Yoꞌoꞌ kaꞌán a̱ ña̱ kuní a̱ sa̱kaꞌnuꞌ yooꞌ, ne̱ vi̱ꞌe̱ Israel, Yahvé
Kaꞌnuꞌ va̱ ña̱ nduuꞌ Ndiosí.
149
¡Kaꞌnuꞌ va̱ ña̱ nduuꞌ Yahvé!
Ka̱ta̱ ndo̱ꞌ ya̱a̱ xa̱aꞌ nuu̱ꞌ a̱,
sa̱kaꞌnuꞌ ña̱ꞌaꞌ sa̱kuuꞌ ndo̱ꞌ miiꞌ nakayá ndoꞌó,
ne̱ nduuꞌ kuenta a̱.
2 Yooꞌ,
ne̱ vi̱ꞌe̱ Israel,
na na̱ku̱a̱tiaꞌ e̱ꞌ ku̱ni̱ e̱ꞌ Ndiosí ña̱ ni̱ xa̱ꞌa̱ yooꞌ.
Yooꞌ,
ne̱ ndieeꞌ ñu̱u̱ Jerusalén,
na sii̱ꞌ ku̱ni̱ e̱ꞌ xaꞌa̱ꞌ Rey ña̱ xaꞌndia tyuunꞌ nuu̱ꞌ e̱ꞌ.
3 Sa̱kaꞌnuꞌ ndo̱ꞌ kivi̱ꞌ a̱ taxaꞌaꞌ ndo̱ꞌ nuu̱ꞌ a̱,
ka̱ta̱ ndo̱ꞌ nuu̱ꞌ a̱,
te̱ sa̱ndaaꞌ ndo̱ꞌ ñuu̱ꞌ arpa,
te̱ ki̱si̱ tu̱ ndo̱ꞌ ti̱ko̱ko̱.
4 Sa̱kanꞌ ña̱ va̱ꞌa̱ va̱ kuni Yahvé xini a̱ ne̱ nduuꞌ kuenta a̱,
ne̱ maso nimá,
te̱ sakakú ña̱ꞌaꞌ a̱.
5 Na va̱ꞌa̱ ku̱ni̱ sa̱kuuꞌ ne̱ nduuꞌ kuenta Ndiosí xaꞌa̱ꞌ a̱ ña̱ nda̱tu̱nꞌ a̱,
te̱ na ka̱ta̱ sii̱ꞌ ni̱a̱ ya̱a̱ nuu̱ꞌ a̱ nde̱e̱ nuu̱ꞌ tunxto̱ miiꞌ ndieeꞌ ni̱a̱ kixín ni̱a̱.
6 Na sa̱kaꞌnuꞌ ni̱a̱ Ndiosí ka̱ta̱ tiꞌeꞌ ni̱a̱ ya̱a̱ nuu̱ꞌ a̱,
te̱ na ko̱ni̱ꞌi̱ ni̱a̱ ityi̱ ña̱ xíinꞌ uvi̱ sa̱aꞌ ta̱ꞌviꞌ.
7 Sa̱kanꞌ te̱ ka̱ꞌni̱ꞌ ni̱a̱ sa̱kuuꞌ ne̱ tukuꞌ,
te̱ sa̱ndoꞌoꞌ ni̱a̱ sa̱kuuꞌ ne̱ yivi̱ꞌ.
8 Sa̱kanꞌ te̱ sa̱tiín ni̱a̱ sa̱kuuꞌ rey xiinꞌ ka̱a̱ tivi̱,
te̱ te̱ kuuꞌ nu̱uꞌ kooꞌ tyukuuꞌ sa̱tiín ni̱a̱ xiinꞌ karena ña̱ nduuꞌ ka̱a̱ tiꞌeꞌ va̱.
9 Sa̱kanꞌ te̱ xiinꞌ ña̱ ku̱ndo̱ꞌo̱ te̱ ja̱a̱nꞌ xinu̱ ña̱ xa̱ ni̱ kaꞌa̱n Ndiosí sa̱a̱ a̱ xiinꞌ ra̱,
sa̱a̱ niiꞌ yoso̱ꞌ a̱ nuu̱ꞌ tu̱tu̱ a̱.
Te̱ va̱ꞌa̱ va̱ ku̱ni̱ sa̱kuuꞌ ne̱ nduuꞌ kuenta Ndiosí xaꞌa̱ꞌ ña̱ ku̱ndo̱ꞌo̱ sa̱kuuꞌ te̱ ja̱a̱nꞌ.
¡Kaꞌnuꞌ va̱ ña̱ nduuꞌ Ndiosí!