Yoꞌoꞌ kaꞌán tiakú Isaías xaꞌa̱ꞌ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto
19
Yoꞌoꞌ kaꞌán tiakú yuꞌu̱,
Isaías,
xaꞌa̱ꞌ ña̱ ni̱ kaꞌa̱n Ndiosí xiinꞌ i̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Egipto,
te̱ ni̱ sa̱yaꞌá i̱ tu̱ꞌu̱n ja̱a̱nꞌ nuu̱ꞌ ne̱ ja̱a̱nꞌ kaꞌán i̱ ndii:
“Ko̱to̱ ndo̱ꞌ,
nduꞌu̱ꞌ Yahvé nuu̱ꞌ i̱i̱n viko̱ꞌ ña̱ ka̱ma̱ va̱ ku̱a̱xi̱ a̱,
te̱ ndiꞌví a̱ nuu̱ꞌ ñu̱ꞌuꞌ Egipto kuaꞌa̱n a̱.
Te̱ sa̱kuuꞌ ña̱ xakaꞌnuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ ña̱ nduuꞌ ndiosí saka ndii,
ki̱si̱ ña̱ꞌaꞌ ña̱ yiꞌvi a̱ nuu̱ꞌ Ndiosí,
te̱ ku̱yi̱ꞌvi xa̱va̱ꞌa̱ tu̱ sa̱kuuꞌ ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ”,
katyi i̱.
2 Te̱ kaꞌán tu̱ Ndiosí ndii:
“Sa̱ku̱ntaꞌanꞌ i̱ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ne̱ ndieeꞌ ñu̱u̱ mi̱iꞌ ni̱a̱,
te̱ ku̱ntaꞌanꞌ tu̱ ni̱a̱ xiinꞌ taꞌanꞌ mi̱iꞌ xa̱tyiꞌ ni̱a̱,
te̱ ku̱ntaꞌanꞌ tu̱ ni̱a̱ xiinꞌ ne̱ ndieeꞌ ya̱ti̱n vi̱ꞌe̱ ni̱a̱,
te̱ ku̱ntaꞌanꞌ ne̱ ndieeꞌ i̱i̱n ñu̱u̱ xiinꞌ i̱nga̱ ne̱ ndieeꞌ tu̱ku̱ ñu̱u̱,
te̱ ku̱ntaꞌanꞌ tu̱ ne̱ ndieeꞌ nuu̱ꞌ i̱i̱n ñu̱ꞌuꞌ xiinꞌ ne̱ ndieeꞌ tu̱ku̱ ñu̱ꞌuꞌ.
3 Sa̱sanaꞌ i̱ xíniꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ,
te̱ tä̱xi̱ tu̱ i̱ sa̱xinu̱ ni̱a̱ ña̱ tyituní ni̱a̱ sa̱a̱ ni̱a̱.
Sa̱kanꞌ na kuiiꞌ xa̱ꞌaꞌ ni̱a̱ ndu̱kuꞌ ni̱a̱ ña̱ xini tuní nuu̱ꞌ ndiosí ni̱a̱,
ña̱ xakaꞌnuꞌ ni̱a̱,
te̱ kuꞌu̱n tu̱ ni̱a̱ nuu̱ꞌ te̱ tu̱ꞌva̱ xiinꞌ nuu̱ꞌ ne̱ ku̱vi̱ ndatuꞌunꞌ xiinꞌ nimá ne̱ xa̱ ni̱ xiꞌi̱,
te̱ kuꞌu̱n ndu̱kuꞌ tu̱ ni̱a̱ ne̱ tuviꞌ i̱ni̱ te̱ tyi̱ndi̱e̱eꞌ ña̱ꞌaꞌ ne̱ ja̱a̱nꞌ.
4 Sa̱na̱kuaꞌa i̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto nda̱ꞌaꞌ i̱i̱n te̱ ni̱a̱ꞌa ku̱ndu̱u̱ xto̱ꞌo̱ ni̱a̱,
te̱ tyi̱nduꞌu̱ꞌ i̱ i̱i̱n rey kuiꞌe̱ va̱ ka̱ꞌndi̱a̱ tyuunꞌ nuu̱ꞌ ni̱a̱”,
katyi Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
5 Ndo̱ko̱ ndo̱o̱ ti̱kui i̱ti̱a̱ Nilo,
te̱ na̱ya̱a̱ ndo̱o̱ miiꞌ kuaꞌa̱n ti̱kui i̱ti̱a̱ ja̱a̱nꞌ.
6 Te̱ tyi̱tyi̱ kaꞌnuꞌ miiꞌ kuaꞌa̱n ti̱kui nuu̱ꞌ ñu̱ꞌuꞌ Egipto ja̱a̱nꞌ ndii,
ki̱ni̱ va̱ ku̱xaꞌa̱n a̱,
te̱ kuiee kuiee ndo̱ko̱ ndo̱o̱ ti̱kui sa̱kuuꞌ i̱ti̱a̱ ña̱ yoo nuu̱ꞌ ñu̱ꞌuꞌ ja̱a̱nꞌ.
Te̱ ityi̱ ndo̱o̱ tu̱ ndoo̱ꞌ xiinꞌ tunꞌ yoo̱ꞌ ka̱niiꞌ nuu̱ꞌ ñu̱ꞌuꞌ ja̱a̱nꞌ.
7 Sa̱kuuꞌ ña̱ ni̱ tyi̱ꞌi̱ ne̱ yivi̱ꞌ yu̱ꞌuꞌ i̱ti̱a̱ Nilo xiinꞌ ña̱ ta̱ta̱ ña̱ yoo miiꞌ nakaá ti̱kui i̱ti̱a̱ ja̱a̱nꞌ kuaꞌa̱n raꞌ ndii,
ityi̱ ndo̱o̱ a̱,
te̱ ndi̱a̱tyiꞌ sa̱kuuꞌ a̱ sa̱a̱ tatyi̱ꞌ.
8 Sa̱kuuꞌ te̱ tava̱ꞌ ti̱a̱kaꞌ ndii,
ku̱a̱ku̱ sutyiꞌ i̱ni̱ xa̱va̱ꞌa̱ ra̱,
te̱ sa̱kanꞌ tu̱ te̱ tava̱ꞌ ti̱a̱kaꞌ xiinꞌ tiku ki̱ꞌiꞌ i̱ti̱a̱ Nilo ndii,
ku̱su̱tyiꞌ va̱ i̱ni̱ ra̱,
te̱ sa̱kuuꞌ te̱ sékun ti̱a̱kaꞌ i̱ti̱a̱ ja̱a̱nꞌ xiinꞌ ñu̱nu̱ꞌ ndii,
ku̱su̱tyiꞌ xa̱va̱ꞌa̱ tu̱ i̱ni̱ te̱ ja̱a̱nꞌ.
9 Ne̱ yivi̱ꞌ,
ne̱ tyiꞌiꞌ tunꞌ yuꞌva̱ lino ndii,
sa̱na̱ xa̱tyiꞌ xíniꞌ ni̱a̱,
te̱ ne̱ ndasaꞌ ndooꞌ a̱ xiinꞌ ne̱ xaꞌa ñu̱nu̱ꞌ xiinꞌ a̱ ndii,
ku̱ndi̱ꞌni̱ xa̱va̱ꞌa̱ nimá ni̱a̱.
10 Te̱ ne̱ xaꞌa toto̱ ndii,
ndi̱ꞌi̱ ndo̱o̱ ña̱ xiko̱ꞌ ni̱a̱,
te̱ sa̱kuuꞌ ne̱ xatyuunꞌ nuu̱ꞌ ni̱a̱,
te̱ tyaꞌvi̱ ña̱ꞌaꞌ ni̱a̱ ndii,
ku̱su̱tyiꞌ xa̱va̱ꞌa̱ i̱ni̱ ni̱a̱.
11 Sa̱kuuꞌ ndoꞌó,
te̱ xaꞌndia tyuunꞌ nuu̱ꞌ ne̱ ndieeꞌ ñu̱u̱ Zoán ndii,
te̱ küuꞌ kaxiꞌ nduuꞌ ndo̱ꞌ.
Te̱ te̱ xini tuní va̱ taxiꞌ tu̱ꞌu̱n nde̱iꞌ nuu̱ꞌ faraón ndii,
mi̱iꞌ ndiꞌiꞌ ña̱ kuäsa̱ꞌ kuní ku̱i̱ti̱ꞌ kaꞌán ra̱ xiinꞌ te̱ ja̱a̱nꞌ.
¿Sa̱a̱ tu̱ käꞌanꞌ nuu̱ꞌ ndo̱ꞌ kaꞌán ñuñuꞌ ndo̱ꞌ nuu̱ꞌ faraón ndii:
“Si̱a̱niꞌ xikaꞌ rey te̱ xini tuní,
te̱ ni̱ yoo̱ xta̱ꞌanꞌ nduuꞌ ndu̱”,
katyi ndo̱ꞌ?
12 Yoꞌó,
rey,
te̱ xaꞌndia tyuunꞌ nuu̱ꞌ ñu̱ꞌuꞌ Egipto,
¿miiꞌ kuaꞌa̱n te̱ xini tuní,
te̱ ndieeꞌ nuu̱ꞌ ñu̱ꞌuꞌ miiꞌ xaꞌndia tyuunꞌ u̱nꞌ?
Na kaꞌa̱n kiꞌi̱ꞌ ra̱ xiinꞌ u̱nꞌ vi̱ti̱n,
te̱ niaꞌa̱ tu̱ ra̱ nuu̱ꞌ u̱nꞌ nde̱e̱ ña̱ nduuꞌ ña̱ ni̱ tyi̱tuní Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱a̱ a̱ xiinꞌ nuu̱ꞌ ñu̱ꞌuꞌ Egipto.
13 Sa̱kuuꞌ ndoꞌó,
te̱ xaꞌndia tyuunꞌ nuu̱ꞌ ne̱ ndieeꞌ ñu̱u̱ Zoán ndii,
te̱ küuꞌ kaxiꞌ nduuꞌ ndo̱ꞌ.
Te̱ ndoꞌó,
te̱ xaꞌndia tyuunꞌ nuu̱ꞌ ne̱ ndieeꞌ ñu̱u̱ Menfis ndii,
ni̱ xi̱ni̱ xaꞌanꞌ ne̱ yivi̱ꞌ ndoꞌó.
Te̱ sa̱kanꞌ tu̱ sa̱kuuꞌ ndoꞌó,
te̱ kuuꞌ nu̱uꞌ nuu̱ꞌ i̱ꞌi̱n ti̱ꞌvi̱ ne̱ ndieeꞌ nuu̱ꞌ ñu̱ꞌuꞌ Egipto ndii,
ni̱ sa̱sanaꞌ ndo̱ꞌ sa̱kuuꞌ ne̱ ndieeꞌ i̱kanꞌ,
te̱ xïni̱ ka̱ ni̱a̱ nde̱e̱ ña̱ nduuꞌ ña̱ va̱ꞌa̱ sa̱a̱ ni̱a̱.
14 Mi̱iꞌ Yahvé ni̱ sko̱ꞌniꞌ i̱i̱n espíritu ña̱ sa̱sanaꞌ xíniꞌ sa̱kuuꞌ te̱ xaꞌndia tyuunꞌ nuu̱ꞌ sa̱kuuꞌ ñu̱u̱ ja̱a̱nꞌ,
te̱ ni̱ sa̱sanaꞌ ra̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ ndee ña̱ nduuꞌ ña̱ va̱ꞌa̱ sa̱a̱ ni̱a̱.
Te̱ ni̱ xa̱a̱ ra̱ xiinꞌ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ nde̱e̱ naa xaaꞌ i̱i̱n te̱ xini̱ kii̱ꞌ kisiꞌ ña̱ꞌaꞌ a̱ te̱ nduxanꞌ ndi̱a̱a̱ xiinꞌ miiꞌ ra̱.
15 Ne̱ ndieeꞌ nuu̱ꞌ ñu̱ꞌuꞌ Egipto ndii,
köo̱ꞌ ka̱ nde̱e̱ i̱i̱n ña̱ꞌa̱ ku̱vi̱ sa̱a̱ ni̱a̱ te̱ tyi̱ndi̱e̱eꞌ ni̱a̱ ñu̱u̱ ja̱a̱nꞌ,
ni̱ nde̱e̱ te̱ xaꞌndia tyuunꞌ kuuꞌ nu̱uꞌ xiinꞌ ne̱ ndaꞌvi so̱ꞌo̱,
ni̱ nde̱e̱ ne̱ vikaꞌ xiinꞌ ne̱ ndaꞌvi kuuꞌ.
16 Kii̱ꞌ xaa̱ kivi̱ꞌ ja̱a̱nꞌ ndii,
sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto ku̱u̱ nde̱e̱ naa ña̱ꞌaꞌ,
sa̱kanꞌ ña̱ na̱nda̱ni̱ xa̱va̱ꞌa̱ ni̱a̱,
te̱ nde̱e̱ ki̱si̱ vi̱ꞌ ña̱ꞌaꞌ a̱ ña̱ yiꞌvi ni̱a̱ kii̱ꞌ ku̱ni̱ ni̱a̱ ña̱ xitoꞌ sa̱ndoꞌoꞌ ña̱ꞌaꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
17 Ne̱ ndieeꞌ nuu̱ꞌ ñu̱ꞌuꞌ Egipto ndii,
ku̱yi̱ꞌvi xa̱va̱ꞌa̱ ni̱a̱ ku̱ni̱ ni̱a̱ ne̱ vi̱ꞌe̱ Judá.
Tee̱ꞌ kivi̱ꞌ ku̱i̱ti̱ꞌ ne̱ ja̱a̱nꞌ ku̱ni̱ so̱ꞌo̱ ni̱a̱ ndii,
ki̱si̱ vi̱ꞌ ña̱ꞌaꞌ a̱ ña̱ yiꞌvi ni̱a̱,
sa̱kanꞌ ña̱ xa̱ xiní ni̱a̱ ña̱ ni̱ tyi̱tuní Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱a̱ a̱ xiinꞌ ni̱a̱.
18 Kii̱ꞌ xaa̱ kivi̱ꞌ ja̱a̱nꞌ ndii,
ko̱o̱ uꞌu̱n taꞌan ñu̱u̱ nuu̱ꞌ ñu̱ꞌuꞌ Egipto miiꞌ ndatuꞌunꞌ ne̱ yivi̱ꞌ tu̱ꞌu̱n hebreo,
ña̱ ndatuꞌunꞌ ne̱ ndieeꞌ nuu̱ꞌ ñu̱ꞌuꞌ Canaán.
Te̱ ta̱xi̱ ni̱a̱ kuento ni̱a̱ ña̱ ku̱ndiku̱n nda̱ku ni̱a̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
Te̱ i̱i̱n a̱ ndii,
Ñu̱u̱ Ña̱ Ni̱ Nduxi̱n Ndo̱o̱ ku̱na̱niꞌ a̱.
19 Kii̱ꞌ xaa̱ kivi̱ꞌ ja̱a̱nꞌ ndii,
ka̱sa̱ꞌa̱ ni̱a̱ i̱i̱n altar miiꞌ na̱soko̱ꞌ ne̱ yivi̱ꞌ ña̱ꞌa̱ nuu̱ꞌ Yahvé sa̱va̱ ni̱ ma̱ꞌiꞌ nuu̱ꞌ ñu̱ꞌuꞌ Egipto,
te̱ ya̱ti̱n xeꞌinꞌ ñu̱ꞌuꞌ ja̱a̱nꞌ ndii,
ta̱ndi̱e̱e̱ ma̱to ni̱a̱ yuu̱ꞌ miiꞌ ko̱to̱ kaꞌnuꞌ ni̱a̱ Yahvé.
20 Te̱ uvi̱ sa̱aꞌ ña̱ ja̱a̱nꞌ ku̱ndu̱u̱ ña̱ niaꞌa̱ ne̱ ndieeꞌ nuu̱ꞌ ñu̱ꞌuꞌ Egipto ja̱a̱nꞌ ña̱ yoo Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
xiinꞌ ne̱ ndieeꞌ ja̱a̱nꞌ.
Te̱ kii̱ꞌ kaꞌa̱n ndaꞌvi ni̱a̱ xiinꞌ Yahvé xaꞌa̱ꞌ a̱ ña̱ sandoꞌoꞌ ña̱ꞌaꞌ te̱ yivi̱ꞌ ndii,
ti̱ꞌviꞌ a̱ i̱i̱n te̱ sa̱kakú ña̱ꞌaꞌ,
te̱ na̱kaꞌa̱n tu̱ ra̱ xaꞌa̱ꞌ ni̱a̱,
te̱ sa̱ndoó ndiká tu̱ ña̱ꞌaꞌ ra̱.
21 Te̱ xiinꞌ ña̱ sa̱a̱ Yahvé ja̱a̱nꞌ niaꞌa̱ a̱ nuu̱ꞌ ne̱ ndieeꞌ nuu̱ꞌ ñu̱ꞌuꞌ Egipto yo̱o̱ nduuꞌ a̱,
te̱ kivi̱ꞌ ja̱a̱nꞌ ku̱nda̱ni̱ tu̱ ne̱ ja̱a̱nꞌ ña̱ ña̱ ja̱a̱nꞌ nduuꞌ Yahvé.
Te̱ ka̱ka̱ nu̱u̱ ni̱a̱ nuu̱ꞌ Yahvé Ndiosí,
te̱ na̱soko̱ꞌ ni̱a̱ ki̱tiꞌ nuu̱ꞌ a̱,
te̱ na̱soko̱ꞌ tu̱ ni̱a̱ ña̱ꞌa̱ nuu̱ꞌ a̱ ta̱xi̱ ni̱a̱ kuento ni̱a̱ nuu̱ꞌ a̱,
te̱ sa̱xinu̱ ni̱a̱ a̱.
22 Mi̱iꞌ Yahvé sa̱ndoꞌoꞌ ne̱ ndieeꞌ nuu̱ꞌ ñu̱ꞌuꞌ Egipto,
ndisu̱ mi̱iꞌ tu̱ a̱ sa̱ndaꞌa ña̱ꞌaꞌ,
sa̱kanꞌ ña̱ ku̱ni̱ so̱ꞌo̱ a̱ ña̱ kaꞌán ndaꞌvi ni̱a̱ xiinꞌ a̱,
te̱ ku̱vi̱ta i̱ni̱ a̱ xaꞌa̱ꞌ ni̱a̱,
te̱ sandaꞌa tu̱ ña̱ꞌaꞌ a̱.
23 Kivi̱ꞌ ja̱a̱nꞌ ndii,
ko̱o̱ i̱i̱n i̱tyiꞌ kaꞌnuꞌ va̱ ña̱ xa̱ꞌaꞌ a̱ nde̱e̱ nuu̱ꞌ ñu̱ꞌuꞌ Egipto ja̱a̱nꞌ,
te̱ na̱xaa̱ a̱ nde̱e̱ Asiria.
Ne̱ ndieeꞌ nuu̱ꞌ ñu̱ꞌuꞌ Asiria ndii,
ku̱vi̱ kuꞌu̱n ni̱a̱ Egipto,
te̱ ne̱ ndieeꞌ nuu̱ꞌ ñu̱ꞌuꞌ Egipto ndii,
ku̱vi̱ kuꞌu̱n ni̱a̱ Asiria,
sa̱kanꞌ na kuiiꞌ ne̱ Egipto xiinꞌ ne̱ Asiria ndii,
sa̱kaꞌnuꞌ ingaꞌ ni̱a̱ Yahvé Ndiosí kivi̱ꞌ ja̱a̱nꞌ.
24 Te̱ kivi̱ꞌ ja̱a̱nꞌ ndii,
na̱kuita̱ kuento ne̱ vi̱ꞌe̱ Israel xiinꞌ ne̱ Egipto,
te̱ sa̱kanꞌ tu̱ xiinꞌ ne̱ Asiria,
te̱ xiinꞌ nda̱ꞌaꞌ uni̱ sa̱aꞌ ne̱ ja̱a̱nꞌ sa̱ñuꞌuꞌ Ndiosí ne̱ yivi̱ꞌ i̱i̱n yivi̱ꞌ.
25 Sa̱kanꞌ ña̱ mi̱iꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
sa̱ñuꞌuꞌ ña̱ꞌaꞌ kaꞌa̱n a̱ ndii:
“Sañuꞌuꞌ va̱ i̱ ne̱ Egipto,
ne̱ nduuꞌ kuenta i̱,
te̱ sañuꞌuꞌ va̱ tu̱ i̱ ne̱ Asiria,
ne̱ nduuꞌ ne̱ ni̱ xa̱ꞌa̱ i̱ xiinꞌ nda̱ꞌaꞌ mi̱iꞌ i̱,
te̱ sa̱ñuꞌuꞌ tu̱ i̱ ne̱ vi̱ꞌe̱ Israel,
ne̱ ni̱ na̱ka̱xi̱n i̱ nduuꞌ ndi̱ti̱a̱ mi̱iꞌ i̱”,
katyi a̱.