Yoꞌoꞌ kaꞌán a̱ xaꞌa̱ꞌ ña̱ xitoꞌ Ndiosí ne̱ nduuꞌ kuenta a̱
Ya̱a̱ ña̱ ni̱ xi̱ta̱ ne̱ yivi̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
125
Ne̱ i̱ni̱ xini Yahvé ndii,
köo̱ꞌ nde̱e̱ i̱i̱n ne̱ ku̱vi̱ sa̱kanda ña̱ꞌaꞌ,
te̱ nduuꞌ ni̱a̱ nde̱e̱ naa i̱kuꞌ Sión,
sa̱kanꞌ ña̱ i̱kuꞌ ja̱a̱nꞌ ndii,
köo̱ꞌ ku̱vi̱ sakanda a̱,
te̱ i̱i̱n xaanꞌ i̱kanꞌ iinꞌ a̱ nde̱e̱ ndiꞌiꞌ ni̱ kivi̱ꞌ.
2 Nde̱e̱ naa xaaꞌ i̱kuꞌ yoo a̱ sa̱a̱ xinundu̱u̱ xi̱i̱nꞌ ñu̱u̱ Jerusalén ndii,
niiꞌ sa̱kanꞌ tu̱ xaaꞌ Yahvé yoo a̱ sa̱a̱ xinundu̱u̱ xi̱i̱nꞌ ne̱ nduuꞌ kuenta a̱,
te̱ xitoꞌ ña̱ꞌaꞌ a̱ nde̱e̱ vi̱ti̱n te̱ nde̱e̱ ndiꞌiꞌ ni̱ kivi̱ꞌ.
3 Te̱ xaaꞌ ña̱ ni̱a̱ꞌa ndii,
süu̱ꞌ nde̱e̱ ndiꞌiꞌ ni̱ kivi̱ꞌ ka̱ꞌndi̱a̱ tyuunꞌ ra̱ nuu̱ꞌ ñu̱ꞌuꞌ miiꞌ ndieeꞌ ne̱ xatyuunꞌ nda̱ku,
ko̱to̱ ka̱ xa̱ꞌaꞌ tu̱ ne̱ xatyuunꞌ nda̱ku ja̱a̱nꞌ sa̱a̱ ni̱a̱ ña̱ ni̱a̱ꞌa ña̱ xaaꞌ te̱ ja̱a̱nꞌ.
4 Sa̱a̱ u̱nꞌ ña̱ va̱ꞌa̱,
Tákuiꞌe Yahvé,
te̱ tyi̱ndi̱e̱eꞌ u̱nꞌ ne̱ yivi̱ꞌ va̱ꞌa̱.
Tyi̱ndi̱e̱eꞌ u̱nꞌ ne̱ xatyuunꞌ nda̱ku ja̱a̱nꞌ.
5 Ndisu̱ ne̱ kuxiooꞌ nuu̱ꞌ u̱nꞌ te̱ xaaꞌ ni̱a̱ ña̱ ni̱a̱ꞌa ndii,
ta̱va̱ꞌ ña̱ꞌaꞌ u̱nꞌ te̱ ku̱ndo̱ꞌo̱ ni̱a̱ nde̱e̱ naa sa̱ndoꞌoꞌ u̱nꞌ sa̱kuuꞌ ne̱ xaaꞌ ña̱ ni̱a̱ꞌa.
Ndisu̱ na ta̱xi̱ u̱nꞌ ña̱ mani̱ꞌ ko̱o̱ nimá sa̱kuuꞌ ne̱ taꞌanꞌ i̱,
ne̱ vi̱ꞌe̱ Israel.