Yoꞌoꞌ kaꞌán Isaías ña̱ mi̱iꞌ Yahvé ka̱ꞌndi̱a̱ tyuunꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ
2
Ña̱ yo̱ꞌo̱ꞌ nduuꞌ ña̱ ni̱ niaꞌa̱ Ndiosí nuu̱ꞌ Isaías,
siꞌe̱ Amoz,
kii̱ꞌ ni̱ sa̱tuví a̱ nuu̱ꞌ ra̱ ña̱ kaꞌán a̱ xaꞌa̱ꞌ ne̱ vi̱ꞌe̱ Judá xiinꞌ xaꞌa̱ꞌ ñu̱u̱ Jerusalén.
2 Naá kivi̱ꞌ ndii,
i̱kuꞌ miiꞌ iinꞌ yu̱kunꞌ kaꞌnuꞌ Ndiosí e̱ꞌ ndii,
ña̱ ja̱a̱nꞌ ku̱ndu̱u̱ ña̱ kaꞌnuꞌ ka̱ i̱i̱n kaniiꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ i̱kuꞌ ja̱a̱nꞌ ku̱ndu̱u̱ ña̱ kuuꞌ nu̱uꞌ nuu̱ꞌ sa̱kuuꞌ i̱nga̱ i̱kuꞌ miiꞌ ka̱ itaꞌ a̱ nuu̱ꞌ ñu̱ꞌuꞌ i̱i̱n yivi̱ꞌ.
Te̱ i̱kanꞌ ki̱xi̱n sa̱kuuꞌ ne̱ yivi̱ꞌ miiꞌ ka̱ ndieeꞌ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ sa̱kaꞌnuꞌ ni̱a̱ Ndiosí.
3 Te̱ nuu̱ꞌ kiꞌinꞌ ñu̱ꞌuꞌ ki̱e̱e̱ ne̱ yivi̱ꞌ te̱ ki̱xi̱n ni̱a̱,
te̱ kaꞌa̱n xiinꞌ taꞌanꞌ ni̱a̱ ndii:
“Ni̱a̱ꞌa̱ ndo̱ꞌ te̱ ka̱a̱ e̱ꞌ xíniꞌ i̱kuꞌ miiꞌ iinꞌ vi̱ꞌe̱ Yahvé,
ña̱ nduuꞌ Ndiosí ña̱ xakaꞌnuꞌ ne̱ vi̱ꞌe̱ Jacob,
te̱ sa̱niaꞌá a̱ yooꞌ i̱tyiꞌ a̱,
te̱ sa̱a̱ e̱ꞌ ña̱ kuní a̱”,
katyi̱ ni̱a̱.
Sa̱kanꞌ ña̱ xíniꞌ i̱kuꞌ Sión ja̱a̱nꞌ ta̱xi̱ Ndiosí tu̱ꞌu̱n nde̱iꞌ a̱ nda̱ꞌaꞌ e̱ꞌ,
te̱ ñu̱u̱ Jerusalén ki̱e̱e̱ tu̱ꞌu̱n va̱ꞌa̱ xaꞌa̱ꞌ Yahvé ja̱a̱nꞌ,
te̱ kiku̱ a̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
4 Mi̱iꞌ Ndiosí ku̱ndu̱u̱ ña̱ kaꞌnu̱ nda̱ku ku̱a̱tyi̱ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ su̱vi̱ tu̱ a̱ sakuni̱a̱ni̱ sa̱kuuꞌ nuu̱ꞌ tu̱n kuiꞌe̱ ña̱ yoo te̱i̱n ne̱ yivi̱ꞌ i̱i̱n yivi̱ꞌ.
Te̱ ityi̱ ni̱a̱ ndii,
yata̱ꞌ ña̱ taꞌviꞌ ni̱a̱ ñu̱ꞌuꞌ ku̱i̱ti̱ꞌ na̱ndu̱u̱ a̱ sa̱a̱ ni̱a̱,
te̱ kuxi̱ ni̱a̱ ndii,
ityi̱ ki̱ꞌiꞌ ku̱i̱ti̱ꞌ nda̱sa̱ nduuꞌ ni̱a̱ nu̱ꞌ.
Te̱ köo̱ꞌ kivi̱ꞌ ku̱ntaꞌanꞌ ka̱ nde̱e̱ i̱i̱n ti̱ꞌvi̱ ne̱ yivi̱ꞌ,
ne̱ ndieeꞌ i̱i̱n ñu̱ꞌuꞌ xiinꞌ i̱nga̱ ka̱ ti̱ꞌvi̱ ne̱ yivi̱ꞌ,
ne̱ ndieeꞌ nuu̱ꞌ i̱nga̱ ñu̱ꞌuꞌ,
ni̱ nde̱e̱ kuäsa̱ꞌ ka̱ tu̱ sa̱niaꞌá taꞌanꞌ te̱ yivi̱ꞌ i̱i̱n yivi̱ꞌ sa̱a̱ ku̱ntaꞌanꞌ ra̱,
sa̱kanꞌ ña̱ ku̱ndi̱e̱e̱ mani̱ꞌ sa̱kuuꞌ ne̱ yivi̱ꞌ sa̱a̱ Ndiosí.
5 Ni̱a̱ꞌa̱ ndoꞌó,
ne̱ vi̱ꞌe̱ Jacob,
ne̱ taꞌanꞌ i̱,
te̱ sa̱a̱ e̱ꞌ ña̱ kuní Yahvé,
te̱ ku̱ndu̱u̱ a̱ nuu̱ꞌ e̱ꞌ nde̱e̱ naa ñuꞌu̱ ña̱ niaꞌá yooꞌ sa̱a̱ ka̱ka̱ e̱ꞌ i̱i̱n yivi̱ꞌ.
Yoꞌoꞌ kaꞌán a̱ ña̱ sa̱ndoꞌoꞌ Ndiosí ne̱ ñuñuꞌ
6 Tákuiꞌe,
ña̱ ndi̱xa̱ xna̱ꞌa̱ nduuꞌ a̱ ndii,
xa̱ ni̱ na̱ko̱o̱ u̱nꞌ nduꞌu̱,
ne̱ nduuꞌ kuenta u̱nꞌ,
ne̱ vi̱ꞌe̱ Jacob,
sa̱kanꞌ ña̱ xa̱ ni̱ sa̱kutuꞌ ni̱a̱ nuu̱ꞌ ñu̱ꞌuꞌ ndu̱ xiinꞌ ña̱ xaaꞌ ne̱ ndieeꞌ xaꞌa̱ꞌ i̱i̱n yivi̱ꞌ miiꞌ ku̱a̱xi̱ ke̱ta̱ ñu̱ꞌu̱,
te̱ sa̱kanꞌ tu̱ ni̱ sa̱kutuꞌ ni̱a̱ a̱ xiinꞌ te̱ tuviꞌ i̱ni̱ nde̱e̱ naa xaaꞌ ne̱ vi̱ꞌe̱ filisteo,
te̱ taxiꞌ ni̱a̱ kuento ni̱a̱ nuu̱ꞌ ne̱ tukuꞌ ña̱ satyuunꞌ ingaꞌ ni̱a̱ xiinꞌ ne̱ ja̱a̱nꞌ.
7 Nuu̱ꞌ ñu̱ꞌuꞌ ndu̱,
ne̱ Israel ndii,
tyituꞌ vi̱ꞌ a̱ yoo plata xiinꞌ oro,
te̱ yoo kuaꞌa̱ꞌ xa̱va̱ꞌa̱ tu̱ ña̱ vikaꞌ nuu̱ꞌ ñu̱ꞌuꞌ ndu̱ yoꞌoꞌ.
Sa̱kanꞌ tu̱ yoo kuaꞌa̱ꞌ xa̱va̱ꞌa̱ kuei nuu̱ꞌ ñu̱ꞌuꞌ ndu̱,
tiꞌ yoso̱ꞌ te̱ yivi̱ꞌ kii̱ꞌ kuaꞌa̱n ti̱i̱n ra̱ ñuꞌu̱,
te̱ yoo kuaꞌa̱ꞌ xa̱va̱ꞌa̱ tu̱ carreta xaaꞌ ndu̱.
8 Ndisu̱ sa̱kanꞌ tu̱ tyituꞌ vi̱ꞌ tu̱ ñu̱u̱ ndu̱ xiinꞌ ndiosí saka,
te̱ sa̱kuuꞌ ne̱ ñu̱u̱ ndu̱ ndii,
ndiosí saka ña̱ ni̱ xa̱ꞌa̱ mi̱iꞌ ni̱a̱ xiinꞌ nda̱ꞌaꞌ ni̱a̱ ja̱a̱nꞌ xakaꞌnuꞌ ni̱a̱.
9 Te̱ sa̱kuuꞌ ne̱ yivi̱ꞌ ja̱a̱nꞌ vi̱ti̱n ndii,
sakaꞌanꞌ xiinꞌ miiꞌ mi̱iꞌ ni̱a̱,
xaꞌa̱ꞌ a̱ ja̱a̱nꞌ na kuiiꞌ kö̱o̱ꞌ kaꞌnuꞌ i̱ni̱ u̱nꞌ xaꞌa̱ꞌ ni̱a̱.
10 Sa̱kuuꞌ ndoꞌó,
ne̱ yivi̱ꞌ ndii,
ko̱ꞌni̱ kiꞌi̱ꞌ ndo̱ꞌ ti̱xi̱n yavi̱ ka̱va̱ꞌ xiinꞌ ti̱xi̱n yavi̱ ñu̱ꞌuꞌ te̱ ti̱si̱ꞌe ndo̱ꞌ xaꞌa̱ꞌ a̱ ña̱ yiꞌvi ndo̱ꞌ ña̱ i̱yo̱ va̱ kaaꞌ nuu̱ꞌ Yahvé ki̱xi̱n a̱,
xiinꞌ xaꞌa̱ꞌ a̱ ña̱ nda̱tu̱nꞌ va̱ yiꞌé a̱ kii̱ꞌ ki̱xi̱n a̱,
te̱ ki̱si̱ a̱ ñu̱ꞌuꞌ i̱i̱n yivi̱ꞌ.
11 Kii̱ꞌ sa̱kanꞌ ndii,
ku̱ka̱ꞌa̱n va̱ nuu̱ꞌ ne̱ ñuñuꞌ,
te̱ ne̱ kaniꞌiꞌ xiinꞌ miiꞌ ndii,
sa̱nuuꞌ xiinꞌ miiꞌ ni̱a̱,
te̱ ndee nuu̱ꞌ i̱i̱n nda̱a̱ꞌ mi̱iꞌ Yahvé ku̱i̱ti̱ꞌ sa̱kaꞌnuꞌ ne̱ yivi̱ꞌ.
12 Sa̱kanꞌ ña̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ ndii,
xa̱ ni̱ tyi̱tuní a̱ i̱i̱n kivi̱ꞌ ña̱ ka̱tunꞌ a̱ sa̱kuuꞌ ne̱ yivi̱ꞌ,
te̱ sa̱ndoꞌoꞌ a̱ ne̱ ñuñuꞌ xiinꞌ ne̱ kaniꞌiꞌ xiinꞌ miiꞌ,
te̱ sa̱ndi̱e̱e̱ kuiꞌe tu̱ a̱ sa̱kuuꞌ ne̱ xatyié xiinꞌ miiꞌ.
13 Te̱ sa̱kanꞌ tu̱ sa̱a̱ a̱ xiinꞌ sa̱kuuꞌ ne̱ kooꞌ tyukuuꞌ,
ne̱ tuu ña̱ nduuꞌ ni̱a̱ nde̱e̱ naa i̱tunꞌ cedro,
tunꞌ sukun va̱,
te̱ naꞌnuꞌ tu̱ nu̱ꞌ,
tunꞌ itaꞌ xiki̱ꞌ Líbano,
uun ne̱ kaꞌnuꞌ,
ne̱ tuu ña̱ nduuꞌ ni̱a̱ nde̱e̱ naa ta̱ntaꞌ naꞌnuꞌ va̱,
tunꞌ itaꞌ xíniꞌ i̱kuꞌ Basán.
14 Te̱ sa̱nduva tu̱ a̱ sa̱kuuꞌ ne̱ ñuñuꞌ,
ne̱ tuu ña̱ nduuꞌ ni̱a̱ nde̱e̱ naa i̱kuꞌ sukun uun xiki̱ꞌ naꞌnuꞌ va̱.
15 Te̱ sa̱kaꞌanꞌ tu̱ a̱ sa̱kuuꞌ ne̱ yivi̱ꞌ ne̱ i̱ni̱ xini vi̱ꞌe̱ sukun xiinꞌ sa̱kuuꞌ nama̱ ña̱ ndasi i̱ꞌnu̱ kutu̱ꞌ ka̱niiꞌ ñu̱u̱ ni̱a̱.
16 Te̱ sa̱kanꞌ tu̱ sa̱a̱ a̱ xiinꞌ sa̱kuuꞌ tunꞌ ndo̱oꞌ naꞌnuꞌ miiꞌ ñuꞌuꞌ te̱ xiko̱ꞌ ña̱ꞌa̱ xiinꞌ sa̱kuuꞌ tunꞌ ndo̱oꞌ tunꞌ nda̱tu̱nꞌ va̱,
tunꞌ ndisoꞌ ña̱ ndiaa yaꞌviꞌ va̱ ña̱ kumiꞌ ra̱.
17 Te̱ ñuñuꞌ xiinꞌ te̱ kaniꞌiꞌ xiinꞌ miiꞌ ndii,
sa̱kaꞌanꞌ xa̱tyiꞌ ña̱ꞌaꞌ Ndiosí,
te̱ ndee nuu̱ꞌ i̱i̱n nda̱a̱ꞌ mi̱iꞌ ku̱i̱ti̱ꞌ Yahvé sa̱kaꞌnuꞌ ne̱ yivi̱ꞌ kivi̱ꞌ ja̱a̱nꞌ.
18 Te̱ sa̱ndiꞌiꞌ xa̱tyiꞌ tu̱ a̱ ña̱ nduuꞌ ndiosí saka nuu̱ꞌ ñu̱ꞌuꞌ i̱i̱n yivi̱ꞌ kii̱ꞌ sa̱kanꞌ.
19 Kii̱ꞌ ki̱xi̱n Yahvé,
te̱ ki̱si̱ a̱ ñu̱ꞌuꞌ i̱i̱n yivi̱ꞌ ndii,
sa̱kuuꞌ ne̱ yivi̱ꞌ ko̱ꞌni̱ ti̱xi̱n yavi̱ ka̱va̱ꞌ xiinꞌ yavi̱ ti̱xi̱n ñu̱ꞌuꞌ ña̱ ti̱si̱ꞌe ni̱a̱ xaꞌa̱ꞌ a̱ ña̱ yiꞌvi ni̱a̱ ña̱ i̱yo̱ va̱ kaaꞌ nuu̱ꞌ Yahvé ku̱a̱xi̱ a̱ xiinꞌ xaꞌa̱ꞌ a̱ ña̱ nda̱tu̱nꞌ va̱ yiꞌé a̱ ña̱ ku̱a̱xi̱ a̱ te̱ sa̱ndoꞌoꞌ a̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
20 Kii̱ꞌ xaa̱ kivi̱ꞌ ña̱ i̱yo̱ va̱ ku̱ndo̱ꞌo̱ ne̱ yivi̱ꞌ ja̱a̱nꞌ ndii,
na̱ko̱o̱ ni̱a̱ sa̱kuuꞌ ndiosí saka ña̱ xakaꞌnuꞌ ni̱a̱,
ña̱ ni̱ ku̱a̱ꞌa̱ xiinꞌ mi̱iꞌ ndiꞌiꞌ oro xiinꞌ plata,
ña̱ ni̱ xa̱ꞌa̱ mi̱iꞌ ni̱a̱ te̱ sa̱kaꞌnuꞌ ña̱ꞌaꞌ ni̱a̱.
Na̱ko̱o̱ ni̱a̱ ña̱ ja̱a̱nꞌ ti̱xi̱n ñu̱ꞌuꞌ te̱ ndee ti̱u̱ꞌuꞌ xiinꞌ tiuu̱nꞌ mba̱ꞌndiaꞌ ku̱i̱ti̱ꞌ ku̱ni̱ ñuꞌuꞌ a̱.
21 Te̱ kii̱ꞌ xinuꞌ ni̱a̱ te̱ koꞌniꞌ ni̱a̱ ti̱xi̱n ka̱va̱ꞌ,
te̱ ti̱si̱ꞌe tu̱ ni̱a̱ yu̱ꞌuꞌ ta̱ꞌviꞌ ti̱xi̱n ka̱va̱ꞌ ndii,
sa̱a̱ ni̱a̱ ña̱ nduxa̱ꞌ te̱ ku̱nu̱ ni̱a̱ nuu̱ꞌ ña̱ i̱yo̱ va̱ ña̱ sa̱ndoꞌoꞌ ña̱ꞌaꞌ Ndiosí xiinꞌ nuu̱ꞌ ña̱ nda̱tu̱nꞌ va̱ yiꞌé a̱ kii̱ꞌ ki̱xi̱n a̱ te̱ ki̱si̱ a̱ ka̱niiꞌ ñu̱ꞌuꞌ i̱i̱n yivi̱ꞌ.
22 Xaꞌa̱ꞌ a̱ ja̱a̱nꞌ na kuiiꞌ ï̱ni̱ ka̱ ndo̱ꞌ ku̱ni̱ ndo̱ꞌ ne̱ yivi̱ꞌ,
sa̱kanꞌ ña̱ köo̱ꞌ nduuꞌ xa̱tyiꞌ ni̱a̱,
te̱ xaꞌa̱ꞌ a̱ ña̱ ku̱vi̱ naꞌiꞌ tatyi̱ꞌ ku̱i̱ti̱ꞌ ni̱a̱ na tiaku ni̱a̱.