Yoꞌoꞌ kaꞌán ndaꞌvi ne̱ yivi̱ꞌ nuu̱ꞌ Ndiosí te̱ sa̱ñuꞌuꞌ a̱ yu̱kunꞌ kaꞌnuꞌ
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
132
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ na̱ka̱ꞌanꞌ u̱nꞌ xaꞌa̱ꞌ David,
te̱ na̱ka̱ꞌanꞌ tu̱ u̱nꞌ xaꞌa̱ꞌ sa̱kuuꞌ ña̱ ndoꞌoꞌ ra̱.
2 Sa̱kanꞌ ña̱ ni̱ ta̱xi̱ ra̱ kuento ra̱ nuu̱ꞌ yoꞌó,
Yahvé Ndiosí,
kii̱ꞌ ni̱ tyi̱ka̱ndi̱a̱ ra̱ kuento ra̱ nuu̱ꞌ yoꞌó,
ña̱ ndi̱e̱eꞌ kooꞌ tyukuuꞌ,
ña̱ xa̱kaꞌnuꞌ ne̱ vi̱ꞌe̱ Jacob,
kaꞌán ra̱ ndii:
3 “Küꞌu̱n i̱ vi̱ꞌe̱ i̱ kusu̱n i̱,
ni̱ nde̱e̱ nä̱ka̱nduꞌu̱ꞌ tu̱ i̱ nuu̱ꞌ tunꞌ xi̱to̱ i̱ te̱ na̱ndiee̱ꞌ i̱,
4 ni̱ nde̱e̱ tä̱xi̱ tu̱ i̱ ka̱nandoo ma̱ꞌna yuꞌu̱ te̱ kusu̱n ndi̱tyi̱ i̱,
ni̱ nde̱e̱ tä̱xi̱ tu̱ i̱ nda̱si̱ ndu̱tyiꞌ nuu̱ꞌ i̱ sa̱a̱ ma̱ꞌna ña̱ kuni kusu̱n va̱ i̱,
5 nde̱e̱ ska̱tyiꞌ niꞌi̱ꞌ i̱ ñu̱ꞌuꞌ miiꞌ ka̱sa̱ꞌa̱ i̱ i̱i̱n vi̱ꞌe̱ miiꞌ sa̱kaꞌnuꞌ e̱ꞌ Yahvé,
miiꞌ ka̱sa̱ꞌa̱ i̱ yu̱kunꞌ,
te̱ sa̱kaꞌnuꞌ e̱ꞌ Ndiosí,
ña̱ ndi̱e̱eꞌ kooꞌ tyukuuꞌ,
ña̱ xa̱kaꞌnuꞌ yooꞌ,
ne̱ vi̱ꞌe̱ Jacob”,
ni̱ katyi̱ ra̱.
6 Ni̱ xi̱ni̱ so̱ꞌo̱ ndu̱ ndatuꞌunꞌ ne̱ yivi̱ꞌ ña̱ xatu̱nꞌ miiꞌ naá kuento u̱nꞌ ña̱ ni̱ ta̱xi̱ u̱nꞌ nda̱ꞌaꞌ Moisés ndii,
ñu̱u̱ Efrata iinꞌ nu̱ꞌ,
te̱ ni̱ xaꞌa̱n ku̱ni̱ ndu̱ iinꞌ nu̱ꞌ nde̱e̱ xaꞌa̱ꞌ kuꞌu̱ xi̱xa̱ va̱ nuu̱ꞌ ñu̱ꞌuꞌ Jaar.
7 Sa̱kanꞌ te̱ ni̱ kaꞌa̱n xiinꞌ taꞌanꞌ ndu̱ ndii:
“Toꞌo̱ꞌ kiꞌi̱ꞌ ndo̱ꞌ te̱ ko̱ꞌni̱ e̱ꞌ yu̱kunꞌ Ndiosí,
te̱ ku̱i̱ta̱ xitiꞌ e̱ꞌ nuu̱ꞌ a̱ te̱ sa̱kaꞌnuꞌ ña̱ꞌaꞌ e̱ꞌ”,
ni̱ katyi̱ ndu̱.
8 Ndo̱ndi̱tyi̱ kiꞌi̱ꞌ,
Tákuiꞌe Yahvé,
te̱ xkaꞌndi̱a̱ u̱nꞌ vi̱ꞌe̱ miiꞌ na̱ndiee̱ꞌ u̱nꞌ,
te̱ ndiꞌvi̱ tu̱ xatu̱nꞌ miiꞌ naá kuento u̱nꞌ ña̱ niaꞌá ña̱ ndi̱e̱eꞌ u̱nꞌ te̱i̱n ndu̱.
9 Na sa̱tyuunꞌ nda̱ku sa̱kuuꞌ sutu̱,
te̱ xikaꞌ nuuꞌ nuu̱ꞌ u̱nꞌ,
te̱ ku̱ndu̱u̱ ña̱ ja̱a̱nꞌ nde̱e̱ naa toto̱ niꞌnuꞌ ra̱,
te̱ na ka̱ta̱ sii̱ꞌ sa̱kuuꞌ te̱ nduuꞌ kuenta u̱nꞌ,
te̱ xikaꞌ nuuꞌ va̱ꞌa̱ nuu̱ꞌ u̱nꞌ.
10 Te̱ xaꞌa̱ꞌ a̱ ña̱ ndani̱ u̱nꞌ David,
te̱ ni̱ xika̱ nu̱u̱ nuu̱ꞌ u̱nꞌ ndii,
sa̱a̱ u̱nꞌ ña̱ va̱ꞌa̱ te̱ sä̱xi̱o̱o̱ u̱nꞌ rey,
te̱ ni̱ na̱ka̱xi̱n u̱nꞌ.
11 Ni̱ ta̱xi̱ Yahvé kuento a̱ nuu̱ꞌ David,
te̱ köo̱ꞌ kivi̱ꞌ na̱ma̱ a̱ kuento ña̱ ni̱ ta̱xi̱ a̱ ja̱a̱nꞌ,
kaꞌán a̱ xiinꞌ ra̱ ndii:
“I̱i̱n si̱a̱niꞌ xikaꞌ u̱nꞌ ku̱nduꞌu̱ꞌ nuu̱ꞌ tei̱ kaꞌnuꞌ miiꞌ ni̱ nduꞌu̱ꞌ u̱nꞌ xaꞌndia tyuunꞌ u̱nꞌ,
te̱ ku̱ndu̱u̱ ra̱ rey sa̱a̱ i̱.
12 Naaꞌ sa̱xinú siꞌe̱ u̱nꞌ sa̱kuuꞌ kuento ña̱ ndoo̱ i̱ xiinꞌ ra̱ xiinꞌ nde̱iꞌ ña̱ kaꞌán tyuunꞌ i̱ nuu̱ꞌ ra̱,
te̱ sa̱kanꞌ tu̱ sa̱a̱ sa̱kuuꞌ si̱a̱niꞌ xikaꞌ te̱ ja̱a̱nꞌ ndii,
ku̱ndi̱e̱e̱ ra̱ nuu̱ꞌ tei̱ kaꞌnuꞌ nde̱e̱ ndiꞌiꞌ ni̱ kivi̱ꞌ sa̱a̱ i̱ miiꞌ ni̱ nduꞌu̱ꞌ u̱nꞌ xaꞌndia tyuunꞌ u̱nꞌ,
te̱ ku̱ndu̱u̱ ra̱ rey”,
ni̱ katyi̱ a̱.
13 Sa̱kanꞌ ña̱ ñu̱u̱ Jerusalén ni̱ na̱ka̱xi̱n Yahvé ku̱i̱i̱n yu̱kunꞌ a̱,
i̱kanꞌ ni̱ kaꞌa̱n nimá a̱ ku̱nduꞌu̱ꞌ a̱,
14 kaꞌán a̱ ndii:
“Yoꞌoꞌ ku̱ndu̱u̱ miiꞌ na̱ndiee̱ꞌ i̱ nde̱e̱ ndiꞌiꞌ ni̱ kivi̱ꞌ,
te̱ yoꞌoꞌ ku̱nduꞌu̱ꞌ i̱,
sa̱kanꞌ ña̱ yoꞌoꞌ nduuꞌ miiꞌ ni̱ xta̱ni̱ va̱ i̱ ku̱i̱i̱n vi̱ꞌe̱ i̱.
15 Sa̱ñuꞌuꞌ i̱ sa̱kuuꞌ ña̱ xaxi̱ꞌ ne̱ ndieeꞌ ñu̱u̱ yoꞌoꞌ,
te̱ ta̱xi̱ i̱ kuaꞌa̱ꞌ ña̱ ka̱xi̱ꞌ sa̱kuuꞌ ne̱ ndaꞌvi kuuꞌ ndieeꞌ ñu̱u̱ yoꞌoꞌ.
16 Te̱ sa̱kanꞌ tu̱ sa̱na̱kuiꞌnú i̱ sa̱kuuꞌ sutu̱ ña̱ sakakú ña̱ꞌaꞌ i̱,
te̱ na ka̱ta̱ sii̱ꞌ sa̱kuuꞌ te̱ yivi̱ꞌ,
te̱ su̱ꞌu̱n xikaꞌ nuuꞌ va̱ꞌa̱ nuu̱ꞌ ra̱.
17 Ñu̱u̱ yoꞌoꞌ sa̱kuaꞌa̱ꞌ ka̱ i̱ ña̱ ndi̱e̱eꞌ David,
sa̱kanꞌ ña̱ te̱ ja̱a̱nꞌ ni̱ na̱ka̱xi̱n i̱ ku̱ndu̱u̱ rey,
te̱ ku̱ndu̱u̱ ra̱ nde̱e̱ naa ñuꞌu̱ ña̱ ko̱tuu̱n nuu̱ꞌ ne̱ nduuꞌ kuenta i̱.
18 Te̱ sa̱kuuꞌ te̱ ndasiꞌ taꞌanꞌ xiinꞌ ra̱ ndii,
sa̱kaꞌanꞌ xa̱va̱ꞌa̱ ña̱ꞌaꞌ i̱,
ndisu̱ rey ja̱a̱nꞌ ndii,
sa̱kaꞌnuꞌ xa̱va̱ꞌa̱ ña̱ꞌaꞌ i̱”,
ni̱ katyi̱ a̱.