Yoꞌoꞌ kaꞌán a̱ xaꞌa̱ꞌ ña̱ sañuꞌuꞌ va̱ Yahvé ne̱ xitoꞌ kaꞌnuꞌ ña̱ꞌaꞌ
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
128
Sañuꞌuꞌ va̱ Yahvé sa̱kuuꞌ ne̱ xitoꞌ kaꞌnuꞌ ña̱ꞌaꞌ,
te̱ xaaꞌ ni̱a̱ sa̱kuuꞌ ña̱ kuní a̱.
2 Naaꞌ sa̱kanꞌ sa̱a̱ tu̱ yoꞌó ndii,
ka̱xi̱ꞌ mi̱iꞌ u̱nꞌ sa̱kuuꞌ ña̱ tyi̱ꞌi̱ u̱nꞌ,
te̱ va̱ꞌa̱ va̱ ku̱ni̱ u̱nꞌ,
te̱ sa̱ñuꞌuꞌ va̱ tu̱ Ndiosí yoꞌó.
3 Ñaꞌ siꞌi u̱nꞌ ndii,
ku̱ndu̱u̱ aꞌ nde̱e̱ naa yo̱ꞌoꞌ uva ña̱ kuunꞌ kuaꞌa̱ꞌ va̱ uva nda̱ꞌaꞌ sa̱a̱ xinundu̱u̱ vi̱ꞌe̱ u̱nꞌ,
sa̱kanꞌ ña̱ ne̱ kuatyi̱ꞌ siꞌe̱ u̱nꞌ ndii,
ku̱ndu̱u̱ ni̱a̱ nde̱e̱ naa tunꞌ ndokoꞌ oliva sa̱a̱ xinundu̱u̱ xiinꞌ mesa miiꞌ ndieeꞌ ndo̱ꞌ xixiꞌ ndo̱ꞌ.
4 Sa̱kanꞌ sa̱ñuꞌuꞌ Yahvé sa̱kuuꞌ ne̱ yivi̱ꞌ,
ne̱ yiꞌvi ña̱ꞌaꞌ.
5 Na sa̱ñuꞌuꞌ na Yahvé yoꞌó sa̱kuuꞌ kivi̱ꞌ ña̱ xikaꞌ u̱nꞌ i̱i̱n yivi̱ꞌ nde̱e̱ ñu̱u̱ Sión miiꞌ nduꞌu̱ꞌ a̱,
te̱ na ta̱xi̱ a̱ ku̱ni̱ u̱nꞌ ña̱ ko̱o̱ va̱ꞌa̱ ñu̱u̱ Jerusalén sa̱kuuꞌ kivi̱ꞌ ña̱ xikaꞌ u̱nꞌ i̱i̱n yivi̱ꞌ.
6 Te̱ na ta̱xi̱ tu̱ a̱ ku̱ti̱a̱ku̱ u̱nꞌ nde̱e̱ ku̱ni̱ u̱nꞌ ku̱a̱ꞌnu̱ si̱a̱niꞌ u̱nꞌ.
Na ta̱xi̱ Ndiosí ña̱ mani̱ꞌ ko̱o̱ nimá ne̱ ndieeꞌ ñu̱u̱ Jerusalén.