Yoꞌoꞌ kaꞌán a̱ xaꞌa̱ꞌ ña̱ sañuꞌuꞌ Yahvé yooꞌ
Ya̱a̱ ña̱ kuaꞌa̱n nda̱ꞌaꞌ Salomón, te̱ ni̱ xi̱ta̱ tu̱ ne̱ yivi̱ꞌ ya̱a̱ kaa̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
127
Naaꞌ sa̱kanꞌ te̱ tyï̱ndi̱e̱eꞌ Yahvé yooꞌ te̱ ka̱sa̱ꞌa̱ e̱ꞌ vi̱ꞌe̱ e̱ꞌ ndii,
xatyuunꞌ saka e̱ꞌ,
naaꞌ sa̱kanꞌ te̱ kö̱to̱ Yahvé i̱i̱n ñu̱u̱ ndii,
xitoꞌ saka te̱ xíinꞌ ñu̱u̱ ja̱a̱nꞌ.
2 Nde̱e̱ xikoó ni̱ ni̱a̱ꞌa̱ ndokoó ndoꞌó kuaꞌa̱n sa̱tyuunꞌ ndo̱ꞌ,
te̱ xa̱ñu̱u va̱ tu̱ nakundieé ndo̱ꞌ kixín ndo̱ꞌ,
te̱ ndoꞌoꞌ xa̱va̱ꞌa̱ ndo̱ꞌ te̱ niꞌíꞌ ndo̱ꞌ ña̱ xaxi̱ꞌ ndo̱ꞌ,
ndisu̱ ne̱ ndani̱ Ndiosí ndii,
taxiꞌ a̱ ña̱ nandiee̱ꞌ va̱ꞌa̱ ni̱a̱.
3 Sa̱kuuꞌ siꞌe̱ e̱ꞌ ndii,
tu̱mani̱ꞌ ña̱ taxiꞌ Yahvé nda̱ꞌaꞌ e̱ꞌ nduuꞌ ni̱a̱,
te̱ ndani̱ xa̱va̱ꞌa̱ a̱ sa̱kuuꞌ ña̱ kuañuꞌu̱,
ña̱ nakuisoꞌ ña̱ꞌaꞌ,
te̱ sakakuꞌ ni̱a̱ a̱.
4 Tiaa̱ siꞌe̱ e̱ꞌ,
te̱ yoo kii̱ꞌ nduuꞌ e̱ꞌ te̱ sa̱va̱ ndii,
nduuꞌ ra̱ nde̱e̱ naa kuxi̱,
tunꞌ xatia te̱ xíinꞌ,
te̱ tyu̱u̱n va̱ ti̱i̱n ñuꞌu̱.
5 Va̱ꞌa̱ va̱ kuni te̱ yivi̱ꞌ,
te̱ yoo kuaꞌa̱ꞌ va̱ tiaa̱ siꞌe̱,
te̱ nduuꞌ nde̱e̱ naa kuaꞌa̱ꞌ kuxi̱ ja̱a̱nꞌ,
sa̱kanꞌ ña̱ nde̱e̱ i̱i̱n köo̱ꞌ sa̱kaꞌanꞌ nuu̱ꞌ ra̱ kii̱ꞌ ka̱ni̱ taꞌanꞌ ra̱ kuento xiinꞌ te̱ ndasiꞌ taꞌanꞌ xiinꞌ ra̱ yiꞌeꞌ ñu̱u̱ nuu̱ꞌ a̱ miiꞌ ndieeꞌ kuesí,
te̱ xaꞌnú ku̱a̱tyi̱.