Yoꞌoꞌ kaꞌán ndo̱so̱ꞌ Isaías nuu̱ꞌ rey Acaz
7
Rey Acaz,
siꞌe̱ Jotam,
te̱ nduuꞌ si̱a̱niꞌ Uzías,
ni̱ xa̱ꞌndi̱a̱ tyuunꞌ ñu̱u̱ Jerusalén nuu̱ꞌ ne̱ vi̱ꞌe̱ Judá.
Te̱ Rezín nduuꞌ rey nuu̱ꞌ ñu̱ꞌuꞌ Siria,
te̱ Peka,
te̱ nduuꞌ siꞌe̱ Remalía,
nduuꞌ rey nuu̱ꞌ ne̱ vi̱ꞌe̱ Israel.
Uvi̱ sa̱aꞌ te̱ ja̱a̱nꞌ ni̱ ka̱a̱ te̱ ku̱ntaꞌanꞌ ra̱ xiinꞌ ne̱ ndieeꞌ ñu̱u̱ Jerusalén,
ndisu̱ nï̱ ku̱vi̱ ka̱nandoo ra̱ ne̱ ndieeꞌ ñu̱u̱ ja̱a̱nꞌ.
2 Te̱ ni̱ xi̱ni̱ tu̱ꞌu̱n rey Acaz nde̱e̱ vi̱ꞌe̱ kuuꞌ nu̱uꞌ miiꞌ nduꞌu̱ꞌ ra̱ xaꞌndia tyuunꞌ ra̱ ña̱ te̱ ndieeꞌ nuu̱ꞌ ñu̱ꞌuꞌ Siria ndii,
ni̱ ndu̱i̱i̱n ra̱ xiinꞌ te̱ vi̱ꞌe̱ Efraín.
Sa̱kanꞌ na kuiiꞌ ni̱ ki̱si̱ a̱ nimá rey Acaz ja̱a̱nꞌ,
te̱ ni̱ ki̱si̱ tu̱ a̱ nimá ne̱ ndieeꞌ ñu̱u̱ ra̱ nde̱e̱ naa xaaꞌ i̱tunꞌ tunꞌ yoo xiki̱ꞌ kanda nu̱ꞌ kii̱ꞌ ndi̱e̱eꞌ va̱ xikaꞌ tatyi̱ꞌ.
3 Sa̱kanꞌ te̱ ni̱ kaꞌa̱n Yahvé xiinꞌ Isaías ndii:
“Na̱ka̱ siꞌe̱ u̱nꞌ Sear-Jasub (te̱ kivi̱ꞌ te̱ ja̱a̱nꞌ kuni katyi̱ a̱,
tyaaꞌ ne̱ ni̱ kaku̱ na̱ndi̱koꞌ),
te̱ kuꞌu̱n na̱taꞌanꞌ ndo̱ꞌ xiinꞌ rey Acaz.
Na̱taꞌanꞌ ndo̱ꞌ xiinꞌ ra̱ nde̱e̱ miiꞌ xaꞌa̱n ndi̱ꞌi̱ tyi̱tyi̱ ña̱ xita̱ꞌ ti̱kui,
teꞌ kuaꞌa̱n miiꞌ naá mi̱ni̱ tyiee̱ ya̱ti̱n yu̱ꞌuꞌ i̱tyiꞌ ña̱ kuaꞌa̱n xaꞌa̱ꞌ kuꞌu̱ miiꞌ ndieeꞌ yuu̱ꞌ natiaꞌ ne̱ yivi̱ꞌ toto̱.
4 Te̱ kaꞌa̱n u̱nꞌ xiinꞌ ra̱ ndii:
Ko̱to̱ xiinꞌ mi̱iꞌ u̱nꞌ,
te̱ sä̱ndiꞌni̱ xiinꞌ mi̱iꞌ u̱nꞌ,
kü̱yi̱ꞌvi u̱nꞌ ni̱ nde̱e̱ kä̱ka̱ tu̱ nimá u̱nꞌ xaꞌa̱ꞌ ña̱ xiꞌé Rezín,
te̱ nduuꞌ rey nuu̱ꞌ ñu̱ꞌuꞌ Siria,
xiinꞌ xaꞌa̱ꞌ ña̱ xiꞌé rey Peka,
siꞌe̱ Remalía,
sa̱kanꞌ ña̱ uvi̱ sa̱aꞌ te̱ ja̱a̱nꞌ ndii,
nduuꞌ ra̱ nde̱e̱ naa ñuꞌu̱ ti̱kei̱ ña̱ xa̱ ni̱ ndaꞌva̱,
te̱ ndee ñuꞌma̱ ku̱i̱ti̱ꞌ tava̱ꞌ a̱.
5 Ña̱ ndi̱xa̱ nduuꞌ a̱ ña̱,
te̱ ndieeꞌ nuu̱ꞌ ñu̱ꞌuꞌ Siria,
xiinꞌ te̱ vi̱ꞌe̱ Efraín,
xiinꞌ siꞌe̱ Remalía ndii,
xa̱ ni̱ nda̱tuꞌunꞌ tuní ra̱ ña̱ sa̱a̱ ra̱ ña̱ ni̱a̱ꞌa xiinꞌ u̱nꞌ,
kaꞌán ra̱ ndii:
6 Kuꞌu̱n e̱ꞌ te̱ ku̱ntaꞌanꞌ e̱ꞌ xiinꞌ te̱ vi̱ꞌe̱ Judá,
te̱ sa̱yi̱ꞌvi ña̱ꞌaꞌ e̱ꞌ.
Na̱ꞌi̱ tu̱ e̱ꞌ ñu̱ꞌuꞌ ra̱ te̱ na̱ta̱ꞌviꞌ e̱ꞌ a̱ ku̱ndu̱u̱ ña̱ꞌa̱ e̱ꞌ.
Ndi̱ꞌi̱ ja̱a̱nꞌ,
te̱ tyi̱nduꞌu̱ꞌ e̱ꞌ siꞌe̱ Tabeel ku̱ndu̱u̱ rey nuu̱ꞌ ñu̱ꞌuꞌ ja̱a̱nꞌ,
katyi ra̱.
7 ’Ndisu̱ yuꞌu̱,
Yahvé,
kaꞌán ndii:
Ña̱ ni̱ tyi̱tuní ra̱ sa̱a̱ ra̱ xiinꞌ u̱nꞌ ja̱a̱nꞌ ndii,
köo̱ꞌ kivi̱ꞌ xinu̱ a̱ ni̱ nde̱e̱ köo̱ꞌ kivi̱ꞌ tu̱ ko̱o̱ a̱.
8 Sa̱kanꞌ ña̱ ñu̱ꞌuꞌ Siria ndii,
süu̱ꞌ ña̱ kaꞌnuꞌ ka̱ nduuꞌ a̱ te̱ sa̱kanꞌ ñu̱u̱ Damasco miiꞌ tiín ndi̱a̱a̱ a̱,
te̱ ñu̱u̱ Damasco ja̱a̱nꞌ ndii,
süu̱ꞌ ña̱ kaꞌnuꞌ ka̱ nduuꞌ a̱ te̱ sa̱kanꞌ rey Rezín,
te̱ xaꞌndia tyuunꞌ nuu̱ꞌ a̱.
Te̱ ne̱ vi̱ꞌe̱ Israel,
kii̱ꞌ xkaꞌndi̱a̱ uni̱ xi̱ko̱ uꞌu̱n kuiya̱ ndii,
ka̱ꞌni̱ꞌ te̱ yivi̱ꞌ sa̱kuuꞌ ni̱a̱,
te̱ ndi̱ꞌi̱ ndo̱o̱ ni̱a̱ nduxi̱n xa̱tyiꞌ.
9 Sa̱kanꞌ ña̱ ne̱ vi̱ꞌe̱ Israel ja̱a̱nꞌ ndii,
süu̱ꞌ ne̱ kooꞌ tyukuuꞌ ka̱ nduuꞌ ni̱a̱ te̱ sa̱kanꞌ ñu̱u̱ Samaria miiꞌ tiín ndi̱a̱a̱ ni̱a̱,
te̱ ñu̱u̱ Samaria ja̱a̱nꞌ ndii,
süu̱ꞌ ñu̱u̱ kaꞌnuꞌ ka̱ nduuꞌ a̱ te̱ sa̱kanꞌ siꞌe̱ Remalía,
te̱ nduuꞌ rey Peka,
te̱ xaꞌndia tyuunꞌ nuu̱ꞌ a̱.
Naaꞌ kuäsa̱ꞌ i̱ni̱ ndo̱ꞌ xini ndo̱ꞌ ña̱ kaꞌán i̱ xiinꞌ ndo̱ꞌ ndii,
ña̱ nda̱ku nduuꞌ a̱ ndii,
köo̱ꞌ xa̱tyiꞌ ña̱ ku̱vi̱ sa̱a̱ yuꞌu̱ te̱ tyi̱ndi̱e̱eꞌ i̱ ndoꞌó,
katyi̱ u̱nꞌ xiinꞌ ra̱”,
katyi a̱.
Yoꞌoꞌ kaꞌán Ndiosí xiinꞌ rey Acaz i̱tyiꞌ ña̱ uvi̱
10 Te̱ ni̱ kaꞌa̱n ka̱ Yahvé xiinꞌ rey Acaz ndii:
11 “Acaz,
kaka̱n nuu̱ꞌ Tákuiꞌe Ndiosí u̱nꞌ i̱i̱n tyu̱u̱n kaꞌnuꞌ ña̱ niaꞌa̱ yoꞌó te̱ ku̱nda̱ni̱ u̱nꞌ naaꞌ xinu̱ xna̱ꞌa̱ ña̱ ni̱ kaꞌa̱n a̱ xiinꞌ u̱nꞌ ja̱a̱nꞌ.
Ña̱ vixi va̱ kaka̱n u̱nꞌ nuu̱ꞌ a̱,
naa kuuꞌ ña̱ yoo nde̱e̱ miiꞌ kunu va̱ ti̱xi̱n ñu̱ꞌuꞌ,
uun ña̱ yoo nde̱e̱ miiꞌ sukun xa̱va̱ꞌa̱ ndi̱viꞌ”,
ni̱ katyi̱ a̱.
12 Te̱ ni̱ kaꞌa̱n Acaz xiinꞌ Isaías ndii:
“Käka̱n yuꞌu̱ nde̱e̱ i̱i̱n ña̱ꞌa̱ nuu̱ꞌ Ndiosí,
sa̱kanꞌ ña̱ vä̱ꞌa̱ ko̱to̱ ku̱a̱ꞌa̱ e̱ꞌ Yahvé”,
ni̱ katyi̱ ra̱.
13 Sa̱kanꞌ te̱ ni̱ kaꞌa̱n Isaías xiinꞌ ne̱ vi̱ꞌe̱ Israel ndii:
“Ndoꞌó,
te̱ ni̱ ndoo̱ xaꞌndia tyuunꞌ miiꞌ ni̱ xa̱ꞌndi̱a̱ tyuunꞌ rey David ndii,
ku̱ni̱ so̱ꞌo̱ kaxiꞌ ndo̱ꞌ ña̱ kaꞌa̱n i̱ xiinꞌ ndo̱ꞌ.
Köo̱ꞌ kivi̱ꞌ xikuiín ndo̱ꞌ ña̱ satañaꞌa̱ꞌ ndo̱ꞌ ne̱ yivi̱ꞌ i̱i̱n yivi̱ꞌ,
te̱ vi̱ti̱n ndii,
nde̱e̱ mi̱iꞌ Ndiosí,
ña̱ xakaꞌnuꞌ i̱,
satañaꞌa̱ꞌ ndo̱ꞌ.
14 Sa̱kanꞌ na kuiiꞌ vi̱ti̱n ndii,
mi̱iꞌ Yahvé ta̱xi̱ ña̱ sa̱kuniꞌ nuu̱ꞌ ndo̱ꞌ.
Sa̱kanꞌ ña̱ na̱ku̱i̱so̱ i̱i̱n ña̱ꞌaꞌ ñaꞌ nduꞌu̱ꞌ siee,
te̱ sa̱kakuꞌ aꞌ i̱i̱n tiaa̱ siꞌe̱ aꞌ,
te̱ tyi̱nduꞌu̱ꞌ aꞌ kivi̱ꞌ ra̱ ku̱na̱niꞌ ra̱ Emanuel,
te̱ kivi̱ꞌ ra̱ ja̱a̱nꞌ kuni katyi̱ a̱ ndii,
Ndiosí yoo xiinꞌ e̱ꞌ.
15 Te̱ kii̱ꞌ kuañuꞌu̱ ra̱ ndii,
letyin u̱ꞌva̱ xiinꞌ ñuñu̱ꞌ ku̱i̱ti̱ꞌ ko̱ꞌo̱ ra̱ nde̱e̱ ska̱tyiꞌ ku̱xa̱tiꞌe̱ ra̱,
te̱ ku̱nda̱ni̱ ra̱ na̱ka̱xi̱n ra̱ ndee ña̱ nduuꞌ ña̱ va̱ꞌa̱ uun ndee ña̱ nduuꞌ ña̱ vä̱ꞌa̱ sa̱a̱ ra̱.
16 Sa̱kanꞌ ña̱ kii̱ꞌ kuní ka̱ ku̱nda̱ni̱ te̱ kuañuꞌu̱ ja̱a̱nꞌ ña̱ sa̱xi̱o̱o̱ ra̱ ña̱ ni̱a̱ꞌa,
te̱ na̱ti̱i̱n ra̱ ña̱ va̱ꞌa̱ ndii,
nduxi̱n ndo̱o̱ ñu̱ꞌuꞌ miiꞌ xaꞌndia tyuunꞌ uvi̱ sa̱aꞌ rey,
te̱ yiꞌvi va̱ ndo̱ꞌ ja̱a̱nꞌ.
17 Mi̱iꞌ Yahvé ti̱ꞌviꞌ rey te̱ vi̱ꞌe̱ Asiria xiinꞌ te̱ xíinꞌ ra̱ te̱ ka̱ꞌni̱ꞌ ra̱ sa̱kuuꞌ ndo̱ꞌ,
te̱ ka̱ꞌni̱ꞌ tu̱ ra̱ sa̱kuuꞌ ne̱ ñu̱u̱ u̱nꞌ xiinꞌ sa̱kuuꞌ ne̱ vi̱ꞌe̱ yu̱vaꞌ u̱nꞌ.
Te̱ ña̱ ku̱ndo̱ꞌo̱ ndo̱ꞌ ja̱a̱nꞌ ndii,
nde̱e̱ i̱i̱n kivi̱ꞌ nï̱ yoo̱ a̱ miiꞌ ndieeꞌ ndo̱ꞌ nde̱e̱ kivi̱ꞌ ña̱ ni̱ ku̱siinꞌ Efraín nuu̱ꞌ ne̱ vi̱ꞌe̱ Judá”,
ni̱ katyi̱ ra̱.
18 Te̱ kivi̱ꞌ ja̱a̱nꞌ ndii,
tu̱tu̱ꞌ Yahvé te̱ xíinꞌ,
te̱ ndieeꞌ tu̱ku̱ taꞌviꞌ i̱ti̱a̱ Nilo ña̱ xkaꞌndíá nuu̱ꞌ ñu̱ꞌuꞌ Egipto,
xiinꞌ te̱ xíinꞌ,
te̱ ndieeꞌ nuu̱ꞌ ñu̱ꞌuꞌ Asiria,
kuaꞌa̱ꞌ ra̱ ki̱xi̱n nde̱e̱ naa ndi̱ka̱ma̱ uun ñuñu̱ꞌ.
19 Te̱ ki̱xi̱n kuaꞌa̱ꞌ xa̱va̱ꞌa̱ ra̱ te̱ ku̱ndi̱e̱e̱ ra̱ nuu̱ꞌ ñu̱ꞌuꞌ miiꞌ va̱ꞌa̱ va̱ ndutíá ña̱ tyiꞌiꞌ ndo̱ꞌ,
te̱ ku̱ndi̱e̱e̱ tu̱ ra̱ yo̱soꞌ miiꞌ i̱tyi va̱ kaaꞌ,
te̱ ku̱ndi̱e̱e̱ tu̱ ra̱ ti̱xi̱n yavi̱ yuu̱ꞌ,
te̱ ku̱ndi̱e̱e̱ tu̱ ra̱ miiꞌ xiꞌiꞌ ki̱tiꞌ ti̱kui.
20 Te̱ kivi̱ꞌ ja̱a̱nꞌ ndii,
ka̱na̱ Ndiosí rey Asiria,
te̱ xaꞌndia tyuunꞌ nde̱e̱ tu̱ku̱ taꞌviꞌ yu̱ꞌuꞌ i̱ti̱a̱ Éufrates,
te̱ ku̱ndu̱u̱ ra̱ nde̱e̱ naa tyilo xíinꞌ va̱,
te̱ ta̱va̱ꞌ tiꞌeꞌ ra̱ xíniꞌ sa̱kuuꞌ ne̱ vi̱ꞌe̱ Israel xiinꞌ i̱xiꞌ xaꞌa̱ꞌ ne̱ yivi̱ꞌ,
te̱ ka̱ꞌndi̱a̱ tu̱ ra̱ nde̱e̱ xuꞌu̱ꞌ te̱ yivi̱ꞌ.
21 Te̱ sa̱kanꞌ tu̱ kivi̱ꞌ ja̱a̱nꞌ ndii,
naaꞌ ni̱ yoo̱ sa̱va̱ ne̱ yivi̱ꞌ,
ne̱ ni̱ ndoo̱ i̱i̱n si̱ndiki̱ꞌ siꞌi tekiꞌ,
te̱ ni̱ ndoo̱ tu̱ uvi̱ taꞌan mbe̱e̱ sana̱ ni̱a̱ nda̱ꞌaꞌ ni̱a̱ ndii,
22 ko̱o̱ kuaꞌa̱ꞌ letyin ko̱ꞌo̱ ni̱a̱,
te̱ nde̱e̱ ku̱vi̱ ka̱sa̱ꞌa̱ ni̱a̱ keso u̱ꞌva̱ ku̱xi̱ ni̱a̱.
Te̱ sa̱kuuꞌ ne̱ kaku̱ ndoo̱ ku̱ndi̱e̱e̱ ñu̱u̱ ja̱a̱nꞌ kii̱ꞌ ndi̱ꞌi̱ sa̱nduxín te̱ yivi̱ꞌ a̱ ndii,
ku̱xi̱ ni̱a̱ keso u̱ꞌva̱ xiinꞌ ñuñu̱ꞌ nde̱e̱ nda̱ꞌni̱ ni̱a̱.
23 Te̱ sa̱kanꞌ tu̱ kivi̱ꞌ ja̱a̱nꞌ ndii,
nuu̱ꞌ ñu̱ꞌuꞌ miiꞌ ni̱ yoo̱ i̱i̱n mií yo̱ꞌoꞌ uva ña̱ ni̱ ndi̱a̱a̱ i̱i̱n mií xu̱ꞌunꞌ yuu̱ꞌ plata ndii,
ndee i̱ñu̱ꞌ xiinꞌ kuꞌu̱ xiti̱nꞌ ku̱i̱ti̱ꞌ na̱koo̱ nuu̱ꞌ a̱.
24 Te̱ nuu̱ꞌ ñu̱ꞌuꞌ ja̱a̱nꞌ ndii,
ndee ki̱tiꞌ ku̱i̱ti̱ꞌ ku̱vi̱ kuꞌu̱n ndu̱kuꞌ te̱ yivi̱ꞌ xiinꞌ tunꞌ to̱so̱ xiinꞌ kuxi̱,
sa̱kanꞌ ña̱ nduxi̱n ndo̱o̱ a̱ te̱ ndee mi̱iꞌ ndiꞌiꞌ i̱ñu̱ꞌ kuii̱ꞌ,
xiinꞌ kuꞌu̱ xiti̱nꞌ,
xiinꞌ kuaꞌa̱ꞌ ki̱tiꞌ i̱kuꞌ ku̱i̱ti̱ꞌ ko̱o̱ nuu̱ꞌ ñu̱ꞌuꞌ ja̱a̱nꞌ.
25 Te̱ nde̱e̱ i̱i̱n ne̱ yivi̱ꞌ küꞌu̱n i̱tu̱n miiꞌ ni̱ xi̱tu̱ꞌni̱ te̱ yivi̱ꞌ ña̱ ta̱ta̱ ra̱ xiinꞌ yata̱ꞌ ki̱ꞌiꞌ xta̱ꞌanꞌ,
sa̱kanꞌ ña̱ ko̱o̱ kuaꞌa̱ꞌ i̱ñu̱ꞌ kuii̱ꞌ xiinꞌ kuꞌu̱ xiti̱nꞌ i̱kanꞌ,
te̱ ndee miiꞌ ku̱ꞌu̱n si̱ndiki̱ꞌ xiinꞌ mbe̱e̱ ka̱xi̱ꞌ riꞌ kuꞌu̱ ku̱i̱ti̱ꞌ ku̱ndu̱u̱ a̱.