Yoꞌoꞌ xikán David nuu̱ꞌ Ndiosí ña̱ ko̱to̱ ña̱ꞌaꞌ a̱ nuu̱ꞌ te̱ sandoꞌoꞌ ña̱ꞌaꞌ
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
140
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱ nuu̱ꞌ te̱ ni̱a̱ꞌa,
te̱ ko̱to̱ u̱nꞌ yuꞌu̱ nuu̱ꞌ te̱ yivi̱ꞌ,
te̱ ndi̱e̱ni va̱.
2 Te̱ ja̱a̱nꞌ ndii,
xa̱nuu̱ꞌ xaꞌa̱ꞌ ña̱ ni̱a̱ꞌa tyituní ra̱ xiinꞌ nimá ra̱,
te̱ i̱ꞌi̱n kivi̱ꞌ kuaꞌa̱n sakuntaꞌanꞌ ra̱ ne̱ yivi̱ꞌ.
3 Nduuꞌ ra̱ nde̱e̱ naa koo̱ꞌ xatu̱ va̱ xiinꞌ ña̱ kaꞌán ra̱,
te̱ kuento ña̱ ndatuꞌunꞌ ra̱ ndii,
nduuꞌ a̱ nde̱e̱ naa ña̱ xatu̱ ña̱ kieeꞌ yu̱ꞌuꞌ koo̱ꞌ ka̱a̱.
Selah
4 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ yuꞌu̱ nuu̱ꞌ te̱ xaaꞌ ña̱ ni̱a̱ꞌa,
te̱ ko̱to̱ tu̱ u̱nꞌ yuꞌu̱ nuu̱ꞌ te̱ ndi̱e̱ni va̱,
te̱ kuní va̱ sa̱a̱ ña̱ ni̱a̱ꞌa xiinꞌ i̱.
5 Te̱ ñuñuꞌ ndii,
ni̱ tyi̱ndi̱e̱e̱ ra̱ tunꞌ ii̱ꞌ i̱tyiꞌ miiꞌ xikaꞌ i̱ te̱ na̱ma̱ i̱ nda̱ꞌaꞌ ra̱,
kaꞌanꞌ ra̱,
te̱ ni̱ tyi̱ta̱ꞌnu̱ tu̱ ra̱ ñu̱nu̱ꞌ yu̱ꞌuꞌ i̱tyiꞌ miiꞌ xikaꞌ i̱,
ndiani̱ te̱ na̱ma̱ i̱ nda̱ꞌaꞌ ra̱,
kaꞌanꞌ ra̱,
te̱ sa̱a̱ kuaꞌa̱n i̱tyiꞌ miiꞌ xikaꞌ i̱ ni̱ tyi̱ndi̱e̱e̱ ra̱ tunꞌ ii̱ꞌ ja̱a̱nꞌ.
Selah
6 Ni̱ kaꞌa̱n i̱ xiinꞌ Yahvé ndii:
“Yoꞌó nduuꞌ Ndiosí ña̱ xakaꞌnuꞌ i̱,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán ndaꞌvi i̱ xiinꞌ u̱nꞌ.
7 Tákuiꞌe Yahvé,
ña̱ kaꞌnuꞌ xa̱va̱ꞌa̱,
ña̱ sa̱kakú yuꞌu̱,
yoꞌó nduuꞌ nde̱e̱ naa tiꞌe̱ꞌ ña̱ ñuꞌuꞌ xíniꞌ i̱,
te̱ ni̱ xi̱to̱ u̱nꞌ yuꞌu̱ kii̱ꞌ ni̱ xaꞌa̱n ti̱i̱n i̱ ñuꞌu̱.
8 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ ña̱ sa̱xinú te̱ xaaꞌ ña̱ ni̱a̱ꞌa ña̱ tyituní ra̱ sa̱a̱ ra̱,
te̱ tä̱xi̱ tu̱ u̱nꞌ ña̱ ki̱e̱e̱ va̱ꞌa̱ ra̱ xiinꞌ ña̱ ni̱a̱ꞌa ña̱ kuni sa̱a̱ ra̱,
ko̱to̱ ka̱ ka̱ni̱ꞌi̱ xiinꞌ miiꞌ ra̱ naaꞌ xinu̱ ña̱ kaꞌán nimá ra̱ ja̱a̱nꞌ”,
ni̱ katyi̱ i̱ xiinꞌ a̱.
Selah
9 Sa̱a̱ u̱nꞌ ña̱ va̱ꞌa̱ te̱ na ku̱ndo̱ꞌo̱ mi̱iꞌ sa̱kuuꞌ te̱ ndasiꞌ taꞌanꞌ xiinꞌ i̱ ña̱ ni̱a̱ꞌa ña̱ kaꞌán ra̱ ku̱ndo̱ꞌo̱ yuꞌu̱,
te̱ na ku̱ndo̱ꞌo̱ mi̱iꞌ tu̱ ra̱ sa̱kuuꞌ ña̱ ni̱a̱ꞌa ña̱ ni̱ kuni̱ ra̱ ku̱ndo̱ꞌo̱ yuꞌu̱ sa̱a̱ ra̱.
10 Sa̱a̱ u̱nꞌ ña̱ va̱ꞌa̱ te̱ sa̱koyó u̱nꞌ ñuꞌu̱ ti̱keí ndatin siki̱ꞌ sa̱kuuꞌ te̱ ja̱a̱nꞌ,
te̱ ko̱ꞌni̱ ña̱ꞌaꞌ u̱nꞌ nuu̱ꞌ ñuꞌu̱ ndatin,
uun ko̱ꞌni̱ ña̱ꞌaꞌ u̱nꞌ i̱i̱n poso̱ kunu va̱ miiꞌ ñuꞌuꞌ ti̱kui,
miiꞌ köo̱ꞌ kivi̱ꞌ ki̱e̱e̱ xa̱tyiꞌ ka̱ ra̱.
11 Sa̱a̱ u̱nꞌ ña̱ va̱ꞌa̱ te̱ tä̱xi̱ u̱nꞌ ki̱e̱e̱ va̱ꞌa̱ te̱ xini xaꞌanꞌ nuu̱ꞌ ñu̱ꞌuꞌ miiꞌ ndieeꞌ ndu̱,
te̱ sa̱a̱ u̱nꞌ ña̱ va̱ꞌa̱ te̱ sa̱koyó u̱nꞌ sa̱kuuꞌ nuu̱ꞌ kuiꞌe̱ xatu̱ va̱ ku̱ndo̱ꞌo̱ sa̱kuuꞌ te̱ xaaꞌ ña̱ ni̱a̱ꞌa.
12 Ndisu̱ sa̱kuuꞌ ne̱ yivi̱ꞌ,
ne̱ ndoꞌoꞌ xaaꞌ te̱ ja̱a̱nꞌ ndii,
xiní kaxiꞌ yuꞌu̱ ña̱ tyi̱ndi̱e̱eꞌ ña̱ꞌaꞌ Yahvé,
te̱ sa̱tyuunꞌ nda̱ku a̱ xaꞌa̱ꞌ ne̱ ndaꞌvi kuuꞌ.
13 Ña̱ nda̱ku nduuꞌ a̱ ña̱ ne̱ xatyuunꞌ nda̱ku ndii,
sa̱kaꞌnuꞌ ni̱a̱ yoꞌó,
te̱ ne̱ i̱i̱n nda̱a̱ꞌ nimá ndii,
ku̱ndi̱e̱e̱ ni̱a̱ vi̱ꞌe̱ u̱nꞌ.