Yoꞌoꞌ xikán ne̱ yivi̱ꞌ xaꞌa̱ꞌ ña̱ sa̱ndo̱ñuꞌuꞌ xa̱tyiꞌ Ndiosí te̱ ndasiꞌ taꞌanꞌ xiinꞌ ni̱a̱
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
129
Nde̱e̱ kii̱ꞌ nduuꞌ i̱ te̱ sa̱va̱ vi̱ꞌ,
te̱ ni̱ xa̱ꞌaꞌ sa̱ndoꞌoꞌ kuaꞌa̱ꞌ te̱ ndasiꞌ taꞌanꞌ xiinꞌ i̱ yuꞌu̱.
Kaꞌa̱n sa̱kuuꞌ ndoꞌó,
ne̱ taꞌanꞌ i̱,
ne̱ vi̱ꞌe̱ Israel vi̱ti̱n ndii:
2 “Nde̱e̱ kii̱ꞌ nduuꞌ i̱ te̱ sa̱va̱ vi̱ꞌ,
te̱ ni̱ xa̱ꞌaꞌ sandoꞌoꞌ kuaꞌa̱ꞌ te̱ ndasiꞌ taꞌanꞌ xiinꞌ i̱ yuꞌu̱,
ndisu̱ nï̱ ku̱vi̱ ka̱nandoo ra̱ yuꞌu̱”,
katyi̱ ndo̱ꞌ.
3 Ka̱niiꞌ i̱kiꞌ xata̱ꞌ i̱ ni̱ sa̱tu̱xuꞌví ra̱,
te̱ kaaꞌ a̱ nde̱e̱ naa kaaꞌ nuu̱ꞌ ñu̱ꞌuꞌ miiꞌ xa̱ ni̱ ta̱ꞌviꞌ te̱ yivi̱ꞌ yuku̱n nani̱ꞌ va̱ te̱ tyi̱ꞌi̱ ra̱.
4 Ndisu̱ Tákuiꞌe Yahvé ndii,
ña̱ xatyuunꞌ nda̱ku nduuꞌ a̱,
te̱ xa̱ ni̱ ke̱ndoso̱ꞌ a̱ sa̱kuuꞌ yo̱ꞌoꞌ ña̱ ni̱ sa̱tiín te̱ xaaꞌ ña̱ ni̱a̱ꞌa yuꞌu̱.
5 Na sa̱kaꞌanꞌ Ndiosí sa̱kuuꞌ te̱ ndasiꞌ ñu̱u̱ Jerusalén,
te̱ na ki̱ë̱e̱ va̱ꞌa̱ ra̱ te̱ na̱ndi̱koꞌ kaꞌanꞌ nuu̱ꞌ va̱ ra̱.
6 Te̱ na ku̱ndu̱u̱ ra̱ te̱ kuäsa̱ꞌ kuní xa̱tyiꞌ nde̱e̱ naa kuꞌu̱ ña̱ nakún xata̱ꞌ vi̱ꞌe̱,
ña̱ ityí kiꞌi̱ꞌ va̱ ña̱ kuní ka̱ ku̱i̱xa̱ a̱.
7 Te̱ kuꞌu̱ ja̱a̱nꞌ ndii,
köo̱ꞌ xa̱tyiꞌ ndi̱kinꞌ a̱ na̱ka̱ya̱ ne̱ yivi̱ꞌ,
ne̱ nakaya ña̱ savi̱ꞌ,
te̱ ni̱ nde̱e̱ köo̱ꞌ tu̱ a̱ na̱ka̱ya̱ ne̱ satiín nu̱ꞌni̱ a̱.
8 Ni̱ nde̱e̱ ne̱ xkaꞌndíá kuaꞌa̱n i̱tyiꞌ nï̱ kaꞌa̱n xiinꞌ ne̱ nakaya ña̱ ja̱a̱nꞌ ndii:
“Na sa̱ñuꞌuꞌ na Yahvé ndoꞌó.
Xiinꞌ ña̱ ndi̱e̱eꞌ Yahvé sañuꞌuꞌ ndu̱ ndoꞌó”,
katyi ni̱a̱.