Yoꞌoꞌ kaꞌán a̱ xaꞌa̱ꞌ a̱ ña̱ sañuꞌuꞌ va̱ Ndiosí yoo kii̱ꞌ ndieeꞌ ti̱ꞌvi̱ e̱ꞌ xiinꞌ ne̱ taꞌanꞌ e̱ꞌ, ne̱ xikaꞌ i̱tyiꞌ Ndiosí xiinꞌ e̱ꞌ
Ya̱a̱ ña̱ ni̱ xi̱ta̱ David nuu̱ꞌ Ndiosí, te̱ ni̱ xi̱ta̱ tu̱ ne̱ yivi̱ꞌ ya̱a̱ kaa̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
133
Ko̱to̱ ndo̱ꞌ,
va̱ꞌa̱ xa̱va̱ꞌa̱ yooꞌ a̱,
te̱ va̱ꞌa̱ yaꞌa̱ tu̱ kuni e̱ꞌ
kii̱ꞌ nakayá ingaꞌ sa̱kuuꞌ e̱ꞌ xiinꞌ ña̱ni̱ taꞌanꞌ e̱ꞌ,
te̱ ndieeꞌ ti̱ꞌvi̱ e̱ꞌ.
2 Kii̱ꞌ xaaꞌ e̱ꞌ sa̱kanꞌ ndii,
nduuꞌ a̱ nde̱e̱ naa xa̱ꞌa̱n xavixínꞌ ñuꞌuꞌ ña̱ xikavá xíniꞌ sutu̱,
xa̱ꞌa̱n xavixínꞌ ña̱ ni̱ xi̱kava̱ xíniꞌ sutu̱ Aarón kii̱ꞌ ni̱ ku̱ñuꞌuꞌ ra̱.
Xa̱ꞌa̱n ja̱a̱nꞌ kii̱ꞌ ni̱ xi̱kava̱ a̱ xíniꞌ Aarón ja̱a̱nꞌ ndii,
ni̱ na̱kaa̱ꞌ a̱ nde̱e̱ xuꞌu̱ꞌ ra̱,
te̱ ni̱ na̱xinu̱ a̱ nde̱e̱ yu̱ꞌuꞌ toto̱ nani̱ꞌ ña̱ niꞌnuꞌ ra̱.
3 Te̱ nduuꞌ tu̱ a̱ nde̱e̱ naa yuyuꞌ ña̱ kuunꞌ xíniꞌ i̱kuꞌ ña̱ naniꞌ Hermón,
te̱ naxaá yuyuꞌ ja̱a̱nꞌ nde̱e̱ xíniꞌ i̱kuꞌ ña̱ itaꞌ ñu̱u̱ Sión.
Te̱ i̱kanꞌ nduuꞌ miiꞌ sañuꞌuꞌ Ndiosí yooꞌ,
taxiꞌ a̱ kivi̱ꞌ ñu̱u̱ e̱ꞌ ña̱ köo̱ꞌ kivi̱ꞌ ndiꞌiꞌ.