Yoꞌoꞌ xikán David nuu̱ꞌ Ndiosí te̱ ko̱to̱ ña̱ꞌaꞌ a̱, te̱ sa̱ñuꞌuꞌ tu̱ ña̱ꞌaꞌ a̱
Ya̱a̱ ña̱ ni̱ xi̱ta̱ David nuu̱ꞌ Ndiosí.
144
Na sa̱ñuꞌuꞌ e̱ꞌ Yahvé,
ña̱ nduuꞌ nde̱e̱ naa vi̱ꞌe̱ yuu̱ꞌ miiꞌ ku̱vi̱ kaku̱ i̱.
Ña̱ ja̱a̱nꞌ nduuꞌ ña̱ saniaꞌá yuꞌu̱ te̱ kuꞌu̱n i̱ miiꞌ yoo ñuꞌu̱,
te̱ saniaꞌá tu̱ a̱ nda̱ꞌaꞌ i̱ sa̱a̱ ku̱ntaꞌanꞌ i̱.
2 Ña̱ ja̱a̱nꞌ nduuꞌ ña̱ kuvita i̱ni̱ xaꞌa̱ꞌ i̱,
te̱ su̱vi̱ tu̱ a̱ nduuꞌ nde̱e̱ naa vi̱ꞌe̱ sukun miiꞌ ku̱vi̱ ti̱si̱ꞌe i̱.
Ña̱ ja̱a̱nꞌ taxiꞌ ndi̱e̱e̱ꞌ i̱,
te̱ su̱vi̱ tu̱ a̱ sakakú yuꞌu̱.
Ña̱ ja̱a̱nꞌ tu̱ nduuꞌ ña̱ i̱ni̱ i̱ xini i̱,
te̱ nduuꞌ a̱ nde̱e̱ naa ka̱a̱ tiꞌeꞌ ña̱ tiasi nuu̱ꞌ i̱ nuu̱ꞌ ña̱ kueinꞌ.
Te̱ su̱vi̱ tu̱ a̱ ni̱ xa̱a̱ sa̱kanꞌ,
te̱ nduuꞌ i̱ te̱ xaꞌndia tyuunꞌ nuu̱ꞌ ne̱ ñu̱u̱ i̱.
3 Tákuiꞌe Yahvé,
¿yo̱o̱ nduuꞌ ne̱ yivi̱ꞌ i̱i̱n yivi̱ꞌ na nakaꞌanꞌ u̱nꞌ xaꞌa̱ꞌ ni̱a̱?
Te̱,
¿yo̱o̱ nduuꞌ ni̱a̱ na ndiꞌni̱ u̱nꞌ xaꞌa̱ꞌ ni̱a̱?
4 Sa̱kanꞌ ña̱ nduuꞌ ni̱a̱ nde̱e̱ naa ña̱ naꞌiꞌ tatyi̱ꞌ ne̱ yivi̱ꞌ untaꞌ ku̱i̱ti̱ꞌ nuu̱ꞌ yoꞌó,
kivi̱ꞌ ña̱ xikaꞌ ni̱a̱ i̱i̱n yivi̱ꞌ ndii,
nduuꞌ a̱ nde̱e̱ naa ku̱ndaꞌvi̱ ña̱ xkaꞌndíá kuaꞌa̱n ku̱i̱ti̱ꞌ.
5 Tákuiꞌe Yahvé,
nu̱niaꞌ yiꞌeꞌ ndi̱viꞌ,
te̱ nu̱u̱ u̱nꞌ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ,
tondi̱a̱ nda̱ꞌaꞌ u̱nꞌ sa̱kuuꞌ i̱kuꞌ te̱ ki̱e̱e̱ ñuꞌma̱ sa̱a̱ a̱.
6 Sa̱koyó u̱nꞌ ñuꞌu̱ savi̱ꞌ,
te̱ ki̱ku̱ꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ u̱nꞌ,
ka̱ti̱a̱ u̱nꞌ kuxi̱ u̱nꞌ,
te̱ sa̱yi̱ꞌvi ña̱ꞌaꞌ u̱nꞌ.
7 Sa̱a̱ u̱nꞌ ña̱ va̱ꞌa̱ te̱ ka̱ta̱ni̱ u̱nꞌ nda̱ꞌaꞌ u̱nꞌ nde̱e̱ ndi̱viꞌ miiꞌ nduꞌu̱ꞌ u̱nꞌ,
te̱ sa̱kakú u̱nꞌ yuꞌu̱,
xta̱ꞌniꞌ u̱nꞌ yuꞌu̱ nuu̱ꞌ tu̱ndoꞌo̱ꞌ ña̱ nduuꞌ nde̱e̱ naa ti̱xi̱n kuaꞌa̱ꞌ ti̱kui miiꞌ kunu va̱,
sa̱a̱ u̱nꞌ ña̱ va̱ꞌa̱ te̱ tya̱ꞌvi̱ u̱nꞌ xaꞌa̱ꞌ i̱,
te̱ sa̱kakú u̱nꞌ yuꞌu̱ nda̱ꞌaꞌ te̱ tukuꞌ,
te̱ ndasiꞌ taꞌanꞌ xiinꞌ i̱.
8 Te̱ ja̱a̱nꞌ ndii,
xa̱ mi̱iꞌ ndiꞌiꞌ ña̱ kuäsa̱ꞌ kuní ndatuꞌunꞌ ra̱,
te̱ kii̱ꞌ taxiꞌ ra̱ kuento ra̱ ndii,
ndoniꞌiꞌ ra̱ nda̱ꞌaꞌ ku̱a̱ꞌa̱ ra̱,
te̱ kaꞌán ra̱ ña̱ sa̱xinú ra̱ kuento ra̱,
ndisu̱ xini xaꞌanꞌ ku̱i̱ti̱ꞌ ra̱.
9 Tákuiꞌe Ndiosí,
ka̱ta̱ i̱ i̱i̱n ya̱a̱ xa̱aꞌ nuu̱ꞌ u̱nꞌ,
te̱ ka̱ta̱ i̱ ya̱a̱ ja̱a̱nꞌ nuu̱ꞌ u̱nꞌ xiinꞌ ñuu̱ꞌ ña̱ naniꞌ arpa,
ña̱ yoo uxi̱ taꞌanꞌ tu̱tyi̱ nuu̱ꞌ.
10 Yoꞌó nduuꞌ ña̱ xaaꞌ sa̱kanꞌ te̱ kieeꞌ va̱ꞌa̱ sa̱kuuꞌ rey kii̱ꞌ kuaꞌa̱n ra̱ miiꞌ yoo ñuꞌu̱,
te̱ yoꞌó tu̱ ni̱ sa̱kakú yuꞌu̱,
David,
te̱ xikaꞌ nuuꞌ nuu̱ꞌ u̱nꞌ,
te̱ nï̱ xaꞌni̱ꞌ te̱ ndasiꞌ xiinꞌ i̱ yuꞌu̱ xiinꞌ ityi̱ ra̱.
11 Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ sa̱kuuꞌ te̱ ndasiꞌ taꞌanꞌ xiinꞌ i̱,
te̱ ja̱a̱nꞌ ndii,
xa̱ mi̱iꞌ ndiꞌiꞌ ña̱ kuäsa̱ꞌ kuní ndatuꞌunꞌ ra̱,
te̱ kii̱ꞌ taxiꞌ ra̱ kuento ra̱ ndii,
ndoniꞌiꞌ ra̱ nda̱ꞌaꞌ ku̱a̱ꞌa̱ ra̱,
te̱ kaꞌán ra̱ ña̱ sa̱xinú ra̱ kuento ra̱,
ndisu̱ xini xaꞌanꞌ ku̱i̱ti̱ꞌ ra̱.
12 Te̱ na ku̱a̱ꞌnu̱ va̱ꞌa̱ sa̱kuuꞌ tiaa̱ sa̱va̱ siꞌe̱ ndu̱ sa̱a̱ u̱nꞌ nde̱e̱ naa tunꞌ ta̱ta̱,
tunꞌ va̱ꞌa̱ va̱ ku̱a̱xi̱ ku̱a̱ꞌnu̱,
te̱ ña̱ꞌaꞌ sa̱va̱ siꞌe̱ ndu̱ ndii,
na nda̱tu̱nꞌ ko̱o̱ ni̱a̱ nde̱e̱ naa ndu̱yu̱ nda̱tu̱nꞌ xa̱va̱ꞌa̱,
tunꞌ itaꞌ xaꞌa̱ꞌ vi̱ꞌe̱ miiꞌ nduꞌu̱ꞌ i̱i̱n rey.
13 Te̱ na ku̱tuꞌ tu̱ yaka̱ miiꞌ kaya ndu̱ sa̱kuuꞌ nuu̱ꞌ ña̱ savi̱ꞌ ña̱ ka̱xi̱ꞌ ndu̱ sa̱a̱ u̱nꞌ,
te̱ na va̱ꞌa̱ va̱ tu̱ taꞌvi̱ꞌ ki̱tiꞌ sana̱ ndu̱ sa̱a̱ u̱nꞌ,
te̱ kuaꞌa̱ꞌ va̱ mií riꞌ tuvi̱ i̱ꞌi̱n i̱tyiꞌ,
te̱ ku̱ꞌu̱n riꞌ nuu̱ꞌ ñu̱ꞌuꞌ miiꞌ xikaꞌ ndu̱,
te̱ na na̱ndu̱u̱ riꞌ nde̱e̱ uxi̱ mií.
14 Te̱ na na̱kuꞌu̱n siꞌe̱ sa̱kuuꞌ si̱ndiki̱ꞌ siꞌi sana̱ ndu̱,
te̱ na kö̱ꞌni̱ nde̱e̱ i̱i̱n te̱ ndasiꞌ taꞌanꞌ xiinꞌ ndu̱ ñu̱u̱ ndu̱ te̱ ta̱va̱ꞌ ra̱ ndu̱,
te̱ na köo̱ꞌ kivi̱ꞌ ka̱ tu̱ ndeꞌi̱ nde̱e̱ i̱i̱n ne̱ yivi̱ꞌ ya̱ꞌya̱ ñu̱u̱ ndu̱ ña̱ nakaꞌ ña̱ꞌaꞌ te̱ xíinꞌ.
15 Va̱ꞌa̱ va̱ kuni ne̱ sa̱kanꞌ vi̱ꞌ xitoꞌ Ndiosí te̱ ndieeꞌ ni̱a̱,
te̱ sañuꞌuꞌ va̱ tu̱ Ndiosí ne̱ yivi̱ꞌ,
ne̱ nakuni ña̱ Yahvé ja̱a̱nꞌ nduuꞌ Ndiosí ña̱ xakaꞌnuꞌ ni̱a̱.