Yoꞌoꞌ kaꞌán David ña̱ sa̱kuuꞌ ne̱ yivi̱ kande̱iꞌ sa̱kaꞌnuꞌ Ndiosí
Ya̱a̱ ña̱ ni̱ xi̱ta̱ David nuu̱ꞌ Ndiosí ña̱ xakaꞌnuꞌ ña̱ꞌaꞌ ra̱.
145
Sa̱kaꞌnuꞌ i̱ yoꞌó,
Ndiosí,
ña̱ nduuꞌ rey,
ña̱ xaꞌndia tyuunꞌ nuu̱ꞌ i̱,
te̱ nde̱e̱ ndiꞌiꞌ ni̱ kivi̱ꞌ sa̱kaꞌnuꞌ i̱ yoꞌó nde̱e̱ a̱ma̱ ka̱ ni̱.
2 Sa̱a̱ kivi̱ꞌ sa̱kaꞌnuꞌ i̱ yoꞌó,
te̱ nde̱e̱ ndiꞌiꞌ ni̱ kivi̱ꞌ sa̱kaꞌnuꞌ tu̱ i̱ yoꞌó nde̱e̱ a̱ma̱ ka̱ ni̱.
3 Tákuiꞌe Yahvé,
ña̱ kaꞌnuꞌ va̱ nduuꞌ yoꞌó,
te̱ xataꞌa̱n ña̱ sa̱kaꞌnuꞌ va̱ꞌa̱ va̱ ndu̱ yoꞌó xiinꞌ ya̱a̱.
Ña̱ kaꞌnuꞌ xa̱va̱ꞌa̱ nduuꞌ u̱nꞌ,
te̱ nde̱e̱ i̱i̱n ne̱ yivi̱ꞌ kü̱vi̱ ku̱nda̱ni̱ sa̱kuuꞌ ña̱ ja̱a̱nꞌ.
4 Te̱ sa̱kuuꞌ ne̱ yivi̱ꞌ i̱i̱n yivi̱ꞌ nda̱tuꞌunꞌ nuu̱ꞌ i̱ꞌi̱n siꞌe̱ ni̱a̱,
ne̱ tuví,
xaꞌa̱ꞌ sa̱kuuꞌ tyu̱u̱n kaꞌnuꞌ ña̱ ni̱ xa̱a̱ u̱nꞌ.
Kaꞌa̱n ndo̱so̱ꞌ ni̱a̱ xaꞌa̱ꞌ sa̱kuuꞌ tyu̱u̱n kaꞌnuꞌ kooꞌ tyukuuꞌ ña̱ ni̱ xa̱a̱ u̱nꞌ nuu̱ꞌ ni̱a̱.
5 Te̱ kaꞌa̱n tu̱ ni̱a̱ xaꞌa̱ꞌ ña̱ nda̱tu̱nꞌ va̱ ña̱ kaꞌnuꞌ u̱nꞌ,
te̱ yuꞌu̱ ka̱ni̱ni̱ xaꞌa̱ꞌ ña̱ nandani̱ ña̱ xaaꞌ u̱nꞌ.
6 Kaꞌa̱n ni̱a̱ xaꞌa̱ꞌ tyu̱u̱n kaꞌnuꞌ kooꞌ tyukuuꞌ ña̱ xaaꞌ u̱nꞌ xiinꞌ xaꞌa̱ꞌ sa̱kuuꞌ ña̱ i̱yo̱ va̱ ña̱ xaaꞌ u̱nꞌ,
te̱ yuꞌu̱ kaꞌa̱n ndo̱so̱ꞌ tiꞌeꞌ xaꞌa̱ꞌ ña̱ kaꞌnuꞌ va̱ ña̱ nduuꞌ u̱nꞌ.
7 Kaꞌa̱n ne̱ yivi̱ꞌ ña̱ ña̱ va̱ꞌa̱ xa̱va̱ꞌa̱ nimá nduuꞌ u̱nꞌ,
te̱ ka̱ta̱ tiꞌeꞌ sii̱ꞌ ni̱a̱ xaꞌa̱ꞌ ña̱ xatyuunꞌ nda̱ku u̱nꞌ.
8 Yahvé ndii,
ña̱ vi̱ta va̱ i̱ni̱ nduuꞌ a̱,
te̱ va̱ꞌa̱ va̱ tu̱ nimá a̱,
kuiee va̱ te̱ nasaáꞌ a̱,
te̱ ndani̱ xa̱va̱ꞌa̱ a̱ ne̱ yivi̱ꞌ.
9 Yahvé ndii,
va̱ꞌa̱ va̱ ña̱ nduuꞌ a̱ xini a̱ sa̱kuuꞌ ne̱ yivi̱ꞌ,
te̱ kuvita va̱ i̱ni̱ a̱ xaꞌa̱ꞌ sa̱kuuꞌ ña̱ ni̱ xa̱ꞌa̱ a̱.
10 Tákuiꞌe Yahvé,
naaꞌ sa̱kaꞌnuꞌ sa̱kuuꞌ ña̱ ni̱ xa̱ꞌa̱ u̱nꞌ yoꞌó,
te̱ na sa̱ñuꞌuꞌ sa̱kuuꞌ ne̱ nduuꞌ kuenta u̱nꞌ yoꞌó.
11 Na kaꞌa̱n ni̱a̱ xaꞌa̱ꞌ ña̱ nda̱tu̱nꞌ va̱ xaꞌndia tyuunꞌ i̱i̱n ka̱niiꞌ i̱i̱n yivi̱ꞌ,
te̱ na kaꞌa̱n ndo̱so̱ꞌ tu̱ ni̱a̱ xaꞌa̱ꞌ tyu̱u̱n kaꞌnuꞌ kooꞌ tyukuuꞌ ña̱ xaaꞌ u̱nꞌ.
12 Sa̱kanꞌ te̱ sa̱kundani̱ ni̱a̱ sa̱kuuꞌ ne̱ yivi̱ꞌ i̱i̱n yivi̱ꞌ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ u̱nꞌ
xiinꞌ xaꞌa̱ꞌ ña̱ nda̱tu̱nꞌ va̱ xaꞌndia tyuunꞌ u̱nꞌ i̱i̱n ka̱niiꞌ i̱i̱n yivi̱ꞌ.
13 Ña̱ xaꞌndia tyuunꞌ yoꞌó i̱i̱n ka̱niiꞌ nuu̱ꞌ ñuꞌuꞌ i̱i̱n yivi̱ꞌ ndii,
kö̱o̱ kivi̱ꞌ kuꞌu̱n ndi̱koꞌ a̱,
te̱ ña̱ xikoꞌ niꞌiꞌ u̱nꞌ i̱i̱n yivi̱ꞌ ndii,
nde̱e̱ ndiꞌiꞌ ni̱ kivi̱ꞌ ko̱o̱ a̱.
14 Tákuiꞌe Yahvé ndii,
taxiꞌ a̱ ndi̱e̱e̱ꞌ ne̱ ndaꞌvi kuni nimá,
te̱ taxiꞌ a̱ ndi̱e̱e̱ꞌ sa̱kuuꞌ ne̱ ni̱ xa̱vi va̱ nuu̱ꞌ ña̱ ndoꞌoꞌ ni̱a̱.
15 Sa̱kuuꞌ ña̱ yoo i̱i̱n yivi̱ꞌ xtoꞌniꞌ nuu̱ꞌ yoꞌó,
Ndiosí,
te̱ ta̱xi̱ u̱nꞌ ña̱ ka̱xi̱ꞌ a̱ sa̱va̱ ni̱ kii̱ꞌ kuní a̱ nuu̱ꞌ a̱.
16 Te̱ yoꞌó ndii,
taxiꞌ u̱nꞌ kuaꞌa̱ꞌ ña̱ xaxi̱ꞌ
sa̱kuuꞌ ña̱ tiaku yoo nuu̱ꞌ ñu̱ꞌuꞌ i̱i̱n yivi̱ꞌ nde̱e̱ sa̱ndaꞌni ña̱ꞌaꞌ u̱nꞌ.
17 Yahvé ndii,
xatyuunꞌ nda̱ku a̱ xiinꞌ sa̱kuuꞌ ña̱ xaaꞌ a̱,
te̱ kuuꞌ vi̱ta va̱ i̱ni̱ a̱ xaꞌa̱ꞌ ne̱ yivi̱ꞌ nuu̱ꞌ sa̱kuuꞌ ña̱ xaaꞌ a̱.
18 Yahvé ndii,
ya̱ti̱n yoo a̱ sa̱kuuꞌ i̱tyiꞌ nuu̱ꞌ ne̱ nandukuꞌ ña̱ꞌaꞌ,
uun ndo̱ꞌ,
ya̱ti̱n va̱ yoo a̱ nuu̱ꞌ ne̱ nandukuꞌ ña̱ꞌaꞌ xiinꞌ i̱i̱n ka̱niiꞌ nimá ni̱a̱.
19 Saxinú Yahvé ña̱ kaꞌán nimá sa̱kuuꞌ ne̱ xitoꞌ kaꞌnuꞌ ña̱ꞌaꞌ,
te̱ xini so̱ꞌo̱ tu̱ a̱ ña̱ kaꞌán ndaꞌvi ni̱a̱ xiinꞌ a̱,
te̱ sakakú ña̱ꞌaꞌ a̱.
20 Xitoꞌ Yahvé sa̱kuuꞌ ne̱ ndani̱ ña̱ꞌaꞌ,
ndisu̱ xaꞌni̱ꞌ a̱ sa̱kuuꞌ ne̱ xaaꞌ ña̱ ni̱a̱ꞌa.
21 Yuꞌu̱ ndii,
Yahvé ku̱i̱ti̱ꞌ sa̱kaꞌnuꞌ i̱,
ka̱ta̱ i̱ ya̱a̱,
te̱ xaꞌa̱ꞌ a̱ ña̱ ña̱ su̱ꞌu̱n va̱ nduuꞌ a̱ ndii,
na sa̱kaꞌnuꞌ ña̱ꞌaꞌ sa̱kuuꞌ ña̱ yoo i̱i̱n yivi̱ꞌ
nde̱e̱ vi̱ti̱n,
te̱ nde̱e̱ ndiꞌiꞌ ni̱ kivi̱ꞌ.