Yoꞌoꞌ kaꞌán tiakú Isaías xaꞌa̱ꞌ ña̱ sa̱nduxín Ndiosí ñu̱ꞌuꞌ Babilonia
13
Ña̱ yo̱ꞌo̱ꞌ nduuꞌ ña̱ kaꞌán tiakú Ndiosí xiinꞌ Isaías,
siꞌe̱ Amoz,
xaꞌa̱ꞌ ña̱ sa̱nduxín a̱ ñu̱ꞌuꞌ Babilonia kii̱ꞌ ni̱ sa̱tuví a̱ nuu̱ꞌ ra̱,
kaꞌán a̱ ndii:
2 “Kuaꞌan ka̱a̱ ndo̱ꞌ xíniꞌ i̱kuꞌ miiꞌ sukun va̱ xiki̱ꞌ tiꞌeꞌ,
te̱ ndo̱ni̱ꞌi̱ sukun ndo̱ꞌ i̱i̱n bandera,
te̱ kaꞌa̱n tiꞌeꞌ tu̱ ndo̱ꞌ xiinꞌ te̱ xíinꞌ,
te̱ ka̱na̱ nda̱ꞌaꞌ tu̱ ña̱ꞌaꞌ ndo̱ꞌ,
te̱ ko̱ꞌni̱ kiꞌi̱ꞌ ra̱ yiꞌeꞌ vi̱ꞌe̱ miiꞌ ndieeꞌ te̱ kuuꞌ kaꞌnuꞌ.
3 Xa̱ ni̱ kaꞌa̱n tyuunꞌ i̱ xiinꞌ sa̱kuuꞌ te̱ nduuꞌ ndi̱ti̱a̱ i̱,
te̱ xa̱ ni̱ ka̱na̱ tu̱ i̱ sa̱kuuꞌ te̱ xíinꞌ,
te̱ ndi̱e̱ni va̱,
te̱ te̱ ja̱a̱nꞌ ndii,
va̱ꞌa̱ va̱ ku̱ni̱ ra̱ kii̱ꞌ ketaꞌ va̱ꞌa̱ i̱ xiinꞌ te̱ ndasiꞌ taꞌanꞌ xiinꞌ i̱.
Te̱ ja̱a̱nꞌ nduuꞌ te̱ kuꞌu̱n ka̱ꞌni̱ꞌ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Babilonia,
ne̱ xiꞌé va̱ i̱ xini i̱”,
katyi a̱.
4 Tiakú ndo̱o̱ i̱yo̱ va̱ niꞌi̱ xíniꞌ i̱kuꞌ nde̱e̱ naa kuaaꞌ tiꞌeꞌ kuaꞌa̱ꞌ xa̱va̱ꞌa̱ ne̱ yivi̱ꞌ.
Ku̱ni̱ so̱ꞌo̱ ndo̱ꞌ tiakú kuaaꞌ sa̱kuuꞌ ti̱ꞌvi̱ ne̱ tukuꞌ,
ne̱ ni̱ na̱kaya̱ i̱kanꞌ.
Yahvé Ndiosí,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ni̱ na̱ka̱ya̱ a̱ sa̱kuuꞌ te̱ xíinꞌ ja̱a̱nꞌ i̱kanꞌ,
te̱ xa̱ yoo tu̱ꞌva̱ ra̱ te̱ ku̱ntaꞌanꞌ ra̱.
5 Te̱ xíinꞌ ja̱a̱nꞌ ndii,
xikaꞌ va̱ nuu̱ꞌ tu̱ku̱ ñu̱ꞌuꞌ ni̱ ki̱e̱e̱ ra̱,
te̱ ku̱a̱xi̱ ra̱ nde̱e̱ tu̱ku̱ taꞌviꞌ ñu̱ꞌuꞌ i̱i̱n yivi̱ꞌ.
Te̱ ja̱a̱nꞌ nduuꞌ nde̱e̱ naa nda̱tyuunꞌ,
tunꞌ tiinꞌ Yahvé te̱ sa̱ndo̱ñuꞌuꞌ a̱ sa̱kuuꞌ ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ Babilonia,
xaꞌa̱ꞌ a̱ ña̱ xiꞌé va̱ a̱ xini ña̱ꞌaꞌ a̱.
6 Ku̱a̱ku̱ ndi̱i sa̱kuuꞌ ndo̱ꞌ,
sa̱kanꞌ ña̱ xa̱ kuyatinꞌ va̱ xaa̱ kivi̱ꞌ ña̱ ki̱xi̱n sa̱ndoꞌoꞌ Yahvé sa̱kuuꞌ ndoꞌó,
ne̱ ndieeꞌ nuu̱ꞌ ñu̱ꞌuꞌ Babilonia,
te̱ ku̱a̱xi̱ kivi̱ꞌ ña̱ sa̱nduxín xa̱tyiꞌ Yahvé,
ña̱ sa̱kuuꞌ a̱ ku̱vi̱,
ka̱niiꞌ ñu̱ꞌuꞌ ndo̱ꞌ.
7 Xaꞌa̱ꞌ a̱ ja̱a̱nꞌ na nde̱e̱ i̱i̱n ne̱ yivi̱ꞌ ndö̱ni̱ꞌi̱ nda̱ꞌaꞌ ka̱ xaꞌa̱ꞌ a̱ ña̱ yiꞌvi va̱ ni̱a̱,
te̱ sa̱kuuꞌ tu̱ ni̱a̱ ku̱yi̱ꞌvi xa̱va̱ꞌa̱ kii̱ꞌ xaa̱ kivi̱ꞌ ja̱a̱nꞌ.
8 Te̱ ku̱yi̱ꞌvi xa̱va̱ꞌa̱ sa̱kuuꞌ ni̱a̱,
te̱ ku̱ndi̱ꞌni̱ xa̱va̱ꞌa̱ tu̱ ni̱a̱,
te̱ ku̱ni̱ uꞌvi̱ xa̱va̱ꞌa̱ tu̱ ni̱a̱ nde̱e̱ naa ndoꞌoꞌ ña̱ꞌaꞌ kii̱ꞌ kitúꞌ siꞌe̱ aꞌ,
te̱ i̱ꞌi̱n ni̱a̱ ndii,
ku̱yi̱ꞌvi xa̱va̱ꞌa̱ ni̱a̱ ku̱ni̱ ni̱a̱ ne̱ ndieeꞌ ya̱ti̱n vi̱ꞌe̱ ku̱i̱ti̱ꞌ ni̱a̱,
te̱ ku̱ka̱ꞌa̱n xa̱va̱ꞌa̱ tu̱ nuu̱ꞌ ni̱a̱.
9 Sa̱kanꞌ ña̱ xa̱ ku̱a̱xi̱ kivi̱ꞌ ña̱ i̱yo̱ va̱ ku̱u̱ sa̱a̱ Yahvé,
kivi̱ꞌ ña̱ sa̱ndoꞌoꞌ xa̱va̱ꞌa̱ Ndiosí ne̱ yivi̱ꞌ xiinꞌ kivi̱ꞌ ña̱ ka̱ꞌmi̱ ndo̱o̱ a̱ ne̱ yivi̱ꞌ xaꞌa̱ꞌ a̱ ña̱ xiꞌé xa̱va̱ꞌa̱ a̱ xini ña̱ꞌaꞌ a̱ xaꞌa̱ꞌ ku̱a̱tyi̱ ni̱a̱,
te̱ sa̱nduxín xa̱tyiꞌ a̱ ñu̱ꞌuꞌ i̱i̱n yivi̱ꞌ,
te̱ na̱ndu̱u̱ a̱ nde̱e̱ naa miiꞌ i̱tyi kaaꞌ.
10 Kivi̱ꞌ ja̱a̱nꞌ ndii,
nde̱e̱ i̱i̱n tiuu̱nꞌ,
tiꞌ ndieeꞌ ndi̱viꞌ,
nä̱tuu̱n ka̱,
ni̱ nde̱e̱ tiuu̱nꞌ tyiee̱,
tiꞌ ketaꞌ ku̱a̱xi̱ kitúꞌ,
te̱ sa̱kanꞌ tu̱ ñu̱ꞌu̱ ndii,
ku̱a̱xi̱ ke̱ta̱ so̱ꞌo̱ a̱ te̱ ndaꞌva̱ a̱,
te̱ nä̱tuu̱n ka̱ tu̱ yoo̱ꞌ.
11 Te̱ kaꞌán tu̱ Ndiosí ndii:
“Ku̱a̱xi̱ kivi̱ꞌ ña̱ sa̱ndoꞌoꞌ i̱ sa̱kuuꞌ ne̱ yivi̱ꞌ i̱i̱n yivi̱ꞌ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱,
te̱ sa̱ndoꞌoꞌ tu̱ i̱ sa̱kuuꞌ ne̱ ni̱a̱ꞌa xaꞌa̱ꞌ ku̱a̱tyi̱ ña̱ xaaꞌ ni̱a̱.
Te̱ sa̱kanꞌ tu̱ sa̱ndo̱ñuꞌuꞌ i̱ sa̱kuuꞌ ne̱ ñuñuꞌ,
te̱ sa̱kaꞌanꞌ tu̱ i̱ nuu̱ꞌ sa̱kuuꞌ ne̱ kaniꞌiꞌ xiinꞌ miiꞌ xiinꞌ ne̱ xïtoꞌ kaꞌnuꞌ ne̱ yivi̱ꞌ.
12 Te̱ kivi̱ꞌ ja̱a̱nꞌ ndii,
köo̱ꞌ kuaꞌa̱ꞌ xa̱tyiꞌ ka̱ ne̱ yivi̱ꞌ ko̱o̱ i̱i̱n yivi̱ꞌ sa̱a̱ i̱,
te̱ ko̱ndi̱a̱ yaꞌviꞌ ni̱a̱ nde̱e̱ naa oro ña̱ nda̱tu̱nꞌ xa̱va̱ꞌa̱,
te̱ köo̱ꞌ kuaꞌa̱ꞌ xa̱tyiꞌ ka̱ tu̱ te̱ yivi̱ꞌ ko̱o̱ sa̱a̱ i̱,
te̱ ko̱ndi̱a̱ yaꞌviꞌ ra̱ nde̱e̱ naa oro ña̱ yoo nuu̱ꞌ ñu̱ꞌuꞌ Ofir.
13 Te̱ xaꞌa̱ꞌ a̱ ña̱ xiꞌé va̱ yuꞌu̱,
Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
xini i̱ ne̱ yivi̱ꞌ i̱i̱n yivi̱ꞌ kivi̱ꞌ ja̱a̱nꞌ ndii,
sa̱kanda i̱ ndi̱viꞌ,
te̱ sa̱nu̱ndiaꞌá tu̱ i̱ ñu̱ꞌuꞌ i̱i̱n yivi̱ꞌ miiꞌ nduꞌu̱ꞌ a̱,
te̱ ka̱ꞌmi̱ tu̱ i̱ sa̱kuuꞌ ni̱a̱ xaꞌa̱ꞌ a̱ ña̱ ni̱ na̱saa̱ꞌ xa̱va̱ꞌa̱ i̱ xini i̱ ni̱a̱”,
katyi a̱.
14 Te̱ sa̱kuuꞌ ne̱ yivi̱ꞌ,
ne̱ ni̱ ki̱e̱e̱ tu̱ku̱ xaanꞌ,
te̱ ndieeꞌ ni̱a̱ nuu̱ꞌ ñu̱ꞌuꞌ Babilonia kii̱ꞌ xaa̱ kivi̱ꞌ ja̱a̱nꞌ ndii,
na̱ndi̱koꞌ ni̱a̱ miiꞌ ndieeꞌ ne̱ i̱i̱n kuuꞌ xiinꞌ ni̱a̱ nde̱e̱ naa xaaꞌ i̱su̱,
tiꞌ ndikún te̱ yivi̱ꞌ kuni ka̱ꞌni̱ꞌ ra̱,
uun ku̱nu̱ ni̱a̱ te̱ na̱ndi̱koꞌ ni̱a̱ nuu̱ꞌ ñu̱ꞌuꞌ miiꞌ ni̱ ki̱e̱e̱ ni̱a̱ nde̱e̱ naa xaaꞌ mbe̱e̱,
tiꞌ ni̱ xiti̱a̱ i̱ꞌnu̱.
15 Naaꞌ na̱ti̱i̱n te̱ xíinꞌ yo̱o̱ ka̱ ndii,
ka̱ꞌni̱ꞌ ndo̱o̱ ña̱ꞌaꞌ ra̱ xiinꞌ kuxi̱,
te̱ yo̱o̱ ka̱ vi̱kuꞌu̱n nda̱ꞌaꞌ te̱ xíinꞌ ndii,
ka̱ꞌni̱ꞌ ña̱ꞌaꞌ ra̱ xiinꞌ ityi̱.
16 Nuu̱ꞌ niꞌnuꞌ ni̱a̱ itaꞌ ni̱a̱ i̱kanꞌ te̱ ti̱i̱n te̱ xíinꞌ ja̱a̱nꞌ siꞌe̱ kuañuꞌu̱ ni̱a̱ su̱ku̱ꞌ ra̱ ñu̱ꞌuꞌ te̱ ka̱ꞌni̱ꞌ ña̱ꞌaꞌ ra̱,
te̱ sa̱kuiꞌnaꞌ ra̱ sa̱kuuꞌ ña̱ꞌa̱ ña̱ kumiꞌ ni̱a̱ vi̱ꞌe̱ ni̱a̱,
te̱ ko̱so̱ꞌ uꞌvi̱ va̱ tu̱ ra̱ ñaꞌ siꞌi sa̱kuuꞌ te̱ yivi̱ꞌ kivi̱ꞌ ja̱a̱nꞌ.
17 “Ko̱to̱ ndo̱ꞌ,
te̱ xíinꞌ,
te̱ ndieeꞌ nuu̱ꞌ ñu̱ꞌuꞌ Medo,
tyu̱ꞌu̱ꞌ i̱ kuꞌu̱n ka̱ꞌni̱ꞌ ña̱ꞌaꞌ,
te̱ ja̱a̱nꞌ ndii,
ku̱ï̱i̱n ra̱ ki̱ꞌi̱n ra̱ xu̱ꞌunꞌ yuu̱ꞌ plata nda̱ꞌaꞌ ni̱a̱,
ni̱ nde̱e̱ xtäni̱ tu̱ ra̱ sa̱ta̱ꞌ ña̱ꞌaꞌ ni̱a̱ xiinꞌ xu̱ꞌunꞌ yuu̱ꞌ oro,
te̱ kä̱ꞌni̱ꞌ ña̱ꞌaꞌ ra̱.
18 Ka̱ꞌni̱ꞌ ndo̱o̱ ra̱ ne̱ sa̱va̱ xiinꞌ tunꞌ to̱so̱,
tunꞌ ndisoꞌ ra̱,
te̱ köo̱ꞌ kaꞌnuꞌ xa̱tyiꞌ tu̱ i̱ni̱ ra̱ xaꞌa̱ꞌ ña̱ kuañuꞌu̱ na̱a̱ꞌ,
ni̱ nde̱e̱ kuäsa̱ꞌ tu̱ ndaꞌvi kuuꞌ ne̱ kuatyi̱ꞌ kualiꞌ nuu̱ꞌ ra̱ kii̱ꞌ ka̱ꞌni̱ꞌ ña̱ꞌaꞌ ra̱.”
19 Te̱ ndieeꞌ nuu̱ꞌ ñu̱ꞌuꞌ Babilonia,
ña̱ nda̱tu̱nꞌ nde̱e̱ naa nda̱tu̱nꞌ yuu̱ ña̱ naniꞌ perla,
nduuꞌ ñu̱u̱ miiꞌ ndieeꞌ te̱ xaꞌndia tyuunꞌ.
Te̱ nduuꞌ tu̱ a̱ ñu̱u̱ kaꞌnuꞌ va̱ nuu̱ꞌ te̱ vi̱ꞌe̱ Caldeo,
te̱ kaꞌán ñuñuꞌ tu̱ ra̱ xaꞌa̱ꞌ a̱.
Ndisu̱ sa̱ndo̱ñuꞌuꞌ ña̱ꞌaꞌ Ndiosí nde̱e̱ naa ni̱ xa̱a̱ a̱ xiinꞌ ñu̱u̱ Sodoma xiinꞌ ñu̱u̱ Gomorra.
20 Köo̱ꞌ kivi̱ꞌ xa̱tyiꞌ ka̱ ku̱ndi̱e̱e̱ nde̱e̱ i̱i̱n ne̱ yivi̱ꞌ ñu̱u̱ ja̱a̱nꞌ,
ni̱ nde̱e̱ köo̱ꞌ kivi̱ꞌ ku̱ndi̱e̱e̱ ne̱ yivi̱ꞌ ñu̱u̱ ja̱a̱nꞌ tee̱ꞌ ndee yaꞌa̱ kivi̱ꞌ.
Ni̱ nde̱e̱ köo̱ꞌ kivi̱ꞌ ka̱ tu̱ ka̱sa̱ꞌa̱ ne̱ yivi̱ꞌ,
ne̱ ku̱a̱xi̱ nuu̱ꞌ ñu̱ꞌuꞌ Arabia,
vi̱ꞌe̱ toto̱ ñu̱u̱ ja̱a̱nꞌ,
te̱ ku̱ndi̱e̱e̱ ni̱a̱.
Ni̱ nde̱e̱ te̱ pa̱xto küꞌu̱n i̱kanꞌ xiinꞌ mbe̱e̱ sana̱ ra̱ te̱ na̱ndiee̱ꞌ riꞌ i̱kanꞌ ñu̱u.
21 Te̱ ki̱tiꞌ i̱kuꞌ ku̱i̱ti̱ꞌ ku̱ndi̱e̱e̱ kusu̱n ñu̱u̱ ña̱ ni̱ nduxi̱n ja̱a̱nꞌ,
te̱ vi̱ꞌe̱ ña̱ ni̱ nduxi̱n itaꞌ i̱kanꞌ ndii,
ndee ki̱tiꞌ,
tiꞌ xakuꞌ ku̱i̱ti̱ꞌ,
ku̱ndi̱e̱e̱ ti̱xi̱n a̱.
Te̱ ku̱ndi̱e̱e̱ ma̱yo i̱kanꞌ xiinꞌ siꞌe̱ riꞌ,
te̱ sa̱kanꞌ tu̱ i̱kanꞌ ka̱nde̱ta̱ ti̱xuꞌu̱ꞌ i̱kuꞌ ka̱ka̱ riꞌ.
22 Te̱ vi̱ꞌe̱ miiꞌ ni̱ nduꞌu̱ꞌ rey xaꞌndia tyuunꞌ ra̱ ndii,
nde̱e̱ naya̱ꞌ i̱kuꞌ ku̱i̱ti̱ꞌ ku̱a̱ku̱ ku̱ndi̱e̱e̱ i̱kanꞌ.
Te̱ vi̱ꞌe̱ kaꞌnuꞌ nda̱tu̱nꞌ va̱ miiꞌ ni̱ nduꞌu̱ꞌ ra̱ ndii,
ndee lobo ku̱i̱ti̱ꞌ ku̱ndi̱e̱e̱ i̱kanꞌ na̱ndiee̱ꞌ riꞌ.
Xa̱ kuyatinꞌ kuiiꞌ va̱ sa̱ndo̱ñuꞌuꞌ Ndiosí sa̱kuuꞌ ne̱ ndieeꞌ nuu̱ꞌ ñu̱ꞌuꞌ Babilonia ja̱a̱nꞌ,
te̱ nä̱kaa̱ ka̱ kivi̱ꞌ ka̱ka̱ ni̱a̱ i̱i̱n yivi̱ꞌ.