Yoꞌoꞌ kaꞌán ndaꞌvi David xiinꞌ Ndiosí te̱ ko̱to̱ ña̱ꞌaꞌ a̱ nuu̱ꞌ ña̱ ni̱a̱ꞌa
Ya̱a̱ ña̱ ni̱ xi̱ta̱ David nuu̱ꞌ Ndiosí.
141
Yahvé,
kaꞌán ndaꞌvi i̱ xiinꞌ u̱nꞌ,
ni̱a̱ꞌa̱ kiꞌi̱ꞌ te̱ tyi̱ndi̱e̱eꞌ u̱nꞌ yuꞌu̱,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán ndaꞌvi i̱ xiinꞌ u̱nꞌ.
2 Sa̱a̱ u̱nꞌ ña̱ va̱ꞌa̱ te̱ na̱ti̱i̱n u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ,
te̱ na ku̱ndu̱u̱ a̱ nde̱e̱ naa su̱xa̱ tyúꞌma nuu̱ꞌ u̱nꞌ,
te̱ ña̱ ndoniꞌiꞌ i̱ nda̱ꞌaꞌ i̱ kii̱ꞌ kaꞌán i̱ si̱u̱ꞌunꞌ xiinꞌ u̱nꞌ ndii,
na ku̱ndu̱u̱ a̱ nde̱e̱ naa tu̱mani̱ꞌ ña̱ nasoko̱ꞌ i̱ nuu̱ꞌ u̱nꞌ nakoꞌ ñu̱ꞌu̱.
3 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yu̱ꞌuꞌ,
te̱ tä̱xi̱ u̱nꞌ kaꞌa̱n i̱ nde̱e̱ i̱i̱n ña̱ kuäsa̱ꞌ kuní.
4 Tä̱xi̱ u̱nꞌ ña̱ kaꞌa̱n nimá i̱ sa̱a̱ i̱ nde̱e̱ i̱i̱n nuu̱ꞌ ña̱ ni̱a̱ꞌa,
ni̱ nde̱e̱ tä̱xi̱ tu̱ u̱nꞌ ña̱ ki̱ꞌi̱n taꞌanꞌ i̱ xiinꞌ nde̱e̱ i̱i̱n ne̱ xaaꞌ ña̱ ni̱a̱ꞌa,
ni̱ nde̱e̱ tä̱xi̱ tu̱ u̱nꞌ ña̱ ku̱xi̱ ingaꞌ i̱ xiinꞌ ne̱ xaaꞌ ña̱ ni̱a̱ꞌa ja̱a̱nꞌ kii̱ꞌ xaꞌa ni̱a̱ vi̱koꞌ ki̱ni̱ iinꞌ.
5 Va̱ꞌa̱ yoo a̱ nuu̱ꞌ yuꞌu̱ ña̱ sa̱ndoꞌoꞌ i̱i̱n te̱ xatyuunꞌ nda̱ku yuꞌu̱,
te̱ ña̱ kaniꞌ kuento te̱ ja̱a̱nꞌ yuꞌu̱ ndii,
nduuꞌ a̱ nde̱e̱ naa xa̱ꞌa̱n xavixínꞌ va̱.
Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ na̱ka̱si̱ i̱ ña̱ kaꞌán nde̱iꞌ te̱ ja̱a̱nꞌ xiinꞌ i̱.
Ndisu̱ kaꞌán te̱ kaꞌán i̱ si̱u̱ꞌunꞌ xiinꞌ u̱nꞌ,
te̱ sa̱ndoꞌoꞌ u̱nꞌ sa̱kuuꞌ te̱ xaaꞌ ña̱ ni̱a̱ꞌa.
6 Kii̱ꞌ ka̱ti̱a̱ te̱ yivi̱ꞌ sa̱kuuꞌ te̱ xaꞌndia tyuunꞌ nuu̱ꞌ te̱ xaaꞌ ña̱ ni̱a̱ꞌa ja̱a̱nꞌ ti̱xi̱n ta̱ꞌviꞌ ndii,
ku̱nda̱ni̱ ra̱ ña̱ ña̱ ndi̱xa̱ nduuꞌ tu̱ꞌu̱n yuꞌu̱ i̱.
7 Te̱ kaꞌa̱n ne̱ yivi̱ꞌ kii̱ꞌ sa̱kanꞌ ndii:
“Köo̱ꞌ ni̱ na̱taa̱nꞌ xa̱tyiꞌ ñu̱ꞌuꞌ ndeꞌi̱ te̱ xaaꞌ ña̱ ni̱a̱ꞌa ja̱a̱nꞌ,
te̱ ni̱ kiku̱ ndo̱o̱ i̱kiꞌ ra̱ yu̱ꞌuꞌ yavi̱ ndi̱i̱,
nde̱e̱ naa kikú ñu̱ꞌuꞌ kii̱ꞌ taꞌviꞌ te̱ yivi̱ꞌ a̱ xiinꞌ ki̱tiꞌ”,
katyi̱ ni̱a̱.
8 Tákuiꞌe Yahvé,
xaꞌa̱ꞌ a̱ ja̱a̱nꞌ na kuiiꞌ nandukuꞌ i̱ yoꞌó te̱ tyi̱ndi̱e̱eꞌ u̱nꞌ yuꞌu̱.
Yoꞌó nduuꞌ ña̱ xitoꞌ yuꞌu̱,
sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ ka̱ꞌni̱ꞌ te̱ yivi̱ꞌ yuꞌu̱.
9 Sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yuꞌu̱ nuu̱ꞌ ña̱ tiinꞌ sikiꞌ te̱ yivi̱ꞌ ja̱a̱nꞌ,
te̱ ko̱to̱ tu̱ u̱nꞌ yuꞌu̱ nuu̱ꞌ te̱ xaaꞌ ña̱ ni̱a̱ꞌa.
10 Te̱ mi̱iꞌ te̱ xaaꞌ ña̱ ni̱a̱ꞌa ja̱a̱nꞌ na koyo̱ nuu̱ꞌ tunꞌ ii̱ꞌ,
tunꞌ ni̱ tyi̱ndi̱e̱e̱ ra̱ xaꞌa̱ꞌ yuꞌu̱,
ndisu̱ yuꞌu̱ ndii,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nda̱ꞌaꞌ ra̱,
te̱ köo̱ꞌ a̱ ku̱ndo̱ꞌo̱ i̱.