Yoꞌoꞌ kaꞌán Isaías ña̱ ka̱ta̱ sa̱kuuꞌ ne̱ vi̱ꞌe̱ Israel ya̱a̱ nuu̱ꞌ Ndiosí kii̱ꞌ xaa̱ kivi̱ꞌ ña̱ sa̱kakú ña̱ꞌaꞌ a̱
12
Kii̱ꞌ xaa̱ kivi̱ꞌ ja̱a̱nꞌ te̱ ka̱ta̱ ndo̱ꞌ nuu̱ꞌ Ndiosí taxiꞌ ndo̱ꞌ ña̱ tyi̱nda̱ni a̱ te̱ kaꞌán ndo̱ꞌ ndii:
“Tákuiꞌe Yahvé,
nuu̱ꞌ yoꞌó ka̱ta̱ i̱ ya̱a̱,
sa̱kanꞌ ña̱ tee̱ꞌ ndee ni̱ na̱saa̱ꞌ u̱nꞌ ni̱ xi̱ni̱ u̱nꞌ yuꞌu̱ ndii,
tu̱ku̱ sa̱kanꞌ ni̱ sa̱xi̱o̱o̱ u̱nꞌ ña̱ xiꞌé u̱nꞌ ja̱a̱nꞌ nuu̱ꞌ i̱,
te̱ vi̱ti̱n ndii,
ni̱ sa̱kiꞌví u̱nꞌ yuꞌu̱.
2 Sa̱kanꞌ ña̱ yoꞌó nduuꞌ ña̱ sa̱kakú yuꞌu̱,
te̱ i̱ni̱ i̱ xini yoꞌó,
te̱ kuäsa̱ꞌ yiꞌvi nde̱e̱ siee,
sa̱kanꞌ ña̱ yoꞌó,
Tákuiꞌe Yahvé,
taxiꞌ ña̱ ndi̱e̱eꞌ i̱,
te̱ su̱vi̱ tu̱ u̱nꞌ xaaꞌ sa̱kanꞌ te̱ xitaꞌ i̱ ya̱a̱ nuu̱ꞌ u̱nꞌ xakaꞌnuꞌ i̱ yoꞌó,
sa̱kanꞌ ña̱ su̱vi̱ u̱nꞌ ni̱ sa̱kakú yuꞌu̱”,
katyi̱ ndo̱ꞌ.
3 Te̱ sa̱kanꞌ tu̱ va̱ꞌa̱ va̱ ku̱ni̱ ndo̱ꞌ ña̱ sa̱kakú Ndiosí ndoꞌó nde̱e̱ naa xaaꞌ ne̱ yivi̱ꞌ kii̱ꞌ tava̱ꞌ ni̱a̱ kuaꞌa̱ꞌ ti̱kui ko̱ꞌo̱ ni̱a̱ i̱i̱n poso.
4 Te̱ kaꞌa̱n ndo̱ꞌ xiinꞌ ne̱ yivi̱ꞌ kivi̱ꞌ ja̱a̱nꞌ ndii:
“Sa̱kaꞌnuꞌ ndo̱ꞌ Yahvé,
te̱ ki̱ꞌi̱n kaꞌnuꞌ ndo̱ꞌ kivi̱ꞌ a̱,
te̱ kaꞌa̱n ndo̱ꞌ xiinꞌ ne̱ tukuꞌ xaꞌa̱ꞌ ña̱ xaaꞌ a̱,
te̱ kaꞌa̱n ndo̱so̱ꞌ tu̱ ndo̱ꞌ nuu̱ꞌ ne̱ yivi̱ꞌ xaꞌa̱ꞌ ña̱ kaꞌnuꞌ a̱.
5 Ka̱ta̱ ndo̱ꞌ ya̱a̱ ña̱ kuiee kuaꞌa̱n nuu̱ꞌ Yahvé,
sa̱kanꞌ ña̱ kuaꞌa̱ꞌ va̱ ña̱ nandani̱ ni̱ xa̱a̱ a̱,
te̱ kuní a̱ ña̱ ku̱nda̱ni̱ sa̱kuuꞌ ne̱ yivi̱ꞌ xaꞌa̱ꞌ ña̱ ja̱a̱nꞌ i̱i̱n kaniiꞌ nuu̱ꞌ ñu̱ꞌuꞌ i̱i̱n yivi̱ꞌ.
6 Na ka̱ta̱ ndoꞌó,
ne̱ ndieeꞌ ñu̱u̱ Jerusalén,
te̱ na ku̱a̱aꞌ tiꞌeꞌ tu̱ ndo̱ꞌ kii̱ꞌ xitaꞌ ndo̱ꞌ ya̱a̱ ja̱a̱nꞌ xaꞌa̱ꞌ a̱ ña̱ va̱ꞌa̱ va̱ kuni ndo̱ꞌ,
sa̱kanꞌ ña̱ kaꞌnuꞌ va̱ ña̱ nduuꞌ Ndiosí su̱ꞌu̱n,
ña̱ xakaꞌnuꞌ yooꞌ,
ne̱ vi̱ꞌe̱ Israel,
ña̱ yoo xiinꞌ e̱ꞌ”,
katyi̱ ndo̱ꞌ.