Yoꞌoꞌ kaꞌán Isaías ña̱ ne̱ ñu̱ꞌuꞌ Moab ja̱a̱nꞌ ndii, nde̱e̱ nuu̱ꞌ ñu̱ꞌuꞌ ne̱ vi̱ꞌe̱ Judá kuꞌu̱n ku̱ndi̱e̱e̱ ni̱a̱ te̱ kaku̱ ni̱a̱
16
Ti̱ꞌviꞌ ndo̱ꞌ i̱i̱n mbe̱e̱ nda̱ꞌaꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ Judá nde̱e̱ ñu̱ꞌuꞌ Sela,
ña̱ kanduꞌu̱ꞌ miiꞌ i̱tyi kaaꞌ,
ki̱e̱e̱ ndo̱ꞌ te̱ kuꞌu̱n ndi̱a̱ka̱ ndo̱ꞌ riꞌ nde̱e̱ xíniꞌ i̱kuꞌ ña̱ iinꞌ ñu̱u̱ Jerusalén.
2 Te̱ ña̱ꞌaꞌ,
ne̱ ndieeꞌ Moab ja̱a̱nꞌ ndii,
taxtaꞌanꞌ ni̱a̱ kuaꞌa̱n ni̱a̱ miiꞌ ndaa̱ yu̱ꞌuꞌ i̱ti̱a̱ Arnón,
te̱ ndoꞌoꞌ ni̱a̱ nde̱e̱ naa sa̱a̱ kii̱ꞌ yiꞌvi riꞌ te̱ nakooꞌ riꞌ tyoꞌo̱ riꞌ,
te̱ xinuꞌ riꞌ kuaꞌa̱n riꞌ.
3 Te̱ kaꞌán ni̱a̱ xiinꞌ ne̱ ndieeꞌ ñu̱u̱ Sión ndii:
“Sa̱a̱ ndo̱ꞌ ña̱ va̱ꞌa̱ te̱ na̱kaꞌa̱n ndo̱ꞌ xaꞌa̱ꞌ ndu̱ nuu̱ꞌ te̱ ndasiꞌ taꞌanꞌ xiinꞌ ndu̱.
Tyi̱ndi̱e̱eꞌ ndo̱ꞌ ndu̱ ko̱to̱ ka̱ ka̱ꞌni̱ꞌ ndiꞌiꞌ ra̱ ndu̱,
sa̱kanꞌ ña̱ xïkuiín ra̱ ña̱ sandoꞌoꞌ ra̱ ndu̱.
Sa̱a̱ ndo̱ꞌ ña̱ va̱ꞌa̱ te̱ nä̱ko̱o̱ i̱i̱n nda̱a̱ꞌ ndo̱ꞌ nduꞌu̱,
ne̱ xa̱ ni̱ kaku̱ na nda̱ꞌaꞌ ra̱.
4 Sa̱a̱ ndo̱ꞌ ña̱ va̱ꞌa̱ te̱ ta̱xi̱ ndo̱ꞌ ku̱ndi̱e̱e̱ nduꞌu̱,
ne̱ ñu̱ꞌuꞌ Moab,
ne̱ ni̱ kaku̱ nda̱ꞌaꞌ te̱ ndasiꞌ taꞌanꞌ xiinꞌ ndu̱,
ñu̱u̱ ndo̱ꞌ,
te̱ ku̱ndu̱u̱ ndo̱ꞌ ne̱ na̱kaꞌa̱n xaꞌa̱ꞌ ndu̱ꞌ nuu̱ꞌ te̱ kuni ka̱ꞌni̱ꞌ sa̱kuuꞌ ndu̱.
Sa̱kanꞌ ña̱ kii̱ꞌ ndi̱ꞌi̱ sa̱ndoꞌoꞌ te̱ ja̱a̱nꞌ ndu̱,
te̱ ndi̱ꞌi̱ tu̱ ña̱ sa̱nduxín ra̱ ka̱niiꞌ ñu̱u̱ ndu̱,
te̱ ku̱vi̱ sa̱kuuꞌ te̱ sandoꞌoꞌ ndu̱ ja̱a̱nꞌ”,
katyi̱ ni̱a̱.
5 Nu̱ta̱ i̱i̱n si̱a̱niꞌ xikaꞌ David,
te̱ ka̱ꞌndi̱a̱ tyuunꞌ nda̱ku va̱,
te̱ ja̱a̱nꞌ ndii,
ka̱ꞌndi̱a̱ tyuunꞌ ra̱ nde̱e̱ ndiꞌiꞌ ni̱ kivi̱ꞌ.
Te̱ ku̱ndu̱u̱ ra̱ i̱i̱n kuesí,
te̱ xatyuunꞌ nda̱ku va̱,
te̱ ka̱sa̱ꞌa̱ ra̱ nde̱iꞌ ña̱ i̱i̱n katyi va̱ nakaꞌán xaꞌa̱ꞌ sa̱kuuꞌ nuu̱ꞌ ne̱ yivi̱ꞌ.
Te̱ yatyi̱ va̱ tu̱ sa̱tyuunꞌ nda̱ku ra̱ xaꞌa̱ꞌ ne̱ yivi̱ꞌ.
6 Xiniꞌ ndu̱ kuento ña̱ ñuñuꞌ va̱ ndoꞌó,
ne̱ ndieeꞌ ñu̱ꞌuꞌ Moab ja̱a̱nꞌ,
te̱ xini tu̱ ndu̱ kuento ña̱ ñuñuꞌ nde̱e̱ ni̱ xaꞌa̱n ndi̱koꞌ ndo̱ꞌ,
te̱ kaniꞌiꞌ xiinꞌ miiꞌ tu̱ ndo̱ꞌ,
kaꞌán ni̱nu̱ va̱ tu̱ ndo̱ꞌ xaꞌa̱ꞌ mi̱iꞌ ndo̱ꞌ,
ndisu̱ sa̱kuuꞌ ña̱ kaꞌán ñuñuꞌ ndo̱ꞌ ja̱a̱nꞌ ndii,
xa̱ ni̱ ndo̱ñuꞌuꞌ ndo̱o̱ a̱.
7 Sa̱kanꞌ na kuiiꞌ sa̱kuuꞌ ndoꞌó,
ne̱ ndieeꞌ ñu̱ꞌuꞌ Moab,
xakuꞌ va̱ xaꞌa̱ꞌ ñu̱ꞌuꞌ ndo̱ꞌ ja̱a̱nꞌ,
te̱ sa̱kuuꞌ tu̱ ndo̱ꞌ sutyiꞌ xa̱va̱ꞌa̱ i̱ni̱ xaꞌa̱ꞌ ñu̱ꞌuꞌ ja̱a̱nꞌ,
te̱ kuuꞌ ndi̱ni va̱ tu̱ ndo̱ꞌ xaꞌa̱ꞌ xita̱ꞌ va̱ꞌa̱ ña̱ xaꞌa ne̱ ndieeꞌ ñu̱u̱ Kir-hareset xiinꞌ uva i̱tyiꞌ.
8 Nuu̱ꞌ ñu̱ꞌuꞌ ñu̱u̱ Hesbón xiinꞌ nuu̱ꞌ ñu̱ꞌuꞌ ñu̱u̱ Sibma ndii,
xa̱ ni̱ ityi̱ ndo̱o̱ yo̱ꞌoꞌ uva,
sa̱kanꞌ ña̱ xa̱ ni̱ xeꞌni̱ ndo̱o̱ rey,
te̱ xaꞌndia tyuunꞌ nuu̱ꞌ tu̱ku̱ ñu̱ꞌuꞌ,
sa̱kuuꞌ yo̱ꞌoꞌ uva ña̱ nda̱tu̱nꞌ xa̱va̱ꞌa̱ yoo nuu̱ꞌ ñu̱ꞌuꞌ ja̱a̱nꞌ.
Te̱ yo̱ꞌoꞌ uva ja̱a̱nꞌ ndii,
ni̱ na̱kaa̱ va̱ a̱ nde̱e̱ ni̱ na̱xa̱a̱ a̱ nde̱e̱ miiꞌ naá ñu̱u̱ Jazer,
te̱ ni̱ kiku̱ yo̱ꞌoꞌ a̱ sa̱a̱ kuaꞌa̱n miiꞌ i̱tyi kaaꞌ,
te̱ ni̱ kiku̱ tu̱ a̱ kuaꞌa̱n a̱ te̱ ni̱ xkaꞌndi̱a̱ a̱ nde̱e̱ nuu̱ꞌ mi̱ni̱ miiꞌ köo̱ꞌ i̱i̱n nda̱a̱ꞌ vi̱ꞌ ki̱tiꞌ naá.
9 Xaꞌa̱ꞌ a̱ ja̱a̱nꞌ na kuiiꞌ xakuꞌ ingaꞌ i̱ vi̱ti̱n xiinꞌ ne̱ ndieeꞌ ñu̱u̱ Jazer xaꞌa̱ꞌ a̱ ña̱ ni̱ ndo̱ꞌo̱ sa̱kuuꞌ yo̱ꞌoꞌ uva ni̱a̱ ña̱ yoo nuu̱ꞌ ñu̱ꞌuꞌ Sibma,
te̱ xiinꞌ ti̱kui nuu̱ꞌ i̱ koso̱ i̱ yo̱ꞌoꞌ uva ña̱ yoo nuu̱ꞌ ñu̱ꞌuꞌ Hesbón,
xiinꞌ ña̱ yoo nuu̱ꞌ ñu̱ꞌuꞌ Eleale,
ku̱a̱tyi̱ ndii,
nde̱e̱ i̱i̱n ne̱ yivi̱ꞌ kuäsa̱ꞌ ka̱ ndeꞌí tiꞌeꞌ ña̱ va̱ꞌa̱ kuni ni̱a̱ xaꞌa̱ꞌ uva xiinꞌ xaꞌa̱ꞌ ña̱ ndikoꞌ ni̱a̱ uva ja̱a̱nꞌ te̱ ta̱va̱ꞌ ni̱a̱ vino,
sa̱kanꞌ ña̱ xa̱ ni̱ ndi̱ꞌi̱ a̱ ni̱ xi̱tu̱ te̱ ndasiꞌ taꞌanꞌ xiinꞌ ni̱a̱.
10 Köo̱ꞌ ka̱ nde̱e̱ i̱i̱n ne̱ yivi̱ꞌ va̱ꞌa̱ kuni nuu̱ꞌ ñu̱ꞌuꞌ miiꞌ xikaꞌ ni̱a̱,
ni̱ nde̱e̱ köo̱ꞌ tu̱ ña̱ nakuatiaꞌ nimá ni̱a̱.
Nde̱e̱ i̱i̱n tu̱ köo̱ꞌ xitaꞌ sii̱ꞌ,
ni̱ nde̱e̱ köo̱ꞌ tu̱ ne̱ ndeꞌí ña̱ va̱ꞌa̱ kuni ni̱a̱ xaꞌa̱ꞌ yo̱ꞌoꞌ uva ja̱a̱nꞌ,
ni̱ nde̱e̱ köo̱ꞌ tu̱ ne̱ xeꞌní uva te̱ tava̱ꞌ ni̱a̱ vino.
Sa̱kanꞌ ña̱ xa̱ ni̱ ndi̱ꞌi̱ ña̱ kuaaꞌ sii̱ꞌ ne̱ yivi̱ꞌ ñu̱u̱ ja̱a̱nꞌ.
11 Sa̱kanꞌ na kuiiꞌ kisiꞌ a̱ nimá i̱ nde̱e̱ naa ñuu̱ꞌ ña̱ naniꞌ arpa xaꞌa̱ꞌ ña̱ ni̱ ndo̱ꞌo̱ nuu̱ꞌ ñu̱ꞌuꞌ Moab xiinꞌ ñu̱u̱ Kir-hareset.
12 Tee̱ꞌ ndee kuꞌu̱n te̱ kuꞌu̱n ne̱ ñu̱ꞌuꞌ Moab ja̱a̱nꞌ xíniꞌ i̱kuꞌ miiꞌ sukun va̱,
te̱ kaꞌa̱n ndaꞌvi ni̱a̱ xiinꞌ ndiosí,
ña̱ xakaꞌnuꞌ ni̱a̱,
nde̱e̱ xa̱vi ni̱a̱.
Te̱ kuꞌu̱n te̱ kuꞌu̱n tu̱ ni̱a̱ yu̱kunꞌ te̱ na̱ku̱a̱tu̱ ni̱a̱ nuu̱ꞌ ndiosí ni̱a̱ ndii,
köo̱ꞌ nde̱e̱ i̱i̱n ña̱ ku̱vi̱ sa̱a̱ ña̱ ja̱a̱nꞌ te̱ tyi̱ndi̱e̱eꞌ ña̱ꞌaꞌ a̱.
13 Ña̱ kaa̱ꞌ nduuꞌ ña̱ xa̱ ni̱ kaꞌa̱n Yahvé xta̱ꞌanꞌ ku̱ndo̱ꞌo̱ ne̱ ndieeꞌ ñu̱ꞌuꞌ Moab ja̱a̱nꞌ.
14 Ndisu̱ vi̱ti̱n kaꞌán a̱ Yahvé ndii:
“Kii̱ꞌ yaꞌa̱ uni̱ kuiya̱ ndii,
ku̱ndo̱ꞌo̱ ne̱ ndieeꞌ ñu̱ꞌuꞌ Moab nde̱e̱ naa i̱i̱n te̱ xikaꞌ nuuꞌ so̱ꞌo̱ nuu̱ꞌ i̱i̱n ne̱ yivi̱ꞌ,
te̱ ndiꞌni̱ va̱ ña̱ xaa̱ kiꞌi̱ꞌ ña̱ ndoo̱ ndiká ra̱ te̱ kuꞌu̱n ra̱ vi̱ꞌe̱ ra̱,
sa̱kanꞌ ña̱ ndi̱ꞌi̱ ndo̱o̱ ña̱ kaꞌnuꞌ ñu̱ꞌuꞌ Moab ja̱a̱nꞌ,
te̱ ne̱ yivi̱ꞌ,
ne̱ kuaꞌa̱ꞌ xa̱va̱ꞌa̱ ndieeꞌ i̱kanꞌ ndii,
ndi̱ꞌi̱ ndo̱o̱ ni̱a̱ ka̱ꞌni̱ꞌ te̱ xíinꞌ,
te̱ ndee tyaaꞌ ku̱i̱ti̱ꞌ ni̱a̱ ndoo̱ ku̱ti̱a̱ku̱ ku̱ndi̱e̱e̱ nuu̱ꞌ ñu̱ꞌuꞌ ja̱a̱nꞌ”,
katyi a̱.