Yoꞌoꞌ kaꞌán a̱ ña̱ Yahvé na ku̱ndu̱u̱ ña̱ xitoꞌ kaꞌnuꞌ e̱ꞌ
8
I̱kanꞌ te̱ ni̱ kaꞌa̱n Yahvé xiinꞌ i̱ ndii:
“Ki̱ꞌi̱n i̱i̱n vitu̱ꞌ tyiee̱ te̱ ke̱ꞌi̱ kaxiꞌ u̱nꞌ nuu̱ꞌ nu̱ꞌ xiinꞌ i̱i̱n ka̱a̱ xíinꞌ nuu̱ꞌ kivi̱ꞌ te̱ nduuꞌ:
Maher-salal-hazbaz”,
ni katyi̱ a̱.
2 Sa̱kanꞌ te̱ ni̱ ka̱na̱ i̱ sutu̱ Urías xiinꞌ sutu̱ Zacarías,
siꞌe̱ Jeberequías,
te̱ ku̱ndu̱u̱ ra̱ te̱ ndi̱e̱e̱ yu̱ꞌuꞌ xaꞌa̱ꞌ ña̱ xitoꞌ sa̱a̱ i̱ ja̱a̱nꞌ,
te̱ uvi̱ sa̱aꞌ sutu̱ ja̱a̱nꞌ ndii,
te̱ kaꞌán va̱ꞌa̱ ne̱ yivi̱ꞌ xaꞌa̱ꞌ nduuꞌ ra̱.
3 Ni̱ yaꞌa̱ kivi̱ꞌ,
te̱ ni̱ kixi̱n i̱ xiinꞌ ñaꞌ siꞌi i̱ ñaꞌ kaꞌán tiakú tu̱ꞌu̱n Ndiosí,
te̱ ni̱ na̱ku̱i̱so̱ aꞌ,
te̱ ni̱ sa̱kakuꞌ aꞌ i̱i̱n tiaa̱ siꞌe̱ aꞌ.
Sa̱kanꞌ te̱ ni̱ kaꞌa̱n Yahvé xiinꞌ i̱ ndii:
“Maher-salal-hasbaz ku̱na̱niꞌ ra̱ sa̱a̱ u̱nꞌ.
4 Sa̱kanꞌ ña̱ kii̱ꞌ kuní ka̱ ku̱vi̱ kaꞌa̱n te̱ kuañuꞌu̱ ñaa̱ꞌ,
“Tata i̱” uun “Nana i̱” ndii,
xa̱ ni̱ na̱ka̱ya̱ ndo̱o̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria sa̱kuuꞌ ña̱ vikaꞌ ña̱ yoo ñu̱u̱ Damasco xiinꞌ ña̱ vikaꞌ ña̱ yoo ñu̱u̱ Samaria”,
ni̱ katyi̱ a̱.
5 Te̱ tu̱ku̱ sa̱kanꞌ ni̱ kaꞌa̱n Yahvé xiinꞌ i̱ ndii:
6 “Ña̱ xitoꞌ i̱ ne̱ vi̱ꞌe̱ Judá ndii,
mani̱ꞌ kuuꞌ i̱ xiinꞌ ni̱a̱,
te̱ nduuꞌ a̱ nde̱e̱ naa ti̱kui,
te̱ kuiee kuaꞌa̱n mi̱ni̱ Siloé,
ndisu̱ ne̱ ja̱a̱nꞌ ndii,
ni̱ sa̱xi̱o̱o̱ ni̱a̱ ña̱ ja̱a̱nꞌ.
Te̱ va̱ꞌa̱ kuni ni̱a̱ xini ni̱a̱ rey Rezín xiinꞌ rey Peka,
te̱ nduuꞌ siꞌe̱ Remalía”,
ni̱ katyi̱ a̱.
7 Xaꞌa̱ꞌ a̱ ja̱a̱nꞌ na kuiiꞌ ti̱ꞌviꞌ Tákuiꞌe Ndiosí kuaꞌa̱ꞌ te̱ xíinꞌ,
te̱ ki̱e̱e̱ nuu̱ꞌ ñu̱ꞌuꞌ Asiria,
te̱ ka̱ꞌni̱ꞌ ra̱ kuaꞌa̱ꞌ va̱ ne̱ vi̱ꞌe̱ Judá ja̱a̱nꞌ,
te̱ sa̱nduxín xa̱tyiꞌ ña̱ꞌaꞌ ra̱,
te̱ ku̱ndu̱u̱ a̱ nde̱e̱ naa kii̱ꞌ xkaꞌndíá kuaꞌa̱ꞌ te̱ñuꞌu̱ꞌ i̱ti̱a̱ Eufrate.
Te̱ kikú ndo̱o̱ te̱ñuꞌu̱ꞌ ja̱a̱nꞌ sa̱kuuꞌ tyi̱tyi̱,
te̱ sandoñuꞌuꞌ raꞌ sa̱kuuꞌ ña̱ yoo miiꞌ xkaꞌndíá raꞌ kuaꞌa̱n raꞌ.
8 Te̱ xíinꞌ Asiria ja̱a̱nꞌ ndii,
ko̱ꞌni̱ ra̱ nde̱e̱ nuu̱ ñu̱ꞌuꞌ Judá nde̱e̱ naa xaaꞌ a̱ kii̱ꞌ kuunꞌ kuiꞌe̱ savi̱ꞌ te̱ kieeꞌ kuaꞌa̱ꞌ te̱ñuꞌu̱ꞌ,
te̱ xiku̱tuꞌ raꞌ nde̱e̱ naxaá raꞌ nde̱e̱ suku̱nꞌ ni̱a̱.
Te̱ ku̱ndu̱u̱ tu̱ te̱ xíinꞌ ja̱a̱nꞌ nde̱e̱ naa i̱i̱n sa̱a̱ tyiee̱ va̱,
tiꞌ sa̱na̱kaá ndi̱xi̱n,
te̱ nda̱si̱ riꞌ ka̱niiꞌ nuu̱ꞌ ñu̱ꞌuꞌ yoꞌó,
Emanuel kuaꞌa.
9 Sa̱kanꞌ na kuiiꞌ,
sa̱kuuꞌ ndoꞌó,
ne̱ yivi̱ꞌ,
ne̱ ndieeꞌ kiꞌinꞌ ñu̱u̱ naꞌnuꞌ ndii,
na̱kaya̱ ndo̱ꞌ,
te̱ ku̱yi̱ꞌvi va̱ ndo̱ꞌ.
Ku̱ni̱ so̱ꞌo̱ sa̱kuuꞌ ndoꞌó,
ne̱ ndieeꞌ xikaꞌ nuu̱ꞌ ñu̱ꞌuꞌ i̱i̱n yivi̱ꞌ,
ña̱ kaꞌa̱n i̱ xiinꞌ ndo̱ꞌ yoꞌoꞌ tee̱ꞌ ndee ko̱o̱ tu̱ꞌva̱ ndo̱ꞌ xiinꞌ tu̱nxi ndo̱ꞌ ndii,
ka̱ꞌni̱ꞌ ndooꞌ te̱ yivi̱ꞌ ndoꞌó.
Sa̱kanꞌ xna̱ꞌa̱ ku̱ndu̱u̱ a̱ tee̱ꞌ ndee xa̱ ni̱ na̱kuiꞌnu̱ ndo̱ꞌ sa̱kuuꞌ ña̱ tiasi ñu̱ꞌuꞌ ndeꞌi̱ ndo̱ꞌ te̱ kä̱ꞌni̱ꞌ ra̱ ndoꞌó ndii,
ka̱ꞌni̱ꞌ ra̱ sa̱kuuꞌ ndo̱ꞌ nde̱e̱ sa̱a̱ ka̱ ni̱.
10 Ku̱vi̱ tyi̱tuní ndo̱ꞌ ña̱ ka̱ꞌni̱ꞌ ndo̱ꞌ nduꞌu̱ naaꞌ kuní ndo̱ꞌ,
ndisu̱ köo̱ꞌ tyukuuꞌ a̱.
Kaꞌa̱n ndo̱ꞌ nuu̱ꞌ ne̱ yivi̱ꞌ ña̱ kuni sa̱a̱ ndo̱ꞌ xiinꞌ ndu̱,
ndisu̱ xïnu̱ nde̱e̱ i̱i̱n a̱,
sa̱kanꞌ ña̱ Ndiosí yoo xiinꞌ ndu̱.
Yoꞌoꞌ kaꞌán a̱ ña̱ va̱ꞌa̱ ka̱ ku̱yi̱ꞌvi e̱ꞌ Ndiosí
11 Sa̱kanꞌ te̱ ni̱ sa̱kuniꞌ kaxiꞌ Yahvé yuꞌu̱ ña̱ sä̱a̱ i̱ ña̱ xaaꞌ i̱nga̱ ne̱ yivi̱ꞌ,
kaꞌán a̱ xiinꞌ i̱ ndii:
12 “Kii̱ꞌ kaꞌán ne̱ yivi̱ꞌ ja̱a̱nꞌ ndii:
Xaꞌa̱ꞌ a̱ ña̱ ka̱ꞌni̱ꞌ te̱ yivi̱ꞌ kaa̱ꞌ kuaꞌa̱ꞌ va̱ yooꞌ tyituní ra̱,
katyi ni̱a̱ ndii,
käꞌán niꞌvi tu̱ yoꞌó ña̱ kaꞌán ne̱ ja̱a̱nꞌ ndii,
xaꞌa̱ꞌ ña̱ ka̱ꞌni̱ꞌ ra̱ kuaꞌa̱ꞌ va̱ yooꞌ tyituní ra̱.
Ni̱ nde̱e̱ kä̱ka̱ tu̱ u̱nꞌ yiꞌvi u̱nꞌ ña̱ yiꞌvi ne̱ ja̱a̱nꞌ xini ni̱a̱.
13 Süu̱ꞌ ja̱a̱nꞌ ndii,
yuꞌu̱,
Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
kuní a̱ ta̱xi̱ ndoꞌó ku̱ndu̱u̱ ña̱ ka̱ꞌndi̱a̱ tyuunꞌ nuu̱ꞌ ndo̱ꞌ,
te̱ yuꞌu̱ ku̱i̱ti̱ꞌ tu̱ kuní a̱ ku̱yi̱ꞌvi ndo̱ꞌ,
te̱ yuꞌu̱ ku̱i̱ti̱ꞌ tu̱ kuní a̱ ki̱ꞌi̱n kaꞌnuꞌ ndo̱ꞌ nde̱e̱ kisiꞌ vi̱ꞌ a̱ ndoꞌó.
14 Te̱ ko̱to̱ i̱ ndoꞌó te̱ köo̱ꞌ a̱ ku̱ndo̱ꞌo̱ ndo̱ꞌ.
Ndisu̱ ne̱ vi̱ꞌe̱ Israel xiinꞌ ne̱ vi̱ꞌe̱ Judá ndii,
ku̱ndu̱u̱ i̱ nde̱e̱ naa i̱i̱n yuu̱ꞌ ña̱ sa̱ke̱kiꞌí ña̱ꞌaꞌ,
te̱ ku̱ndu̱u̱ i̱ nde̱e̱ naa yuu̱ꞌ ña̱ sa̱nduvaꞌ ña̱ꞌaꞌ.
Te̱ ne̱ ndieeꞌ ñu̱u̱ Jerusalén ndii,
ku̱ndu̱u̱ i̱ nde̱e̱ naa ñu̱nu̱ꞌ miiꞌ vi̱kuꞌu̱n ni̱a̱,
te̱ ku̱ndu̱u̱ tu̱ i̱ nde̱e̱ naa tunꞌ ii̱ꞌ miiꞌ vi̱kuꞌu̱n ni̱a̱.
15 Te̱ kuaꞌa̱ꞌ va̱ ne̱ yivi̱ꞌ ke̱kiꞌi̱ sa̱a̱ i̱ te̱ xaa̱ ni̱a̱ ñu̱ꞌuꞌ,
te̱ vi̱kuꞌu̱n ndo̱o̱ ni̱a̱”,
ni̱ katyi̱ a̱.
Yoꞌoꞌ ku̱a̱xi̱ ña̱ kaꞌán Isaías xiinꞌ nda̱ꞌaꞌ xaꞌa̱ꞌ ra̱
16 Ndoꞌó,
te̱ ndikún ña̱ saniaꞌá i̱ ndii,
ta̱xa̱ꞌa̱ ndo̱ꞌ ña̱ saniaꞌá Ndiosí,
te̱ na̱ka̱ꞌanꞌ va̱ tu̱ ndo̱ꞌ xaꞌa̱ꞌ ña̱ kaꞌán tuní a̱ ña̱ ni̱ sa̱niaꞌá i̱ ndoꞌó.
17 Tee̱ꞌ ndee xa̱ ni̱ ku̱xi̱o̱o̱ Yahvé nuu̱ꞌ yooꞌ,
ne̱ si̱a̱niꞌ xikaꞌ Jacob ndii,
ku̱ndi̱a̱tu̱ ña̱ꞌaꞌ yuꞌu̱,
sa̱kanꞌ ña̱ ña̱ ja̱a̱nꞌ i̱ni̱ i̱ xini i̱.
18 Nda̱ꞌaꞌ Yahvé Ndiosí,
ña̱ nduꞌu̱ xíniꞌ i̱kuꞌ Sión ndii,
yuꞌu̱ xiinꞌ siꞌe̱ i̱,
te̱ ni̱ ta̱xi̱ a̱ nda̱ꞌaꞌ i̱ ndii,
nduuꞌ ndu̱ꞌ nde̱e̱ naa tyu̱u̱n kaꞌnuꞌ ña̱ sakuniꞌ ña̱ xaaꞌ a̱,
te̱ su̱vi̱ a̱ nduuꞌ ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
19 Te̱ naaꞌ kaꞌa̱n yo̱o̱ ka̱ xiinꞌ ndo̱ꞌ ndii:
“Va̱ꞌa̱ ka̱ kaꞌa̱n e̱ꞌ xiinꞌ te̱ tava̱ꞌ ndiatu̱ uun xiinꞌ te̱ tuviꞌ i̱ni̱,
te̱ kaꞌán ya̱aꞌ ku̱i̱ti̱ꞌ xaꞌa̱ꞌ so̱ꞌo̱ ne̱ yivi̱ꞌ,
te̱ ii̱ꞌ va̱ tu̱ kaꞌán ra̱,
te̱ kaꞌa̱n ra̱ xiinꞌ e̱ꞌ ndee ña̱ kuní a̱ sa̱a̱ e̱ꞌ”,
katyi̱ ni̱a̱.
Te̱ na̱ku̱i̱i̱n ndo̱ꞌ nuu̱ꞌ ni̱a̱ ndii:
“Ña̱ ndi̱xa̱ nduuꞌ a̱ ndii,
sa̱kuuꞌ ne̱ yivi̱ꞌ,
ne̱ nduuꞌ kuenta Ndiosí ndii,
kuní a̱ kaꞌa̱n ni̱a̱ xiinꞌ a̱ te̱ ku̱ni̱ ni̱a̱ ndee ña̱ kuní a̱ sa̱a̱ ni̱a̱,
sa̱kanꞌ ña̱ vä̱ꞌa̱ yoo a̱ naaꞌ kaka̱n ne̱ tiaku nuu̱ꞌ ne̱ xa̱ ni̱ xiꞌi̱ te̱ tyi̱ndi̱e̱eꞌ ña̱ꞌaꞌ ne̱ ja̱a̱nꞌ”,
katyi̱ ndo̱ꞌ.
20 Va̱ꞌa̱ ka̱ ndu̱kuꞌ ndo̱ꞌ ña̱ kaꞌán tuní Ndiosí xiinꞌ ña̱ saniaꞌá a̱ nuu̱ꞌ tu̱ꞌu̱n nde̱iꞌ a̱,
sa̱kanꞌ ña̱ ne̱ näkuitá ña̱ kaꞌán xiinꞌ ña̱ kaꞌán tu̱ꞌu̱n nde̱iꞌ Ndiosí ja̱a̱nꞌ ndii,
ne̱ xikaꞌ i̱i̱n yaví nduuꞌ ni̱a̱.
21 Te̱ ka̱ka̱ ndo̱so̱ꞌ ne̱ ja̱a̱nꞌ i̱i̱n yivi̱ꞌ,
te̱ xa̱vi xa̱va̱ꞌa̱ ni̱a̱,
te̱ ku̱xiꞌi̱ xa̱va̱ꞌa̱ tu̱ ni̱a̱ so̱ko̱.
Te̱ xaꞌa̱ꞌ a̱ ña̱ ku̱xiꞌi̱ va̱ ni̱a̱ so̱ko̱ ja̱a̱nꞌ ndii,
na̱saa̱ꞌ xa̱va̱ꞌa̱ ni̱a̱,
te̱ ndo̱ꞌni̱ꞌi̱ ni̱a̱ nuu̱ꞌ ni̱a̱ ndi̱viꞌ,
te̱ sa̱na̱tyaꞌanꞌ ni̱a̱ rey ni̱a̱ xiinꞌ Ndiosí ña̱ xakaꞌnuꞌ ni̱a̱.
22 Te̱ kii̱ꞌ na̱ko̱to̱ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ miiꞌ ka̱ ndii,
mi̱iꞌ ndiꞌiꞌ tu̱ndoꞌo̱ꞌ,
xiinꞌ ña̱ i̱i̱n yaví,
xiinꞌ ña̱ i̱i̱n ni̱a̱a̱ꞌ,
xiinꞌ ña̱ ndiꞌni̱ nimá ne̱ yivi̱ꞌ ku̱i̱ti̱ꞌ ku̱ni̱ ni̱a̱ yoo sa̱a̱ kuaꞌa̱n.
Te̱ xa̱ te̱i̱n ña̱ i̱i̱n yaví ja̱a̱nꞌ ndoo̱ ni̱a̱ ku̱ndi̱e̱e̱ ni̱a̱,
te̱ ku̱ndo̱ꞌo̱ xa̱va̱ꞌa̱ ni̱a̱.