Yoꞌoꞌ kaꞌán a̱ ña̱ kuní a̱ sa̱kaꞌnuꞌ e̱ Ndiosí xaꞌa̱ꞌ ña̱ va̱ꞌa̱ ña̱ xaaꞌ a̱ xaꞌa̱ꞌ ne̱ ndieeꞌ ñu̱u̱ Jerusalén
147
¡Kaꞌnuꞌ va̱ ña̱ nduuꞌ Yahvé!
Sa̱kanꞌ ña̱ va̱ꞌa̱ va̱ yoo a̱ ña̱ ka̱ta̱ e̱ꞌ kiꞌinꞌ ya̱a̱ nuu̱ꞌ Yahvé ña̱ xakaꞌnuꞌ e̱ꞌ.
Nuu̱ꞌ ña̱ ja̱a̱nꞌ kuní a̱ ka̱ta̱ e̱ꞌ ya̱a̱ nda̱tu̱nꞌ kuaꞌa̱n.
2 Yahvé ndii,
nakasaꞌa xa̱aꞌ tukuuꞌ a̱ ñu̱u̱ Jerusalén,
te̱ ñu̱u̱ ja̱a̱nꞌ nda̱sa̱ i̱i̱n ndo̱o̱ tu̱ku̱u̱ a̱ sa̱kuuꞌ ne̱ vi̱ꞌe̱ Israel,
ne̱ ni̱ kiku̱ kuaꞌa̱n tu̱ku̱ xaanꞌ.
3 Sandaꞌa a̱ ne̱ kuꞌví nimá,
te̱ satatanꞌ a̱ miiꞌ ni̱ tu̱xuꞌví ni̱a̱.
4 Kaꞌviꞌ a̱ i̱ꞌi̱n tiuu̱nꞌ ndieeꞌ ndi̱viꞌ,
te̱ kaꞌán a̱ kivi̱ꞌ i̱ꞌi̱n riꞌ kuaꞌa̱n.
5 Kaꞌnuꞌ va̱ ña̱ nduuꞌ Ndiosí e̱ꞌ,
te̱ ña̱ ndi̱e̱eꞌ kooꞌ tyukuuꞌ nduuꞌ a̱,
te̱ kö̱o̱ kivi̱ꞌ ndiꞌiꞌ ña̱ xini tuní a̱.
6 Yahvé ndii,
tyindieeꞌ a̱ ne̱ maso nimá,
ndisu̱ sakaꞌanꞌ xa̱va̱ꞌa̱ a̱ sa̱kuuꞌ ne̱ xaaꞌ ña̱ ni̱a̱ꞌa.
7 Na ka̱ta̱ e̱ꞌ ya̱a̱ nuu̱ꞌ Yahvé,
na sa̱ndaaꞌ e̱ꞌ ñuu̱ꞌ arpa,
te̱ ka̱ta̱ e̱ꞌ ya̱a̱ nuu̱ꞌ Ndiosí e̱ꞌ.
8 Ña̱ ja̱a̱nꞌ nduuꞌ ña̱ ndakin viko̱ꞌ ndi̱viꞌ,
te̱ sakooꞌ tu̱ꞌva̱ tu̱ a̱ savi̱ꞌ,
te̱ koso̱ a̱ ñu̱ꞌuꞌ,
su̱vi̱ a̱ xaaꞌ sa̱kanꞌ te̱ nakún kuꞌu̱ xiki̱ꞌ tiꞌeꞌ.
9 Taxiꞌ a̱ ña̱ xaxi̱ꞌ sa̱kuuꞌ nuu̱ꞌ ki̱tiꞌ,
te̱ kii̱ꞌ kuaaꞌ tiꞌeꞌ sa̱a̱ kualiꞌ siꞌe̱ ti̱ka̱kaꞌ ndii,
taxiꞌ tu̱ a̱ ña̱ xaxi̱ꞌ tiꞌ ja̱a̱nꞌ.
10 Ndiosí ndii,
xtäni̱ a̱ kuuꞌ kuei,
tiꞌ ndi̱e̱eꞌ xa̱va̱ꞌa̱,
ni̱ nde̱e̱ xtäni̱ tu̱ a̱ kuuꞌ te̱ yivi̱ꞌ,
te̱ ndi̱e̱eꞌ xa̱va̱ꞌa̱.
11 Süu̱ꞌ ja̱a̱nꞌ ndii,
xtani̱ a̱ kuuꞌ ne̱ xitoꞌ kaꞌnuꞌ ña̱ꞌaꞌ,
ne̱ ndiatuꞌ ña̱ ku̱vi̱ta i̱ni̱ a̱ xaꞌa̱ꞌ ni̱a̱.
12 Ndoꞌó,
ne̱ ndieeꞌ ñu̱u̱ Jerusalén,
sa̱kaꞌnuꞌ ndo̱ꞌ Yahvé.
Sa̱kaꞌnuꞌ ndoꞌó,
ne̱ ndieeꞌ ñu̱u̱ Sión,
Ndiosí ndo̱ꞌ.
13 Sa̱kanꞌ ña̱ ña̱ ja̱a̱nꞌ ni̱ sa̱kutu̱ꞌ vitu̱ꞌ yiꞌeꞌ ñu̱u̱ ndo̱ꞌ,
te̱ sañuꞌuꞌ a̱ sa̱kuuꞌ ndoꞌó,
ne̱ ndieeꞌ ti̱xi̱n nama̱ ñu̱u̱.
14 Ña̱ ja̱a̱nꞌ xaaꞌ sa̱kanꞌ te̱ yoo ña̱ mani̱ꞌ ka̱niiꞌ nuu̱ꞌ ñu̱ꞌuꞌ ndo̱ꞌ,
te̱ taxiꞌ tu̱ a̱ kuaꞌa̱ꞌ ndi̱kinꞌ trigo xixiꞌ ndo̱ꞌ nde̱e̱ ndaꞌni ndo̱ꞌ.
15 Tiꞌviꞌ a̱ tu̱ꞌu̱n a̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ kiꞌi̱ꞌ xa̱va̱ꞌa̱ ndavaꞌ tu̱ꞌu̱n a̱ ja̱a̱nꞌ naxaá a̱ i̱i̱n yivi̱ꞌ.
16 Sakuunꞌ a̱ ka̱xi̱n i̱i̱n ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ nde̱e̱ ndasaꞌ ya̱a̱ katyi̱ꞌ vi̱ꞌ ña̱ꞌaꞌ a̱,
te̱ kiku̱ꞌ a̱ ka̱xi̱n ja̱a̱nꞌ nde̱e̱ naa yaa̱ꞌ nuꞌu̱.
17 Sakuunꞌ a̱ kuaꞌa̱ꞌ iꞌinꞌ nde̱e̱ naa yuu̱ꞌ kualiꞌ,
te̱ kö̱o̱ ku̱ndi̱e̱ni xa̱tyiꞌ ku̱ti̱a̱ku̱ nuu̱ꞌ ña̱ vi̱xi̱n xa̱va̱ꞌa̱ a̱,
sa̱kanꞌ ña̱ nde̱e̱ ti̱kui nduuꞌ tiꞌeꞌ xaaꞌ a̱.
18 Ndisu̱ tu̱ku̱ ni̱ kaꞌán tyuunꞌ Ndiosí,
te̱ ndutiaꞌ iꞌinꞌ ja̱a̱nꞌ,
sakakaꞌ a̱ tatyi̱ꞌ i̱ꞌniꞌ vixi̱n te̱ nakaá tu̱ku̱u̱ ti̱kui kuaꞌa̱n raꞌ.
19 Ni̱ sa̱tuví a̱ kuento a̱ nuu̱ꞌ yooꞌ,
ne̱ vi̱ꞌe̱ Jacob,
nuu̱ꞌ yooꞌ,
ne̱ vi̱ꞌe̱ Israel ja̱a̱nꞌ,
ni̱ sa̱tuví tu̱ a̱ tu̱ꞌu̱n nde̱iꞌ a̱ xiinꞌ ña̱ kaꞌán tyuunꞌ a̱.
20 Ndisu̱ nï̱ xaaꞌ a̱ sa̱kanꞌ xiinꞌ nde̱e̱ i̱i̱n ti̱ꞌvi̱ i̱nga̱ ne̱ yivi̱ꞌ,
te̱ kö̱o̱ kivi̱ꞌ ni̱ xi̱ni̱ nde̱e̱ i̱i̱n ti̱ꞌvi̱ ne̱ ja̱a̱nꞌ xaꞌa̱ꞌ ña̱ kaꞌán tyuunꞌ a̱.
Kaꞌnuꞌ va̱ ña̱ nduuꞌ Ndiosí.