Yoꞌoꞌ kaꞌán a̱ xaꞌa̱ꞌ ña̱ ni̱ sa̱kiꞌví Ndiosí ne̱ vi̱ꞌe̱ Israel, te̱ ni̱ ta̱xi̱ a̱ ña̱ va̱ꞌa̱ kuni ni̱a̱
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
126
Kii̱ꞌ sa̱ndoó ndiká Yahvé yooꞌ,
ne̱ vi̱ꞌe̱ Israel,
nda̱ꞌaꞌ ne̱ ñu̱u̱ Babilonia,
te̱ na̱ndi̱koꞌ e̱ꞌ ñu̱u̱ Jerusalén,
te̱ na̱ku̱ndiee̱ va̱ꞌa̱ tu̱ku̱u̱ e̱ꞌ ndii,
ka̱ni̱ni̱ e̱ꞌ ña̱ nduuꞌ e̱ꞌ nde̱e̱ naa ne̱ xáni ku̱i̱ti̱ꞌ.
2 Sa̱kanꞌ na kuiiꞌ kuaku̱ si̱ni xa̱va̱ꞌa̱ e̱ꞌ,
te̱ ka̱ta̱ e̱ꞌ kuaꞌa̱ꞌ va̱ ya̱a̱ nuu̱ꞌ Ndiosí.
Sa̱kanꞌ te̱ kaꞌa̱n ne̱ tukuꞌ ndii:
“Tyu̱u̱n kaꞌnuꞌ va̱ ni̱ xa̱a̱ Yahvé xaꞌa̱ꞌ ne̱ kaa̱ꞌ”,
katyi̱ ni̱a̱.
3 Ña̱ ndi̱xa̱ xna̱ꞌa̱ nduuꞌ a̱ ndii,
tyu̱u̱n kaꞌnuꞌ va̱ ni̱ xa̱a̱ Yahvé xaꞌa̱ꞌ e̱ꞌ,
sa̱kanꞌ na kuiiꞌ va̱ꞌa̱ xa̱va̱ꞌa̱ kuni e̱ꞌ.
4 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ sa̱ndoó ndiká u̱nꞌ ndu̱,
te̱ na̱ku̱ndiee̱ va̱ꞌa̱ tu̱ku̱u̱ ndu̱
nde̱e̱ naa xaaꞌ u̱nꞌ xiinꞌ miiꞌ i̱tyi kaaꞌ,
miiꞌ naniꞌ Neguev,
kii̱ꞌ sakuunꞌ u̱nꞌ savi̱ꞌ te̱ nda̱sa̱ kuii̱ꞌ u̱nꞌ nuu̱ꞌ ñu̱ꞌuꞌ ja̱a̱nꞌ.
5 Te̱ ne̱ xakuꞌ te̱ tyiꞌiꞌ ni̱a̱ ndi̱kinꞌ nuu̱ꞌ ñu̱ꞌuꞌ ja̱a̱nꞌ ndii,
va̱ꞌa̱ va̱ kuni ni̱a̱ kii̱ꞌ na̱ka̱ya̱ ni̱a̱ ña̱ saviꞌ.
6 Xakuꞌ ni̱a̱ kii̱ꞌ xikaꞌ ni̱a̱ tyiꞌiꞌ ni̱a̱ ndi̱kinꞌ,
ndisu̱ kii̱ꞌ na̱ndi̱koꞌ ni̱a̱ na̱ka̱ya̱ ni̱a̱ ña̱ saviꞌ ndii,
xitaꞌ vi̱ꞌ ni̱a̱ kuaꞌa̱n ni̱a̱ xaꞌa̱ꞌ a̱ ña̱ va̱ꞌa̱ va̱ kuni ni̱a̱.