Yoꞌoꞌ kaꞌán tiakú Isaías xaꞌa̱ꞌ ña̱ nakataꞌ ne̱ ndieeꞌ ñu̱u̱ Jerusalén kuento ni̱a̱ xiinꞌ ne̱ ndieeꞌ nuu̱ꞌ ñu̱ꞌuꞌ Etiopía
18
Ku̱ni̱ so̱ꞌo̱ ndoꞌó,
ne̱ ndieeꞌ ñu̱u̱ miiꞌ tiakú tiꞌeꞌ va̱ niꞌi̱ vi̱ꞌ ndi̱xi̱n ti̱ka̱,
ñu̱u̱ ña̱ ñuꞌuꞌ xikaꞌ va̱ tu̱ku̱ taꞌviꞌ i̱ti̱a̱ ña̱ xkaꞌndíá nuu̱ꞌ ñu̱ꞌuꞌ Etiopía.
2 Ne̱ ja̱a̱nꞌ nduuꞌ ne̱ tiꞌviꞌ te̱ yivi̱ꞌ,
te̱ kuaꞌa̱n xiinꞌ kuento ñuꞌuꞌ ra̱ ti̱xi̱n tunꞌ ndo̱oꞌ,
tunꞌ ni̱ ku̱a̱ꞌa̱ xiinꞌ tu̱n yoo̱ꞌ,
tunꞌ naniꞌ papiro,
nakaa̱ꞌ ra̱ nuu̱ꞌ mi̱ni̱ kuaꞌa̱n ra̱,
te̱ kaꞌán ni̱a̱ xiinꞌ ra̱ ndii:
“Ndoꞌó,
te̱ ka̱ma̱ va̱ kuꞌu̱n,
kuaꞌa̱n ndo̱ꞌ xiinꞌ kuento ñu̱u̱ miiꞌ ndieeꞌ ne̱ yivi̱ꞌ,
ne̱ sukun va̱,
te̱ nda̱tu̱nꞌ va̱ tu̱ iinꞌ ni̱a̱.
Ne̱ yivi̱ꞌ ja̱a̱nꞌ ndii,
sa̱kuuꞌ ne̱ yivi̱ꞌ yiꞌvi ña̱ꞌaꞌ miiꞌ ka̱ kuaꞌa̱n ni̱a̱,
te̱ kooꞌ tyukuuꞌ va̱ tu̱ ni̱a̱,
te̱ ñuñuꞌ tu̱ ni̱a̱,
te̱ yoo kuaꞌa̱ꞌ va̱ i̱ti̱a̱ nuu̱ꞌ ñu̱ꞌuꞌ miiꞌ ndieeꞌ ni̱a̱”,
katyi ni̱a̱.
3 Sa̱kuuꞌ ndoꞌó,
ne̱ yivi̱ꞌ,
ne̱ ndieeꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
ko̱to̱ ndo̱ꞌ kii̱ꞌ ka̱ni̱ te̱ xíinꞌ bandera miiꞌ sukun va̱ xíniꞌ i̱kuꞌ,
te̱ ku̱ni̱ so̱ꞌo̱ ndo̱ꞌ kii̱ꞌ ti̱vi̱ ra̱ nda̱tyuunꞌ tunꞌ niꞌiꞌ i̱tyiꞌ.
4 Ni̱ kaꞌa̱n Yahvé xiinꞌ i̱ ndii:
“Nde̱e̱ ndi̱viꞌ miiꞌ nduꞌu̱ꞌ i̱ ko̱o̱ taxi̱nꞌ ku̱i̱ti̱ꞌ i̱ te̱ ko̱to̱ i̱ ña̱ ndoꞌoꞌ ne̱ yivi̱ꞌ,
taxi̱nꞌ ko̱o̱ i̱ nde̱e̱ naa xaaꞌ ñu̱ꞌu̱ ña̱ nda̱tu̱nꞌ nandii̱ꞌ a̱ kii̱ꞌ namá savi̱ꞌ,
uun nde̱e̱ naa taxi̱nꞌ ndieeꞌ viko̱ꞌ ña̱ sakuunꞌ ka̱xi̱n ni̱a̱ꞌa̱ kivi̱ꞌ ña̱ i̱ꞌniꞌ va̱ kii̱ꞌ nakaya te̱ yivi̱ꞌ ña̱ savi̱ꞌ”,
ni̱ katyi̱ a̱.
5 Sa̱kanꞌ ña̱ kii̱ꞌ kuní ka̱ na̱ka̱ya̱ ne̱ yivi̱ꞌ ña̱ savi̱ꞌ,
kii̱ꞌ koyó i̱ta̱ yo̱ꞌoꞌ uva,
te̱ tyityí tu̱ uva ja̱a̱nꞌ ndii,
ka̱ꞌndi̱a̱ i̱ nda̱ꞌaꞌ yo̱ꞌoꞌ uva ja̱a̱nꞌ te̱ tu̱ꞌu̱n i̱ nde̱e̱ ti̱o̱ꞌo̱ nda̱ꞌaꞌ a̱ ña̱ nakaá kuaꞌa̱n te̱ ka̱ti̱a̱ i̱ a̱.
6 Te̱ kii̱ꞌ sa̱kanꞌ ndii,
ku̱vi̱ sa̱kuuꞌ te̱ xíinꞌ ni̱a̱ ja̱a̱nꞌ,
te̱ ndoo̱ ñu̱ꞌuꞌ ndeꞌi̱ ra̱ ku̱ndi̱e̱e̱ a̱ xaꞌa̱ꞌ kuꞌu̱,
te̱ ka̱xi̱ꞌ ña̱ꞌaꞌ ti̱ko̱xií,
tiꞌ yoo xiki̱ꞌ ja̱a̱nꞌ,
te̱ ka̱xi̱ꞌ tu̱ ña̱ꞌaꞌ sa̱kuuꞌ nuu̱ꞌ ki̱tiꞌ i̱kuꞌ.
Te̱ ti̱ko̱xií ndii,
xa̱ i̱kanꞌ ndoo̱ riꞌ ku̱ndi̱e̱e̱ riꞌ niiꞌ ñu̱miꞌ,
te̱ sa̱kanꞌ tu̱ sa̱kuuꞌ nuu̱ꞌ ki̱tiꞌ i̱kuꞌ ndii,
i̱kanꞌ ndoo̱ riꞌ ku̱ndi̱e̱e̱ riꞌ niiꞌ saviꞌ.
7 Kivi̱ꞌ ja̱a̱nꞌ ndii,
ne̱ yivi̱ꞌ,
ne̱ sukun va̱ ja̱a̱nꞌ,
te̱ nda̱tu̱nꞌ va̱ tu̱ iinꞌ ni̱a̱,
te̱ sa̱kuuꞌ ne̱ yivi̱ꞌ yiꞌvi ña̱ꞌaꞌ miiꞌ ka̱ kuaꞌa̱n ni̱a̱,
te̱ kooꞌ tyukuuꞌ va̱ tu̱ ni̱a̱,
te̱ ñuñuꞌ tu̱ ni̱a̱.
Te̱ yoo kuaꞌa̱ꞌ va̱ i̱ti̱a̱ nuu̱ꞌ ñu̱ꞌuꞌ miiꞌ ndieeꞌ ni̱a̱ ndii,
ki̱xi̱n na̱soko̱ꞌ ni̱a̱ tu̱mani̱ꞌ nuu̱ꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
Te̱ kuꞌu̱n ndi̱a̱ka̱ ni̱a̱ tu̱mani̱ꞌ ja̱a̱nꞌ nde̱e̱ ñu̱u̱ Jerusalén miiꞌ kaꞌán ne̱ yivi̱ꞌ xiinꞌ Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.