Kaniꞌ kuento Yahvé sa̱kuuꞌ ña̱ ni̱ xa̱ꞌa̱ a̱, sa̱kanꞌ te̱ sa̱kaꞌnuꞌ ña̱ꞌaꞌ ña̱ ja̱a̱nꞌ
¡Kaꞌnuꞌ va̱ ña̱ nduuꞌ Yahvé!
148
Sa̱kuuꞌ ndoꞌó,
ña̱ ndieeꞌ ndi̱viꞌ,
sa̱kaꞌnuꞌ ndo̱ꞌ Yahvé nde̱e̱ miiꞌ nduꞌu̱ꞌ a̱ ndi̱viꞌ.
Sa̱kaꞌnuꞌ ña̱ꞌaꞌ ndo̱ꞌ nde̱e̱ miiꞌ sukun va̱ miiꞌ nduꞌu̱ꞌ a̱.
2 Sa̱kaꞌnuꞌ ña̱ꞌaꞌ sa̱kuuꞌ ndoꞌó,
ángele,
ña̱ xikaꞌ nuuꞌ nuu̱ꞌ a̱.
Na sa̱kaꞌnuꞌ tu̱ ña̱ꞌaꞌ sa̱kuuꞌ ndoꞌó,
ña̱ ndieeꞌ ndi̱viꞌ.
3 Na sa̱kaꞌnuꞌ ña̱ꞌaꞌ yoꞌó,
ñu̱ꞌu̱,
xiinꞌ yoꞌó,
yoo̱ꞌ.
Na sa̱kaꞌnuꞌ ña̱ꞌaꞌ sa̱kuuꞌ ndoꞌó,
tiuu̱nꞌ naꞌnuꞌ,
ña̱ yiꞌé nda̱tu̱nꞌ xa̱va̱ꞌa̱ ndieeꞌ ndi̱viꞌ.
4 Na sa̱kaꞌnuꞌ ña̱ꞌaꞌ yoꞌó,
ndi̱viꞌ,
ña̱ kanduꞌu̱ꞌ miiꞌ sukun ka̱.
Te̱ na sa̱kaꞌnuꞌ tu̱ ña̱ꞌaꞌ ndoꞌó,
ti̱kui,
teꞌ yoo nuu̱ꞌ ndi̱viꞌ.
5 Sa̱kuuꞌ ña̱ ja̱a̱nꞌ na sa̱kaꞌnuꞌ kivi̱ꞌ Yahvé,
sa̱kanꞌ ña̱ ña̱ ja̱a̱nꞌ ni̱ kaꞌa̱n tyuunꞌ,
te̱ ni̱ xi̱koo̱ sa̱kuuꞌ ña̱ꞌa̱ ña̱ yoo.
6 Ña̱ ja̱a̱nꞌ ni̱ xa̱ꞌa̱ sa̱kuuꞌ ña̱ꞌa̱ ja̱a̱nꞌ,
te̱ yoo a̱ nde̱e̱ ndiꞌiꞌ ni̱ kivi̱ꞌ,
te̱ ni̱ tyi̱ka̱nduꞌu̱ꞌ tu̱ a̱ i̱i̱n nde̱iꞌ ña̱ kaꞌán sa̱a̱ ku̱ndi̱e̱e̱ ña̱ ja̱a̱nꞌ,
te̱ kö̱o̱ kivi̱ꞌ nama̱ nde̱iꞌ ja̱a̱nꞌ.
7 Na sa̱kaꞌnuꞌ sa̱kuuꞌ ndoꞌó,
ña̱ yoo nuu̱ꞌ ñu̱ꞌuꞌ i̱i̱n yivi̱ꞌ,
Yahvé,
ndoꞌó,
tiꞌ i̱yo̱ va̱ iinꞌ ñuꞌuꞌ mi̱ni̱.
Te̱ na sa̱kaꞌnuꞌ tu̱ ña̱ꞌaꞌ yoꞌó,
mi̱ni̱ miiꞌ kunu xa̱va̱ꞌa̱.
8 Na sa̱kaꞌnuꞌ tu̱ ña̱ꞌaꞌ ndoꞌó,
ñuꞌu̱ savi̱ꞌ,
xiinꞌ iꞌinꞌ,
xiinꞌ ka̱xi̱n,
xiinꞌ viko̱ꞌ nu̱ꞌuꞌ.
Te̱ na sa̱kaꞌnuꞌ tu̱ ña̱ꞌaꞌ tatyi̱ꞌ ndi̱e̱eꞌ ña̱ saxinú ña̱ kaꞌán tyuunꞌ a̱.
9 Na sa̱kaꞌnuꞌ tu̱ ña̱ꞌaꞌ sa̱kuuꞌ i̱kuꞌ xiinꞌ sa̱kuuꞌ i̱tu̱n.
Na sa̱kaꞌnuꞌ tu̱ ña̱ꞌaꞌ sa̱kuuꞌ nuu̱ꞌ i̱tunꞌ,
tunꞌ kuunꞌ nduu̱ꞌ vixi̱ nda̱ꞌaꞌ,
xiinꞌ sa̱kuuꞌ nuu̱ꞌ i̱tunꞌ cedro.
10 Na sa̱kaꞌnuꞌ tu̱ ña̱ꞌaꞌ sa̱kuuꞌ nuu̱ꞌ ki̱tiꞌ i̱kuꞌ xiinꞌ sa̱kuuꞌ nuu̱ꞌ ki̱tiꞌ,
tiꞌ yoo vi̱ꞌe̱.
Te̱ na sa̱kaꞌnuꞌ tu̱ ña̱ꞌaꞌ sa̱kuuꞌ nuu̱ꞌ sa̱a̱ xiinꞌ sa̱kuuꞌ nuu̱ꞌ ki̱tiꞌ,
tiꞌ kañuuꞌ ti̱xi̱n.
11 Na sa̱kaꞌnuꞌ tu̱ ña̱ꞌaꞌ sa̱kuuꞌ te̱ nduuꞌ rey,
te̱ yoo nuu̱ꞌ ñu̱ꞌuꞌ i̱i̱n yivi̱ꞌ,
xiinꞌ sa̱kuuꞌ ne̱ yivi̱ꞌ.
Te̱ na sa̱kaꞌnuꞌ tu̱ ña̱ꞌaꞌ sa̱kuuꞌ te̱ kuuꞌ nu̱uꞌ xiinꞌ sa̱kuuꞌ te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ.
12 Na sa̱kaꞌnuꞌ tu̱ ña̱ꞌaꞌ sa̱kuuꞌ te̱ sa̱va̱ xiinꞌ sa̱kuuꞌ ña̱ꞌaꞌ sa̱va̱.
Te̱ na sa̱kaꞌnuꞌ tu̱ ña̱ꞌaꞌ sa̱kuuꞌ te̱ xi̱xa̱ xiinꞌ sa̱kuuꞌ ne̱ kuatyi̱ꞌ kualiꞌ.
13 Sa̱kaꞌnuꞌ sa̱kuuꞌ ndo̱ꞌ kivi̱ꞌ Yahvé,
sa̱kanꞌ ña̱ i̱i̱n nda̱a̱ꞌ kivi̱ꞌ ña̱ ja̱a̱nꞌ ku̱i̱ti̱ꞌ nduuꞌ ña̱ kaꞌnuꞌ xa̱va̱ꞌa̱ ka̱.
Te̱ ña̱ kaꞌnuꞌ a̱ ndii,
yoo a̱ i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ xiinꞌ ka̱niiꞌ ndi̱viꞌ.
14 Ni̱ ta̱xi̱ a̱ ndi̱e̱e̱ꞌ ne̱ nduuꞌ kuenta a̱,
te̱ ka̱ꞌndi̱a̱ tyuunꞌ ni̱a̱.
Na sa̱kaꞌnuꞌ ña̱ꞌaꞌ sa̱kuuꞌ yooꞌ,
ne̱ vi̱ꞌe̱ Israel,
ne̱ nduuꞌ kuenta a̱,
ne̱ nduuꞌ kuenta a̱,
ne̱ yoo ya̱ti̱n nuu̱ꞌ a̱ i̱ꞌi̱n kivi̱ꞌ kuaꞌa̱n.
¡Kaꞌnuꞌ va̱ ña̱ nduuꞌ Ndiosí!