñu̱u̱ Kir ndii,
xa̱ ni̱ sa̱kooꞌ tu̱ꞌva̱ xiinꞌ miiꞌ ra̱ xiinꞌ ka̱a̱ ña̱ tiasi ti̱a̱ꞌni̱ ra̱.
7 Ka̱niiꞌ yo̱soꞌ miiꞌ nda̱tu̱nꞌ va̱ nuu̱ꞌ ñu̱u̱ ndo̱ꞌ ndii,
tyituꞌ vi̱ꞌ itaꞌ kuaꞌa̱ꞌ karreta,
te̱ sa̱a̱ kuaꞌa̱n yiꞌeꞌ ñu̱u̱ ndo̱ꞌ itaꞌ kuaꞌa̱ꞌ xa̱va̱ꞌa̱ te̱ yoso̱ꞌ kuei.
8 Ne̱ vi̱ꞌe̱ Judá ndii,
kü̱vi̱ xa̱tyiꞌ ka̱ na̱kaꞌa̱n ni̱a̱ xaꞌa̱ꞌ ni̱a̱.
Te̱ kivi̱ꞌ ja̱a̱nꞌ ndii,
i̱ni̱ ndo̱ꞌ kuni ndo̱ꞌ ityi̱ nii̱ꞌ ña̱ ñuꞌuꞌ va̱ꞌa̱ ti̱xi̱n vi̱ꞌe̱ yaka̱ ña̱ iinꞌ miiꞌ iinꞌ vi̱ꞌe̱ kaꞌnuꞌ.
9 Te̱ kii̱ꞌ ni̱ xi̱ni̱ ni̱a̱ ña̱ kuaꞌa̱ꞌ va̱ xaanꞌ ni̱ xa̱ꞌaꞌ ndata̱ꞌ nama̱ ña̱ ndasi i̱ꞌnu̱ ñu̱u̱ Jerusalén ndii,
ni̱ xa̱ꞌaꞌ ni̱a̱ taxaꞌa ni̱a̱ ti̱kui ti̱xi̱n pila ña̱ iinꞌ ninu̱.
10 Sa̱kanꞌ te̱ ni̱ ka̱ꞌvi̱ te̱ ndieeꞌ ñu̱u̱ ja̱a̱nꞌ sa̱a̱ taꞌan vi̱ꞌe̱ yoo ñu̱u̱ Jerusalén,
te̱ ni̱ ta̱ni̱ ra̱ sa̱va̱ a̱,
te̱ xiinꞌ ña̱ ja̱a̱nꞌ ni̱ nda̱sa̱ va̱ꞌa̱ ra̱ nama̱ ña̱ ndasi i̱ꞌnu̱ ñu̱u̱ ja̱a̱nꞌ.
11 Te̱ ma̱ꞌiꞌ uvi̱ taꞌan nama̱ ni̱ xa̱ꞌa̱ ra̱ i̱i̱n pila miiꞌ ku̱naa̱ ti̱kui,
teꞌ ku̱a̱xi̱ ndi̱e̱nu̱,
ndisu̱ nï̱ xaaꞌ ra̱ kuenta kuuꞌ Ndiosí.
Ña̱ ja̱a̱nꞌ nduuꞌ ña̱ ni̱ kaꞌa̱n te̱ ku̱a̱ꞌa̱ pila ja̱a̱nꞌ,
te̱ su̱vi̱ tu̱ a̱ nduuꞌ ña̱ ni̱ tyi̱tuní sa̱kuuꞌ ña̱ ja̱a̱nꞌ nde̱e̱ ña̱ nu̱uꞌ.
12 Kivi̱ꞌ ja̱a̱nꞌ ndii,
ni̱ ka̱na̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱kuuꞌ ne̱ ndieeꞌ ñu̱u̱ Jerusalén ja̱a̱nꞌ ña̱ ku̱a̱ku̱ ni̱a̱,
te̱ ku̱su̱tyiꞌ tu̱ i̱ni̱ ni̱a̱ xaꞌa̱ꞌ a̱ ña̱ ni̱ xa̱a̱ ni̱a̱ ku̱a̱tyi̱ nuu̱ꞌ Ndiosí,
xiinꞌ ña̱ ka̱ꞌndi̱a̱ ni̱a̱ i̱xiꞌ xíniꞌ ni̱a̱,
xiinꞌ ña̱ ku̱i̱ꞌnu̱ ni̱a̱ toto̱ nde̱iꞌ va̱ xaꞌa̱ꞌ a̱ ña̱ niaꞌá ni̱a̱ ña̱ sutyiꞌ va̱ i̱ni̱ ni̱a̱.
13 Ndisu̱ ndoꞌó ndii,
vi̱koꞌ xaꞌa ndo̱ꞌ,
te̱ ndieeꞌ sii̱ꞌ ndo̱ꞌ,
te̱ xaꞌni̱ꞌ ndo̱ꞌ si̱ndiki̱ꞌ,
te̱ xaꞌni̱ꞌ tu̱ ndo̱ꞌ mbe̱e̱,
te̱ xixiꞌ ndo̱ꞌ nde̱i̱ꞌ,
te̱ xiꞌiꞌ tu̱ ndo̱ꞌ vino.
Te̱ kaꞌán ndo̱ꞌ ndii:
“Na ku̱xi̱ e̱ꞌ te̱ ko̱ꞌo̱ e̱ꞌ vino,
sa̱kanꞌ ña̱ tiaa̱n ku̱vi̱ e̱ꞌ”,
katyi ndo̱ꞌ.
14 Sa̱kanꞌ na kuiiꞌ ni̱ sa̱tuví Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
nuu̱ꞌ i̱ kaꞌán a̱ ndii:
“Ña̱ nda̱ku kaꞌán i̱ xiinꞌ u̱nꞌ ndii,
köo̱ꞌ kaꞌnuꞌ i̱ni̱ i̱ xaꞌa̱ꞌ ku̱a̱tyi̱ ña̱ ni̱ xa̱a̱ ndo̱ꞌ nde̱e̱ ku̱vi̱ ndo̱ꞌ.”
Ña̱ kaa̱ꞌ kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
Yoꞌoꞌ kaꞌán tiakú Isaías ña̱ ku̱ndo̱ꞌo̱ Sebna, te̱ xatyuunꞌ nuu̱ꞌ rey Ezequías
15 Kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii:
“Kuaꞌan miiꞌ nduꞌu̱ Sebna,
te̱ xitoꞌ xu̱ꞌunꞌ rey,
te̱ nduuꞌ tu̱ ra̱ martomo ti̱xi̱n vi̱ꞌe̱ rey ja̱a̱nꞌ,
te̱ kaꞌa̱n u̱nꞌ xiinꞌ ra̱ ndii:
16 ¿Yo̱o̱ nduuꞌ yoꞌó,
kaꞌanꞌ u̱nꞌ,
uun ndiotyun na xaꞌa u̱nꞌ i̱i̱n ñañaꞌ nda̱tu̱nꞌ va̱ ñu̱u̱ yoꞌoꞌ,
miiꞌ ku̱naa̱ u̱nꞌ kii̱ꞌ ku̱vi̱ u̱nꞌ,
te̱ xaꞌa u̱nꞌ miiꞌ ku̱naa̱ u̱nꞌ kii̱ꞌ ku̱vi̱ u̱nꞌ i̱i̱n xaanꞌ miiꞌ sukun nda̱tu̱nꞌ va̱ xata̱ꞌ ka̱va̱ꞌ?
17 Ko̱to̱ u̱nꞌ,
yoꞌó,
te̱ tuu ña̱ te̱ kaꞌnuꞌ va̱ nduuꞌ u̱nꞌ,
ku̱ni̱ so̱ꞌo̱ u̱nꞌ ña̱ kaꞌa̱n i̱ xiinꞌ u̱nꞌ.
Yahvé ndii,
ndee xa̱ku̱ꞌ va̱ kuní te̱ na̱ti̱i̱n kutu̱ꞌ a̱ yoꞌó te̱ sa̱kanaꞌ a̱ xikaꞌ a̱ yoꞌó.
18 Na̱ti̱i̱n a̱ yoꞌó te̱ nda̱sa̱ tinduꞌ a̱ yoꞌó nde̱e̱ naa pelota,
te̱ sa̱kanaꞌ yoꞌó xikaꞌ xa̱va̱ꞌa̱ nuu̱ꞌ i̱i̱n ñu̱ꞌuꞌ tyiee̱ va̱,
te̱ i̱kanꞌ ku̱vi̱ u̱nꞌ,
te̱ i̱kanꞌ tu̱ ndoo̱ karreta u̱nꞌ,
tunꞌ nda̱tu̱nꞌ va̱ kumiꞌ u̱nꞌ,
te̱ ndee ña̱ sa̱kaꞌanꞌ nuu̱ꞌ xto̱ꞌo̱ u̱nꞌ ku̱i̱ti̱ꞌ ku̱ndu̱u̱ u̱nꞌ i̱kanꞌ.
19 Xta̱ꞌniꞌ i̱ yoꞌó miiꞌ nduꞌu̱ꞌ u̱nꞌ xaꞌndia tyuunꞌ u̱nꞌ,
te̱ ta̱xiꞌ i̱ yoꞌó nuu̱ꞌ tyu̱u̱n ña̱ ndisoꞌ u̱nꞌ,
katyi̱ u̱nꞌ xiinꞌ ra̱.
20 ’Kivi̱ꞌ ja̱a̱nꞌ ndii,
ka̱na̱ i̱ te̱ xikaꞌ nuuꞌ nuu̱ꞌ i̱ Eliaquim,
siꞌe̱ Hilcías.
21 Te̱ sa̱na̱kuiꞌnú ña̱ꞌaꞌ i̱ toto̱ ndiká ña̱ ni̱ niꞌnu̱ yoꞌó,
te̱ sa̱tiín tu̱ i̱ to̱koꞌ ra̱ xiinꞌ i̱i̱nꞌ ña̱ ni̱ ki̱ꞌi̱ to̱koꞌ u̱nꞌ,
te̱ nda̱ꞌaꞌ te̱ ja̱a̱nꞌ na̱ta̱xi̱ i̱ ndi̱e̱e̱ꞌ ña̱ ni̱ ku̱miꞌ yoꞌó.
Te̱ ku̱ndu̱u̱ ra̱ nde̱e̱ naa i̱i̱n yu̱vaꞌ nuu̱ꞌ ne̱ ñu̱u̱ Jerusalén,
te̱ sa̱kanꞌ tu̱ nuu̱ꞌ ne̱ vi̱ꞌe̱ Judá.
22 Te̱ nda̱ꞌaꞌ te̱ ja̱a̱nꞌ na̱ta̱xi̱ i̱ nda̱ꞌaꞌ te̱ ka̱ꞌndi̱a̱ tyuunꞌ ra̱ nde̱e̱ naa ni̱ xa̱ꞌndi̱a̱ tyuunꞌ rey David xta̱ꞌanꞌ,
te̱ kii̱ꞌ nu̱niaꞌ ra̱ i̱i̱n yiꞌeꞌ ndii,
nde̱e̱ i̱i̱n ne̱ yivi̱ꞌ kü̱vi̱ nda̱si̱ a̱,
te̱ kii̱ꞌ nda̱si̱ ra̱ i̱i̱n yiꞌeꞌ ndii,
nde̱e̱ i̱i̱n ne̱ yivi̱ꞌ kü̱vi̱ nu̱niaꞌ a̱.
23 Ki̱ꞌi̱n kaꞌnuꞌ ne̱ yivi̱ꞌ sa̱kuuꞌ ne̱ i̱i̱n kuuꞌ xiinꞌ ra̱,
sa̱kanꞌ ña̱ tyi̱ndi̱e̱eꞌ ña̱ꞌaꞌ i̱ te̱ sa̱tyuunꞌ nda̱ku va̱ ra̱,
te̱ ku̱ndu̱u̱ ra̱ nde̱e̱ naa i̱i̱n clavo ña̱ iinꞌ kutu̱ꞌ xa̱va̱ꞌa̱ ni̱ xa̱a̱ te̱ yivi̱ꞌ to̱koꞌ nama̱.
24 Te̱ nuu̱ꞌ te̱ ja̱a̱nꞌ ko̱to̱ꞌni̱ sa̱kuuꞌ ne̱ i̱i̱n kuuꞌ xiinꞌ ra̱ kuenta yu̱vaꞌ ra̱,
te̱ sa̱vikaꞌ ña̱ꞌaꞌ ra̱,
te̱ sa̱kanꞌ tu̱ siꞌe̱ ra̱,
xiinꞌ si̱a̱niꞌ ra̱ xiinꞌ sa̱kuuꞌ ne̱ i̱i̱n kuuꞌ xiinꞌ ra̱,
ne̱ ndaꞌvi kuuꞌ”,
ni̱ katyi Ndiosí.
25 Ndisu̱ kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii:
“I̱i̱n kivi̱ꞌ ja̱a̱nꞌ nuu̱ꞌ kuꞌu̱n e̱ꞌ ndii,
xta̱ꞌniꞌ i̱ te̱ nduuꞌ nde̱e̱ naa i̱i̱n clavo ña̱ iinꞌ kutu̱ꞌ va̱ ja̱a̱nꞌ,
te̱ ndu̱va̱ ra̱ ñu̱ꞌuꞌ.
Te̱ sa̱kuuꞌ ne̱ xtoꞌniꞌ nuu̱ꞌ ra̱ ja̱a̱nꞌ ndii,
ku̱vi̱ ndo̱o̱ ni̱a̱.
Te̱ yuꞌu̱,
Yahvé,
nduuꞌ ña̱ kaꞌán ña̱ kaa̱ꞌ”,
katyi a̱.