Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ ndieeꞌ ñu̱u̱ Damasco
17
Ña̱ yo̱ꞌo̱ꞌ ni̱ kaꞌa̱n tiakú Ndiosí xiinꞌ i̱ ku̱ndo̱ꞌo̱ ne̱ ndieeꞌ ñu̱u̱ Damasco kaꞌán a̱ ndii:
“Ñu̱u̱ Damasco ndii,
nä̱ꞌaꞌ ka̱ te̱ nduxi̱n xa̱tyiꞌ a̱,
te̱ ndee tyoꞌo̱ vi̱ꞌe̱ ku̱i̱ti̱ꞌ ndoo̱ ku̱i̱ta̱ nuu̱ꞌ a̱,
te̱ kü̱ndu̱u̱ ka̱ a̱ i̱i̱n ñu̱u̱ tyiee̱ va̱.
2 Te̱ sa̱kuuꞌ ñu̱u̱ ña̱ ñuꞌuꞌ nuu̱ꞌ ñu̱ꞌuꞌ Aroer ndii,
nduxi̱n ndo̱o̱ a̱,
te̱ ndee kuꞌu̱ miiꞌ ku̱ndi̱e̱e̱ mbe̱e̱ kusu̱n ku̱i̱ti̱ꞌ riꞌ na̱ndu̱u̱ a̱,
te̱ tä̱xiꞌ nde̱e̱ i̱i̱n ne̱ yivi̱ꞌ riꞌ.
3 Nuu̱ꞌ ñu̱ꞌuꞌ Efraín miiꞌ ndieeꞌ ñu̱u̱ ña̱ ndasi i̱ꞌnu̱ kutu̱ꞌ va̱ ndii,
nduxi̱n sa̱kuuꞌ a̱.
Te̱ ñu̱u̱ Damasco ndii,
köo̱ꞌ ka̱ nde̱e̱ i̱i̱n te̱ ka̱ꞌndi̱a̱ tyuunꞌ nuu̱ꞌ a̱,
te̱ ne̱ ndieeꞌ nuu̱ꞌ ñu̱ꞌuꞌ Siria,
ne̱ ndoo̱ na tiaku xiinꞌ sa̱kuuꞌ ña̱ vikaꞌ ne̱ ñu̱u̱ ja̱a̱nꞌ ndii,
ña̱ꞌa̱ ne̱ vi̱ꞌe̱ Israel na̱ndu̱u̱ a̱.”
Ña̱ kaa̱ꞌ nduuꞌ ña̱ kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
Yoꞌoꞌ kaꞌán tiakú Isaías ña̱ ku̱ndo̱ꞌo̱ ne̱ vi̱ꞌe̱ Israel
4 Te̱ ni̱ kaꞌa̱n ka̱ Ndiosí ndii:
“Kivi̱ꞌ ja̱a̱nꞌ ndii,
nu̱u̱ sa̱kuuꞌ ña̱ ndi̱e̱eꞌ ne̱ vi̱ꞌe̱ Israel,
te̱ ndi̱ꞌi̱ ndo̱o̱ tu̱ ña̱ vikaꞌ ni̱a̱.
5 Te̱ ku̱ndo̱ꞌo̱ ni̱a̱ nde̱e̱ naa ñu̱ꞌuꞌ miiꞌ xikaꞌ i̱i̱n te̱ nakaya ña̱ savi̱ꞌ,
te̱ natyiꞌi̱ꞌ xiinꞌ nda̱ꞌaꞌ ndiꞌi̱ va̱ ndi̱kinꞌ trigo miiꞌ xikaꞌ ra̱.
Te̱ ku̱ndo̱ꞌo̱ tu̱ ni̱a̱ nde̱e̱ naa i̱i̱n te̱ nakaya ndi̱kinꞌ trigo yo̱soꞌ ña̱ kanduꞌu̱ꞌ nuu̱ꞌ ñu̱ꞌuꞌ Refaim.
6 Te̱ ndee ndiaꞌviꞌ ku̱i̱ti̱ꞌ ni̱a̱ ndoo̱ nde̱e̱ naa xaaꞌ a̱ kii̱ꞌ kisiꞌ te̱ yivi̱ꞌ i̱i̱n tunꞌ nduu̱ꞌ olivo te̱ ndoó ndee i̱i̱n uvi̱ taꞌan ku̱i̱ti̱ꞌ nduu̱ꞌ olivo ja̱a̱nꞌ nde̱e̱ nuu̱ꞌ níiꞌ nu̱ꞌ.
Te̱ ndee tyaaꞌ ku̱i̱ti̱ꞌ tu̱ a̱ ndoo̱ nda̱ꞌaꞌ nu̱ꞌ miiꞌ kuunꞌ kuaꞌa̱ꞌ va̱ a̱,
sa̱kanꞌ na kuiiꞌ naaꞌ kuaꞌa̱ꞌ va̱ ndoo̱ ndii,
ndee ku̱miꞌ taꞌan a̱ uun ndee uꞌu̱n taꞌan ku̱i̱ti̱ꞌ a̱.”
Ña̱ kaa̱ꞌ nduuꞌ ña̱ kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
7 Kivi̱ꞌ ja̱a̱nꞌ ndii,
na̱ndu̱kuꞌ ne̱ yivi̱ꞌ Ndiosí,
ña̱ ni̱ xa̱ꞌa̱ ña̱ꞌaꞌ,
te̱ ndo̱ni̱ꞌi̱ tu̱ ni̱a̱ nuu̱ꞌ ni̱a̱ te̱ ko̱to̱ kaꞌnuꞌ ni̱a̱ Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel.
8 Te̱ kö̱to̱ kaꞌnuꞌ ka̱ ni̱a̱ nuu̱ꞌ altar miiꞌ itaꞌ ndiosí ña̱ ni̱ xa̱ꞌa̱ nda̱ꞌaꞌ ni̱a̱,
ni̱ nde̱e̱ kö̱to̱ kaꞌnuꞌ ka̱ tu̱ ni̱a̱ ndiosí ña̱ ni̱ xa̱ꞌa̱ nda̱ꞌaꞌ mi̱iꞌ ni̱a̱.
Köo̱ꞌ kivi̱ꞌ ka̱ ko̱to̱ kaꞌnuꞌ tu̱ ni̱a̱ nuu̱ꞌ ndiosí ni̱a̱,
ña̱ nianiaꞌ,
ña̱ naniꞌ Asera,
ña̱ ni̱ xa̱ꞌa̱ xiinꞌ nda̱ꞌaꞌ ni̱a̱ xiinꞌ i̱tunꞌ ku̱i̱ti̱ꞌ,
ni̱ nde̱e̱ kö̱to̱ kaꞌnuꞌ ka̱ tu̱ ni̱a̱ nuu̱ꞌ altar miiꞌ xaꞌmiꞌ ni̱a̱ su̱xa̱ tyu̱ꞌma nuu̱ꞌ ndiosí ni̱a̱ ja̱a̱nꞌ.
9 Kivi̱ꞌ ja̱a̱nꞌ ndii,
nduxi̱n xa̱tyiꞌ sa̱kuuꞌ ñu̱u̱ ndoꞌó,
ne̱ vi̱ꞌe̱ Israel ja̱a̱nꞌ,
ña̱ ndasi i̱ꞌnu̱ kutu̱ꞌ va̱ nde̱e̱ naa ni̱ ndo̱ꞌo̱ ñu̱u̱ ne̱ vi̱ꞌe̱ heveo xiinꞌ ñu̱u̱ ne̱ vi̱ꞌe̱ amorreo xta̱ꞌanꞌ va̱ kii̱ꞌ ni̱ xa̱ꞌni̱ꞌ ña̱ꞌaꞌ ne̱ vi̱ꞌe̱ Israel.
Te̱ xaꞌa̱ꞌ a̱ ña̱ ni̱ yi̱ꞌvi ndo̱ꞌ ka̱ꞌni̱ꞌ ne̱ yivi̱ꞌ ndoꞌó ndii,
ni̱ na̱ko̱o̱ ndo̱ꞌ miiꞌ ndieeꞌ ndo̱ꞌ,
te̱ ni̱ na̱ndu̱u̱ a̱ nde̱e̱ naa miiꞌ i̱tyi kaaꞌ.
10 Sa̱kanꞌ ña̱ ni̱ na̱ko̱o̱ ndo̱ꞌ Ndiosí,
ña̱ sakakú ndoꞌó,
te̱ nï̱ na̱ka̱ꞌanꞌ ka̱ ndo̱ꞌ ña̱ ña̱ ja̱a̱nꞌ nduuꞌ ña̱ xitoꞌ ndoꞌó.
Te̱ ña̱ xaaꞌ ndo̱ꞌ vi̱ti̱n ndii,
ndee xaꞌa̱ꞌ ndiosí,
ña̱ xakaꞌnuꞌ ne̱ tukuꞌ,
ku̱i̱ti̱ꞌ tyiꞌiꞌ ndo̱ꞌ tunꞌ i̱ta̱ nda̱tu̱nꞌ xa̱va̱ꞌa̱,
te̱ nda̱tu̱nꞌ va̱ tu̱ yo̱ꞌoꞌ uva tyiꞌiꞌ ndo̱ꞌ xaꞌa̱ꞌ ña̱ ja̱a̱nꞌ.
11 Te̱ kivi̱ꞌ ña̱ tyiꞌiꞌ ndo̱ꞌ tunꞌ i̱ta̱ ja̱a̱nꞌ ndii,
va̱ꞌa̱ va̱ kosó ndo̱ꞌ nu̱ꞌ,
te̱ xaꞌnuꞌ nu̱ꞌ,
te̱ tu̱ku̱ kivi̱ꞌ kendiaa̱ꞌ ndo̱ꞌ ndi̱kinꞌ ña̱ kuunꞌ nda̱ꞌaꞌ nu̱ꞌ.
Ndisu̱ kii̱ꞌ xaa̱ kivi̱ꞌ ña̱ ku̱u̱n kuiꞌe̱ xatu̱ nda̱ꞌaꞌ tunꞌ i̱ta̱ ja̱a̱nꞌ sa̱a̱ Ndiosí ndii,
koyo̱ sa̱kuuꞌ ndi̱kinꞌ tunꞌ ja̱a̱nꞌ nda̱ꞌaꞌ nu̱ꞌ,
te̱ ku̱ndo̱ꞌo̱ xa̱va̱ꞌa̱ ndoꞌó xaꞌa̱ꞌ ña̱ ja̱a̱nꞌ.
12 Ku̱ni̱ so̱ꞌo̱ ndo̱ꞌ ña̱ tiakú kuaaꞌ kuaꞌa̱ꞌ xa̱va̱ꞌa̱ te̱ xíinꞌ,
te̱ ni̱ ki̱e̱e̱ kiꞌinꞌ va̱ ñu̱u̱ kuaaꞌ ra̱ nde̱e̱ naa niꞌi̱ mi̱ni̱ kaꞌnuꞌ,
te̱ ku̱ni̱ so̱ꞌo̱ ndo̱ꞌ ña̱ tiꞌeꞌ va̱ tiakú kuaaꞌ ra̱ xaꞌa̱ꞌ ña̱ kuaꞌa̱ꞌ xa̱va̱ꞌa̱ ra̱,
te̱ nduuꞌ ra̱ nde̱e̱ naa kuaꞌa̱ꞌ va̱ te̱ñuꞌu̱ꞌ i̱ti̱a̱.
13 Ndisu̱ tee̱ꞌ ndee kuaꞌa̱ꞌ xa̱va̱ꞌa̱ te̱ xíinꞌ ja̱a̱nꞌ tiakú kuaaꞌ nde̱e̱ naa niꞌi̱ ti̱kui mi̱ni̱ kaꞌnuꞌ ndii,
ta̱xtaꞌanꞌ ra̱ te̱ ku̱nu̱ ndo̱o̱ ra̱ kii̱ꞌ sa̱ku̱taxi̱nꞌ Ndiosí yu̱ꞌuꞌ ra̱.
Te̱ ku̱ndo̱ꞌo̱ ra̱ nde̱e̱ naa mi̱ꞌiꞌ i̱tyi ña̱ nutaꞌ xaaꞌ tatyi̱ꞌ,
te̱ ku̱ndo̱ꞌo̱ tu̱ ra̱ nde̱e̱ naa kuꞌu̱ xiti̱nꞌ ña̱ tuꞌunꞌ savi̱ꞌ kii̱ꞌ kuunꞌ kuiꞌe̱ a̱.
14 Xa̱kuaa̱ꞌ ndii,
yiꞌvi xa̱va̱ꞌa̱ ne̱ vi̱ꞌe̱ Israel,
te̱ ndieeꞌ ni̱a̱,
ndisu̱ kii̱ꞌ kitúꞌ ndii,
xa̱ ni̱ ndi̱ꞌi̱ ne̱ ndasiꞌ taꞌanꞌ xiinꞌ ni̱a̱ ja̱a̱nꞌ ni̱ xiꞌi̱.
Ña̱ ja̱a̱nꞌ nduuꞌ ña̱ xataꞌa̱n na̱tyaꞌvi̱ Ndiosí sa̱kuuꞌ ne̱ xakuiꞌnaꞌ ña̱ꞌa̱ e̱ꞌ,
te̱ ña̱ ja̱a̱nꞌ tu̱ nduuꞌ ña̱ va̱ꞌa̱ ku̱ndo̱ꞌo̱ ne̱ xaꞌni̱ꞌ yooꞌ.