Yoꞌoꞌ kaꞌán a̱ xaꞌa̱ꞌ ña̱ miiꞌ ka̱ te̱ yoo Ndiosí, te̱ xiní tu̱ a̱ sa̱kuuꞌ ña̱ yoo
Ya̱a̱ ña̱ ni̱ xi̱ta̱ David ña̱ kuaꞌa̱n nda̱ꞌaꞌ te̱ kuuꞌ nu̱uꞌ nuu̱ꞌ te̱ xitaꞌ ya̱a̱ ti̱xi̱n yu̱kunꞌ kaꞌnuꞌ.
139
Tákuiꞌe Yahvé,
xa̱ ni̱ xi̱to̱ ndiꞌi̱ va̱ u̱nꞌ nimá i̱,
te̱ xa̱ xiní kaxiꞌ u̱nꞌ sa̱a̱ xikaꞌ i̱.
2 Xiní kaxiꞌ yoꞌó sa̱kuuꞌ ña̱ xaaꞌ i̱,
tee̱ꞌ ndee xikaꞌ yoo u̱nꞌ ndii,
xiní u̱nꞌ sa̱kuuꞌ ña̱ xanini i̱.
3 Xa̱ ni̱ xi̱to̱ ndiꞌi̱ u̱nꞌ sa̱kuuꞌ ña̱ xaaꞌ i̱ miiꞌ ka̱ kuaꞌa̱n i̱,
te̱ sa̱kanꞌ tu̱ kii̱ꞌ nandiee̱ꞌ i̱,
te̱ xiní u̱nꞌ sa̱kuuꞌ ña̱ xaaꞌ i̱.
4 Tákuiꞌe Yahvé,
xa̱ xiní yoꞌó yo̱o̱ nduuꞌ a̱ kaꞌa̱n yuꞌu̱
nde̱e̱ kii̱ꞌ tiäa̱ꞌan kaꞌa̱n i̱ nde̱e̱ i̱i̱n yu̱ꞌuꞌ.
5 Sa̱a̱ xinundu̱u̱ xi̱i̱nꞌ i̱ yoo u̱nꞌ,
te̱ xitoꞌ u̱nꞌ yuꞌu̱,
te̱ kataniꞌ u̱nꞌ nda̱ꞌaꞌ u̱nꞌ miiꞌ ka̱ kuaꞌa̱n i̱ te̱ köo̱ꞌ a̱ ndoꞌoꞌ i̱.
6 Sa̱kuuꞌ ña̱ xiní u̱nꞌ xaꞌa̱ꞌ i̱ ja̱a̱nꞌ ndii,
nda̱tu̱nꞌ xa̱va̱ꞌa̱ ña̱ nduuꞌ a̱ nuu̱ꞌ yuꞌu̱,
vixi xka̱ꞌndi̱a̱ a̱ te̱ kü̱vi̱ xa̱tyiꞌ ku̱nda̱ni̱ i̱ e̱.
7 Kuäsa̱ꞌ xa̱tyiꞌ yoo miiꞌ ku̱vi̱ kuꞌu̱n xikaꞌ yuꞌu̱ nuu̱ꞌ Espíritu u̱nꞌ,
te̱ kuäsa̱ꞌ xa̱tyiꞌ tu̱ yoo miiꞌ ku̱vi̱ ku̱nu̱ i̱ nuu̱ꞌ u̱nꞌ.
8 Naaꞌ kuꞌu̱n ka̱a̱ i̱ ndi̱viꞌ ndii,
i̱kanꞌ nduꞌu̱ꞌ yoꞌó,
te̱ naa kuꞌu̱n ka̱nduꞌu̱ꞌ i̱ nde̱e̱ ma̱aꞌ ti̱xi̱n ñu̱ꞌuꞌ ndii,
yoo tu̱ yoꞌó i̱kanꞌ.
9 Te̱ naaꞌ ku̱vi̱ ku̱ta̱ꞌnu̱ i̱ te̱ kuꞌu̱n xikaꞌ i̱,
uun kuꞌu̱n ku̱nduꞌu̱ꞌ i̱ nde̱e̱ tu̱ku̱ taꞌviꞌ xi̱o̱o̱ mi̱ni̱ ndii,
10 nde̱e̱ i̱kanꞌ kuꞌu̱n u̱nꞌ te̱ tyi̱ndi̱e̱eꞌ u̱nꞌ yuꞌu̱,
te̱ ko̱to̱ tu̱ u̱nꞌ yuꞌu̱ xiinꞌ ña̱ ndi̱e̱eꞌ u̱nꞌ.
11 Ku̱vi̱ tu̱ kaꞌa̱n i̱ xiinꞌ ña̱ i̱i̱n yaví te̱ ti̱si̱ꞌe a̱ yuꞌu̱,
te̱ kaꞌa̱n tu̱ i̱ xiinꞌ i̱i̱n keꞌinꞌ te̱ na̱ndu̱u̱ a̱ ñu̱u te̱ ti̱si̱ꞌe a̱ yuꞌu̱ nuu̱ꞌ u̱nꞌ.
12 Ndisu̱ ni̱ nde̱e̱ te̱i̱n ña̱ i̱i̱n yaví ja̱a̱nꞌ kü̱vi̱ ti̱si̱ꞌe i̱ nuu̱ꞌ yoꞌó,
sa̱kanꞌ ña̱ nde̱e̱ ña̱ i̱i̱n yaví ja̱a̱nꞌ tuviꞌ nde̱e̱ naa i̱i̱n keꞌinꞌ nuu̱ꞌ yoꞌó.
Ña̱ i̱i̱n yaví xiinꞌ i̱i̱n keꞌinꞌ ndii,
i̱i̱n katyi tuviꞌ nuu̱ꞌ yoꞌó.
13 Sa̱kanꞌ ña̱ yoꞌó nduuꞌ ña̱ ni̱ xa̱ꞌa̱ ña̱ ñuꞌuꞌ ti̱xi̱n i̱,
te̱ ni̱ tyu̱ꞌu̱n taꞌanꞌ tu̱ u̱nꞌ i̱ꞌi̱n tuꞌu̱nꞌ ñu̱ꞌuꞌ ndeꞌi̱ i̱ nde̱e̱ ti̱xi̱n si̱ꞌiꞌ i̱.
14 Xakaꞌnuꞌ i̱ yoꞌó,
sa̱kanꞌ ña̱ va̱ꞌa̱ va̱ ni̱ xa̱ꞌa̱ u̱nꞌ yuꞌu̱.
Te̱ nda̱tu̱nꞌ va̱ sa̱kuuꞌ ña̱ xaꞌa yoꞌó,
xiní kaxiꞌ i̱ ña̱ sa̱kanꞌ nduuꞌ a̱.
15 Ni̱ xi̱ni̱ yoꞌó sa̱a̱ xikoó ñu̱ꞌuꞌ ndeꞌi̱ i̱ nde̱e̱ miiꞌ kasi̱ꞌe va̱,
te̱ ni̱ xi̱ni̱ tu̱ u̱nꞌ sa̱a̱ xikuꞌún taꞌanꞌ i̱ꞌi̱n tuꞌu̱nꞌ ñu̱ꞌuꞌ ndeꞌi̱ i̱ ja̱a̱nꞌ ti̱xi̱n si̱ꞌiꞌ i̱.
16 Nde̱e̱ kii̱ꞌ ni̱ na̱kuꞌu̱n i̱,
te̱ xa̱ ni̱ xi̱ni̱ u̱nꞌ yuꞌu̱,
te̱ xa̱ yoso̱ꞌ sa̱kuuꞌ ña̱ ja̱a̱nꞌ nuu̱ꞌ tu̱tu̱ ni̱ xa̱a̱ u̱nꞌ,
te̱ xa̱ ni̱ tyi̱tuní u̱nꞌ sa̱a̱ taꞌanꞌ kivi̱ꞌ ka̱ka̱ i̱ i̱i̱n yivi̱ꞌ,
tee̱ꞌ ndee tiäa̱ꞌan ko̱o̱ nde̱e̱ i̱i̱n tuꞌu̱nꞌ ñu̱ꞌuꞌ ndeꞌi̱ i̱ ja̱a̱nꞌ.
17 Tákuiꞌe Ndiosí,
nda̱tu̱nꞌ xa̱va̱ꞌa̱ ña̱ xanini yoꞌó nuu̱ꞌ yuꞌu̱,
te̱ kuaꞌa̱ꞌ xa̱va̱ꞌa̱ tu̱ a̱.
18 Naaꞌ sa̱kanꞌ te̱ ka̱ꞌvi̱ e̱ꞌ e̱ ndii,
kuaꞌa̱ꞌ ka̱ te̱ sa̱kanꞌ ñu̱tiꞌ.
Te̱ kii̱ꞌ ndo̱to̱ i̱ ndii,
nduꞌu̱ꞌ ka̱ i̱ xiinꞌ u̱nꞌ.
19 Tákuiꞌe Ndiosí,
xa̱va̱ꞌa̱ na sa̱kanꞌ te̱ xiinꞌ u̱nꞌ ka̱ꞌni̱ꞌ u̱nꞌ sa̱kuuꞌ ne̱ xaaꞌ ña̱ ni̱a̱ꞌa.
Sa̱kanꞌ ña̱ kaꞌán va̱ nimá i̱ ña̱ sa̱xikaꞌ u̱nꞌ sa̱kuuꞌ te̱ xaꞌni̱ꞌ ne̱ yivi̱ꞌ nuu̱ꞌ i̱.
20 Te̱ kaꞌán ki̱ni̱ tu̱ ra̱ xaꞌa̱ꞌ yoꞌó,
tiinꞌ sikiꞌ te̱ ndasiꞌ taꞌanꞌ xiinꞌ u̱nꞌ ja̱a̱nꞌ kivi̱ꞌ u̱nꞌ te̱ taxiꞌ ra̱ kuento ra̱.
21 Tákuiꞌe Yahvé,
xiní kaxiꞌ u̱nꞌ ña̱ ndasiꞌ va̱ yuꞌu̱ te̱ yivi̱ꞌ,
te̱ ndasiꞌ yoꞌó,
te̱ küni ko̱to̱ xa̱tyiꞌ tu̱ i̱ te̱ xikuitá teiꞌ nuu̱ꞌ u̱nꞌ.
22 Ndasiꞌ koo̱ꞌ vi̱ꞌ ña̱ꞌaꞌ i̱,
sa̱kanꞌ ña̱ te̱ ndasiꞌ taꞌanꞌ xiinꞌ u̱nꞌ ja̱a̱nꞌ ndii,
te̱ ndasiꞌ taꞌanꞌ tu̱ xiinꞌ yuꞌu̱ nduuꞌ ra̱.
23 Tákuiꞌe Ndiosí,
ko̱to̱ ndiꞌi̱ va̱ u̱nꞌ nimá i̱ te̱ ku̱nda̱ni̱ u̱nꞌ ndee ña̱ xanini i̱,
ko̱to̱ ku̱a̱ꞌa̱ u̱nꞌ yuꞌu̱ te̱ ku̱nda̱ni̱ u̱nꞌ ndee ña̱ sandiꞌni̱ nimá i̱.
24 Te̱ niaꞌa̱ u̱nꞌ yuꞌu̱ naaꞌ ñuꞌuꞌ yo̱o̱ ka̱ nduuꞌ ña̱ xtäni̱ u̱nꞌ nimá i̱,
te̱ sa̱a̱ u̱nꞌ ña̱ va̱ꞌa̱ tyi̱ndi̱e̱eꞌ u̱nꞌ yuꞌu̱,
te̱ sa̱a̱ i̱ ña̱ va̱ꞌa̱ te̱ na̱ti̱i̱n i̱ kivi̱ꞌ ñu̱u̱ ña̱ köo̱ꞌ kivi̱ꞌ ndiꞌiꞌ sa̱a̱ u̱nꞌ.