Yoꞌoꞌ kanaꞌ Ndiosí Isaías te̱ kuꞌu̱n kaꞌa̱n ndo̱so̱ꞌ ra̱ kuento a̱
6
Kuiya̱ ña̱ ni̱ xiꞌi̱ rey Uzías ndii,
ni̱ xi̱ni̱ yuꞌu̱ nduꞌu̱ Ndiosí ti̱xi̱n yu̱kunꞌ kaꞌnuꞌ nuu̱ꞌ i̱i̱n tei̱ kaꞌnuꞌ miiꞌ sukun va̱,
te̱ ka̱niiꞌ ti̱xi̱n yu̱kunꞌ kaꞌnuꞌ ja̱a̱nꞌ ni̱ tyi̱tuꞌ ni̱ xa̱a̱ yu̱ꞌuꞌ toto̱ nani̱ꞌ ña̱ niꞌnuꞌ a̱.
2 Te̱ yoo kiꞌinꞌ ángele ña̱ nduuꞌ serafín kooꞌ tyukuuꞌ xa̱va̱ꞌa̱ xikaꞌ nuuꞌ nuu̱ꞌ Ndiosí ti̱xi̱n yu̱kunꞌ ja̱a̱nꞌ.
Te̱ i̱ꞌi̱n ña̱ ja̱a̱nꞌ ndii,
yoo iñu̱ taꞌan ndi̱xi̱n a̱.
Xiinꞌ uvi̱ taꞌan ndi̱xi̱n a̱ ja̱a̱nꞌ tisaꞌví a̱ nuu̱ꞌ a̱,
te̱ xiinꞌ uvi̱ taꞌan ndi̱xi̱n a̱ tisaꞌví a̱ xaꞌa̱ꞌ a̱,
te̱ xiinꞌ i̱nga̱ uvi̱ taꞌan ndi̱xi̱n a̱ taꞌnuꞌ a̱.
3 Te̱ kaꞌán xiinꞌ taꞌanꞌ a̱ ndii:
“Ña̱ su̱ꞌu̱n,
ña̱ su̱ꞌu̱n va̱,
ña̱ su̱ꞌu̱n xa̱va̱ꞌa̱ nduuꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
te̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ tyituꞌ vi̱ꞌ yoo ña̱ kaꞌnuꞌ a̱”,
katyi serafín ja̱a̱nꞌ.
4 Te̱ kii̱ꞌ ni̱ tiaku̱ tatyi̱ꞌ yu̱ꞌuꞌ sa̱kuuꞌ serafín ja̱a̱nꞌ ndii,
ni̱ ka̱nda̱ vitu̱ꞌ tunꞌ ndasi yiꞌeꞌ yu̱kunꞌ kaꞌnuꞌ ja̱a̱nꞌ,
te̱ ka̱niiꞌ ti̱xi̱n yu̱kunꞌ ni̱ tyi̱tuꞌ vi̱ꞌ ñuꞌma̱.
5 Sa̱kanꞌ te̱ ni̱ kaꞌa̱n i̱ ndii:
“Ndaꞌvi va̱ kuuꞌ yuꞌu̱,
vi̱ti̱n nduuꞌ a̱ ku̱vi̱ xna̱ꞌa̱ i̱,
sa̱kanꞌ ña̱ te̱ ndisoꞌ ku̱a̱tyi̱ nduuꞌ i̱,
te̱ nduꞌu̱ꞌ i̱ te̱i̱n ne̱ yivi̱ꞌ,
ne̱ xaaꞌ tu̱ ku̱a̱tyi̱ xiinꞌ ña̱ kaꞌán ni̱a̱.
Ni̱ xi̱ni̱ ndu̱tyiꞌ nuu̱ꞌ i̱ ña̱ nduuꞌ Rey,
Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ”,
ni̱ katyi̱ i̱.
6 Sa̱kanꞌ te̱ ni̱ na̱ku̱i̱taꞌnu̱ i̱i̱n serafín ja̱a̱nꞌ nde̱e̱ miiꞌ iinꞌ i̱ ja̱a̱nꞌ niꞌiꞌ a̱ i̱i̱n ñuꞌu̱ ti̱kei̱ ña̱ ni̱ ki̱ꞌi̱n a̱ xiinꞌ i̱i̱n xinda̱ꞌ nuu̱ꞌ altar.
7 Te̱ ni̱ sa̱tondíá a̱ ñuꞌu̱ ti̱kei̱ ja̱a̱nꞌ yu̱ꞌuꞌ i̱,
kaꞌán a̱ xiinꞌ i̱ ndii:
“Ko̱to̱ u̱nꞌ,
ni̱ sa̱tondíá i̱ ñuꞌu̱ ti̱kei̱ yoꞌoꞌ yu̱ꞌuꞌ u̱nꞌ,
te̱ vi̱ti̱n ndii,
xa̱ ni̱ ndo̱yo̱ ku̱a̱tyi̱ u̱nꞌ,
te̱ xa̱ ni̱ yoo̱ kaꞌnuꞌ i̱ni̱ Ndiosí xaꞌa̱ꞌ kua̱tyi̱ ña̱ ni̱ xa̱a̱ u̱nꞌ”,
ni̱ katyi̱ a̱.
8 Sa̱kanꞌ te̱ ni̱ xi̱ni̱ so̱ꞌo̱ i̱ ni̱ kaꞌa̱n Tákuiꞌe Ndiosí ndii:
“¿Yo̱o̱ tu̱ ti̱ꞌviꞌ i̱ kuꞌu̱n xiinꞌ kuento i̱?
Te̱,
¿yo̱o̱ tu̱ kuꞌu̱n nuu̱ꞌ yooꞌ vi̱ti̱n?”,
ni̱ katyi̱ a̱.
Sa̱kanꞌ te̱ ni̱ kaꞌa̱n i̱ ndii:
“Yoꞌoꞌ iinꞌ yuꞌu̱,
yuꞌu̱ ti̱ꞌviꞌ u̱nꞌ”,
ni̱ katyi̱ i̱.
9 Te̱ ni̱ kaꞌa̱n a̱ xiinꞌ i̱ ndii:
“Kuaꞌan te̱ kaꞌa̱n u̱nꞌ xiinꞌ ne̱ yivi̱ꞌ,
ne̱ i̱i̱n kuuꞌ xiinꞌ u̱nꞌ ndii:
Tee̱ꞌ ndee ku̱ni̱ so̱ꞌo̱ kaxiꞌ ndo̱ꞌ ña̱ kaꞌán Ndiosí xiinꞌ ndo̱ꞌ ndii,
kü̱nda̱ni̱ ndo̱ꞌ a̱,
te̱ tee̱ꞌ ndee ko̱to̱ꞌni̱ kaxiꞌ va̱ ndo̱ꞌ a̱ ndii,
köo̱ꞌ xa̱tyiꞌ a̱ ku̱vi̱ ku̱nda̱ni̱ ndo̱ꞌ”,
ni̱ katyi̱ a̱.
10 Te̱ ni̱ kaꞌa̱n ka̱ a̱ xiinꞌ i̱ ndii:
“Sa̱sanaꞌ xíniꞌ ne̱ yivi̱ꞌ kaa̱ꞌ te̱ nda̱si̱ u̱nꞌ so̱ꞌo̱ ni̱a̱,
te̱ nda̱si̱ tu̱ u̱nꞌ ndu̱tyiꞌ nuu̱ꞌ ni̱a̱,
sa̱kanꞌ te̱ kü̱vi̱ ko̱to̱ꞌni̱ ni̱a̱ xiinꞌ ndu̱tyiꞌ nuu̱ꞌ ni̱a̱,
ni̱ nde̱e̱ kü̱vi̱ tu̱ ku̱ni̱ so̱ꞌo̱ ni̱a̱ xiinꞌ so̱ꞌo̱ ni̱a̱,
ni̱ nde̱e̱ kü̱vi̱ tu̱ ku̱nda̱ni̱ ni̱a̱ xiinꞌ nimá ni̱a̱,
te̱ na̱ndi̱koꞌ ni̱a̱ nuu̱ꞌ i̱ te̱ sa̱ndaꞌa ña̱ꞌaꞌ i̱”,
ni̱ katyi̱ a̱.
11 Sa̱kanꞌ te̱ ni̱ kaꞌa̱n i̱ xiinꞌ a̱ ndii:
“¿Sa̱a̱ vi̱ꞌ taꞌan kivi̱ꞌ te̱ kuꞌu̱n ndi̱koꞌ ña̱ ja̱a̱nꞌ?”,
ni̱ katyi̱ i̱.
Te̱ ni̱ kaꞌa̱n a̱ xiinꞌ i̱ ndii:
“Nde̱e̱ ska̱tyiꞌ nduxi̱n sa̱kuuꞌ ñu̱u̱ ni̱a̱,
te̱ nde̱e̱ i̱i̱n ne̱ yivi̱ꞌ köo̱ꞌ ka̱ ndoo̱ ku̱ndi̱e̱e̱ ka̱ nuu̱ꞌ a̱,
te̱ nde̱e̱ i̱i̱n ne̱ yivi̱ꞌ kü̱ndi̱e̱e̱ ka̱ tu̱ ti̱xi̱n vi̱ꞌe̱ ni̱a̱,
te̱ sa̱kanꞌ tu̱ ñu̱ꞌuꞌ ni̱a̱ ndii,
miiꞌ i̱tyiꞌ kaaꞌ na̱ndu̱u̱ ka̱niiꞌ a̱.
12 Nde̱e̱ ska̱tyiꞌ ti̱ꞌviꞌ yuꞌu̱,
Yahvé,
sa̱kuuꞌ ne̱ ja̱a̱nꞌ xikaꞌ i̱i̱n yivi̱ꞌ,
te̱ ka̱niiꞌ ñu̱ꞌuꞌ ni̱a̱ na̱ndu̱u̱ miiꞌ i̱tyi kaaꞌ.
13 Te̱ naaꞌ ndoo̱ ka̱ tyaaꞌ ne̱ yivi̱ꞌ tiaku ni̱a̱ ndii,
tu̱ku̱ ni̱ sa̱kanꞌ ko̱ꞌni̱ te̱ yivi̱ꞌ miiꞌ ndieeꞌ ni̱a̱ te̱ ka̱ꞌmi̱ ña̱ꞌaꞌ ra̱.
Ndisu̱ sa̱a̱ niiꞌ xaaꞌ tu̱n koo̱ꞌ xiinꞌ ta̱ntaꞌ kii̱ꞌ xaꞌndia te̱ yivi̱ꞌ nu̱ꞌ te̱ ndoó ti̱kundu̱ nu̱ꞌ te̱ tu̱ku̱ ni̱ nakaꞌndi nda̱ꞌaꞌ nu̱ꞌ ndii,
niiꞌ sa̱kanꞌ tu̱ ndoo̱ tyaaꞌ ne̱ nduuꞌ kuenta i̱,
te̱ ne̱ ndoo̱ ja̱a̱nꞌ nduuꞌ ne̱ na̱taꞌvi̱ꞌ nuu̱ꞌ kuꞌu̱n e̱ꞌ”,
ni̱ katyi̱ a̱.