Yoꞌoꞌ kaꞌán David xiinꞌ Ndiosí te̱ tyi̱ndi̱e̱eꞌ ña̱ꞌaꞌ a̱ nuu̱ꞌ ña̱ ndoꞌoꞌ ra̱
Ya̱a̱ ña̱ ni̱ xi̱ta̱ David nuu̱ꞌ Ndiosí kii̱ꞌ ni̱ naa̱ si̱ꞌe ra̱ ti̱xi̱n yavi̱ yuu̱ꞌ.
142
Kaꞌán tiꞌeꞌ i̱ xiinꞌ Yahvé,
te̱ tyi̱ndi̱e̱eꞌ a̱ yuꞌu̱,
kaꞌán tiꞌeꞌ i̱ xiinꞌ Yahvé,
te̱ ku̱vi̱ta i̱ni̱ a̱ xaꞌa̱ꞌ i̱.
2 Te̱ nuu̱ꞌ ña̱ ja̱a̱nꞌ ta̱ndi̱e̱e̱ i̱ sa̱kuuꞌ ña̱ ndoꞌoꞌ i̱,
te̱ ndatuꞌunꞌ i̱ nuu̱ꞌ a̱ xaꞌa̱ꞌ sa̱kuuꞌ ña̱ sandiꞌni̱ nimá i̱.
3 Kii̱ꞌ ndiꞌni̱ xa̱va̱ꞌa̱ nimá i̱ ndii,
i̱i̱n nda̱a̱ꞌ yoꞌó ku̱i̱ti̱ꞌ xiní sa̱a̱ xikaꞌ i̱.
Miiꞌ ka̱ kuaꞌa̱n i̱ ndii,
tyindieeꞌ te̱ ndasiꞌ taꞌanꞌ xiinꞌ i̱ tunꞌ ii̱ꞌ nuu̱ꞌ i̱.
4 Ko̱to̱ u̱nꞌ sa̱a̱ kuaꞌa̱n xi̱i̱nꞌ i̱,
te̱ ku̱ni̱ u̱nꞌ ña̱ kuäsa̱ꞌ iinꞌ i̱i̱n nda̱a̱ꞌ vi̱ꞌ ne̱ kuni ko̱to̱ꞌni̱ nuu̱ꞌ i̱,
te̱ köo̱ꞌ tu̱ nde̱e̱ i̱i̱n nda̱a̱ꞌ xaanꞌ miiꞌ ku̱vi̱ kaku̱ i̱.
Nde̱e̱ i̱i̱n ne̱ yivi̱ꞌ kuäsa̱ꞌ ndiꞌni̱ xaꞌa̱ꞌ i̱.
5 Sa̱kanꞌ na kuiiꞌ kaꞌán tiꞌeꞌ i̱ xiinꞌ yoꞌó,
Tákuiꞌe Yahvé ndii:
“Yoꞌó nduuꞌ ña̱ xitoꞌ yuꞌu̱,
ña̱ ndi̱xa̱ xna̱ꞌa̱ nduuꞌ a̱ ndii,
i̱i̱n nda̱a̱ꞌ yoꞌó ku̱i̱ti̱ꞌ nduuꞌ ña̱ yoo tyindieeꞌ yuꞌu̱ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ.
6 Sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán tiꞌeꞌ i̱ xiinꞌ u̱nꞌ,
sa̱kanꞌ ña̱ köo̱ꞌ ka̱ xa̱tyiꞌ ka̱ ndi̱e̱e̱ꞌ i̱.
Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ te̱ sandoꞌoꞌ yuꞌu̱,
sa̱kanꞌ ña̱ ndi̱e̱eꞌ ka̱ ra̱ te̱ sa̱kanꞌ yuꞌu̱.
7 Sa̱a̱ u̱nꞌ ña̱ va̱ꞌa̱ te̱ sa̱ndoó ndiká u̱nꞌ yuꞌu̱ nuu̱ꞌ tu̱ndoꞌo̱ꞌ yoꞌoꞌ,
te̱ sa̱kaꞌnuꞌ i̱ yoꞌó.
Ne̱ xatyuunꞌ nda̱ku ndii,
na̱kaya̱ ni̱a̱ sa̱a̱ xinundu̱u̱ xi̱i̱nꞌ i̱ xaꞌa̱ꞌ ña̱ va̱ꞌa̱ ña̱ ni̱ xa̱a̱ u̱nꞌ xiinꞌ i̱”,
ni̱ katyi̱ i̱ xiinꞌ u̱nꞌ.