Yoꞌoꞌ xakaꞌnuꞌ David Ndiosí xaꞌa̱ꞌ a̱ ña̱ ni̱ sa̱kakú ña̱ꞌaꞌ a̱ nda̱ꞌaꞌ te̱ ndasiꞌ taꞌanꞌ xiinꞌ ra̱
Ya̱a̱ ña̱ ni̱ xi̱ta̱ David nuu̱ꞌ Ndiosí, te̱ ni̱ xi̱ta̱ tu̱ ne̱ yivi̱ꞌ ya̱a̱ kaa̱ꞌ kii̱ꞌ kuaꞌa̱n ki̱e̱ndu̱u̱ ni̱a̱ ñu̱u̱ Jerusalén.
124
Naaꞌ sa̱kanꞌ te̱ nï̱ tyi̱ndi̱e̱eꞌ Yahvé yooꞌ,
na kaꞌa̱n sa̱kuuꞌ ndoꞌó,
ne̱ taꞌanꞌ i̱,
ne̱ vi̱ꞌe̱ Israel ndii,
2 naaꞌ sa̱kanꞌ te̱ nï̱ tyi̱ndi̱e̱eꞌ Yahvé yooꞌ kii̱ꞌ ni̱ xika̱ te̱ ndasiꞌ taꞌanꞌ xiinꞌ e̱ꞌ ka̱ꞌni̱ꞌ ra̱ yooꞌ ndii,
3 xa̱ ni̱ xa̱ꞌni̱ꞌ sa̱ni̱ku̱u̱ ra̱ sa̱kuuꞌ e̱ꞌ,
sa̱kanꞌ ña̱ xiꞌé xa̱va̱ꞌa̱ ra̱ xini ra̱ yooꞌ.
4 Xa̱ ndi̱ꞌi̱ e̱ꞌ ni̱ xa̱ꞌni̱ꞌ te̱ ndasiꞌ taꞌanꞌ xiinꞌ e̱ꞌ ja̱a̱nꞌ nde̱e̱ naa xaaꞌ ti̱a̱ñuꞌu̱ꞌ kii̱ꞌ kuunꞌ kuiꞌe̱ savi̱ꞌ te̱ kañuuꞌ raꞌ sa̱kuuꞌ ña̱ꞌa̱,
te̱ xa̱ ndi̱ꞌi̱ e̱ꞌ ni̱ tavi̱ ra̱ nde̱e̱ naa xaaꞌ ti̱kui i̱ti̱a̱ kii̱ꞌ taví raꞌ sa̱kuuꞌ ña̱ꞌa̱.
5 Naaꞌ sa̱kanꞌ ndii,
xa̱ ndi̱ꞌi̱ e̱ꞌ ni̱ xa̱ꞌni̱ꞌ te̱ ndasiꞌ taꞌanꞌ xiinꞌ e̱ꞌ ja̱a̱nꞌ
nde̱e̱ naa xaaꞌ ti̱a̱ñuꞌu̱ꞌ kii̱ꞌ sandoñuꞌuꞌ raꞌ sa̱kuuꞌ ña̱ꞌa̱ miiꞌ xkaꞌndíá raꞌ kii̱ꞌ kuunꞌ kuiꞌe̱ savi̱ꞌ.
6 Na sa̱kaꞌnuꞌ e̱ꞌ Yahvé taxiꞌ e̱ꞌ ña̱ tyi̱nda̱ni a̱,
xaꞌa̱ꞌ a̱ ña̱ nï̱ ta̱xi̱ na a̱ ka̱ꞌni̱ꞌ te̱ xaaꞌ ña̱ ni̱a̱ꞌa ja̱a̱nꞌ yooꞌ te̱ sa̱kuatyiꞌ xiꞌe̱ xa̱tyiꞌ ra̱ yooꞌ xiinꞌ nu̱ꞌu̱ ra̱.
7 Ni̱ kaku̱ na e̱ꞌ nda̱ꞌaꞌ te̱ ndasiꞌ taꞌanꞌ xiinꞌ e̱ꞌ ja̱a̱nꞌ nde̱e̱ naa xaaꞌ sa̱a̱ kakú riꞌ ti̱xi̱n tunꞌ ii̱ꞌ nda̱ꞌaꞌ te̱ sékun riꞌ,
ni̱ tiaꞌndi̱a̱ na ñu̱nu̱ꞌ ña̱ sékun ra̱ yooꞌ,
te̱ ni̱ kaku̱ sa̱kuuꞌ e̱ꞌ nda̱ꞌaꞌ ra̱.
8 Yahvé nduuꞌ ña̱ ni̱ sa̱kakú yooꞌ,
ña̱ ni̱ xa̱ꞌa̱ ndi̱viꞌ xiinꞌ ñu̱ꞌuꞌ i̱i̱n yivi̱ꞌ.