Yoꞌoꞌ kaꞌán a̱ ña̱ Ndiosí ku̱i̱ti̱ꞌ ku̱ndi̱a̱tu̱ i̱ni̱ e̱ꞌ tya̱ꞌvi̱ xaꞌa̱ꞌ ku̱a̱tyi̱ e̱ꞌ
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
130
Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán ndaꞌvi i̱ xiinꞌ u̱nꞌ,
sa̱kanꞌ ña̱ ndiꞌni̱ xa̱va̱ꞌa̱ nimá i̱ xaꞌa̱ꞌ ña̱ ndoꞌoꞌ i̱.
2 Tákuiꞌe,
sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ ña̱ kaꞌán ndaꞌvi i̱ xiinꞌ u̱nꞌ,
te̱ tyu̱u̱n xaꞌanꞌ u̱nꞌ kuuꞌ si̱u̱ꞌunꞌ ña̱ kaꞌán i̱ xiinꞌ u̱nꞌ.
3 Tákuiꞌe Yahvé,
naaꞌ sa̱kanꞌ te̱ na̱tava̱ꞌ yoꞌó kuenta xaꞌa̱ꞌ sa̱kuuꞌ ku̱a̱tyi̱ ndu̱ ndii,
köo̱ꞌ nde̱e̱ i̱i̱n ndu̱ ku̱vi̱ ku̱ya̱ti̱n nuu̱ꞌ u̱nꞌ,
te̱ kü̱vi̱ ndu̱.
4 Ndisu̱ yoo kaꞌnuꞌ i̱ni̱ yoꞌó xaꞌa̱ꞌ ku̱a̱tyi̱ ndu̱,
sa̱kanꞌ na kuiiꞌ kuní a̱ ña̱ ku̱yi̱ꞌvi ndu̱ yoꞌó.
5 Yuꞌu̱ ndii,
i̱ni̱ i̱ xini i̱ Yahvé,
te̱ ña̱ ja̱a̱nꞌ ndiatuꞌ i̱ni̱ i̱ sa̱kakú yuꞌu̱,
te̱ i̱ni̱ tu̱ i̱ xini i̱ ña̱ kaꞌán kuento a̱.
6 Ndi̱e̱eꞌ va̱ ndiatuꞌ i̱ ki̱xi̱n Yahvé te̱ sa̱kakú a̱ yuꞌu̱,
ndi̱e̱eꞌ ka̱ ndiatuꞌ ña̱ꞌaꞌ i̱ te̱ sa̱kanꞌ ndiatuꞌ te̱ xíinꞌ xitoꞌ ñu̱u̱ ñu̱u ña̱ kitu̱ꞌ kiꞌi̱ꞌ,
uun ndo̱ꞌ,
ndi̱e̱eꞌ ka̱ ndiatuꞌ ña̱ꞌaꞌ i̱ te̱ sa̱kanꞌ ña̱ ndi̱e̱eꞌ va̱ kaꞌán nimá te̱ xitoꞌ ñu̱u̱ ñu̱u ña̱ kitu̱ꞌ kiꞌi̱ꞌ.
7 Sa̱kanꞌ tu̱ kuní a̱ ku̱ndi̱a̱tu̱ ndoꞌó,
ne̱ taꞌanꞌ i̱,
ne̱ vi̱ꞌe̱ Israel,
Yahvé,
te̱ sa̱kakú a̱ ndoꞌó,
sa̱kanꞌ ña̱ Yahvé ndii,
kuvita i̱ni̱ a̱ xaꞌa̱ꞌ ne̱ yivi̱ꞌ,
te̱ xaꞌa̱ꞌ a̱ ña̱ ndani̱ xa̱va̱ꞌa̱ a̱ yooꞌ ndii,
tya̱ꞌvi̱ ndo̱o̱ a̱ xaꞌa̱ꞌ ku̱a̱tyi̱ e̱ꞌ.
8 Te̱ mi̱iꞌ ña̱ ja̱a̱nꞌ tya̱ꞌvi̱ xaꞌa̱ꞌ sa̱kuuꞌ yooꞌ,
ne̱ vi̱ꞌe̱ Israel,
te̱ sa̱kakú a̱ sa̱kuuꞌ e̱ꞌ nuu̱ꞌ ku̱a̱tyi̱ ña̱ xaaꞌ e̱ꞌ.