Yoꞌoꞌ kaꞌán ndaꞌvi David xiinꞌ Ndiosí, te̱ sa̱kakú ña̱ꞌaꞌ a̱ nda̱ꞌaꞌ te̱ ndasiꞌ taꞌanꞌ xiinꞌ ra̱
Ya̱a̱ ña̱ ni̱ xi̱ta̱ David nuu̱ꞌ Ndiosí.
143
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ ta̱xi̱ so̱ꞌo̱ tu̱ u̱nꞌ ña̱ kaꞌán ndaꞌvi i̱ xiinꞌ u̱nꞌ.
Sa̱a̱ u̱nꞌ ña̱ va̱ꞌa̱ te̱ na̱ku̱i̱i̱n u̱nꞌ ña̱ kaꞌán i̱ xiinꞌ u̱nꞌ,
sa̱kanꞌ ña̱ yoꞌó ndii,
ña̱ xatyuunꞌ nda̱ku nduuꞌ u̱nꞌ,
te̱ ña̱ ndi̱xa̱ tu̱ kaꞌán u̱nꞌ.
2 Sa̱a̱ u̱nꞌ ña̱ va̱ꞌa̱ te̱ näka̱n u̱nꞌ kuenta nuu̱ꞌ yuꞌu̱,
te̱ xikaꞌ nuuꞌ nuu̱ꞌ u̱nꞌ,
xaꞌa̱ꞌ ku̱a̱tyi̱ ña̱ xaaꞌ i̱,
sa̱kanꞌ ña̱ köo̱ꞌ nde̱e̱ i̱i̱n ne̱ yivi̱ꞌ ne̱ ku̱vi̱ kaꞌa̱n ña̱ ne̱ köo̱ꞌ ku̱a̱tyi̱ nduuꞌ ni̱a̱ nuu̱ꞌ yoꞌó.
3 Te̱ ndasiꞌ taꞌanꞌ xiinꞌ i̱ ndii,
ndi̱e̱eꞌ va̱ ndikún ra̱ yuꞌu̱,
te̱ xa̱ kuni ka̱ꞌni̱ꞌ ra̱ yuꞌu̱,
te̱ kuní ra̱ ña̱ ku̱naa̱ i̱ ti̱xi̱n ñu̱ꞌuꞌ miiꞌ i̱i̱n yaví va̱ nde̱e̱ naa te̱ xa̱ ni̱ xiꞌi̱ xta̱ꞌanꞌ vi̱ꞌ.
4 Te̱ nde̱e̱ kü̱vi̱ ka̱ na̱ꞌi̱ tatyi̱ꞌ vi̱ꞌ i̱ ña̱ ndiꞌni̱ xa̱va̱ꞌa̱ nimá i̱,
te̱ ni̱ ku̱ya̱a̱ ndi̱i ndo̱o̱ i̱ ña̱ yiꞌvi xa̱va̱ꞌa̱ i̱.
5 Nakaꞌanꞌ i̱ xaꞌa̱ꞌ sa̱kuuꞌ kivi̱ꞌ ña̱ ni̱ ki̱xi̱n xta̱ꞌanꞌ,
te̱ xanini i̱ xaꞌa̱ꞌ sa̱kuuꞌ tyu̱u̱n kaꞌnuꞌ ña̱ ni̱ xa̱a̱ u̱nꞌ.
Te̱ nakanini i̱ ndiꞌi̱ i̱ xaꞌa̱ꞌ sa̱kuuꞌ ña̱ ni̱ xa̱a̱ u̱nꞌ xiinꞌ ña̱ ndi̱e̱eꞌ u̱nꞌ.
6 Nuu̱ꞌ yoꞌó kataniꞌ nda̱ꞌaꞌ i̱,
te̱ kaꞌán i̱ si̱u̱ꞌunꞌ xiinꞌ u̱nꞌ,
sa̱kanꞌ ña̱ ndi̱e̱eꞌ va̱ kuní i̱ ña̱ tyi̱ndi̱e̱eꞌ u̱nꞌ yuꞌu̱ nde̱e̱ naa xaaꞌ ñu̱ꞌuꞌ i̱tyiꞌ ña̱ ndi̱e̱eꞌ va̱ kuní a̱ ña̱ ku̱u̱n kiꞌi̱ꞌ savi̱ꞌ.
Selah
7 Tákuiꞌe Yahvé,
ni̱a̱ꞌa̱ kiꞌi̱ꞌ te̱ na̱ku̱i̱i̱n u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
sa̱kanꞌ ña̱ xa̱ yoo i̱ ku̱vi̱ i̱,
te̱ kü̱ndi̱e̱ni ka̱ nimá i̱.
Sa̱a̱ u̱nꞌ ña̱ va̱ꞌa̱ te̱ kü̱xi̱o̱o̱ u̱nꞌ nuu̱ꞌ i̱,
ko̱to̱ ka̱ ku̱vi̱ i̱,
te̱ ku̱ndo̱ꞌo̱ i̱ nde̱e̱ naa ne̱ yivi̱ꞌ,
ne̱ xiꞌí te̱ kuaꞌa̱n ni̱a̱ yavi̱ ndi̱i̱.
8 Sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ yuꞌu̱ sa̱a̱ ni̱a̱ꞌa̱ ña̱ kuvita i̱ni̱ u̱nꞌ xaꞌa̱ꞌ i̱,
sa̱kanꞌ ña̱ yoꞌó i̱ni̱ i̱ xini i̱.
Sa̱a̱ u̱nꞌ ña̱ va̱ꞌa̱ te̱ niaꞌa̱ u̱nꞌ yuꞌu̱ sa̱a̱ kuní u̱nꞌ ka̱ka̱ i̱ i̱i̱n yivi̱ꞌ,
sa̱kanꞌ ña̱ nda̱ꞌaꞌ yoꞌó sanakuaꞌa i̱ nimá i̱.
9 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ te̱ ndasiꞌ taꞌanꞌ xiinꞌ i̱,
yoꞌó nduuꞌ nde̱e̱ naa miiꞌ ku̱vi̱ kakú i̱.
10 Sa̱a̱ u̱nꞌ ña̱ va̱ꞌa̱ te̱ sa̱niaꞌá u̱nꞌ yuꞌu̱ te̱ sa̱a̱ i̱ ña̱ kuní u̱nꞌ,
sa̱kanꞌ ña̱ yoꞌó nduuꞌ Ndiosí ña̱ xakaꞌnuꞌ i̱.
Espíritu yoꞌó ndii,
ña̱ va̱ꞌa̱ va̱ nduuꞌ a̱ ta̱xi̱ u̱nꞌ na tyi̱ndi̱e̱eꞌ a̱ yuꞌu̱,
te̱ na̱xaa̱ i̱ nuu̱ꞌ ñu̱ꞌuꞌ va̱ꞌa̱ miiꞌ ku̱nduꞌu̱ꞌ i̱.
11 Tákuiꞌe Yahvé,
xaꞌa̱ꞌ a̱ ña̱ kuní u̱nꞌ kaꞌa̱n va̱ꞌa̱ ne̱ yivi̱ꞌ xaꞌa̱ꞌ u̱nꞌ ndii,
sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kivi̱ꞌ ñu̱u̱ i̱,
te̱ xaꞌa̱ꞌ a̱ ña̱ xatyuunꞌ nda̱ku u̱nꞌ ndii,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nuu̱ꞌ tu̱ꞌu̱n ndiꞌni̱ ña̱ ndoꞌoꞌ i̱.
12 Te̱ xaꞌa̱ꞌ a̱ ña̱ köo̱ꞌ kivi̱ꞌ ndiꞌiꞌ ña̱ kuvita i̱ni̱ u̱nꞌ xaꞌa̱ꞌ i̱ ndii,
sa̱a̱ u̱nꞌ ña̱ va̱ꞌa̱ te̱ ka̱ꞌni̱ꞌ u̱nꞌ sa̱kuuꞌ te̱ ndasiꞌ taꞌanꞌ xiinꞌ i̱ ja̱a̱nꞌ,
sa̱nduxín u̱nꞌ sa̱kuuꞌ ra̱,
sa̱kanꞌ ña̱ te̱ xikaꞌ nuuꞌ nuu̱ꞌ u̱nꞌ nduuꞌ yuꞌu̱.