Yoꞌoꞌ kaꞌán a̱ ña̱ sa̱ndoꞌoꞌ Yahvé ne̱ vi̱ꞌe̱ Judá xiinꞌ ne̱ ndieeꞌ ñu̱u̱ Jerusalén
3
Ku̱ni̱ so̱ꞌo̱ ndo̱ꞌ ña̱ kaꞌán i̱ xiinꞌ ndo̱ꞌ.
Tákuiꞌe Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii,
nä̱ꞌaꞌ ka̱ te̱ sa̱ndiꞌiꞌ a̱ sa̱kuuꞌ ña̱ tiaku yooꞌ,
ne̱ ndieeꞌ ñu̱u̱ Jerusalén xiinꞌ ña̱ tiaku ne̱ vi̱ꞌe̱ Judá.
Sa̱ndiꞌiꞌ xa̱tyiꞌ tu̱ a̱ sa̱kuuꞌ ña̱ xaxi̱ꞌ e̱ꞌ te̱ tiaku e̱ꞌ,
te̱ sa̱ndokoꞌ xa̱tyiꞌ tu̱ a̱ sa̱kuuꞌ ti̱kui teꞌ xiꞌiꞌ e̱ꞌ miiꞌ ka̱ yooꞌ raꞌ.
2 Te̱ sa̱ndiꞌiꞌ tu̱ a̱ sa̱kuuꞌ te̱ ndi̱e̱ni va̱ ti̱i̱n ñuꞌu̱,
te̱ sa̱kanꞌ tu̱ sa̱kuuꞌ te̱ xíinꞌ,
te̱ sa̱kanꞌ tu̱ sa̱kuuꞌ kuesí,
te̱ sa̱kanꞌ tu̱ sa̱kuuꞌ te̱ kaꞌán tiakú tu̱ꞌu̱n Ndiosí,
te̱ sa̱kanꞌ tu̱ sa̱kuuꞌ te̱ tuviꞌ i̱ni̱ xiinꞌ sa̱kuuꞌ te̱ xi̱xa̱,
te̱ kuuꞌ nu̱uꞌ nuu̱ꞌ ñu̱u̱.
3 Te̱ sa̱kanꞌ tu̱ sa̱ndiꞌiꞌ Ndiosí sa̱kuuꞌ te̱ xíinꞌ kuuꞌ nu̱uꞌ,
te̱ xaꞌndia tyuunꞌ nuu̱ꞌ uvi̱ xi̱ko̱ uxi̱ taꞌan te̱ xíinꞌ xiinꞌ sa̱kuuꞌ te̱ kuuꞌ kaꞌnuꞌ,
te̱ ndisoꞌ tyuunꞌ vie̱,
te̱ sa̱kanꞌ tu̱ sa̱kuuꞌ te̱ kaꞌán nde̱iꞌ nuu̱ꞌ te̱ yivi̱ꞌ,
te̱ sa̱kanꞌ tu̱ sa̱kuuꞌ te̱ tyu̱u̱n va̱ ka̱sa̱ꞌa̱ yo̱o̱ ka̱ nduuꞌ ña̱ꞌa̱ xiinꞌ nda̱ꞌaꞌ ra̱,
te̱ sa̱kanꞌ tu̱ sa̱kuuꞌ te̱ xini tuní va̱ xaꞌa̱ꞌ tiuu̱nꞌ.
4 Te̱ sa̱va̱ ku̱i̱ti̱ꞌ tyi̱ndi̱e̱e̱ i̱ ku̱ndu̱u̱ te̱ kuuꞌ nu̱uꞌ nuu̱ꞌ ni̱a̱,
te̱ te̱ kuatyi̱ꞌ kualiꞌ ku̱i̱ti̱ꞌ tyi̱ndi̱e̱e̱ i̱ ku̱ndu̱u̱ te̱ ka̱ꞌndi̱a̱ tyuunꞌ nuu̱ꞌ ni̱a̱.
5 Kivi̱ꞌ ja̱a̱nꞌ ndii,
ku̱tu̱ndoꞌo̱ꞌ xa̱va̱ꞌa̱ ko̱o̱ i̱i̱n yivi̱ꞌ,
sa̱kanꞌ na kuiiꞌ ku̱ntaꞌanꞌ ne̱ yivi̱ꞌ xiinꞌ ne̱ ndieeꞌ ñu̱u̱ ni̱a̱,
te̱ sa̱kanꞌ tu̱ ku̱ntaꞌanꞌ ni̱a̱ xiinꞌ ne̱ ndieeꞌ ya̱ti̱n vi̱ꞌe̱ ni̱a̱.
Te̱ sa̱va̱ ndii,
ndo̱ni̱ꞌi̱ nda̱ꞌaꞌ ra̱ nuu̱ꞌ ne̱ xi̱xa̱,
te̱ ne̱ yivi̱ꞌ ndaꞌvi so̱ꞌo̱ ndii,
kö̱to̱ kaꞌnuꞌ tu̱ ne̱ ja̱a̱nꞌ ne̱ kaꞌán va̱ꞌa̱ ne̱ yivi̱ꞌ xaꞌa̱ꞌ.
6 Te̱ kii̱ꞌ xaa̱ kivi̱ꞌ ja̱a̱nꞌ ndii,
na̱ti̱i̱n i̱i̱n te̱ yivi̱ꞌ nda̱ꞌaꞌ ña̱ni̱ mi̱iꞌ ra̱,
te̱ kaꞌa̱n ra̱ xiinꞌ te̱ ja̱a̱nꞌ ndii:
“Va̱ꞌa̱ yoꞌó ndii,
yoo na̱ tu̱ku̱ toto̱ niꞌnuꞌ u̱nꞌ,
xaꞌa̱ꞌ a̱ ja̱a̱nꞌ na sa̱a̱ u̱nꞌ ña̱ va̱ꞌa̱ te̱ ku̱ndu̱u̱ u̱nꞌ te̱ kuuꞌ nu̱uꞌ nuu̱ꞌ e̱ꞌ,
te̱ ka̱ꞌndi̱a̱ tyuunꞌ nuu̱ꞌ ne̱ ñu̱u̱ e̱ꞌ ña̱ xa̱ ni̱ nduxi̱n ndo̱o̱ kaa̱ꞌ”,
katyi̱ ra̱.
7 Te̱ na̱ku̱i̱i̱n ña̱ni̱ ra̱ ja̱a̱nꞌ kaꞌa̱n ra̱ ndii:
“Äa̱ꞌo,
köo̱ꞌ tyukuuꞌ yuꞌu̱ tyi̱ndi̱e̱eꞌ i̱ ndoꞌó,
sa̱kanꞌ ña̱ vi̱ꞌe̱ i̱ ndii,
köo̱ꞌ xa̱tyiꞌ ña̱ xaxi̱ꞌ kumiꞌ i̱ ni̱ nde̱e̱ köo̱ꞌ tu̱ toto̱ ku̱i̱ꞌnu̱ i̱ ndoó ndo̱so̱ꞌ xaaꞌ i̱,
sa̱kanꞌ na kuiiꞌ sä̱kuisoꞌ tyuunꞌ ndo̱ꞌ yuꞌu̱ te̱ ku̱ndu̱u̱ i̱ te̱ ka̱ꞌndi̱a̱ tyuunꞌ nuu̱ꞌ ndo̱ꞌ”,
katyi̱ ra̱.
8 Sa̱kanꞌ xaaꞌ a̱ te̱ nduxín xa̱tyiꞌ ñu̱u̱ Jerusalén,
te̱ nduxín xa̱tyiꞌ tu̱ miiꞌ xaꞌndia tyuunꞌ te̱ vi̱ꞌe̱ Judá.
Sa̱kanꞌ ña̱ kaꞌán ki̱ni̱ ra̱ xaꞌa̱ꞌ Yahvé,
te̱ küni ka̱ndi̱xaꞌ tu̱ ña̱ꞌaꞌ ra̱,
te̱ xateiꞌ ra̱ nuu̱ꞌ a̱ tee̱ꞌ ndee ña̱ kaꞌnuꞌ va̱ nduuꞌ a̱.
9 Nuu̱ꞌ mi̱iꞌ ne̱ yivi̱ꞌ ka̱vixi̱ ña̱ꞌaꞌ xaꞌa̱ꞌ ku̱a̱tyi̱ ña̱ xaaꞌ ni̱a̱,
sa̱kanꞌ ña̱ xaaꞌ tuviꞌ ni̱a̱ ku̱a̱tyi̱ ja̱a̱nꞌ nde̱e̱ naa ni̱ xa̱a̱ ne̱ ni̱ ndiee̱ ñu̱u̱ Sodoma,
te̱ kuäsa̱ꞌ xaaꞌ si̱ꞌe ni̱a̱ a̱.
Tyiee̱ va̱ tu̱ndoꞌo̱ꞌ ku̱ndo̱ꞌo̱ ne̱ ja̱a̱nꞌ sa̱a̱ Ndiosí,
sa̱kanꞌ ña̱ xa̱ mi̱iꞌ ni̱a̱ nduuꞌ ni̱a̱ te̱ ni̱ ndu̱kuꞌ ni̱a̱ tu̱ndoꞌo̱ꞌ ja̱a̱nꞌ ku̱ndo̱ꞌo̱ ni̱a̱.
10 Ndisu̱ kaꞌa̱n ndo̱ꞌ xiinꞌ ne̱ xatyuunꞌ nda̱ku ña̱ va̱ꞌa̱ va̱ ki̱e̱e̱ ne̱ ja̱a̱nꞌ nuu̱ꞌ sa̱kuuꞌ ña̱ sa̱a̱ ni̱a̱,
sa̱kanꞌ ña̱ mi̱iꞌ ndiꞌiꞌ ña̱ va̱ꞌa̱ na̱ti̱i̱n ni̱a̱ nda̱ꞌaꞌ Ndiosí xaꞌa̱ꞌ ña̱ va̱ꞌa̱ ña̱ ni̱ xa̱a̱ ni̱a̱.
11 Ndisu̱ tyiee̱ va̱ tu̱ndoꞌo̱ꞌ ku̱ndo̱ꞌo̱ ne̱ xaaꞌ ña̱ ni̱a̱ꞌa,
sa̱kanꞌ ña̱ na̱tyaꞌvi̱ ña̱ꞌaꞌ Ndiosí sa̱a̱ niiꞌ xataꞌa̱n ku̱ndo̱ꞌo̱ ni̱a̱ xaꞌa̱ꞌ sa̱kuuꞌ ña̱ ni̱a̱ꞌa ña̱ ni̱ xa̱a̱ ni̱a̱.
12 Te̱ sandoꞌoꞌ ne̱ nduuꞌ kuenta i̱ ndii,
nde̱e̱ naa te̱ kuatyi̱ꞌ ku̱i̱ti̱ꞌ nduuꞌ ra̱,
te̱ ña̱ꞌaꞌ ku̱i̱ti̱ꞌ nduuꞌ ne̱ xaꞌndia tyuunꞌ nuu̱ꞌ ni̱a̱.
Xa̱ ndaꞌvi kuuꞌ ndoꞌó ne̱ nduuꞌ kuenta i̱,
sa̱kanꞌ ña̱ te̱ kuuꞌ nu̱uꞌ nuu̱ꞌ ndo̱ꞌ ndii,
xini xaꞌanꞌ ra̱ ndoꞌó,
te̱ xakaꞌ ra̱ ndoꞌó kuaꞌa̱n ndo̱ꞌ nuu̱ꞌ i̱tyiꞌ ña̱ kuäsa̱ꞌ kuní.
13 Sakooꞌ tu̱ꞌva̱ xiinꞌ miiꞌ Yahvé nuu̱ꞌ tei̱ kaꞌnuꞌ miiꞌ nduꞌu̱ꞌ a̱ xaꞌnú a̱ ku̱a̱tyi̱ ne̱ yivi̱ꞌ,
te̱ xa̱ yoo tu̱ꞌva̱ a̱ te̱ sa̱naꞌmá a̱ ne̱ nduuꞌ kuenta a̱.
14 Te̱ na̱ka̱na̱ Yahvé sa̱kuuꞌ te̱ xi̱xa̱ nuu̱ꞌ ñu̱u̱ xiinꞌ te̱ kuuꞌ nu̱uꞌ nuu̱ꞌ ne̱ nduuꞌ kuenta a̱,
te̱ sa̱naꞌmá ña̱ꞌaꞌ a̱,
te̱ kaꞌán a̱ xiinꞌ ra̱ ndii:
“Ndoꞌó ndii,
xa̱ ni̱ sa̱nduxín ndo̱ꞌ sa̱kuuꞌ ne̱ nduuꞌ kuenta i̱,
ne̱ nduuꞌ nde̱e̱ naa yo̱ꞌoꞌ uva,
ni̱ xa̱kuinaꞌ ndo̱ꞌ ña̱ꞌa̱ ne̱ ndaꞌvi kuuꞌ,
te̱ ni̱ ta̱xa̱ꞌa̱ ndo̱ꞌ a̱ vi̱ꞌe̱ ndo̱ꞌ.
15 ¿Yo̱o̱ ni̱ ta̱xi̱ nde̱iꞌ nda̱ꞌaꞌ ndoꞌó na kuiiꞌ sandoꞌoꞌ ndo̱ꞌ ne̱ nduuꞌ kuenta i̱,
te̱ xakuiꞌnaꞌ ndo̱ꞌ ña̱ꞌa̱ ne̱ ndaꞌvi kuuꞌ,
te̱ xeꞌní ndo̱so̱ꞌ ña̱ꞌaꞌ ndo̱ꞌ?”,
ni̱ katyi̱ Tákuiꞌe Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
Yoꞌoꞌ kaꞌán Yahvé ña̱ sa̱ndoꞌoꞌ a̱ ña̱ꞌaꞌ ñaꞌ ñuñuꞌ, ne̱ ndieeꞌ ñu̱u̱ Jerusalén
16 Te̱ kaꞌán tu̱ Yahvé ndii:
“Ndoꞌó ña̱ꞌaꞌ,
ne̱ ndieeꞌ ñu̱u̱ nda̱tu̱nꞌ Jerusalén ndii,
ñuñuꞌ va̱ ndo̱ꞌ,
te̱ ndi̱e̱nu̱ ndonuꞌ nuu̱ꞌ ndo̱ꞌ xikaꞌ ndo̱ꞌ,
te̱ xakuitaꞌ ndo̱ꞌ te̱ yivi̱ꞌ xiinꞌ ndu̱tyiꞌ nuu̱ꞌ ndo̱ꞌ,
te̱ tyito̱ va̱ xeꞌní ndo̱ꞌ kuaꞌa̱n ndo̱ꞌ,
te̱ sakaxanꞌ tyu̱u̱n ka̱ ndo̱ꞌ siki̱ ka̱a̱ ña̱ ñuꞌuꞌ suku̱nꞌ xaꞌa̱ꞌ ndo̱ꞌ kuaꞌa̱n ndo̱ꞌ.
17 Xaꞌa̱ꞌ a̱ ja̱a̱nꞌ na kuiiꞌ ti̱ꞌviꞌ yuꞌu̱,
Yahvé,
ti̱ka̱taꞌ xíniꞌ sa̱kuuꞌ ndo̱ꞌ,
te̱ koyo̱ tiꞌeꞌ ndo̱o̱ i̱xiꞌ xíniꞌ ndo̱ꞌ sa̱a̱ i̱,
te̱ ku̱ka̱ꞌa̱n va̱ nuu̱ꞌ ndo̱ꞌ kii̱ꞌ ku̱ni̱ ne̱ yivi̱ꞌ i̱i̱nꞌ ndo̱ꞌ miiꞌ kasi̱ꞌe”,
katyi a̱.
18 Kii̱ꞌ ka̱tunꞌ Ndiosí ne̱ yivi̱ꞌ ndii,
ta̱va̱ꞌ a̱ sa̱kuuꞌ ña̱ xaaꞌ nda̱tu̱nꞌ xiinꞌ miiꞌ ña̱ꞌaꞌ ta̱va̱ꞌ a̱ siki̱ ña̱ ñuꞌuꞌ xaꞌa̱ꞌ ni̱a̱,
xiinꞌ vika̱ to̱so̱,
tunꞌ kiꞌiꞌ xíniꞌ ni̱a̱,
xiinꞌ siki̱ suku̱nꞌ ni̱a̱ ña̱ iinꞌ nde̱e̱ naa yoo̱ꞌ kii̱ꞌ nduuꞌ iti̱a̱ꞌ riꞌ,
19 te̱ sa̱kanꞌ tu̱ siki̱ so̱ꞌo̱ ni̱a̱,
xiinꞌ siki̱ ña̱ ñuꞌuꞌ suku̱nꞌ nda̱ꞌaꞌ ni̱a̱,
xiinꞌ toto̱ ndi̱kiꞌ ña̱ ndieeꞌ xíniꞌ ni̱a̱,
20 te̱ sa̱kanꞌ tu̱ ta̱va̱ꞌ a̱ pein ña̱ ñuꞌuꞌ suku̱nꞌ ni̱a̱,
xiinꞌ siki̱ ka̱a̱ ña̱ ñuꞌuꞌ suku̱nꞌ xaꞌa̱ꞌ ni̱a̱,
xiinꞌ toto̱ ña̱ kieeꞌ ña̱ kuꞌniꞌ to̱koꞌ ni̱a̱,
xiinꞌ ti̱kui xavixínꞌ ni̱a̱,
xiinꞌ ña̱ ñuꞌuꞌ suku̱nꞌ ni̱a̱ ña̱ xitoꞌ ña̱ꞌaꞌ a̱ xanini ni̱a̱,
21 te̱ sa̱kanꞌ tu̱ ka̱xun nda̱ꞌaꞌ ña̱ kumiꞌ ni̱a̱,
xiinꞌ sa̱kuuꞌ nuu̱ꞌ siki̱ ña̱ ndiaa yaꞌviꞌ ña̱ taxkoꞌ xiti̱nꞌ ni̱a̱,
22 te̱ sa̱kanꞌ tu̱ ta̱va̱ꞌ a̱ toto̱ va̱ꞌa̱ ña̱ niꞌnuꞌ ni̱a̱ kuaꞌa̱n ni̱a̱ vi̱koꞌ,
xiinꞌ toto̱ ndiká ña̱ tití ni̱a̱,
xiinꞌ toto̱ ndi̱kiꞌ ña̱ ndisuku̱ꞌ ni̱a̱,
xiinꞌ mata̱ ña̱ taxkoꞌ nda̱ꞌaꞌ ni̱a̱,
23 te̱ sa̱kanꞌ tu̱ peko ña̱ ndisoꞌ ni̱a̱,
xiinꞌ toto̱ yaxinꞌ ña̱ niꞌnuꞌ ni̱a̱,
xiinꞌ sa̱kuuꞌ toto̱ ya̱ꞌvi̱ va̱ ña̱ kumiꞌ ni̱a̱ ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ yuꞌva̱ lino,
xiinꞌ toto̱ nii̱ꞌ ña̱ tiín xíniꞌ ni̱a̱,
xiinꞌ ndi̱kiꞌ ña̱ ndieeꞌ xíniꞌ ni̱a̱.
24 Te̱ nuu̱ꞌ a̱ ña̱ ko̱o̱ xiko̱ ti̱kui xavixínꞌ miiꞌ ndieeꞌ ni̱a̱ ndii,
xa̱ mi̱iꞌ ndiꞌiꞌ xiko̱ xaꞌán ko̱o̱ miiꞌ ndieeꞌ ni̱a̱.
Te̱ nuu̱ꞌ a̱ ña̱ ko̱o̱ toto̱ kieeꞌ ña̱ kuꞌniꞌ to̱koꞌ ni̱a̱ ndii,
yo̱ꞌoꞌ nii̱ꞌ ku̱i̱ti̱ꞌ ko̱tii̱n to̱koꞌ ni̱a̱,
te̱ nuu̱ꞌ a̱ ña̱ nda̱sa̱ nda̱tu̱nꞌ ni̱a̱ i̱xiꞌ xíniꞌ ni̱a̱ ndii,
koyo̱ tiꞌeꞌ ndo̱o̱ i̱xiꞌ xíniꞌ ni̱a̱.
Te̱ nuu̱ꞌ a̱ ña̱ ku̱i̱ꞌnu̱ ni̱a̱ toto̱ va̱ꞌa̱ va̱ ndii,
toto̱ nde̱iꞌ ku̱i̱ti̱ꞌ ku̱i̱ꞌnu̱ ni̱a̱,
te̱ nuu̱ꞌ a̱ ña̱ nda̱tu̱nꞌ ko̱o̱ ni̱a̱ ndii,
ña̱ kaꞌanꞌ nuu̱ꞌ ku̱i̱ti̱ꞌ ku̱ndo̱ꞌo̱ ni̱a̱.
25 Te̱ yivi̱ꞌ,
te̱ ndieeꞌ ñu̱u̱ ni̱a̱ ndii,
ndi̱ꞌi̱ ndo̱o̱ ra̱ ka̱ꞌni̱ꞌ te̱ yivi̱ꞌ xiinꞌ ityi̱ te̱ xíinꞌ ni̱a̱,
te̱ kundieni ni̱a̱ ndii,
ku̱vi̱ ndo̱o̱ ra̱ kii̱ꞌ kuꞌu̱n ti̱i̱n ra̱ ñuꞌu̱.
26 Te̱ sa̱kuuꞌ ne̱ ndieeꞌ ñu̱u̱ ja̱a̱nꞌ ku̱a̱ku̱,
te̱ ku̱su̱tyiꞌ va̱ tu̱ i̱ni̱ ni̱a̱,
te̱ ñu̱u̱ ni̱a̱ ndii,
ku̱ndo̱ꞌo̱ a̱ nde̱e̱ naa i̱i̱n ña̱ꞌaꞌ ñaꞌ ni̱ ku̱kuaa̱nꞌ,
te̱ ndoo̱ aꞌ ka̱nduꞌu̱ꞌ a̱ ñu̱ꞌuꞌ xa̱tyiꞌ.