Yoꞌoꞌ kaꞌán a̱ xaꞌa̱ꞌ ña̱ ka̱ku̱ i̱i̱n ña̱ ka̱ꞌndi̱a̱ tyuunꞌ nde̱e̱ ndiꞌiꞌ ni̱ kivi̱ꞌ
9
Nde̱e̱ sa̱a̱ ka̱ ni̱ ndii,
süu̱ꞌ nde̱e̱ ndiꞌiꞌ ni̱ kivi̱ꞌ ko̱o̱ ña̱ i̱i̱n yaví ja̱a̱nꞌ nuu̱ꞌ ne̱ ndoꞌoꞌ ña̱ ja̱a̱nꞌ vi̱ti̱n.
Xta̱ꞌanꞌ ndii,
ni̱ sa̱kaꞌanꞌ Ndiosí ne̱ ni̱ ndiee̱ nuu̱ꞌ ñu̱ꞌuꞌ Zabulón xiinꞌ ne̱ ni̱ ndiee̱ nuu̱ꞌ ñu̱ꞌuꞌ Neftalí,
ndisu̱ naá kivi̱ꞌ nuu̱ꞌ kuꞌu̱n e̱ꞌ ndii,
niaꞌa̱ Ndiosí ña̱ kaꞌnuꞌ a̱ nuu̱ꞌ sa̱kuuꞌ ne̱ ku̱ndi̱e̱e̱ nuu̱ꞌ ñu̱ꞌuꞌ Galilea miiꞌ ndieeꞌ ne̱ tukuꞌ ya̱ti̱n i̱tyiꞌ ña̱ kuaꞌa̱n yu̱ꞌuꞌ mi̱ni̱ kaꞌnuꞌ tu̱ku̱ taꞌviꞌ yu̱ꞌuꞌ i̱ti̱a̱ Jordán.
2 Ne̱ xikaꞌ i̱i̱n yaví nuu̱ꞌ Ndiosí ndii,
ku̱ni̱ ni̱a̱ i̱i̱n ñuꞌu̱ tyiee̱ va̱ tee̱ꞌ ndee xikaꞌ i̱i̱n yaví ni̱a̱,
te̱ ne̱ xa̱ yoo ku̱vi̱ nduuꞌ ni̱a̱ ndii,
yiꞌe̱ i̱i̱n ñuꞌu̱ nda̱tu̱nꞌ va̱ nuu̱ꞌ ni̱a̱ naá kivi̱ꞌ.
3 Nda̱sa̱ kuaꞌa̱ꞌ u̱nꞌ ne̱ vi̱ꞌe̱ Israel,
te̱ na̱ku̱a̱tiaꞌ sa̱kuuꞌ ni̱a̱ sa̱a̱ u̱nꞌ.
Na̱ku̱a̱tiaꞌ ni̱a̱ nuu̱ꞌ u̱nꞌ nde̱e̱ naa nakuatiaꞌ ne̱ yivi̱ꞌ kii̱ꞌ nakaya ni̱a̱ ña̱ savi̱ꞌ uun nde̱e̱ naa nakuatiaꞌ ne̱ yivi̱ꞌ kii̱ꞌ nataꞌviꞌ ni̱a̱ ña̱ nakaya ni̱a̱ nda̱ꞌaꞌ ne̱ ndasiꞌ taꞌanꞌ xiinꞌ ni̱a̱ kii̱ꞌ kuaꞌa̱n ni̱a̱ ñuꞌu̱.
4 Sa̱kanꞌ ña̱ sa̱kakú ña̱ꞌaꞌ u̱nꞌ nuu̱ꞌ te̱ yivi̱ꞌ,
te̱ xikaꞌ nuuꞌ so̱ꞌo̱ ni̱a̱ nuu̱ꞌ,
te̱ sa̱kakú tu̱ ña̱ꞌaꞌ u̱nꞌ nuu̱ꞌ tyu̱u̱n viee̱ va̱ ña̱ xaaꞌ ni̱a̱,
te̱ ka̱ꞌni̱ꞌ ndo̱o̱ u̱nꞌ ne̱ sandoꞌoꞌ ña̱ꞌaꞌ ja̱a̱nꞌ nde̱e̱ naa ni̱ xa̱a̱ u̱nꞌ kii̱ꞌ ni̱ sa̱ndo̱ñuꞌuꞌ u̱nꞌ te̱ xíinꞌ,
te̱ ni̱ ndiee̱ nuu̱ꞌ ñu̱ꞌuꞌ Madián.
5 Te̱ sa̱kuuꞌ ndixa̱nꞌ ña̱ kiꞌiꞌ te̱ xíinꞌ,
te̱ kuaꞌa̱n miiꞌ yoo ñuꞌu̱ xiinꞌ toto̱ ña̱ ni̱ ka̱ꞌma̱ ndo̱o̱ níiꞌ niꞌnuꞌ ra̱ ndii,
ña̱ ko̱ko̱ ku̱ndu̱u̱ a̱,
te̱ ku̱ndu̱u̱ a̱ nde̱e̱ naa xa̱ꞌa̱n ña̱ kieé nuu̱ꞌ ñuꞌu̱ te̱ ndatin a̱.
6 Sa̱kanꞌ ña̱ xa̱ ni̱ ka̱ku̱ i̱i̱n te̱ lulu te̱i̱n e̱ꞌ,
xa̱ ni̱ ta̱xi̱ Ndiosí i̱i̱n siꞌe̱ a̱ nda̱ꞌaꞌ e̱ꞌ,
te̱ ni̱ ta̱xi̱ tu̱ a̱ ndi̱e̱e̱ꞌ nda̱ꞌaꞌ te̱ ja̱a̱nꞌ te̱ ka̱ꞌndi̱a̱ tyuunꞌ ra̱,
te̱ ku̱na̱niꞌ ra̱ Te̱ Tyu̱u̱n va̱ Kaꞌán Nde̱iꞌ,
te̱ ku̱na̱niꞌ tu̱ ra̱ Ndiosí Ña̱ Sa̱kuuꞌ a̱ Ku̱vi̱,
te̱ ku̱na̱niꞌ tu̱ ra̱ Yu̱vaꞌ e̱ꞌ Ña̱ Yoo Nde̱e̱ Ndiꞌiꞌ ni̱ Kivi̱ꞌ,
te̱ ku̱na̱niꞌ tu̱ ra̱ Xaꞌndu̱ ña̱ Ndieeꞌ Mani̱ꞌ Ne̱ Yivi̱ꞌ.
7 Ña̱ na̱kaa̱ ña̱ ka̱ꞌndi̱a̱ tyuunꞌ ra̱ xiinꞌ ña̱ ku̱ndi̱e̱e̱ mani̱ꞌ ne̱ yivi̱ꞌ sa̱a̱ ra̱ ndii,
köo̱ꞌ kivi̱ꞌ ndi̱ꞌi̱ a̱.
Ka̱ꞌndi̱a̱ tyuunꞌ i̱i̱n katyi ra̱ nuu̱ꞌ sa̱kuuꞌ ne̱ yivi̱ꞌ,
te̱ ka̱ꞌndi̱a̱ tyuunꞌ nda̱ku tu̱ ra̱ nuu̱ꞌ ni̱a̱ nde̱e̱ naa ni̱ xa̱ꞌndi̱a̱ tyuunꞌ xii̱ꞌ ya̱taꞌ ra̱ David ku̱nduꞌu̱ꞌ ra̱ te̱ ka̱ꞌndi̱a̱ tyuunꞌ ra̱ nde̱e̱ vi̱ti̱n te̱ nde̱e̱ ndiꞌiꞌ ni̱ kivi̱ꞌ.
Te̱ sa̱kuuꞌ ña̱ ja̱a̱nꞌ xinu̱ sa̱a̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
xaꞌa̱ꞌ a̱ ña̱ ndani̱ xa̱va̱ꞌa̱ a̱ yooꞌ.
Yoꞌoꞌ kaꞌán a̱ xaꞌa̱ꞌ ña̱ xiꞌé Yahvé xini a̱ ne̱ vi̱ꞌe̱ Israel
8 Xa̱ ni̱ sa̱kuniꞌ tu̱ꞌu̱n Tákuiꞌe Ndiosí ne̱ vi̱ꞌe̱ Jacob,
te̱ ni̱ xinu̱ a̱ ni̱ ndo̱ꞌo̱ sa̱kuuꞌ ne̱ vi̱ꞌe̱ Israel.
9 Te̱ sa̱kuuꞌ ne̱ vi̱ꞌe̱ Efraín xiinꞌ sa̱kuuꞌ ne̱ ndieeꞌ ñu̱u̱ Samaria ku̱ni̱ kuento xaꞌa̱ꞌ ña̱ ja̱a̱nꞌ,
te̱ xaꞌa̱ꞌ a̱ ña̱ kaniꞌiꞌ xiinꞌ miiꞌ ni̱a̱ na kaꞌán ñuñuꞌ ni̱a̱ ndii:
10 “Ni̱ ndu̱va̱ vi̱ꞌe̱ ndo̱ꞌo̱,
ndisu̱ na̱ka̱sa̱ꞌa̱ xa̱aꞌ tu̱ku̱u̱ e̱ꞌ vi̱ꞌe̱ e̱ꞌ xiinꞌ yuu̱ꞌ ña̱ tu̱xiꞌ e̱ꞌ.
Ni̱ xa̱ꞌndi̱a̱ ndo̱o̱ te̱ yivi̱ꞌ tunꞌ sicómoro,
ndisu̱ tunꞌ cedro na̱tyi̱ꞌi̱ e̱ꞌ miiꞌ ni̱ ita̱ tunꞌ ja̱a̱nꞌ”,
katyi̱ ni̱a̱.
11 Ndisu̱ mi̱iꞌ Yahvé tyu̱ꞌu̱ꞌ te̱ ndasiꞌ taꞌanꞌ xiinꞌ Rezín ja̱a̱nꞌ,
te̱ ki̱xi̱n ka̱ꞌni̱ꞌ ña̱ꞌaꞌ ra̱,
te̱ sa̱kaꞌán tu̱ a̱ nimá sa̱kuuꞌ te̱ ndikún ña̱ꞌaꞌ te̱ ki̱xi̱n ka̱ꞌni̱ꞌ ña̱ꞌaꞌ ra̱.
12 Te̱ ki̱e̱e̱ ñu̱u̱ Siria so̱ꞌo̱ ki̱xi̱n xtoꞌniꞌ miiꞌ ketaꞌ ñu̱ꞌu̱,
te̱ te̱ vi̱ꞌe̱ filisteo so̱ꞌo̱ ki̱xi̱n xtoꞌniꞌ miiꞌ ketá ñu̱ꞌu̱.
Te̱ i̱i̱n ka̱ꞌni̱ꞌ ku̱i̱ti̱ꞌ ra̱ sa̱kuuꞌ ni̱a̱ nde̱e̱ naa xaaꞌ ki̱tiꞌ kii̱ꞌ i̱i̱n kokoꞌ ku̱i̱ti̱ꞌ riꞌ ki̱tiꞌ,
ndisu̱ kusaaꞌ xiꞌé ka̱ Yahvé xini a̱ ne̱ ja̱a̱nꞌ,
te̱ xa̱ yoo tu̱ꞌva̱ a̱ te̱ sa̱ndoꞌoꞌ ña̱ꞌaꞌ a̱.
13 Sa̱kanꞌ ña̱ tee̱ꞌ ndee kuaꞌa̱ꞌ sa̱ndoꞌoꞌ ña̱ꞌaꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii,
ku̱ï̱i̱n ni̱a̱ na̱ma̱ ni̱a̱ nimá ni̱a̱ ni̱ nde̱e̱ nä̱ndu̱kuꞌ tu̱ ña̱ꞌaꞌ ni̱a̱.
14 Xaꞌa̱ꞌ a̱ ja̱a̱nꞌ na kuiiꞌ i̱i̱n kivi̱ꞌ ku̱i̱ti̱ꞌ te̱ sa̱ndo̱ñuꞌuꞌ Yahvé sa̱kuuꞌ te̱ nduuꞌ xíniꞌ xiinꞌ sa̱kuuꞌ te̱ nduuꞌ suꞌma̱ꞌ tiꞌeꞌ a̱,
sa̱kuunꞌ tu̱ a̱ sa̱kuuꞌ nda̱ꞌaꞌ tunꞌ koko ña̱ nda̱tu̱nꞌ va̱,
te̱ ka̱ꞌndi̱a̱ tu̱ a̱ tunꞌ yoo̱ꞌ ndaꞌvi so̱ꞌo̱.
15 Sa̱kuuꞌ te̱ xi̱xa̱,
te̱ kuuꞌ nu̱uꞌ nuu̱ꞌ ne̱ vi̱ꞌe̱ Israel,
nduuꞌ xíniꞌ a̱ ja̱a̱nꞌ,
te̱ sa̱kuuꞌ te̱ xini xaꞌanꞌ kaꞌán tiakú ra̱ xaꞌa̱ꞌ Ndiosí,
nduuꞌ suꞌma̱ꞌ tiꞌeꞌ a̱.
16 Sa̱kanꞌ ña̱ te̱ xaꞌndia tyuunꞌ nuu̱ꞌ ne̱ yivi̱ꞌ yoꞌoꞌ ndii,
xini xaꞌanꞌ ña̱ꞌaꞌ ra̱,
te̱ su̱vi̱ ra̱ xaaꞌ sa̱kanꞌ te̱ ni̱ sa̱na̱ xíniꞌ sa̱kuuꞌ ni̱a̱.
17 Xaꞌa̱ꞌ a̱ ja̱a̱nꞌ na vä̱ꞌa̱ kuni Tákuiꞌe Ndiosí xini a̱ ne̱ sa̱va̱,
ni̱ nde̱e̱ kü̱vi̱ta tu̱ i̱ni̱ a̱ xaꞌa̱ꞌ ne̱ ndaꞌvi köo̱ꞌ yu̱vaꞌ siꞌiꞌ,
ni̱ nde̱e̱ xaꞌa̱ꞌ ña̱ꞌaꞌ kuaa̱nꞌ.
Sa̱kanꞌ ña̱ sa̱kuuꞌ ni̱a̱ ndii,
ne̱ sikiꞌ nduuꞌ ni̱a̱,
te̱ ni̱a̱ꞌa tu̱ ni̱a̱,
te̱ xa̱ nuu̱ꞌ xaꞌa̱ꞌ ña̱ kuäsa̱ꞌ kuní ndatuꞌunꞌ sa̱kuuꞌ ni̱a̱.
Tee̱ꞌ ndee ni̱ xa̱a̱ Ndiosí sa̱kuuꞌ ña̱ ja̱a̱nꞌ xiinꞌ ni̱a̱ ndii,
tiäꞌa̱an sa̱vi̱kuiín a̱ ña̱ xiꞌé a̱ xini a̱ ne̱ ja̱a̱nꞌ,
te̱ xa̱ yoo tu̱ꞌva̱ a̱ te sa̱ndoꞌoꞌ ña̱ꞌaꞌ a̱.
18 Ña̱ ni̱a̱ꞌa ña̱ xaaꞌ ne̱ yivi̱ꞌ ja̱a̱nꞌ ndii,
nduuꞌ a̱ nde̱e̱ naa ñuꞌu̱ kii̱ꞌ xaꞌmiꞌ a̱ kuꞌu̱ xiti̱nꞌ xiinꞌ i̱ñu̱ꞌ,
te̱ xaꞌmiꞌ tu̱ a̱ i̱tunꞌ naꞌnuꞌ,
tunꞌ itaꞌ kuꞌu̱ xi̱xa̱ va̱,
te̱ ti̱katyi̱ꞌ vi̱ꞌ nduuꞌ ñuꞌma̱ ña̱ kieeꞌ kii̱ꞌ xixí tunꞌ ja̱a̱nꞌ,
te̱ sukun va̱ kuaꞌa̱n ka̱a̱ a̱.
19 Ka̱niiꞌ nuu̱ꞌ ñu̱ꞌuꞌ ja̱a̱nꞌ ko̱ko̱ sa̱a̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
xaꞌa̱ꞌ a̱ ña̱ xiꞌé va̱ a̱ xini a̱ ne̱ yivi̱ꞌ ja̱a̱nꞌ.
Te̱ ku̱ndu̱u̱ ni̱a̱ nde̱e̱ naa i̱ti̱a̱ ña̱ ko̱ko̱ sa̱a̱ ñuꞌu̱,
te̱ nde̱e̱ i̱i̱n ni̱a̱ köo̱ꞌ kaꞌnuꞌ i̱ni̱ xaꞌa̱ꞌ ni̱ nde̱e̱ taꞌanꞌ mi̱iꞌ xa̱tyiꞌ ni̱a̱ kivi̱ꞌ ja̱a̱nꞌ.
20 Ku̱ntaꞌanꞌ ni̱a̱ xaꞌa̱ꞌ ña̱ xaxi̱ꞌ xiinꞌ ne̱ ndieeꞌ ya̱ti̱n vi̱ꞌe̱ ni̱a̱ nda̱ꞌaꞌ ku̱a̱ꞌa̱ ni̱a̱,
ndisu̱ kusaaꞌ xiꞌí naa xiꞌí ni̱a̱ so̱ko̱.
Te̱ ka̱ꞌni̱ꞌ ni̱a̱ ne̱ ndieeꞌ ya̱ti̱n vi̱ꞌe̱ ni̱a̱ nda̱ꞌaꞌ i̱ti̱n ni̱a̱ xaꞌa̱ꞌ ña̱ xaxi̱ꞌ,
ndisu̱ ndä̱ꞌni̱ ni̱a̱.
Te̱ soꞌo̱ꞌ ndiꞌiꞌ ndii,
nde̱e̱ siꞌe̱ mi̱iꞌ ni̱a̱ ka̱xi̱ꞌ ni̱a̱.
21 Te̱ vi̱ꞌe̱ Manasés ku̱ntaꞌanꞌ xiinꞌ te̱ vi̱ꞌe̱ Efraín,
te̱ te̱ vi̱ꞌe̱ Efraín ku̱ntaꞌanꞌ xiinꞌ te̱ vi̱ꞌe̱ Manasés ja̱a̱nꞌ,
te̱ uvi̱ sa̱aꞌ ti̱ꞌvi̱ ra̱ ndu̱i̱i̱n,
te̱ ku̱ntaꞌanꞌ ra̱ xiinꞌ te̱ vi̱ꞌe̱ Judá.
Sa̱kanꞌ ña̱ tee̱ꞌ ndee ni̱ xa̱a̱ Ndiosí sa̱kuuꞌ ña̱ ja̱a̱nꞌ xiinꞌ ni̱a̱ ndii,
tiäꞌa̱an sa̱vi̱kuiín a̱ ña̱ xiꞌé a̱ xini a̱ ne̱ ja̱a̱nꞌ,
te̱ xa̱ yoo tu̱ꞌva̱ a̱ te̱ sa̱ndoꞌoꞌ ña̱ꞌaꞌ a̱.