Yoꞌoꞌ kaꞌán a̱ ña̱ kande̱iꞌ sa̱kaꞌnuꞌ e̱ꞌ Ndiosí xaꞌa̱ꞌ a̱ ña̱ ña̱ xatyuunꞌ nda̱ku nduuꞌ a̱
Kaꞌnuꞌ va̱ ña̱ nduuꞌ Ndiosí.
146
Xakaꞌnuꞌ i̱ Yahvé xiinꞌ i̱i̱n ka̱niiꞌ nimá i̱.
2 Sa̱kuuꞌ kivi̱ꞌ ña̱ xikaꞌ i̱ i̱i̱n yivi̱ꞌ sa̱kaꞌnuꞌ i̱ Yahvé,
ka̱ta̱ i̱ kiꞌinꞌ ya̱a̱ nuu̱ꞌ Ndiosí mi̱iꞌ i̱ ja̱a̱nꞌ vi̱ti̱n ña̱ tiaku i̱.
3 Ï̱ni̱ ndo̱ꞌ ku̱ni̱ ndo̱ꞌ ne̱ kaꞌnuꞌ,
ne̱ xaꞌndia tyuunꞌ,
ni̱ nde̱e̱ ï̱ni̱ tu̱ ndo̱ꞌ ku̱ni̱ ndo̱ꞌ nde̱e̱ i̱i̱n ne̱ yivi̱ꞌ i̱i̱n yivi̱ꞌ,
sa̱kanꞌ ña̱ kü̱vi̱ sa̱kakú ne̱ ja̱a̱nꞌ ndoꞌó.
4 Te̱ kii̱ꞌ xiꞌí ni̱a̱ ndii,
tu̱ku̱ ni̱ nanduuꞌ ni̱a̱ ñu̱ꞌuꞌ ña̱ ni̱ nduu̱ ni̱a̱ ña̱ nu̱uꞌ,
te̱ xa̱ kivi̱ꞌ ja̱a̱nꞌ tu̱ kuaꞌa̱n ndi̱koꞌ sa̱kuuꞌ ña̱ tyituní ni̱a̱ sa̱a̱ ni̱a̱.
5 Sa̱kuuꞌ ne̱ natiinꞌ ña̱ tyindieeꞌ Ndiosí,
ña̱ xakaꞌnuꞌ ne̱ vi̱ꞌe̱ Jacob ndii,
va̱ꞌa̱ va̱ kuni ni̱a̱,
te̱ i̱ni̱ ni̱a̱ xini ni̱a̱ Yahvé Ndiosí ña̱ xakaꞌnuꞌ ni̱a̱.
6 Ña̱ ja̱a̱nꞌ ni̱ xa̱ꞌa̱ ndi̱viꞌ,
te̱ ni̱ xa̱ꞌa̱ tu̱ a̱ ñu̱ꞌuꞌ i̱i̱n yivi̱ꞌ,
te̱ ni̱ xa̱ꞌa̱ tu̱ a̱ mi̱ni̱ kaꞌnuꞌ,
te̱ su̱vi̱ tu̱ a̱ ni̱ xa̱ꞌa̱ sa̱kuuꞌ ña̱ yoo nuu̱ꞌ sa̱kuuꞌ ña̱ ja̱a̱nꞌ.
Te̱ saxinú a̱ sa̱kuuꞌ ña̱ kaꞌán a̱ nde̱e̱ ndiꞌiꞌ ni̱ kivi̱ꞌ.
7 Xatyuunꞌ nda̱ku a̱ xaꞌa̱ꞌ sa̱kuuꞌ ne̱ ndoꞌoꞌ xaaꞌ ne̱ yivi̱ꞌ,
te̱ taxiꞌ a̱ ña̱ xaxi̱ꞌ ne̱ xiꞌí so̱ko̱.
Yahvé ndii,
sandoó ndiká a̱ ne̱ ñuꞌuꞌ vi̱ꞌe̱ ka̱a̱.
8 Te̱ nuniaꞌ a̱ ndu̱tyiꞌ nuu̱ꞌ ne̱ kuiꞌe nuu̱ꞌ,
te̱ tyindieeꞌ tu̱ a̱ ne̱ yoo tu̱ndoꞌo̱ꞌ nuu̱ꞌ,
te̱ ndani̱ a̱ ne̱ xatyuunꞌ nda̱ku.
9 Yahvé ndii,
xitoꞌ a̱ ne̱ ku̱a̱xi̱ tu̱ku̱ ñu̱ꞌuꞌ,
te̱ taxiꞌ a̱ ña̱ xaxi̱ꞌ ne̱ ndaꞌvi kö̱o̱ yu̱vaꞌ siꞌiꞌ xiinꞌ ña̱ꞌaꞌ kuaa̱nꞌ.
Ndisu̱ tä̱xi̱ a̱ sa̱xinú te̱ xaaꞌ ña̱ ni̱a̱ꞌa ña̱ kuni sa̱a̱ ra̱ xiinꞌ ni̱a̱.
10 Yahvé ndii,
nde̱e̱ ndiꞌiꞌ ni̱ kivi̱ꞌ xaꞌndia tyuunꞌ a̱.
Ñu̱u̱ Jerusalén kuaꞌa,
ña̱ ja̱a̱nꞌ nduuꞌ Ndiosí ña̱ xakaꞌnuꞌ u̱nꞌ nde̱e̱ ndiꞌiꞌ ni̱ kivi̱ꞌ.
¡Kaꞌnuꞌ va̱ ña̱ nduuꞌ Ndiosí!