Yoꞌoꞌ kaꞌán tiakú Isaías xaꞌa̱ꞌ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Babilonia
21
Ña̱ yo̱ꞌo̱ꞌ nduuꞌ ña̱ ni̱ kaꞌa̱n tiakú Ndiosí xiinꞌ i̱ ña̱ sa̱a̱ a̱ xiinꞌ ne̱ ndieeꞌ ñu̱u̱ ña̱ ñuꞌuꞌ miiꞌ i̱tyi kaaꞌ yu̱ꞌuꞌ mi̱ni̱ kaꞌnuꞌ:
Nde̱e̱ naa xaaꞌ a̱ kii̱ꞌ xkaꞌndíá tatyi̱ꞌ ndi̱e̱eꞌ ña̱ xkaꞌndíá nuu̱ꞌ ñu̱ꞌuꞌ Neguev miiꞌ i̱tyi kaaꞌ ndii,
niiꞌ sa̱kanꞌ i̱yo̱ xa̱va̱ꞌa̱ kuuꞌ ña̱ ku̱a̱xi̱ kuaꞌa̱ꞌ va̱ te̱ xíinꞌ,
te̱ sa̱nduxín xa̱tyiꞌ ra̱ ñu̱u̱ ña̱ ñuꞌuꞌ miiꞌ i̱tyi kaaꞌ yu̱ꞌuꞌ mi̱ni̱ kaꞌnuꞌ ja̱a̱nꞌ,
te̱ ja̱a̱nꞌ ndii nde̱e̱ nuu̱ꞌ ñu̱ꞌuꞌ miiꞌ i̱tyi kaaꞌ miiꞌ i̱yo̱ va̱ kaaꞌ ni̱ ki̱e̱e̱ ra̱,
te̱ ku̱a̱xi̱ ra̱.
2 I̱yo̱ va̱ iinꞌ ña̱ ni̱ niaꞌa̱ Ndiosí nuu̱ꞌ i̱.
Te̱ sikiꞌ ndii,
sanakuaꞌa sikiꞌ ra̱ yoꞌó,
te̱ sanduxín ndii,
sanduxín ndo̱o̱ ra̱ ña̱ vikaꞌ u̱nꞌ.
Nu̱ta̱ kiꞌi̱ꞌ ndoꞌó,
ne̱ ndieeꞌ ñu̱u̱ Elam,
te̱ ka̱ꞌni̱ꞌ ña̱ꞌaꞌ ndo̱ꞌ.
Te̱ ndoꞌó,
ne̱ ndieeꞌ nuu̱ꞌ ñu̱ꞌuꞌ Media ndii,
nda̱si̱ i̱ꞌnu̱ kiꞌi̱ꞌ ndo̱ꞌ sa̱kuuꞌ ñu̱u̱ ña̱ ñuꞌuꞌ miiꞌ i̱tyi kaaꞌ yu̱ꞌuꞌ mi̱ni̱ kaꞌnuꞌ ja̱a̱nꞌ,
sa̱kanꞌ ña̱ kivi̱ꞌ vi̱ti̱n sa̱ndiꞌiꞌ i̱ sa̱kuuꞌ ña̱ tanaꞌ ndo̱ꞌ ni̱ xa̱a̱ te̱ xíinꞌ ñu̱u̱ ja̱a̱nꞌ.
3 Xaꞌa̱ꞌ a̱ ja̱a̱nꞌ na kuiiꞌ kisiꞌ vi̱ꞌ a̱ yuꞌu̱ ña̱ yiꞌvi va̱ i̱,
te̱ nakuiyoꞌ vi̱ꞌ i̱ ña̱ uꞌvi̱ va̱ xini i̱ xaaꞌ ña̱ ja̱a̱nꞌ nde̱e̱ naa ndoꞌoꞌ i̱i̱n ña̱ꞌaꞌ kii̱ꞌ sakakuꞌ aꞌ siꞌe̱ aꞌ.
Te̱ xaꞌa̱ꞌ a̱ ña̱ ndiꞌni̱ va̱ nimá i̱ ndii,
xa̱ yoo i̱ ku̱vi̱ xa̱tyiꞌ i̱ kii̱ꞌ xini so̱ꞌo̱ i̱ ña̱ ku̱ndo̱ꞌo̱ sa̱kuuꞌ ñu̱u̱ ja̱a̱nꞌ,
te̱ ni̱ yi̱ꞌvi xa̱va̱ꞌa̱ i̱ kii̱ꞌ ni̱ xi̱ni̱ i̱ ña̱ xaaꞌ Ndiosí.
4 Sekoꞌ vi̱ꞌ a̱ nuu̱ꞌ i̱ ña̱ yiꞌvi va̱ i̱,
te̱ yatyi̱ va̱ tu̱ katin nimá i̱ xaaꞌ ña̱ i̱yo̱ va̱ ja̱a̱nꞌ.
Sa̱aꞌ ndii xtani̱ va̱ i̱ kii̱ꞌ kuaa̱ꞌ,
ndisu̱ vi̱ti̱n ndii,
yiꞌvi xa̱va̱ꞌa̱ i̱ xaaꞌ xa̱kuaa̱ꞌ kii̱ꞌ kuñu̱u.
5 Ko̱to̱ ndo̱ꞌ mesa nakataꞌ ne̱ yivi̱ꞌ,
te̱ xa̱ ni̱ xa̱ki̱n ni̱a̱ toto̱ nda̱tu̱nꞌ nuu̱ꞌ nu̱ꞌ,
sa̱kanꞌ ña̱ xa̱ ni̱ xa̱ꞌaꞌ vi̱koꞌ,
te̱ xa̱ xixiꞌ ne̱ yivi̱ꞌ,
te̱ xiꞌiꞌ ni̱a̱.
Ndoꞌó,
te̱ xíinꞌ kuuꞌ nu̱uꞌ,
yatyi̱ va̱ nu̱ta̱ kiꞌi̱ꞌ ndo̱ꞌ te̱ na̱kuiꞌnu̱ ndo̱ꞌ ka̱a̱ ña̱ tiasi ti̱a̱ꞌni̱ ndo̱ꞌ,
te̱ sa̱kooꞌ tu̱ꞌva̱ xiinꞌ miiꞌ ndo̱ꞌ te̱ kuꞌu̱n ti̱i̱n ndo̱ꞌ ñuꞌu̱.
6 Sa̱kanꞌ ña̱ ni̱ kaꞌa̱n Yahvé xiinꞌ i̱ ndii:
“Kuaꞌan te̱ ka̱ni̱ u̱nꞌ i̱i̱n te̱ ko̱to̱ ndo̱so̱ꞌ ka̱niiꞌ ñu̱u̱,
te̱ kaꞌa̱n tiꞌeꞌ ra̱ xiinꞌ u̱nꞌ kii̱ꞌ ku̱ni̱ ra̱ ku̱a̱xi̱ te̱ ndasiꞌ taꞌanꞌ xiinꞌ ndo̱ꞌ.
7 Te̱ naaꞌ ku̱ni̱ te̱ xitoꞌ ndo̱so̱ꞌ ka̱niiꞌ ñu̱u̱ ja̱a̱nꞌ ku̱a̱xi̱ kiꞌinꞌ te̱ yivi̱ꞌ yoso̱ꞌ ra̱ ki̱tiꞌ,
uvi̱ taꞌan uvi̱ taꞌan ra̱ ndieeꞌ xata̱ꞌ mburru,
xiinꞌ xata̱ꞌ camello ku̱a̱xi̱ ra̱,
xiinꞌ xata̱ꞌ kuei,
te̱ na ko̱o̱ tu̱ꞌva̱ xa̱va̱ꞌa̱ ra̱”,
ni̱ katyi̱ a̱.
8 Sa̱kanꞌ te̱ ni̱ ndeꞌi̱ tiꞌeꞌ te̱ xitoꞌ ndo̱so̱ꞌ ñu̱u̱ ja̱a̱nꞌ,
kaꞌán ra̱ xiinꞌ i̱ ndii:
“Tákuiꞌe,
sa̱a̱ kivi̱ꞌ xiinꞌ sa̱a̱ ñu̱u iinꞌ i̱ te̱ xitoꞌ ndo̱so̱ꞌ i̱ ka̱niiꞌ ñu̱u̱.
9 Te̱ vi̱ti̱n xitoꞌ i̱ ndii,
naá i̱i̱n te̱ yivi̱ꞌ ti̱xi̱n i̱i̱n karreta,
tunꞌ kañuuꞌ uvi̱ taꞌan kuei ku̱a̱xi̱ ra̱,
te̱ kaꞌán ra̱ ndii:
Xa̱ ni̱ nduxi̱n ñu̱ꞌuꞌ Babilonia,
xa̱ ni̱ nduxi̱n xa̱tyiꞌ ñu̱ꞌuꞌ ja̱a̱nꞌ.
Te̱ sa̱kanꞌ tu̱ ndiosí ña̱ xakaꞌnuꞌ ne̱ ndieeꞌ i̱kanꞌ ndii,
xa̱ ni̱ tya̱tyi̱ xiꞌe̱ ndo̱o̱ a̱ ndieeꞌ a̱ ñu̱ꞌuꞌ,
katyi ra̱”,
ni̱ katyi̱ te̱ xitoꞌ ndo̱so̱ꞌ ja̱a̱nꞌ.
10 Ndoꞌó kuaꞌa,
ne̱ taꞌanꞌ i̱,
ne̱ kuaꞌa̱ꞌ va̱ ni̱ ndo̱ꞌo̱ ni̱ xa̱a̱ te̱ xíinꞌ,
te̱ kiꞌinꞌ va̱ tu̱ ndo̱ꞌ ni̱ xa̱ꞌni̱ꞌ ra̱ nde̱e̱ naa xaaꞌ ne̱ yivi̱ꞌ kii̱ꞌ sakoyó ni̱a̱ ndi̱kinꞌ trigo,
te̱ nativi ni̱a̱ mi̱ꞌiꞌ a̱.
Kaꞌán i̱ xiinꞌ ndo̱ꞌ ña̱ ni̱ xi̱ni̱ so̱ꞌo̱ i̱ kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ña̱ nduuꞌ Ndiosí ña̱ xakaꞌnuꞌ ne̱ vi̱ꞌe̱ Israel.
Yoꞌoꞌ kaꞌán tiakú Isaías xaꞌa̱ꞌ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Edom
11 Ña̱ yo̱ꞌo̱ꞌ nduuꞌ ña̱ kaꞌán tiakú xaꞌa̱ꞌ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Edom.
Xini so̱ꞌo̱ i̱ tiakú kaꞌán tiꞌeꞌ i̱i̱n te̱ yivi̱ꞌ xiinꞌ i̱ nde̱e̱ ñu̱u̱ Seir ndii:
“Yoꞌó,
te̱ xitoꞌ ndo̱so̱ꞌ ñu̱u̱,
¿sa̱a̱ ka̱ taꞌan hora kuní te̱ kitu̱ꞌ?
Yoꞌó,
te̱ xitoꞌ ndo̱so̱ꞌ ñu̱u̱,
¿sa̱a̱ ka̱ taꞌan hora kuní te̱ kitu̱ꞌ?”,
ni̱ katyi̱ ra̱.
12 Sa̱kanꞌ te̱ ni̱ na̱ku̱i̱i̱n yuꞌu̱ꞌ te̱ xitoꞌ ndo̱so̱ꞌ ñu̱u̱ ja̱a̱nꞌ kaꞌán i̱ ndii:
“Nä̱ꞌaꞌ ka̱ te̱ kitu̱ꞌ,
ndisu̱ i̱i̱n kani̱ꞌ va̱ te̱ tu̱ku̱ sa̱kanꞌ kuñu̱u naaꞌ kuni nda̱tuꞌu̱nꞌ ka̱ ndo̱ꞌ i̱nga̱ i̱tyiꞌ ndii,
va̱ꞌa̱ ka̱ na̱ndi̱koꞌ ndo̱ꞌ nunuꞌ xii ka̱,
te̱ nda̱tuꞌu̱nꞌ tu̱ku̱u̱ ndo̱ꞌ”,
ni̱ katyi i̱.
Yoꞌoꞌ ku̱a̱xi̱ ña̱ kaꞌán tiakú xaꞌa̱ꞌ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Arabia
13 Ña̱ yo̱ꞌo̱ꞌ nduuꞌ ña̱ ni̱ niaꞌa̱ Ndiosí nuu̱ꞌ i̱ ña̱ kaꞌán tiakú xaꞌa̱ꞌ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Arabia.
Ndoꞌó,
ne̱ ni̱ ki̱e̱e̱ ñu̱u̱ Dedán,
ne̱ ñuꞌuꞌ yuku̱n i̱tyiꞌ kuaꞌa̱n ndo̱ꞌ ndii,
xaꞌa̱ꞌ kuꞌu̱ xiti̱nꞌ miiꞌ i̱tyiꞌ kaaꞌ ku̱i̱ti̱ꞌ kusu̱n ndo̱ꞌ nuu̱ꞌ ñu̱ꞌuꞌ Arabia.
14 Ndoꞌó,
ne̱ ndieeꞌ nuu̱ꞌ ñu̱ꞌuꞌ Tema ndii,
kuaꞌan na̱taꞌanꞌ ndo̱ꞌ xiinꞌ ne̱ ku̱a̱xi̱ i̱tyiꞌ va̱ ti̱kui te̱ ta̱xi̱ ndo̱ꞌ ti̱kui ko̱ꞌo̱ ni̱a̱.
Te̱ ta̱xi̱ tu̱ ndo̱ꞌ ña̱ ku̱xi̱ ne̱ xinuꞌ kuaꞌa̱n ja̱a̱nꞌ xaꞌa̱ꞌ a̱ ña̱ kuni ka̱ꞌni̱ꞌ ña̱ꞌaꞌ ne̱ yivi̱ꞌ.
15 Sa̱kanꞌ ña̱ nuu̱ꞌ te̱ kuni ka̱ꞌni̱ꞌ ña̱ꞌaꞌ xiinꞌ ityi̱ xikaꞌ xinuꞌ ni̱a̱ xiinꞌ nuu̱ꞌ te̱ xa̱ niꞌiꞌ tunꞌ to̱so̱,
te̱ kuni ka̱ꞌni̱ꞌ ña̱ꞌaꞌ ra̱ xiinꞌ kuxi̱,
te̱ xinuꞌ tu̱ ni̱a̱ nuu̱ꞌ ña̱ i̱yo̱ va̱ kuuꞌ ña̱ yoo nuu̱ꞌ ñu̱ꞌuꞌ miiꞌ ndieeꞌ ni̱a̱.
16 Sa̱kanꞌ ña̱ ni̱ kaꞌa̱n Yahvé xiinꞌ i̱ ndii:
“So̱ꞌo̱ kuuꞌ kuiya̱ ki̱ꞌi̱n ña̱ ka̱ꞌvi̱ e̱ꞌ i̱ꞌi̱n kivi̱ꞌ kuaꞌa̱n ndii,
ndi̱ꞌi̱ sa̱kuuꞌ ña̱ kaꞌnuꞌ ne̱ ndieeꞌ ñu̱u̱ Cedar.
17 Sa̱kanꞌ tu̱ te̱ xatia kuxi̱ te̱ ndieeꞌ ñu̱u̱ Cedar ja̱a̱nꞌ ndii,
ndee ndiaꞌviꞌ ku̱i̱ti̱ꞌ te̱ ndi̱e̱ni va̱ ti̱i̱n ñuꞌu̱ kaku̱”,
ni̱ katyi̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ña̱ nduuꞌ Ndiosí,
ña̱ xakaꞌnuꞌ yooꞌ,
ne̱ vi̱ꞌe̱ Israel.