Yoꞌoꞌ kaꞌán Isaías xaꞌa̱ꞌ ña̱ ka̱ꞌndi̱a̱ tyuunꞌ mani̱ꞌ rey Mesías
11
Nde̱e̱ naa xaaꞌ i̱i̱n ti̱kundu̱ ña̱ nakaꞌndi nda̱ꞌaꞌ nu̱ꞌ uunꞌ nde̱e̱ naa xaaꞌ ti̱o̱ꞌo̱ i̱tunꞌ ña̱ nianiaꞌ a̱ te̱ kuunꞌ nduu̱ꞌ nda̱ꞌaꞌ nuꞌ ndii,
niiꞌ sa̱kanꞌ tu̱ sa̱a̱ a̱ xiinꞌ ndii̱ xkuaa̱ꞌ Isaí,
yu̱vaꞌ rey David,
ña̱ tuvi̱ i̱i̱n si̱a̱niꞌ xikaꞌ ra̱,
te̱ ka̱ꞌndi̱a̱ tyuunꞌ.
2 Te̱ mi̱iꞌ Espíritu Ndiosí ko̱o̱ xiinꞌ si̱a̱niꞌ xikaꞌ ra̱ ja̱a̱nꞌ,
te̱ Espíritu ja̱a̱nꞌ sa̱a̱ sa̱kanꞌ te̱ ku̱ndu̱u̱ ra̱ te̱ xini tuní va̱,
te̱ ku̱ndu̱u̱ tu̱ ra̱ te̱ kooꞌ tyukuuꞌ va̱,
te̱ Espíritu ja̱a̱nꞌ tu̱ sa̱a̱ sa̱kanꞌ te̱ ku̱ndu̱u̱ ra̱ te̱ tyu̱u̱n va̱ kaꞌa̱n nde̱iꞌ nuu̱ꞌ ne̱ yivi̱ꞌ,
te̱ ku̱ndu̱u̱ tu̱ ra̱ te̱ kumiꞌ xa̱va̱ꞌa̱ ña̱ ndi̱e̱eꞌ,
te̱ Espíritu ja̱a̱nꞌ tu̱ sa̱a̱ sa̱kanꞌ te̱ ku̱ndu̱u̱ ra̱ te̱ ndityi va̱,
te̱ ku̱yi̱ꞌvi tu̱ ra̱ Ndiosí.
3 Te̱ va̱ꞌa̱ va̱ ku̱ni̱ ra̱ te̱ ku̱yi̱ꞌvi ra̱ Yahvé,
te̱ kä̱tunꞌ ra̱ ne̱ yivi̱ꞌ xaꞌa̱ꞌ sa̱a̱ yoo ku̱i̱ti̱ꞌ ni̱a̱ ni̱ nde̱e̱ kä̱tunꞌ tu̱ ña̱ꞌaꞌ ra̱ xaꞌa̱ꞌ ña̱ ku̱ni̱ so̱ꞌo̱ ra̱ kaꞌán ne̱ yivi̱ꞌ ku̱i̱ti̱ꞌ.
4 Süu̱ꞌ ja̱a̱nꞌ ndii,
na̱kaꞌa̱n ra̱ xaꞌa̱ꞌ ne̱ ndaꞌvi kuuꞌ sa̱a̱ niiꞌ kaꞌán tu̱ꞌu̱n nde̱iꞌ,
te̱ ka̱tunꞌ nda̱ku ra̱ ne̱ maso nimá ndieeꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ka̱ꞌni̱ꞌ ra̱ sa̱kuuꞌ ne̱ xaaꞌ ña̱ ni̱a̱ꞌa xiinꞌ tatyi̱ꞌ yu̱ꞌuꞌ ra̱,
te̱ kii̱ꞌ kaꞌa̱n tyuunꞌ ra̱ ndii,
ndo̱ñuꞌuꞌ xa̱tyiꞌ ne̱ xaaꞌ ña̱ ni̱a̱ꞌa sa̱a̱ ra̱.
5 Ña̱ xatyuunꞌ nda̱ku ku̱ndu̱u̱ nde̱e̱ naa i̱i̱nꞌ kiꞌiꞌ to̱koꞌ ra̱,
te̱ ña̱ saxinú xna̱ꞌa̱ ra̱ kuento ra̱ ku̱ndu̱u̱ nde̱e̱ naa xa̱tu̱ siee ña̱ niꞌnuꞌ ra̱.
6 Kivi̱ꞌ ja̱a̱nꞌ ndii,
ku̱ndi̱e̱e̱ ingaꞌ lobo xiinꞌ mbe̱e̱,
te̱ kusu̱n ingaꞌ tu̱ ndi̱ka̱ꞌa̱ xiinꞌ ti̱xuꞌu̱ꞌ kualiꞌ.
Te̱ si̱ndiki̱ꞌ kualiꞌ xiinꞌ toro tiakiꞌ ndii,
ku̱ꞌu̱n ingaꞌ riꞌ xiinꞌ lion ka̱xi̱ꞌ riꞌ kuꞌu̱,
te̱ i̱i̱n te̱ lulu ku̱i̱ti̱ꞌ ko̱to̱ sa̱kuuꞌ ki̱tiꞌ ja̱a̱nꞌ.
7 Si̱ndiki̱ꞌ tiata̱nꞌ xiinꞌ osa tiata̱nꞌ ndii,
ku̱ꞌu̱n ingaꞌ riꞌ ka̱xi̱ꞌ riꞌ kuꞌu̱,
te̱ ku̱ꞌu̱n ingaꞌ tu̱ siꞌe̱ riꞌ,
te̱ lion ndii,
kuꞌu̱ ku̱i̱ti̱ꞌ ka̱xi̱ꞌ sa̱kuuꞌ riꞌ nde̱e̱ naa si̱ndiki̱ꞌ.
8 Te̱ kuañuꞌu̱,
te̱ tyityinꞌ ka̱ ndii,
ku̱siki̱ꞌ ra̱ yu̱ꞌuꞌ yavi̱ miiꞌ ñuꞌuꞌ koo̱ꞌ xiniꞌ xaꞌndiaꞌ,
te̱ te̱ lulu,
te̱ xa̱ ni̱ na̱ko̱o̱ ña̱ tyityinꞌ ndii,
ki̱ꞌeꞌ ra̱ tyoꞌo̱ koo̱ꞌ ka̱a̱ miiꞌ naá riꞌ.
9 Nde̱e̱ i̱i̱n ne̱ yivi̱ꞌ,
ne̱ ku̱ndi̱e̱e̱ nuu̱ꞌ ñu̱ꞌuꞌ su̱ꞌu̱n ja̱a̱nꞌ ndii,
sä̱a̱ ni̱a̱ ña̱ ni̱a̱ꞌa xiinꞌ taꞌanꞌ ni̱a̱ ni̱ nde̱e̱ sä̱tíviꞌ tu̱ ni̱a̱ nuu̱ꞌ ñu̱ꞌuꞌ ja̱a̱nꞌ.
Sa̱kanꞌ ña̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ ku̱tuꞌ vi̱ꞌ ko̱o̱ ne̱ yivi̱ꞌ,
ne̱ sa̱a̱ ña̱ kuní Yahvé,
nde̱e̱ naa xaaꞌ mi̱ni̱ kaꞌnuꞌ ña̱ tyituꞌ vi̱ꞌ ñuꞌuꞌ ti̱kui.
10 Kivi̱ꞌ ja̱a̱nꞌ ndii,
si̱a̱niꞌ xikaꞌ ndii̱ xkuaa̱ꞌ Isaí ja̱a̱nꞌ ku̱ndu̱u̱ rey,
te̱ nu̱ta̱ ra̱ nde̱e̱ naa xaaꞌ i̱i̱n ti̱o̱ꞌo̱ i̱tunꞌ ña̱ nianiaꞌ a̱,
te̱ ku̱nduꞌu̱ꞌ ra̱ ka̱ꞌndi̱a̱ ra̱ tyuunꞌ nuu̱ꞌ tei̱ kaꞌnuꞌ miiꞌ ni̱ nduꞌu̱ꞌ rey David ni̱ xa̱ꞌndi̱a̱ tyuunꞌ ra̱.
Te̱ kuꞌu̱n na̱ndu̱kuꞌ ña̱ꞌaꞌ ne̱ tukuꞌ xaꞌa̱ꞌ a̱ ña̱ kuní ni̱a̱ ña̱ ka̱ꞌndi̱a̱ tyuunꞌ ra̱ nuu̱ꞌ sa̱kuuꞌ ni̱a̱,
te̱ na̱ti̱i̱n ra̱ kuaꞌa̱ꞌ va̱ ña̱ kiꞌinꞌ ña̱ꞌaꞌ ne̱ ja̱a̱nꞌ.
11 Kivi̱ꞌ ja̱a̱nꞌ ndii,
tu̱ku̱ ni̱ sa̱na̱kaá Yahvé nda̱ꞌaꞌ a̱ te̱ sa̱kakú a̱ sa̱kuuꞌ ne̱ nduuꞌ kuenta a̱,
ne̱ ndee tyaaꞌ,
ne̱ ndoo̱ ka̱ ndieeꞌ ka̱niiꞌ i̱i̱n yivi̱ꞌ,
te̱ sa̱na̱ndikoꞌ ña̱ꞌaꞌ a̱ ñu̱u̱ Jerusalén,
naa kuuꞌ ne̱ ndieeꞌ Asiria,
xiinꞌ Egipto,
xiinꞌ Patros,
xiinꞌ Etiopía,
xiinꞌ Elam,
xiinꞌ Sinar,
xiinꞌ Hamat,
xiinꞌ sa̱kuuꞌ ne̱ ndieeꞌ ñu̱u̱ ña̱ ñuꞌuꞌ sa̱a̱ kuaꞌa̱n yo̱soꞌ yu̱ꞌuꞌ mi̱ni̱ kaꞌnuꞌ.
12 Ndo̱ni̱ꞌi̱ te̱ ja̱a̱nꞌ i̱i̱n bandera te̱ ku̱ni̱ sa̱kuuꞌ ne̱ tukuꞌ xiinꞌ sa̱kuuꞌ ne̱ vi̱ꞌe̱ Israel,
ne̱ ni̱ kiku̱ ndieeꞌ nuu̱ꞌ tu̱ku̱ ñu̱ꞌuꞌ,
te̱ na̱ka̱na̱ tu̱ ra̱ sa̱kuuꞌ ne̱ vi̱ꞌe̱ Judá,
ne̱ ni̱ kiku̱ ndieeꞌ ku̱miꞌ saaꞌ xiki̱ꞌ ñu̱ꞌuꞌ i̱i̱n yivi̱ꞌ,
te̱ na̱ndi̱koꞌ ni̱a̱ ñu̱u̱ Jerusalén.
13 Kivi̱ꞌ ja̱a̱nꞌ ndii,
ndi̱ꞌi̱ sa̱kuuꞌ ña̱ ndasiꞌ taꞌanꞌ ne̱ vi̱ꞌe̱ Judá xini ni̱a̱ ne̱ vi̱ꞌe̱ Efraín,
te̱ ne̱ ndasiꞌ taꞌanꞌ xiinꞌ ne̱ vi̱ꞌe̱ Judá ndii,
ka̱ꞌni̱ꞌ Ndiosí sa̱kuuꞌ ni̱a̱.
Te̱ ne̱ vi̱ꞌe̱ Efraín ndii,
kuäsa̱ꞌ ka̱ nda̱si̱ꞌ nuu̱ꞌ ni̱a̱ ku̱ni̱ ni̱a̱ ne̱ vi̱ꞌe̱ Judá,
te̱ ni̱ nde̱e̱ sä̱ndoꞌoꞌ ka̱ tu̱ ne̱ vi̱ꞌe̱ Judá ja̱a̱nꞌ ne̱ vi̱ꞌe̱ Efraín.
14 Ndu̱i̱i̱n sa̱kuuꞌ ra̱,
te̱ ka̱ꞌni̱ꞌ ra̱ sa̱kuuꞌ te̱ filisteo,
te̱ ndieeꞌ xtoꞌniꞌ miiꞌ ketá ñu̱ꞌu̱,
te̱ ndu̱i̱i̱n tu̱ ra̱ te̱ ka̱ꞌni̱ꞌ ra̱ sa̱kuuꞌ te̱ ndieeꞌ xtoꞌniꞌ miiꞌ ketaꞌ ñu̱ꞌu̱.
Te̱ te̱ ndieeꞌ nuu̱ꞌ ñu̱ꞌuꞌ Edom xiinꞌ te̱ ndieeꞌ nuu̱ꞌ ñu̱ꞌuꞌ Moab ndii,
uvi̱ sa̱aꞌ ti̱ꞌvi̱ te̱ ja̱a̱nꞌ ka̱ka̱ nu̱u̱ nuu̱ꞌ te̱ vi̱ꞌe̱ Judá xiinꞌ nuu̱ꞌ te̱ vi̱ꞌe̱ Efraín,
te̱ te̱ vi̱ꞌe̱ Amón ndii,
sa̱xinu̱ ra̱ sa̱kuuꞌ ña̱ kaꞌán tyuunꞌ te̱ ja̱a̱nꞌ.
15 Te̱ mi̱iꞌ Tákuiꞌe Yahvé nu̱niaꞌ i̱tyiꞌ nuu̱ꞌ ti̱kui mi̱ni̱ kuaꞌa,
te̱ ka̱ta̱ni̱ nda̱ꞌaꞌ tu̱ a̱ nuu̱ꞌ ti̱kui i̱ti̱a̱ Eufrate,
te̱ ti̱ꞌviꞌ tu̱ a̱ i̱i̱n tatyi̱ꞌ i̱ꞌniꞌ va̱ nuu̱ꞌ ti̱kui i̱ti̱a̱ ja̱a̱nꞌ,
te̱ na̱ta̱ꞌviꞌ ña̱ꞌaꞌ a̱ te̱ na̱ndu̱u̱ a̱ uxa̱ taꞌan yivi̱ꞌ kualiꞌ,
sa̱kanꞌ te̱ ku̱vi̱ xkaꞌndi̱a̱ xiinꞌ xaꞌaꞌ ne̱ nduuꞌ kuenta a̱ ja̱a̱nꞌ i̱kanꞌ.
16 Sa̱kanꞌ na kuiiꞌ ka̱sa̱ꞌa̱ a̱ i̱tyiꞌ miiꞌ xkaꞌndi̱a̱ ne̱ nduuꞌ kuenta a̱,
ne̱ ndee ndiaꞌviꞌ,
ne̱ ni̱ ndoo̱ ndieeꞌ nuu̱ꞌ ñu̱ꞌuꞌ Asiria,
nde̱e̱ naa ni̱ xa̱a̱ a̱ kii̱ꞌ ni̱ ta̱va̱ꞌ a̱ ne̱ vi̱ꞌe̱ Israel nuu̱ꞌ ñu̱ꞌuꞌ Egipto.