4
Te̱ kivi̱ꞌ ja̱a̱nꞌ ndii,
köo̱ꞌ kuaꞌa̱ꞌ xa̱tyiꞌ ka̱ te̱ yivi̱ꞌ ndoo̱ ku̱ti̱a̱ku̱,
sa̱kanꞌ na kuiiꞌ uxa̱ taꞌan ña̱ꞌaꞌ kaꞌa̱n xiinꞌ i̱i̱n nda̱a̱ꞌ ra̱ ndii:
“Sa̱a̱ u̱nꞌ ña̱ va̱ꞌa̱ te̱ tu̱ndaꞌa̱ꞌ u̱nꞌ xiinꞌ sa̱kuuꞌ ndu̱ꞌ.
Ndu̱kuꞌ miiꞌ ndu̱ ña̱ ka̱xi̱ꞌ ndu̱,
te̱ sa̱ta̱ꞌ mi̱iꞌ tu̱ ndu̱ toto̱ ku̱i̱ꞌnu̱ ndu̱.
Ña̱ kuní ku̱i̱ti̱ꞌ ndu̱ sa̱a̱ u̱nꞌ xaꞌa̱ꞌ ndu̱ ndii,
tu̱ndaꞌa̱ꞌ u̱nꞌ xiinꞌ ndu̱,
te̱ ta̱xi̱ u̱nꞌ ko̱ni̱ꞌi̱ ndu̱ kivi̱ꞌ u̱nꞌ,
sa̱kanꞌ te̱ sä̱ndi̱ꞌi̱ ne̱ yivi̱ꞌ xiinꞌ ndu̱ꞌ kaꞌa̱n ni̱a̱ ña̱ ne̱ köo̱ꞌ kivi̱ꞌ ni̱ tu̱ndaꞌa̱ꞌ nduuꞌ ndu̱”,
katyi̱ ni̱a̱.
Yoꞌoꞌ taxiꞌ Ndiosí kuento a̱ ña̱ na̱ku̱ndiee̱ va̱ꞌa̱ ne̱ ndieeꞌ ñu̱u̱ Jerusalén sa̱a̱ a̱ nuu̱ꞌ kuꞌu̱n e̱ꞌ
2 Kivi̱ꞌ ja̱a̱nꞌ ndii,
ne̱ Israel,
ne̱ na̱taꞌvi̱ꞌ xa̱aꞌ,
ne̱ na̱ka̱xi̱n Yahvé ku̱ndi̱e̱e̱ ñu̱u̱ Jerusalén ndii,
ne̱ ja̱a̱nꞌ nduuꞌ ne̱ ku̱ndi̱e̱e̱ va̱ꞌa̱,
te̱ nda̱tu̱nꞌ tu̱ ko̱o̱ ni̱a̱,
te̱ ña̱ ku̱a̱ꞌnu̱ nuu̱ꞌ ñu̱ꞌuꞌ ni̱a̱ ndii,
ku̱vikaꞌ ni̱a̱ sa̱a̱ a̱,
te̱ ku̱kaꞌnuꞌ tu̱ ni̱a̱ sa̱a̱ a̱.
3 Ne̱ nï̱ xiꞌi̱ kii̱ꞌ ni̱ ko̱ꞌni̱ te̱ xíinꞌ ñu̱u̱ Sión ndii,
kuenta Ndiosí ku̱na̱niꞌ ni̱a̱,
te̱ ne̱ ja̱a̱nꞌ nduuꞌ ne̱ nï̱ xiꞌi̱ kii̱ꞌ ni̱ sa̱nduxín te̱ xíinꞌ ñu̱u̱ Jerusalén ja̱a̱nꞌ,
te̱ ni̱ na̱ko̱so̱ꞌ kivi̱ꞌ ni̱a̱ ni̱ xa̱a̱ Ndiosí,
te̱ ndoo̱ ni̱a̱ ku̱ndi̱e̱e̱ ni̱a̱ ñu̱u̱ Jerusalén ja̱a̱nꞌ.
4 Xto̱ꞌo̱ e̱ꞌ Ndiosí ndii,
nda̱sa̱ndo̱o̱ a̱ ne̱ ndieeꞌ ñu̱u̱ Jerusalén níiꞌ ña̱ ni̱ xiti̱a̱ ñu̱u̱ miiꞌ ndieeꞌ ni̱a̱ ja̱a̱nꞌ,
te̱ xiinꞌ tatyi̱ꞌ i̱ꞌniꞌ ña̱ kieeꞌ yu̱ꞌuꞌ a̱ na̱ti̱a̱ a̱ ne̱ ndieeꞌ ñu̱u̱ ja̱a̱nꞌ,
te̱ ña̱ ja̱a̱nꞌ ku̱ndu̱u̱ nde̱e̱ naa ñuꞌu̱ ña̱ nda̱sa̱ndo̱o̱ ña̱ꞌaꞌ nuu̱ꞌ ña̱ ni̱ ku̱ndeꞌi̱ ni̱a̱ ni̱ xa̱a̱ ku̱a̱tyi̱ ni̱a̱.
5 Te̱ tyi̱nduꞌu̱ꞌ Yahvé viko̱ꞌ ndiaaꞌ ka̱niiꞌ miiꞌ ndieeꞌ ne̱ yivi̱ꞌ ñu̱u̱ Sión ja̱a̱nꞌ xiinꞌ miiꞌ nakayá ni̱a̱ xakaꞌnuꞌ ña̱ꞌaꞌ ni̱a̱ i̱i̱n keꞌinꞌ.
Te̱ viko̱ꞌ ja̱a̱nꞌ ku̱ndu̱u̱ ka̱tiꞌ ni̱a̱,
te̱ ñu̱u ndii,
ñuꞌu̱ nda̱tu̱nꞌ na̱yiꞌe̱ nuu̱ꞌ ni̱a̱ sa̱a̱ a̱.
Sa̱kanꞌ ña̱ ña̱ kaꞌnuꞌ Ndiosí ti̱saꞌvi̱ ka̱niiꞌ miiꞌ ndieeꞌ ni̱a̱ ja̱a̱nꞌ.
6 Te̱ ku̱ndu̱u̱ a̱ nde̱e̱ naa vi̱ꞌe̱ miiꞌ kaku̱ ni̱a̱ nuu̱ꞌ ña̱ i̱ꞌniꞌ i̱i̱n keꞌinꞌ,
te̱ ku̱ndu̱u̱ tu̱ a̱ miiꞌ ku̱vi̱ ku̱nu̱ saviꞌ ni̱a̱ xiinꞌ kii̱ꞌ xikaꞌ tatyi̱ꞌ ndi̱e̱eꞌ kii̱ꞌ kuunꞌ kuiꞌe̱ savi̱ꞌ ja̱a̱nꞌ.