Yoꞌoꞌ kaꞌán a̱ xaꞌa̱ꞌ ña̱ ni̱ ku̱su̱tyiꞌ va̱ i̱ni̱ ne̱ ni̱ xi̱kuꞌu̱n nda̱ꞌaꞌ te̱ xíinꞌ te̱ kuaꞌa̱n ni̱a̱ nuu̱ꞌ ñu̱ꞌuꞌ Babilonia
137
Kii̱ꞌ ni̱ ndiee̱ e̱ꞌ nuu̱ꞌ Babilonia ndii,
kiꞌinꞌ va̱ i̱tyiꞌ ni̱ xi̱ku̱ndiee̱ e̱ꞌ yu̱ꞌuꞌ sa̱kuuꞌ i̱ti̱a̱ ña̱ yoo nuu̱ꞌ ñu̱ꞌuꞌ ja̱a̱nꞌ,
te̱ ni̱ xa̱ku̱ va̱ e̱ꞌ kii̱ꞌ ni̱ na̱ka̱ꞌanꞌ e̱ꞌ xaꞌa̱ꞌ ñu̱u̱ Jerusalén.
2 Te̱ nda̱ꞌaꞌ tunꞌ i̱ñu̱ꞌ yivi̱ꞌ,
tunꞌ yoo yu̱ꞌuꞌ i̱ti̱a̱ ja̱a̱nꞌ,
ni̱ ka̱ta̱xkoꞌ e̱ꞌ ñuu̱ꞌ ña̱ naniꞌ arpa,
ña̱ xandaaꞌ e̱ꞌ.
3 Te̱ ni̱ kaꞌa̱n te̱ yivi̱ꞌ,
te̱ ni̱ xi̱kuꞌu̱n e̱ꞌ nda̱ꞌaꞌ ja̱a̱nꞌ xiinꞌ e̱ꞌ ña̱ ka̱ta̱ e̱ꞌ nuu̱ꞌ ra̱,
ni̱ kaꞌa̱n te̱ sa̱ndoꞌoꞌ yooꞌ ja̱a̱nꞌ xiinꞌ e̱ꞌ ña̱ ka̱ta̱ sii̱ꞌ e̱ꞌ nuu̱ꞌ ra̱,
kaꞌán ra̱ ndii:
“Ka̱ta̱ ndo̱ꞌ i̱i̱n ya̱a̱ ña̱ kaꞌán xaꞌa̱ꞌ ñu̱u̱ Jerusalén nuu̱ꞌ ndu̱”,
ni̱ katyi̱ ra̱.
4 Köo̱ꞌ kivi̱ꞌ ka̱ta̱ e̱ꞌ ya̱a̱ ña̱ kaꞌán xaꞌa̱ꞌ Yahvé
kii̱ꞌ ndieeꞌ e̱ꞌ nuu̱ꞌ ñu̱ꞌuꞌ miiꞌ ndieeꞌ ne̱ tukuꞌ.
5 Ñu̱u̱ Jerusalén kuaꞌa,
naaꞌ na̱ndoso̱ꞌ i̱ xaꞌa̱ꞌ u̱nꞌ naá kivi̱ꞌ ndii,
na ku̱u̱ i̱tunꞌ nda̱ꞌaꞌ ku̱a̱ꞌa̱ i̱ te̱ kü̱vi̱ ka̱ sa̱ndaaꞌ i̱ ñuu̱ꞌ arpa.
6 Ñu̱u̱ Jerusalén,
naaꞌ na̱ndoso̱ꞌ i̱ xaꞌa̱ꞌ u̱nꞌ,
uun naaꞌ va̱ꞌa̱ kuni i̱ tee̱ꞌ ndee xikaꞌ ndoo̱ u̱nꞌ te̱ ku̱nduꞌu̱ꞌ i̱ ndii,
na tii̱n ndi̱a̱a̱ yaa̱ꞌ i̱ nuu̱ꞌ ndiaꞌva̱ i̱.
7 Tákuiꞌe Yahvé,
na̱ka̱ꞌanꞌ u̱nꞌ ña̱ ni̱ xa̱a̱ ne̱ vi̱ꞌe̱ Edom
kii̱ꞌ ni̱ ko̱ꞌni̱ te̱ xíinꞌ,
te̱ ndieeꞌ ñu̱ꞌuꞌ Babilonia,
ñu̱u̱ Jerusalén,
kaꞌán tiꞌeꞌ ra̱ ndii:
“Sa̱nduxín ndo̱ꞌ ka̱niiꞌ ñu̱u̱,
te̱ sa̱kuatyiꞌ xiꞌe̱ ndo̱ꞌ ka̱niiꞌ nde̱e̱ xaꞌa̱ꞌ a̱”,
ni̱ katyi̱ ra̱.
8 Ndaꞌvi va̱ ku̱ndo̱ꞌo̱ sa̱kuuꞌ ndoꞌó,
ne̱ ndieeꞌ ñu̱u̱ Babilonia,
sa̱kanꞌ ña̱ sa̱nduxín xa̱tyiꞌ te̱ yivi̱ꞌ ñu̱u̱ ndo̱ꞌ,
va̱ꞌa̱ va̱ ku̱ni̱ te̱ yivi̱ꞌ,
te̱ na̱tyaꞌvi̱ ndoꞌó
xaꞌa̱ꞌ sa̱kuuꞌ ña̱ ni̱a̱ꞌa,
ña̱ ni̱ xa̱a̱ ndo̱ꞌ xiinꞌ ndu̱.
9 Va̱ꞌa̱ va̱ ku̱ni̱ te̱ yivi̱ꞌ,
te̱ ki̱ꞌi̱n sa̱kuuꞌ siꞌe̱ ndo̱ꞌ,
te̱ su̱ku̱ꞌ ña̱ꞌaꞌ ra̱ xata̱ꞌ ka̱va̱ꞌ.