Yoꞌoꞌ kaꞌán a̱ xaꞌa̱ꞌ ña̱ kuní a̱ ta̱xi̱ e̱ꞌ ña̱ tyi̱nda̱ni Ndiosí xaꞌa̱ꞌ a̱ ña̱ ni̱ tyi̱ndi̱e̱eꞌ a̱ yooꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí.
138
Tákuiꞌe Yahvé,
xakaꞌnuꞌ i̱ yoꞌó xiinꞌ i̱i̱n ka̱niiꞌ nimá i̱.
Nuu̱ꞌ sa̱kuuꞌ ángele ña̱ ndieeꞌ ndi̱viꞌ xakaꞌnuꞌ i̱ yoꞌó.
2 Kuni i̱ ku̱i̱i̱n xitiꞌ i̱ ko̱to̱ꞌni̱ i̱ ni̱ ku̱nda̱ku miiꞌ iinꞌ yu̱kunꞌ su̱ꞌu̱n ña̱ nduuꞌ kuenta u̱nꞌ,
te̱ sa̱kaꞌnuꞌ i̱ yoꞌó xaꞌa̱ꞌ a̱ ña̱ ndani̱ u̱nꞌ yuꞌu̱ xiinꞌ xaꞌa̱ꞌ a̱ ña̱ xatyuunꞌ nda̱ku u̱nꞌ.
Sa̱kanꞌ ña̱ ña̱ kaꞌnuꞌ ka̱ nduuꞌ sa̱kuuꞌ tu̱ꞌu̱n yu̱ꞌuꞌ u̱nꞌ xiinꞌ ña̱ ndi̱e̱eꞌ u̱nꞌ,
te̱ sa̱kanꞌ sa̱kuuꞌ ña̱ꞌa̱ ña̱ yoo.
3 Te̱ kii̱ꞌ ni̱ kaꞌa̱n tiꞌeꞌ i̱ si̱u̱ꞌunꞌ xiinꞌ u̱nꞌ ndii,
ni̱ na̱ku̱i̱i̱n u̱nꞌ,
te̱ ni̱ ta̱xi̱ tu̱ u̱nꞌ ña̱ ndi̱e̱eꞌ i̱,
te̱ ni̱ xa̱ndi̱e̱ni u̱nꞌ yuꞌu̱.
4 Tákuiꞌe Yahvé,
sa̱kuuꞌ rey,
te̱ yoo nuu̱ꞌ ñu̱ꞌuꞌ i̱i̱n yivi̱ꞌ,
sa̱kaꞌnuꞌ yoꞌó,
sa̱kanꞌ ña̱ ku̱ni̱ so̱ꞌo̱ ra̱ tu̱ꞌu̱n yu̱ꞌuꞌ u̱nꞌ.
5 Te̱ ka̱ta̱ ra̱ ya̱a̱ ña̱ kaꞌán xaꞌa̱ꞌ sa̱kuuꞌ tyu̱u̱n kaꞌnuꞌ ña̱ xaaꞌ yoꞌó,
Yahvé,
sa̱kanꞌ ña̱ ña̱ kaꞌnuꞌ xa̱va̱ꞌa̱ nduuꞌ sa̱kuuꞌ ña̱ nda̱tu̱nꞌ yoꞌó,
Yahvé.
6 Tee̱ꞌ ndee ña̱ kaꞌnuꞌ xa̱va̱ꞌa̱ nduuꞌ Yahvé ndii,
tyindieeꞌ a̱ ne̱ ndaꞌvi kuuꞌ,
ndisu̱ ne̱ ñuñuꞌ ndii,
xikaꞌ yoo a̱ nuu̱ꞌ ni̱a̱.
7 Tee̱ꞌ ndee ko̱o̱ kuaꞌa̱ꞌ va̱ tu̱ndoꞌo̱ꞌ nuu̱ꞌ i̱ ndii,
yoꞌó nduuꞌ ña̱ tyi̱ndi̱e̱eꞌ yuꞌu̱,
te̱ yoꞌó tu̱ nduuꞌ ña̱ ko̱to̱ yuꞌu̱ kii̱ꞌ xiꞌé te̱ ndasiꞌ taꞌanꞌ xiinꞌ i̱ xini ra̱ yuꞌu̱,
te̱ kä̱ꞌni̱ꞌ ra̱ yuꞌu̱.
Te̱ xiinꞌ ña̱ ndi̱e̱eꞌ u̱nꞌ sa̱kakú u̱nꞌ yuꞌu̱.
8 Yahvé,
sa̱xinú yoꞌó ña̱ ni̱ tyi̱tuní u̱nꞌ sa̱a̱ u̱nꞌ xiinꞌ i̱,
sa̱kanꞌ ña̱ köo̱ꞌ kivi̱ꞌ ndiꞌiꞌ ña̱ kuvita i̱ni̱ u̱nꞌ xaꞌa̱ꞌ i̱,
te̱ su̱vi̱ u̱nꞌ nduuꞌ tu̱ ña̱ ni̱ xa̱ꞌa̱ yuꞌu̱,
sa̱kanꞌ na kuiiꞌ sa̱a̱ u̱nꞌ ña̱ va̱ꞌa̱,
te̱ nä̱ko̱o̱ u̱nꞌ yuꞌu̱.