Yoꞌoꞌ ku̱a̱xi̱ ña̱ ni̱ kaꞌa̱n tiakú Isaías ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Moab
15
Ña̱ yo̱ꞌo̱ꞌ nduuꞌ ña̱ kaꞌán ndi̱a̱a̱ ña̱ ni̱ sa̱tuví Ndiosí nuu̱ꞌ i̱ ña̱ ku̱ndo̱ꞌo̱ ne̱ ndieeꞌ nuu̱ꞌ ñu̱ꞌuꞌ Moab.
I̱i̱n nda̱a̱ꞌ ñu̱u ku̱i̱ti̱ꞌ te̱ sa̱nduxín te̱ yivi̱ꞌ ka̱niiꞌ ñu̱u̱ Ar,
ña̱ naá nuu̱ꞌ ñu̱ꞌuꞌ Moab ja̱a̱nꞌ,
te̱ sa̱ndo̱ñuꞌuꞌ xa̱tyiꞌ tu̱ ra̱ ñu̱u̱ Kir,
ña̱ naá tu̱ nuu̱ꞌ ñu̱ꞌuꞌ ja̱a̱nꞌ.
2 Ne̱ ndieeꞌ ñu̱u̱ Dibón ndii,
kuaꞌa̱n ka̱a̱ sa̱kuuꞌ ni̱a̱ xíniꞌ i̱kuꞌ miiꞌ sukun va̱ miiꞌ itaꞌ yu̱kunꞌ ndiosí ni̱a̱,
te̱ ku̱a̱ku̱ ni̱a̱ i̱kanꞌ.
Te̱ ne̱ ndieeꞌ nuu̱ꞌ ñu̱ꞌuꞌ Moab ja̱a̱nꞌ ndii,
xakuꞌ va̱ ni̱a̱ xaꞌa̱ꞌ ña̱ ni̱ nduxi̱n ndo̱o̱ ñu̱u̱ Nebo xiinꞌ ñu̱u̱ Medeba.
Te̱ sa̱kuuꞌ ne̱ yivi̱ꞌ ndii,
ni̱ ta̱va̱ꞌ tiꞌeꞌ ni̱a̱ i̱xiꞌ xíniꞌ ni̱a̱,
te̱ tiaa̱ ndii,
ni̱ ya̱kun ndo̱o̱ ra̱ i̱xiꞌ nuu̱ꞌ ra̱,
ni̱ xa̱a̱ ni̱a̱ sa̱kanꞌ xaꞌa̱ꞌ ña̱ sutyiꞌ xa̱va̱ꞌa̱ i̱ni̱ ni̱a̱.
3 Te̱ sa̱kuuꞌ ni̱a̱ niꞌnuꞌ toto̱ nde̱iꞌ kuaꞌa̱n ni̱a̱ ya̱ꞌya̱,
uun kuaꞌa̱n ni̱a̱ ya̱ꞌvi̱,
uun ndieeꞌ ni̱a̱ xata̱ꞌ vi̱ꞌe̱ ni̱a̱.
Te̱ sa̱kuuꞌ tu̱ ni̱a̱ xakuꞌ ndi̱i va̱,
te̱ xa̱ yoo ni̱a̱ ku̱vi̱ xa̱tyiꞌ ni̱a̱ ña̱ kuaꞌa̱ꞌ va̱ ti̱kui nuu̱ꞌ ni̱a̱ xitíá xakuꞌ ni̱a̱.
4 Te̱ ne̱ ndieeꞌ ñu̱u̱ Hesbón xiinꞌ ne̱ ndieeꞌ ñu̱u̱ Eleale ndii,
kuaaꞌ tiꞌeꞌ ni̱a̱ xikán ni̱a̱ ña̱ tyi̱ndi̱e̱eꞌ ña̱ꞌaꞌ ne̱ yivi̱ꞌ,
te̱ nde̱e̱ ñu̱u̱ Jahaza tiakú kuaaꞌ ni̱a̱,
sa̱kanꞌ na kuiiꞌ kisiꞌ vi̱ꞌ a̱ nimá nde̱e̱ te̱ xíinꞌ,
te̱ ndi̱e̱ni va̱ ku̱ntaꞌanꞌ te̱ ndieeꞌ ñu̱ꞌuꞌ Moab ja̱a̱nꞌ xaꞌa̱ꞌ a̱ ña̱ yiꞌvi xa̱va̱ꞌa̱ ra̱.
5 Nde̱e̱ nimá yuꞌu̱ xakuꞌ xaꞌa̱ꞌ ña̱ ndoꞌoꞌ ne̱ ndieeꞌ ñu̱ꞌuꞌ Moab ja̱a̱nꞌ,
te̱ ne̱ ndieeꞌ ñu̱ꞌuꞌ ja̱a̱nꞌ ndii,
xinuꞌ ndo̱o̱ ni̱a̱ kuaꞌa̱n ni̱a̱ nde̱e̱ ñu̱u̱ Zoar,
te̱ so̱ꞌo̱ kuaꞌa̱n ni̱a̱ i̱tyiꞌ ña̱ kuaꞌa̱n ñu̱u̱ Eglat-selisiyá.
Xakuꞌ ni̱a̱ kuaꞌa̱n ka̱a̱ ni̱a̱ i̱tyiꞌ ña̱ kuaꞌa̱n ñu̱u̱ Luhit.
Te̱ nde̱e̱ ku̱vi̱ ku̱ni̱ so̱ꞌo̱ e̱ꞌ tiakú xakuꞌ ni̱a̱ ñuꞌuꞌ ni̱a̱ i̱tyiꞌ ña̱ kuaꞌa̱n ñu̱u̱ Horonaim,
kuaꞌa̱n na̱kaa̱ꞌ ni̱a̱ xaꞌa̱ꞌ a̱ ña̱ ni̱ nduxi̱n ndo̱o̱ miiꞌ ndieeꞌ ni̱a̱.
6 Te̱ ti̱kui i̱ti̱a̱ ñu̱u̱ Nimrim ndii,
xa̱ ni̱ ndo̱ko̱ ndo̱o̱ raꞌ,
te̱ xa̱ ni̱ ityi̱ ndo̱o̱ tu̱ kuꞌu̱ kuiiꞌ nuu̱ꞌ ñu̱ꞌuꞌ ja̱a̱nꞌ,
nde̱e̱ i̱i̱n kuꞌu̱ iti̱a̱ꞌ köo̱ꞌ ka̱ yoo i̱kanꞌ,
te̱ kuäsa̱ꞌ xa̱tyiꞌ ka̱ kuii̱ꞌ kaaꞌ sa̱a̱ kuaꞌa̱n ka̱niiꞌ nuu̱ꞌ ñu̱ꞌuꞌ ja̱a̱nꞌ.
7 Sa̱kanꞌ na kuiiꞌ natyiꞌi̱ꞌ ne̱ yivi̱ꞌ sa̱kuuꞌ ña̱ vikaꞌ ni̱a̱ ña̱ ni̱ ka̱ya̱ ni̱a̱,
te̱ kuaꞌa̱n ndi̱a̱ka̱ ni̱a̱ nde̱e̱ tu̱ku̱ taꞌviꞌ yu̱ꞌuꞌ i̱ti̱a̱ miiꞌ yoo tunꞌ i̱ñu̱ꞌ yivi̱ꞌ.
8 Te̱ tiakú kuaaꞌ ni̱a̱ kuaꞌa̱n ni̱a̱ ka̱niiꞌ xeꞌinꞌ ñu̱ꞌuꞌ Moab ja̱a̱nꞌ xikán ni̱a̱ ña̱ tyi̱ndi̱e̱eꞌ ña̱ꞌaꞌ ne̱ yivi̱ꞌ,
te̱ nde̱e̱ ñu̱u̱ Eglaim tiakú kuaaꞌ ni̱a̱,
te̱ naxaá tatyi̱ꞌ ni̱a̱ nde̱e̱ ñu̱u̱ Beer-elim.
9 Te̱ tee̱ꞌ ndee xa̱ ni̱ na̱ndu̱u̱ ndo̱o̱ ti̱kui i̱ti̱a̱ ñu̱u̱ Dimón níiꞌ,
ndisu̱ kusaaꞌ ti̱ꞌviꞌ ka̱ yuꞌu̱ Yahvé kuiꞌe̱ xatu̱ ka̱ ku̱ndo̱ꞌo̱ ne̱ ndieeꞌ ñu̱u̱ ja̱a̱nꞌ,
sa̱kanꞌ ña̱ ne̱ kaku̱ na nda̱ꞌaꞌ te̱ xíinꞌ te̱ ndieeꞌ ñu̱ꞌuꞌ Moab ja̱a̱nꞌ ndii,
ti̱ꞌviꞌ i̱ i̱i̱n lion te̱ ka̱xi̱ꞌ ndiꞌiꞌ ña̱ꞌaꞌ riꞌ,
te̱ ka̱xi̱ꞌ tu̱ riꞌ sa̱kuuꞌ i̱nga̱ ne̱ ndoo̱ ndieeꞌ nuu̱ꞌ ñu̱ꞌuꞌ ja̱a̱nꞌ.