Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ne̱ ndieeꞌ nuu̱ꞌ ñu̱ꞌuꞌ Etiopía
20
Kuiya̱ ña̱ ni̱ ti̱ꞌviꞌ rey Sargón,
te̱ xaꞌndia tyuunꞌ nuu̱ꞌ ñu̱ꞌuꞌ Asiria,
te̱ xíinꞌ te̱ kuuꞌ nu̱uꞌ ra̱,
te̱ ku̱ntaꞌanꞌ ra̱ xiinꞌ te̱ vi̱ꞌe̱ filisteo,
te̱ ndieeꞌ ñuuꞌ Asdod,
te̱ ni̱ ka̱nandoo ña̱ꞌaꞌ ra̱ ndii,
2 ni̱ kaꞌa̱n Yahvé xiinꞌ Isaías,
siꞌe̱ Amoz ndii:
“Xta̱ꞌniꞌ u̱nꞌ toto̱ nde̱iꞌ ña̱ niꞌnuꞌ u̱nꞌ xikaꞌ u̱nꞌ nde̱e̱ sa̱aꞌ,
te̱ ta̱va̱ꞌ tu̱ u̱nꞌ ndixa̱nꞌ ña̱ kiꞌiꞌ u̱nꞌ”,
ni̱ katyi̱ a̱.
Te̱ ni̱ xa̱a̱ xna̱ꞌa̱ Isaías ña̱ ni̱ kaꞌa̱n tyuunꞌ Ndiosí xiinꞌ ra̱,
te̱ ni̱ xika̱ i̱i̱nꞌ vityiꞌ xa̱tyiꞌ ra̱,
te̱ ni̱ xika̱ xavityiꞌ tu̱ ra̱.
3 Sa̱kanꞌ te̱ ni̱ kaꞌa̱n ka̱ Yahvé ndii:
“Sa̱a̱ niiꞌ ni̱ xika̱ i̱i̱n vityiꞌ xa̱tyiꞌ Isaías,
te̱ xikaꞌ nuuꞌ nuu̱ꞌ i̱,
te̱ ni̱ xika̱ xavityiꞌ tu̱ ra̱ niiꞌ uni̱ kuiya̱,
te̱ ku̱ndu̱u̱ a̱ ña̱ kaꞌán ndi̱a̱a̱ xaꞌa̱ꞌ ña̱ ki̱ni̱ va̱ ña̱ sa̱ndoꞌoꞌ i̱ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ne̱ ndieeꞌ nuu̱ꞌ ñu̱ꞌuꞌ Etiopía ndii,
4 niiꞌ sa̱kanꞌ na̱ka̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria,
sa̱kuuꞌ te̱ ndieeꞌ nuu̱ꞌ ñu̱ꞌuꞌ Egipto xiinꞌ te̱ ndieeꞌ nuu̱ꞌ ñu̱ꞌuꞌ Etiopía,
te̱ sa̱va̱ ni̱ xiinꞌ te̱ xi̱xa̱ ni̱,
te̱ kuꞌu̱n ta̱a̱nꞌ ña̱ꞌaꞌ ra̱ vi̱ꞌe̱ ka̱a̱.
Kuꞌu̱n i̱i̱nꞌ vityiꞌ xa̱tyiꞌ te̱ ja̱a̱nꞌ sa̱a̱ ra̱,
te̱ kuꞌu̱n xavityiꞌ tu̱ ra̱,
te̱ tuviꞌ ndooꞌ yu̱ꞌuꞌ siꞌndi̱ ra̱ kuꞌu̱n ra̱,
sa̱kanꞌ te̱ ku̱ka̱ꞌa̱n va̱ nuu̱ꞌ sa̱kuuꞌ ne̱ Egipto ja̱a̱nꞌ.
5 Te̱ ku̱ka̱ꞌa̱n tu̱ ni̱a̱ xaꞌa̱ꞌ ñu̱u̱ Etiopía ña̱ ni̱ ndiatu̱ i̱ni̱ ni̱a̱ tyi̱ndi̱e̱eꞌ ña̱ꞌaꞌ,
te̱ ku̱ka̱ꞌa̱n tu̱ nuu̱ꞌ ni̱a̱ xaꞌa̱ꞌ ñu̱u̱ Egipto ña̱ ni̱ tu̱u̱ ni̱a̱ nduuꞌ i̱i̱n ñu̱u̱ kaꞌnuꞌ xa̱va̱ꞌa̱.
6 Te̱ ne̱ ndieeꞌ sa̱a̱ kuaꞌa̱n yu̱ꞌuꞌ mi̱ni̱ kaꞌnuꞌ kaꞌa̱n xiinꞌ taꞌanꞌ ndii:
Ko̱to̱ ndo̱ꞌ,
sa̱a̱ vi̱ꞌ ni̱ ndo̱ꞌo̱ sa̱kuuꞌ ne̱ ni̱ ndiatu̱ i̱ni̱ e̱ꞌ tyi̱ndi̱e̱eꞌ yooꞌ,
te̱ kiꞌinꞌ va̱ i̱tyiꞌ ni̱ xaꞌa̱n e̱ꞌ xikán e̱ꞌ nuu̱ꞌ ni̱a̱ te̱ tyi̱ndi̱e̱eꞌ ni̱a̱ yooꞌ,
te̱ sa̱kakú ni̱a̱ yooꞌ nda̱ꞌaꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria.
Te̱ vi̱ti̱n ndii,
¿sa̱a̱ tu̱ sa̱a̱ e̱ꞌ te̱ kaku̱ e̱ꞌ nda̱ꞌaꞌ rey ja̱a̱nꞌ?,
katyi̱ ni̱a̱”,
katyi Ndiosí.